Kapitulo 5

Usa ka Isyu nga Nagalangkit Kanimo

 1. Nganong nakaplagan sa katawhan nga lisud ang pagsabut ngano ang Diyos nagtugot sa pagkadautan taliwala sa katawhan?

BISAN pa sa kumon nga handum alang sa kalinaw ug kasegurohan, ang kasaysayan sa tawo puno sa pag-ulag dugo ug kasakitan. Sanglit ang Bibliya nagapakita nga ang Diyos nagadumot sa maong mga butang, nganong wala niya hunonga kining mga kahimtang una karon? Walay duda nga kini dili tungod sa kakulang sa interes. Ang Bibliya, maingon man ang katahum sa yutan-ong buhat sa kamot sa Diyos, nagahatag sa abunda nga ebidensiya sa iyang gugma ug kabalaka alang sa katawhan. (1 Juan 4:8) Mas importante pa, ang kadungganan sa ngalan sa Diyos nalangkit, sanglit kay kining mga kahimtang nagpahinabo sa katawhan sa pagtamay kaniya. Unsang katarungan ang anaa, kaha, sa pagtugot sa linibo ka tuig sa kaguliyang ug pagkamalapason?

 2. (a) Asa sa Bibliya atong makaplagan ngano ang Diyos nagtugot sa dautang mga kahimtang sa taas nga panahon? (b) Unsa ang nagahimo niini nga tataw nga ang talaan sa Bibliya mahitungod kang Adan ug Eva usa ka kamatuoran sa kasaysayan?

² Ang tubag makaplagan sa unang basahon sa Bibliya mahitungod kang Adan ug Eva. Kini dili sugilambong lamang. Kini kamatuoran sa kasaysayan. Ang Bibliya nagahatag sa kompleto, dokumentado nga rekord sa kagikanan gikan sa unang siglo sa Kumong Panahon balik ngadto sa unang mga tawo. (Lucas 3:23-38; Genesis 5:1-32; 11:10-32) Ingon nga atong unang katigulangan, si Adan ug Eva dunay tinong inpluensiya kanato. Ug kon unsa ang ginasulti sa Bibliya kanato mahitungod kanila magatabang kanato sa pagsabut sa mga sirkumstansiya nga nagaapektar sa atong kinabuhi karon.

 3. Unsang matang sa mga tagana ang gihimo sa Diyos alang sa katawhan sa sinugdanan?

³ Ang Bibliya nagabutyag nga ang tanang mga tagana sa Diyos alang sa unang tawhanong pares maayo kaayo. Anaa kanila ang tanang butang alang sa malipayong kinabuhi​—sama sa parke nga puloy-anan sa Eden, sa dagayang klase sa pagkaon, sa makatagbaw nga bulohaton, sa paglaum sa pagtan-aw sa ilang panimalay nga magdaghan ug magpuno sa yuta, ug sa panalangin sa ilang Maglalalang. (Genesis 1:28, 29; 2:8, 9, 15) Kinsa ang sa rasonable makapangayo ug mas pa?

 4. (a) Sa paglalang kanila, sa unsang mga paagi ang mga tawo lahi sa ubang yutan-ong mga linalang? (b) Sa unsang paagi ang kinahanglanong giya gitagana alang kanila?

⁴ Ang inspiradong rekord sa Genesis nagabutyag nga ang mga tawo nag-okupar sa usa ka uniko o talagsaong kahimtang sa yuta. Dili sama sa mga mananap, sila dunay kasingkasing nga nagpanag-iyag moral nga sentido ug sila gihatagan sa libre nga kabubut-on. Mao kana ngano gisangkapan sila sa mga gahum sa pagpangatarungan ug sa paghukom. Sa paggiya kanila, ang Diyos nagbutang diha sa lalaki ug babaye sa hiyas sa konsiyensiya aron nga, ingon nga mga hingpit nga tawo, ang ilang normal nga inklinasyon mao ang sa maayo. (Roma 2:15) Gawas niining tanan, ang Diyos nagsulti kanila kon ngano nga sila buhi, kon unsa ang ilang buhaton, ug kon kinsa ang nagtagana sa tanang matahum nga butang libut kanila. (Genesis 1:28-30) Sa unsang paagi, nan, atong ikasaysay ang maong dautang mga kahimtang nga nagalungtad karon?

 5. (a) Unsang simple nga kinahanglanon ang gibutang sa Diyos sa unang tawhanong pares, ug alang sa unsang katarungan? (b) Ngano ang ilang paglaum sa kinabuhi alang sa umaabut hustong nalangkit?

⁵ Ang Kasulatanhong rekord nagapakita nga ang usa ka isyu nagbangon​—usa nga nagalangkit sa matag usa kanato karon. Kini mitungha pinaagi sa mga sirkumstansiya nga naugmad wala pa dugay human sa paglalang sa unang tawhanong pares. Ang Diyos naghatag sa lalaki ug babaye sa oportunidad sa pagpasundayag sa mahigugmaong pag-ila sa ilang Maglalalang pinaagi sa pagsugot sa usa ka kinahanglanon. Ang kinahanglanon walay bisan unsang butang nagpasabut nga sila dunay dautan nga mga hilig nga kinahanglan santaon. Hinuon, kini naglangkit sa butang nga sa iyang kaugalingon normal ug husto​—ang pagkaon. Ang Diyos nag-ingon sa tawo: “Gikan sa tagsa ka kahoy sa tanaman mahimong makakaon ka ngadto sa katagbawan. Apan mahitungod sa kahoy sa kahibalo sa maayo ug sa dautan dili ka magkaon niini, kay sa adlaw nga magkaon ka niini positibo nga mamatay ka.” (Genesis 2:16, 17) Kining kinahanglanon wala magakuha sa unang pares sa bisan unsang butang kinahanglanon alang sa kinabuhi. Makakaon man sila sa tanan ubang mga kahoy sa tanaman. Apan ang ilang paglaum sa kinabuhi alang sa umaabut tinong nalangkit, ug nagakaigo. Ngano? Tungod kay ang Usa kinsa nangayog pagkamasinundanon mao ang mismong Tuboran ug Tagsustento sa kinabuhi sa tawo.

 6. (a) Ang atong unang mga ginikanan mahimong magkinabuhi unta sa walay katapusan kon sila naglihok harmonya sa unsang sukaranang kamatuoran mahitungod sa pagmando? (b) Nganong sila mapalihok sa pagsugot sa Diyos?

⁶ Ang katuyoan sa Diyos dili alang sa mga tawo nga mamatay. Walay gihisgutang kamatayon ngadto kang Adan ug Eva gawas sa silot sa pagsupak. Anaa sa atubangan sa atong unang mga ginikanan ang paglaum sa pagkinabuhi sa walay katapusan sa ilang malinawon, samag parke nga puloy-anan. Sa pagbaton niini, unsa ang gikinahanglan kanila? Pinaagi gayod sa pag-ila nga ang yuta diin sila nagkinabuhi iya sa Usa kinsa naghimo niini, ug nga, ingon nga Maglalalang, ang Diyos mao ang makatarunganong may awtoridad ibabaw sa iyang linalang. (Salmo 24:1, 10) Walay duda kining Usa, kinsa naghatag sa tawo sa tanang butang nga iyang gikinahanglan, lakip ang kinabuhi mismo, takus sa pagsugot sa bisan unsang kinahanglanon nga mahimong ipatuman kanila. Bisan pa, dili niya buot nga ang pagsugot ginapugos. Hinunoa, kinahanglan kanang magsumikad sa mahinangpong mga kasingkasing, nga gipalihok sa gugma. (1 Juan 5:3) Apan ang atong unang tawhanong mga ginikanan napakyas sa pagpakita sa maong gugma. Sa unsang paagi nahitabo kini?

Ang Sinugdanan sa Pagsukol sa Langitnong Pagmando

 7. (a) Sumala sa Bibliya, asa ang pagsukol sa pagmando sa Diyos nagsugod? (b) Nganong rasonable ang pagtuo sa espirituhanong dapit?

⁷ Ang Bibliya nagapakita nga ang pagsukol sa pagmando sa Diyos unang nagsugod, dili sa yuta, apan sa dapit nga dili makita sa tawhanong mga mata. Kita ba, sama sa daghan, magaduda sa paglungtad sa maong dapit tungod kay yanong wala kita makakita? Buweno, ang gravity dili makita, mao man ang hangin. Apan makita ang ilang mga epekto. Mao man, usab, ang mga epekto sa dili makitang dapit maobserbahan. Bisan tuod ang “Diyos usa ka Espiritu,” ang iyang mga buhat sa paglalang makita sa tanan natong palibut. Kon kita nagatuo kaniya, obligado kita sa pagtuo sa usa ka espirituhanong dapit. (Juan 4:24; Roma 1:20) Apan aduna bay laing nagapuyo nianang dapit?

 8. Unsang matang sa mga persona ang mga anghel?

⁸ Sumala sa Bibliya, minilyon sa espirituhanong mga persona, ang mga anghel, naglungtad una pa sa tawo. (Job 38:4, 7; Salmo 103:20; Daniel 7:10) Tanan kini sila gilalang nga hingpit, walay dautang mga hilig. Apan, sama sa ulahing gilalang sa Diyos, ang tawo, sila gihatagan sa libre nga kabubut-on. Busa makahimo sila sa pagpili sa kurso sa pagkamatinumanon kon dili pagkamatinumanon sa Diyos.

9, 10. (a) Sa unsang paagi posible alang sa usa ka hingpit nga linalang nga dunay inklinasyon sa pagbuhat ug sayup? (b) Busa, sa unsang paagi ang usa sa mga anghel nahimong Satanas?

⁹ Apan ang pangutana nga gisukot sa daghan mao: Sa unsang paagi, ingon nga hingpit nga mga linalang, ang bisan usa kanila maghimog sayup? Buweno, kapila sa atong kaugalingong kinabuhi nga ang mga sirkumstansiya motungha nga magpaatubang kanato sa nagkalainlaing posibilidad​—ang uban maayo, ang uban dautan? Nga kita duna sa intelihensiya sa pagsabut sa dautang mga posibilidad wala sa awtomatiko maghimo kanatong dautan, mao ba? Ang matuod nga pangutana mao: Sa unsang kurso atong itumong ang atong hunahuna ug kasingkasing? Kon puntingon ta ang daotang mga hunahuna, kita madaldal sa pag-ugmad sa sayup nga tinguha sa atong kasingkasing. Ang maong tinguha magapalihok kanato sa kaulahian sa paghimo sa sayup. Kining makadaot nga liyok gipatin-aw sa tagsulat sa Bibliya nga si Santiago: “Ang tagsa tintalon pinaagi sa pagdaldal ug paghaylo sa iyang kaugalingong tinguha. Unya ang tinguha, kon kini makapanamkon na, magapahimugso sa sala; unya, ang sala, kon mahimo na, nagadala sa kamatayon.”​—Santiago 1:14, 15.

¹⁰ Ang mga Kasulatan nagabutyag kini nahitabo ngadto sa usa sa espirituhanong mga anak sa Diyos. Siya gidaldal sa iyang kaugalingong mga pangibog. Iyang nakita ang mga posibilidad diha sa tawhanong linalang sa Diyos. Sila ba mahimong magpasakup kaniya inay kay sa Diyos? Dayag na lamang nga siya nagsugod sa pagpangandoy ug bahin sa pagsimba nga gihatag sa Diyos. (Lucas 4:5-8) Naglihok sumala sa iyang tinguha, siya nahimong magsusukol sa Diyos. Alang nianang katarungan siya gihisgutan sa Bibliya nga Satanas, nga nagakahulogan Magsusukol.​—Job 1:6.

11. Unsang lig-ong sukaranan ang anaa sa pagtuo nga si Satanas matuod nga nagalungtad?

¹¹ Niining materyalistiko ika-20 ka siglo, ang pagtuo sa maong espirituhanong persona sama kang Satanas dili popular. Apan, usab, ang popular nga panghunahuna nahimo ba gayong seguradong giya ngadto sa kamatuoran? Taliwala niadtong kinsa nagtuon sa balatian, makausa kini dili popular ang pagtuo nga ang dili makitang mga kagaw usa ka hinungdan, apan karon ang ilang inpluensiya ilado na kaayo. Piho, diay, nga ang pagkadi-popular sa usa ka butang wala magkahulogan nga kana isalikway na. Si Jesu-Kristo mismo naggikan sa espirituhanong dapit ug busa makasulti nga may awtoridad sa kinabuhi didto. Siya tinong nagpaila kang Satanas ingon nga usa ka daotang espirituhanong persona. (Juan 8:23; Lucas 13:16; 22:31) Pinaagi lamang sa pagdawat sa paglungtad niining espirituhanong kaaway nga kita makasabut kon sa unsang paagi ang maong dautang mga kahimtang nagsugod niining yuta.

12. Sa unsang paagi si Satanas nakigsulti sa babaye si Eva, ug ngano nianang paagi?

¹² Ang inspiradong rekord, sa Genesis kapitulo 3, nagahubit sa unsang paagi si Satanas nagpadayon sa pagtagbaw sa iyang sayup nga tinguha. Sa tanaman sa Eden siya nagduol sa babaye si Eva sa paagi nga takuban aron siya dili gayod mailhan. Siya naggamit sa usa ka mananap nga kumong makita sa tawhanong pares​—ang bitin. Dayag nga nagagamit sa atong gitawag nga ventriloquismo, gipahinabo niya nga ang iyang mga pulong daw naggula gikan niining linalang. Ang natural mabinantayong paagi niini haum kaayo uban sa impresyon nga buot ni Satanas himuon.​—Genesis 3:1; Pinadayag 12:9.

13. Unsa ang giingon ni Satanas kang Eva, ug uban sa unsang dayag nga katuyoan?

¹³ Inay sa laktud nga pagsulti sa babaye sa pagtutok kaniya ingon nga iyang magmamando, si Satanas unang nanlimbasog sa pagtanum sa duda sa iyang hunahuna, sa pagpangutana: “Nag-ingon ba diay ang Diyos nga dili kamo makakaon sa tanan nga kahoy sa tanaman?” Sa laing pagkasulti, siya nag-ingon: ‘Wala gayoy pulos nga ang Diyos nag-ingon nga dili kamo makakaon sa tanang kahoy sa tanaman.’ Niini siya nagpasabut nga tingali ang Diyos nagatago sa usa ka butang maayo. Si Eva nagtubag pinaagi sa pagkutlo sa pagdili sa Diyos, nga naglakip lamang sa usa ka kahoy, maingon man sa pag-ingon nga ang silot sa pagsupil mao ang kamatayon. Niana, si Satanas nagsulay sa pagpahuyang sa iyang pagtahud sa balaod sa Diyos, nga nag-ingon: “Positibo nga dili kamo mamatay. Kay ang Diyos nahibalo nga sa mismong adlaw sa inyong pagkaon niini ang inyong mga mata magabuka ug kamo mahimong sama sa Diyos, nga nahibalo sa maayo ug sa dautan.” (Genesis 3:1-5) Atubangan sa maong situasyon, unsa kaha ang imong himuon?

14. (a) Nganong si Eva nahulog nga biktima ni Satanas? (b) Unsa ang gibuhat ni Adan?

¹⁴ Si Eva nagtugot sa iyang kaugalingon nga daldalon sa hakug nga tinguha. Siya nagkaon sa gidili sa Diyos. Human niana, ubos sa iyang pag-awhag, ang iyang bana si Adan nagkaon usab. Nagpili siya sa pagdapig kaniya inay kay sa iyang Maglalalang. (Genesis 3:6; 1 Timoteo 2:14) Unsa ang resulta?

15. Busa, unsa ang hinungdan alang sa krimen ug pagkamalapason, maingon man sa balatian ug kamatayon, nga nagtimaan sa tawhanong paglungtad?

¹⁵ Ang entirong tawhanong panimalay nahulog ngadto sa sala ug pagkadili hingpit. Karon si Adan ug Eva dili na makahatag sa ilang kaliwat sa kahingpitan nga wala na kanila. Sama gayod sa paghimog mga kopya gikan sa usa ka sundanan nga may depekto, mao man ang tanang kaliwat ni Adan natawo sa sala, uban sa gipanunod nga hilig ngadto sa pagkahakug. (Genesis 8:21) Kining inklinasyon, kon dili santaon, magatultol ngadto sa kasal-anan sa pagpangawat, paglugos, pagpatay ug sa tanan ubang pagkadautan nga nagkuha sa kalinaw ug kasegurohan gikan sa katawhan. Kining panulondon sa sala mao ang nagresulta usab sa balatian ug kamatayon.​—Roma 5:12.

Ang mga Isyu nga Gibangon

16, 17. (a) Sa pagsabut ngano ang Diyos nagtugot niining situasyon sa taas nga panahon, unsa ang kinahanglang atong ilhon? (b) Unsa sa pagkamatuod ang isyu nga gibangon?

¹⁶ Sa kahayag niining kamatuoran, ang atong mga hunahuna magabalik sa pangutana kon ngano ang Diyos nagtugot niining situasyon, nagtugot niini sa pag-ugmad sa gilapdon na niini. Tungod kini sa mabug-at nga isyu nga gibangon ug sa epekto niini sa entirong uniberso. Sa unsang paagi kana?

¹⁷ Pinaagi sa iyang argumento nga ang balaod sa Diyos ngadto kang Adan ug Eva dili maayo alang kanila ug pinaagi sa paghagit sa giingon sa Diyos nga resulta sa pagsupak, si Satanas nagduda sa pagmando sa Diyos. Wala, siya wala magaduda sa kamatuoran nga ang Diyos magmamando. Hinuon, ang isyu nga gibangon ni Satanas nasentro sa pagkahusto sa pagmando ni Jehova, sa Iyang pagkasoberano, ug sa pagkamatarung sa Iyang mga dalan. Sa malimbongon, si Satanas nag-ergo nga ang mga tawo mas maayo pa pinaagi sa paglihok nga independiente, sa paghimo sa ilang kaugalingong mga desisyon inay kay sa pagpasakup sa direksiyon sa Diyos. (Genesis 3:4, 5) Hinuon, sa pagbuhat niana, sila nagasunod sa pagpanguna sa kaaway sa Diyos.

18. (a) Unsa ang laing isyu nga nalangkit, asa kini ginapakita sa Bibliya? (b) Sa unsang paagi kining isyu nagalangkit kanato?

¹⁸ Ang laing isyu nalangkit. Sanglit kining mga linalang sa Diyos miliso batuk kaniya didto sa Eden, unsa man ang buhaton sa uban? Sa ulahi, sa mga adlaw sa tawong si Job, si Satanas dayag nga nag-akusar nga kadtong kinsa nagaalagad kang Jehova nagabuhat niana, dili tungod sa bisan unsang gugma sa Diyos ug sa iyang pagmando, apan sa kahakug, tungod kay ang Diyos nagatagana sa tanang butang alang kanila. Si Satanas nagpasabut nga, walay usa kon ibutang ubos sa pagpig-ot, ang maunongong magasuportar sa pagkasoberano ni Jehova. Mao nga ang pagkamaunongon ug ang integridad sa tagsa ka intelihente nga linalang sa langit ug sa yuta gibutang sa pagduda. Busa ang isyu nagalangkit kanimo.​—Job 1:8-12; 2:4, 5.

19, 20. Pinaagi sa dili paglaglag sa mga rebelde gilayon, unsang oportunidad ang gihatag ni Jehova sa iyang mga linalang, sa espirituhanon ug tawhanon?

¹⁹ Nag-atubang sa maong hagit, unsa ang himuon ni Jehova? Sayon ra unta alang kaniya sa paglaglag kang Satanas ug kang Adan ug Eva. Magpasundayag unta kana sa soberanong gahum ni Jehova. Apan kini ba magatubag sa mga pangutana nga karon anaa sa mga hunahuna sa tanang mga linalang sa Diyos kinsa nagasubay niining kaugmaran? Ang walay katapusang kalinaw ug kasegurohan sa uniberso nagakinahanglan nga kining mga pangutana husayon, sa bug-os, makausa ug alang sa tanang panahon. Gawas pa niana, ang integridad ug pagkamaunongon sa tanang intelihente nga mga linalang sa Diyos gibutang sa pagduda. Kon sila nahigugma kaniya, buot nila mismo nga tubagon ang maong palso nga akusasyon. Si Jehova naghatag kanila sa oportunidad sa pagbuhat niana gayod. Usab, pinaagi sa pagtugot kang Adan ug Eva sa pagpatungha sa mga anak (walay sapayan nga dili hingpit), ang Diyos makasanta sa pagkawala sa tawhanong pamilya​—usa ka banay nga nagaapil kanatong tanan nga buhi karon. Kini magahatag sa mga kaliwat sa oportunidad sa pagpili alang sa ilang kaugalingon kon sila magasugot ba sa langitnong pagmando. Kanang pagpili mao ang nagaatubang kanimo karon!

²⁰ Busa, inay sa pagpadapat gilayon sa silot sa kamatayon, si Jehova nagtugot niadtong nagrebelde sa pagpabilin sulod sa usa ka panahon. Si Adan ug Eva gipalagput sa Eden, aron mamatay una pa matapus ang usa ka libo ka tuig. (Genesis 5:5; itandi ang Genesis 2:17 ug 2 Pedro 3:8.) Si Satanas usab pagalaglagon sa igong panahon, nga daw siya usa ka bitin kansang ulo pagadugmokon.​—Genesis 3:15; Roma 16:20.

Unsa ang Gibutyag sa Paglabay sa Panahon

21, 22. (a) Mahitungod sa pagmando, unsa ang gihimo ni Satanas ug sa katawhan sulod sa panahon nga gitugot sa Diyos? (b) Unsa ang ginapakita sa tawhanong kasaysayan mahitungod sa gobiyerno nga nagpanlimbasog sa pagsalikway sa Diyos?

²¹ Unsa ang miresulta sa hagit mahitungod sa pagkamatarung sa pagmando sa Diyos? Ang tawo ba nakabenepisyo sa iyang kaugalingon pinaagi sa pagpanlimbasog sa pagpadagan sa iyang kaugalingong kalihokan? Ang katawhan gitugotan sa pagsulay sa tagsa ka mahunahunaang matang sa gobiyerno. Wala pahunonga ni Jehova nga sayo ra kaayo ang mga panlimbasog sa tawo aron sa bug-os makita ang mga resulta. Bisan ang miaging siglo dili pa igo. Ang tawo bag-o pang nakasulod sa “panahon sa teknolohiya” ug nagasugod pa lamang sa paghimog dakung mga pag-angkon mahitungod sa kon unsa ang iyang mahimo.

²² Apan ang laing siglo kinahanglanon pa ba sa pagtan-aw kon unsa ang resulta sa kurso sa pagkaindependiente sa tawo gikan sa Diyos? Bisan ang bantugang mga tawo sa gobiyerno ug siyensiya nagaila nga ang yuta nagaatubang sa grabe nga peligro sa kalaglagan. Piho nga ang Diyos dili gayod makatugot sa bug-os nga kalaglagan aron sa pagpamatuod sa bug-os nga kapakyasan sa independiente nga pagmando sa tawo. Uban sa testimonyo sa unom ka libo ka tuig nga pagpamatuod kon unsay mahitabo sa dihang ang gobiyerno nagasalikway sa Diyos, dili gayod ikaingon nga walay igong panahong gitugot sa bug-os tawhanong pagmando. Ang kamatuoran nagapakita nga walay gobiyerno nga independiente sa Diyos ang makapatungha sa matuod nga kalinaw ug kasegurohan alang sa tanang katawhan.

23. Unsa ang mahitabo sa dili madugay nga magbukas sa dalan alang sa matarung pagmando sa yuta pinaagig Anak sa Diyos?

²³ Sumala sa atong makita sa ulahi, dugay na sa pasiuna ug uban sa eksakto nga panahon si Jehova nga Diyos nagmarka ug partikular nga kaliwatan nga makakita sa iyang paghinlo sa uniberso sa tanang pag-alsa batuk sa iyang balaang pagmando. Dili lamang ang dautang mga tawo laglagon kondili si Satanas ug ang iyang mga demonyo ginapugngan diha sa usa ka bung-aw, nga dili na makainpluensiya pa sa kalihokan sa mga tawo o sa mga anghel. Kini aron sa pagbukas sa dalan alang sa matarung nga pagmando sa yuta pinaagi sa gobiyerno sa Anak sa Diyos. Sulod sa panahon sa usa ka libo ka tuig, kanang gobiyerno magatangtang sa tanang kadautan nga gipahinabo sa kaliboan ka tuig sa hakug nga pagmando sa tawo. Kini magapasig-uli niining yuta ngadto sa paraiso nga katahum ug magadala sa masinugtanong katawhan balik sa kahingpitan nga gipahimuslan sa Eden.​—Pinadayag 20:1, 2; 21:1-5; 1 Corinto 15:25, 26.

24. (a) Ngano si Satanas ug ang iyang mga demonyo buhian sa katapusan sa usa ka libo ka tuig? (b) Unsa man ang sangputanan?

²⁴ Ang Bibliya nagapahayag nga sa pagtiklop nianang usa ka libo ka tuig nga pagmando si Satanas ug iyang mga demonyo pagabuhian gikan sa pagkabilanggo sulod sa mubong panahon. Ngano? Aron nga ang tanan nga magkinabuhi unya makabaton sa oportunidad sa pagpakita sa ilang kaugalingon nga maunongon sa soberanong pagmando ni Jehova. Ang dili maihap nga gidaghanon mamangon sa pagkabanhaw. Alang sa kadaghanan kanila kini mao ang ilang unang oportunidad sa pagpasundayag ubos sa pagsulay sa ilang gugma alang sa Diyos. Ang isyu pareho ra sa gibangon didto sa Eden​—kon sila ba magalaban sa pagkasoberano ni Jehova pinaagi sa matinumanong pagsugot. Si Jehova nagatinguha lamang ingon nga iyang mga sakup niadtong kang kansang gugma nagapalihok sa maong pagkamaunongon. Kadtong kinsa buot magadapig sa kaaway sa Diyos ug sa iyang mga demonyo sa bisan unsang mga panlimbasog nga himuon nila sa pagsamok pag-usab sa kalinaw sa uniberso sa Diyos libre sa paghimo niana. Apan sa pagsalikway sa gobiyerno sa Diyos, sila takus sa kalaglagan. Ug niining panahon kini magaabut sa gilayon, nga daw sama sa kalayo gikan sa langit. Ang tanang mga rebelde, espirituhanon ug tawhanon, mahanaw unya alang sa tanang panahon.​—Pinadayag 20:7-10.

25, 26. Sa unsang paagi ang pagdumala ni Jehova sa mga butang nahimong kaayohan gayod alang sa matag usa kanato?

²⁵ Matuod, sulod sa kaliboan ka tuig ang katawhan nag-antus sa hilabihan. Apan tungod kini sa pagpili sa atong unang mga ginikanan, dili sa Diyos. Ang Diyos nag-antus sa pagtamay ug nagpailub sa mga butang nga dulumtanan kaniya sulod niining tanang panahon. Apan ang Diyos, kang kansa ‘ang usa ka libo ka tuig sama sa usa ka adlaw,’ nagabaton sa largong pagtan-aw sa mga butang, ug kini alang sa kaayohan sa iyang mga linalang. Ang inspiradong apostol nagsulat: “Si Jehova dili langaylangayan mahitungod sa iyang saad, nga maoy pagsabut sa ubang katawhan, apan siya mapailubon uban kaninyo tungod kay wala siya nagatinguha nga ang bisan kinsa kaninyo malaglag kondili nagatinguha nga ang tanan makadangat sa paghinulsol.” (2 Pedro 3:8, 9) Kondili pa sa pailub ug pag-antus sa Diyos, walay si bisan kinsa kanato ang makabaton ug bisan unsang oportunidad sa kaluwasan.

²⁶ Bisan pa niana, dili kita magkanayon nga sulod sa miaging unom ka libo ka tuig ang Diyos wala maglihok. Dili, siya dili basta kay nagatugot sa pagkadautan, nagalangan sa panahon ug walay aksiyon sa iyang kaugalingon. Sumala sa atong makita, ang mga kamatuoran nagapakita sa kaatbang.

[Hulagway sa panid 51]

Si Satanas nakigbisog nga ubos sa pagsulay ang tanang tawo dili magmatinumanon ug magalihok nga bulag sa Diyos