Kapitulo 8
Nganong Gitugotan sa Diyos ang Pag-antos?
1, 2. Sa unsang paagi ang mga tawo kasagarang mosanong sa tawhanong pag-antos?
SA DIHANG ang mga katalagman mohampak, nga modaot sa mga kabtangan ug mokalas sa daghang kinabuhi, daghan ang dili makasabot kon nganong mahitabo ang maong makalilisang nga mga butang. Ang uban nabalaka sa gidak-on, kabangis, ug kamapatuyangon sa krimen ug kapintasan. Ikaw usab mahimong nahibulong, ‘Nganong gitugotan sa Diyos ang pag-antos?’
2 Tungod kay wala sila makakitag makapatagbawng tubag niining pangutanaha, daghan ang nawad-ag pagtuo sa Diyos. Gibati nila nga siya dili interesado sa katawhan. Ang uban nga nagdawat sa pag-antos ingong kamatuoran sa kinabuhi nayugot ug nagbasol sa Diyos sa tanang kadaotan sa tawhanong katilingban. Kon ikaw adunay maong mga pagbati, sa walay duhaduha maikag ka sa mga ginaingon sa Bibliya bahin niining mga butanga.
PAG-ANTOS DILI GIKAN SA DIYOS
3, 4. Nganong makatino kita nga ang pagkadaotan ug pag-antos dili gikan kang Jehova?
3 Gipasaligan kita sa Bibliya nga ang nakita natong pag-antos sa atong palibot wala ipahinabo ni Jehova nga Diyos. Pananglitan, ang Kristohanong tinun-ang si Santiago misulat: “Dihang ilalom sa pagsulay, ayaw ipaingon ni bisan kinsa: ‘Ginasulayan ako sa Diyos.’ Kay ang Diyos dili masulayan ug daotang mga butang ni siya mismo nagasulay kang bisan kinsa.” (Santiago 1:13) Kon ingon niana, ang Diyos dili maoy nakapahinabo sa daghang kalisdanan nga nagahampak sa katawhan. Dili siya magasulay sa mga tawo aron sila mahimong takos alang sa kinabuhi sa langit, ni paantoson niya ang mga tawo tungod sa gituohan nga daotan nilang mga buhat sa miaging kinabuhi.—Roma 6:7.
4 Dugang pa, bisan tuod daghang makalilisang nga mga butang ang nahimo sa ngalan sa Diyos o ni Kristo, walay mabasa sa Bibliya nga nagpasabot nga ilang giuyonan ang maong mga lihok. Ang Diyos ug si Kristo walay labot niadtong nangangkon nga nag-alagad kanila apan nanglimbong ug nanikas, nagpatay ug nangawat, ug naghimog daghang butang nga nagpahinabog tawhanong pag-antos. Sa pagkamatuod, “ang dalan sa daotan maoy dulumtanan kang Jehova.” Ang Diyos “halayo sa mga daotan.”—Proverbio 15:9, 29.
5. Unsa ang pila ka hiyas ni Jehova, ug unsay iyang pagbati mahitungod sa iyang mga linalang?
5 Ang Bibliya naghubit kang Jehova ingong “malumo kaayo sa pagmahal ug maluluy-on.” (Santiago 5:11) Kini nagpahayag nga “si Jehova maoy mahigugmaon sa hustisya.” (Salmo 37:28; Isaias 61:8) Siya dili mapanimaslon. Siya mapuangorong nagmahal sa iyang mga linalang ug naghatag kanilang tanan sa kinamaayohan alang sa ilang kaayohan. (Buhat 14:16, 17) Gihimo kana ni Jehova sukad sa pagsugod gayod sa kinabuhi niining yutaa.
USA KA HINGPIT NGA SINUGDANAN
6. Sa unsang paagi gipasumbingay sa pila ka leyenda ang mga kahimtang sa sayong kasaysayan sa katawhan?
6 Kitang tanan naanad nang makakita ug makabati sa kasakit ug pag-antos. Busa malisod handurawon ang usa ka panahong walay pag-antos, apan mao kana ang kahimtang sa pagsugod sa kasaysayan sa tawo. Bisan ang mga leyenda sa pipila ka nasod nagpasumbingay sa maong malipayong sinugdanan. Sa Gregong mitolohiya, ang una sa “Lima ka Kapanahonan sa Tawo” gitawag ug “Bulawanong Kapanahonan.” Niana ang mga tawo nagkinabuhing malipayon, walay paghago, kasakit, ug mga kadaot sa pagkatigulang. Ang mga Insik nag-ingon nga sa panahon sa pagmando sa mitolohikanhong Dalag nga Emperador (si Huang-Ti), ang mga tawo nagpuyo sa kalinaw, nga nagpahimulos sa panagkauyon bisan uban sa mga puwersa sa kinaiyahan ug sa ihalas nga kahayopan. Ang mga Persianhon, Ehiptohanon, Tibetnon, Peruviano, ug mga Mehikano tanantanan dunay mga leyenda mahitungod sa panahong may kalipay ug kahingpitan sa sinugdanan sa kasaysayan sa katawhan.
7. Nganong gilalang sa Diyos ang yuta ug ang tawo?
7 Ang mga kasugiran sa kanasoran maoy lanog lamang sa kinakaraanang sinulat nga rekord sa kasaysayan sa tawo, ang Bibliya. Kini nagpahibalo kanato nga gibutang sa Diyos ang unang tawhanong magtiayon, si Adan ug Eva, sa usa ka paraiso nga gitawag ug tanaman sa Eden ug gisugo sila: “Sumanay ug dumaghan kamo ug pun-on ninyo ang yuta ug magagahom kamo niini.” (Genesis 1:28) Ang atong unang mga ginikanan nagpahimulos sa kahingpitan ug may paglaom nga makakita sa tibuok yuta nga mahimong paraiso nga puy-an sa hingpit tawhanong pamilya nga magkinabuhi sa dumalayong kalinaw ug kalipay. Mao kanay katuyoan sa Diyos sa paglalang sa yuta ug sa tawo.—Isaias 45:18.
DAOTAG-TUYO NGA HAGIT
8. Si Adan ug Eva gidahom nga mosugot sa unsang sugo, apan unsay nahitabo?
8 Aron makapabilin sa pag-uyon sa Diyos, si Adan ug Eva kinahanglang dili mokaon gikan “sa kahoy sa kahibalo sa maayo ug sa daotan.” (Genesis 2:16, 17) Kon gisugot pa nila ang balaod ni Jehova, wala untay pag-antos nga magadaot sa kinabuhi sa tawo. Pinaagi sa pagsugot sa sugo sa Diyos, ila untang mapasundayag ang ilang gugma kang Jehova ug ang ilang pagkamaunongon kaniya. (1 Juan 5:3) Apan sumala sa atong nasayran sa Kapitulo 6, dili ingon niana ang nahitabo. Kay naaghat ni Satanas, si Eva mikaon gikan nianang maong kahoy. Sa ulahi, si Adan mikaon usab sa gidiling bunga.
9. Unsang isyu maylabot kang Jehova ang gipasiugda ni Satanas?
9 Nasabtan ba nimo ang pagkaseryoso sa nahitabo? Giatake ni Satanas ang posisyon ni Jehova ingong ang Labing Hataas. Pinaagi sa pag-ingon, “Ikaw tinong dili mamatay,” gisupak sa Yawa ang mga pulong sa Diyos, “Ikaw tinong mamatay.” Ang dugang mga pulong ni Satanas nagpasabot nga gihimo ni Jehova si Adan ug Eva nga walay alamag sa posibilidad nga mahisama sa Diyos, sa ingon wala magkinahanglan Kaniya aron pagtino kon unsay maayo ug daotan. Busa ang hagit ni Satanas naglalis sa pagkatukma ug pagkaangay sa posisyon ni Jehova ingong ang Unibersohanong Soberano.—Genesis 2:17; 3:1-6.
10. Unsang mga pagbutangbutang ang gihimo ni Satanas may kalabotan sa mga tawo?
10 Si Satanas nga Yawa nagbutangbutang usab nga ang mga tawo magpabilin lamang nga masinugtanon kang Jehova samtang ang pagsugot sa Diyos maoy alang sa ilang bentaha. Sa laing pagkasulti, gidudahan ang integridad sa tawo. Si Satanas nagbutangbutang nga walay tawo ang kinabubut-ong magpabiling maunongon sa Diyos. Kining daotag-tuyo nga pagbutangbutang ni Satanas tin-awng napadayag sa asoy sa Bibliya mahitungod kang Job, usa ka matinumanong alagad ni Jehova nga nakaagi ug dakong pagsulay usa niana ka panahon sa wala pay 1600 W.K.P. Sa dihang imong basahon ang unang duha ka kapitulo sa basahon ni Job, masabtan nimo ang hinungdan sa tawhanong pag-antos ug kon nganong gitugotan kana sa Diyos.
11. Unsang matanga sa tawo si Job, apan unsay gibutangbutang ni Satanas?
11 Si Job, “usa ka tawong walay-ikasaway ug matarong,” nailalom sa pag-atake ni Satanas. Una, gipasangil ni Satanas ang daotang mga motibo kang Job pinaagi sa pagpangutana, “Mahadlok ba lamang si Job sa Diyos nga walay hinungdan?” Dayon, ang Yawa sa malinglahong paagi nagdaot sa Diyos ug kang Job pinaagi sa pagbutangbutang nga gipalit ni Jehova ang pagkamaunongon ni Job pinaagi sa pagpanalipod ug pagpanalangin kaniya. “Apan, alang sa kausaban,” hagit ni Satanas kang Jehova, “palihog, bakyawa ang imong kamot, ug tandoga ang tanan nga anaa kaniya ug tan-awa kon dili ba siya magpasipala kanimo sa atubangan sa imong nawong mismo.”—Job 1:8-11.
12. (a) Unsang mga pangutana ang matubag lamang kon tugotan sa Diyos si Satanas sa pagsulay kang Job? (b) Ang pagsulay kang Job miresulta sa unsa?
12 Si Job nag-alagad ba kang Jehova tungod lamang sa tanang maayong butang nga iyang nadawat gikan sa Diyos? Ang integridad ba ni Job magpabiling lig-on ubos sa pagsulay? Sa laing bahin, si Jehova ba may igong pagsalig sa iyang alagad aron tugotan siyang sulayan? Kining mga pangutanaha matubag kon tugotan ni Jehova si Satanas nga ipahamtang ang grabe kaayong pagsulay kang Job. Ang matinumanong dalan ni Job ubos sa pagsulay nga gitugot sa Diyos, sumala sa giasoy sa basahong Job, napamatud-ang usa ka hingpit nga bindikasyon sa pagkamatarong ni Jehova ug sa integridad sa tawo.—Job 42:1, 2, 12.
13. Sa unsang paagi kita nalangkit sa nahitabo sa Eden ug kang Job?
13 Hinunoa, ang nahitabo sa tanaman sa Eden ug sa tawong si Job may mas halalom pang kahulogan. Ang mga isyu nga gipasiugda ni Satanas naglangkit sa tanang tawo, nga naglakip kanato karon. Ang ngalan sa Diyos gidaot, ug ang iyang pagkasoberano gihagit. Ang pagkamatarong sa linalang sa Diyos, ang tawo, giduhaduhaan. Kining mga isyuha kinahanglang husayon.
KON UNSAON PAGHUSAY ANG MGA ISYU
14. Sa dihang nag-atubang sa daotag-tuyo nga pagbutangbutang, unsay mahimong buhaton sa gibutangbutangang tawo?
14 Agig ilustrasyon, ibutang nato nga ikaw usa ka mahigugmaong ginikanan nga daghag anak diha sa usa ka malipayong pamilya. Pananglit usa sa imong mga silingan nanabi, nga gibutangbutangan ka nga usa ka daotang ginikanan. Komosta na man kon ang silingan nag-ingon nga ang imong mga anak wala mahigugma kanimo, nga sila nakig-uban lamang kanimo tungod kay wala silay laing kaadtoan nga mas maayong kahimtang, ug nga sila mobiya kon may mohatag kanilag kahigayonan. ‘Binuang!’ mahimong moingon ka. Oo, apan sa unsang paagi pamatud-an nimo kana? Ang pila ka ginikanan mahimong mosumbalik sa kapungot. Gawas pa sa pagmugnag dugang mga suliran, ang maong mapintas nga sanong magpamatuod sa mga kabakakan. Ang makapatagbawng paagi sa pagsagubang sa maong suliran mao ang paghatag ug higayon sa imong tigbutangbutang nga pamatud-an ang iyang pagbutangbutang ug sa imong mga anak sa pagpamatuod nga sila sinserong nahigugma kanimo.
15. Unsang paagi ang gipili ni Jehova sa pag-atubang sa hagit ni Satanas?
15 Si Jehova susama nianang mahigugmaong ginikanan. Sila Adan ug Eva mahimong ikapanag-ing sa mga anak, ug si Satanas haom sa papel sa bakakong silingan. Sa kamaalamon wala dihadiha laglaga sa Diyos si Satanas, Adan, ug Eva apan gitugotan kining mga mamumuhat ug kalapasan nga mabuhi sa makadiyot. Kini mihatag ug panahon sa atong unang mga ginikanan nga makapatunghag tawhanong pamilya, ug kini naghatag higayon sa Yawa sa pagpamatuod kon kaha ang iyang pagbutangbutang tinuod ba aron mahusay ang mga isyu. Hinunoa, sukad sa sinugdan, ang Diyos nasayod nga ang pipila ka tawo magmaunongon kaniya ug busa makapamatuod nga si Satanas bakakon. Pagkamapasalamaton nato nga si Jehova padayong nagpanalangin ug nagtabang niadtong nahigugma kaniya!—2 Cronicas 16:9; Proverbio 15:3.
UNSAY NAPAMATUD-AN?
16. Sa unsang paagi ang kalibotan nailalom sa gahom ni Satanas?
16 Halos sa tibuok kasaysayan sa tawo, si Satanas may kagawasan sa pagpalampos sa iyang mga plano sa paggahom ibabaw sa katawhan. Apil sa ubang mga butang, may impluwensiya siya sa politikal nga mga gahom ug nagpasiugdag mga relihiyon nga sa malinglahon nagtumong sa pagsimba ngadto kaniya inay kang Jehova. Busa ang Yawa nahimong “diyos niining sistema sa mga butang,” ug siya gitawag “ang magmamando niining kalibotana.” (2 Corinto 4:4; Juan 12:31) Sa pagkatinuod, “ang tibuok kalibotan nahimutang diha sa gahom sa tuman-kadaotang usa.” (1 Juan 5:19) Kini ba nagpasabot nga si Satanas nakapamatuod sa iyang pangangkon nga iyang mapahilayo ang katawhan gikan ni Jehova nga Diyos? Tino nga dili! Samtang gitugotang molungtad si Satanas, si Jehova padayong nagpalampos sa iyang kaugalingong katuyoan. Nan, unsay gipadayag sa Bibliya may kalabotan sa pagtugot sa Diyos sa pagkadaotan?
17. Unsay angay natong huptan sa hunahuna may kalabotan sa hinungdan sa pagkadaotan ug pag-antos?
17 Ang pagkadaotan ug pag-antos wala ipahinabo ni Jehova. Sanglit si Satanas mao ang magmamando niining kalibotana ug ang diyos niining sistema sa mga butang, siya ug kadtong mga nagapaluyo kaniya maoy responsable sa presenteng kahimtang sa tawhanong katilingban ug sa tanang kasakitan nga giantos sa katawhan. Walay makasulti sa hustong paagi nga ang Diyos maoy hinungdan sa maong kalisdanan.—Roma 9:14.
18. Unsay ginapamatud-an sa pagtugot ni Jehova sa pagkadaotan ug pag-antos may kalabotan sa ideya sa pagkaindependente gikan sa Diyos?
18 Ang pagtugot ni Jehova sa pagkadaotan ug pag-antos nakapamatuod nga ang pagkaindependente gikan sa Diyos wala makapatunghag mas maayong kalibotan. Dili ikapangulipas, ang kasaysayan puno sa sunodsunod nga katalagman. Ang hinungdan niini mao nga ang mga tawo mipili sa pagsubay sa ilang kaugalingong independenteng dalan ug wala magpakitag tinuod nga pagtagad sa pulong ug kabubut-on sa Diyos. Sa dihang ang karaang katawhan ni Jehova ug ang ilang mga pangulo sa pagkadili-matinumanon misubay “sa popular nga dalan” ug misalikway sa iyang pulong, ang mga sangpotanan maoy malaglagon. Pinaagi sa iyang propeta nga si Jeremias, giingnan sila sa Diyos: “Ang mga manggialamon gipakaulawan. Sila nalisang ug hingdakpan. Tan-awa! Ilang gisalikway ang pulong mismo ni Jehova, ug unsang kaalam ang ilang nabatonan?” (Jeremias 8:5, 6, 9) Kay napakyas sa pagsunod sa mga sukdanan ni Jehova, ang katawhan sa katibuk-an nahisama sa usa ka sakayan nga walay timon, nga gituyatuya sa balorong dagat.
19. Unsay pamatuod nga si Satanas dili makapaliso sa tanang tawo batok sa Diyos?
19 Ang pagtugot sa Diyos sa pagkadaotan ug pag-antos nakapamatuod usab nga si Satanas wala makapahilayo sa tanang tawo gikan ni Jehova. Gipakita sa kasaysayan nga kanunayng may mga indibiduwal nga nagpabiling matinumanon sa Diyos walay sapayan sa mga tintasyon o mga kalisdanan nga gipahamtang kanila. Latas sa mga siglo, ang gahom ni Jehova ginapakita alang sa iyang mga alagad, ug ang iyang ngalan ginamantala sa tibuok yuta. (Exodo 9:16; 1 Samuel 12:22) Ang Hebreohanon kapitulo 11 nagtug-an kanato mahitungod sa hataas nga linya sa mga matinumanon, lakip kang Abel, Enoc, Noe, Abraham, ug Moises. Ang Hebreohanon 12:1 nagtawag kanila nga ‘usa ka dakong panganod sa mga saksi.’ Sila maoy mga pananglitan sa dili-matarog nga pagtuo kang Jehova. Sa modernong mga panahon usab, daghan ang nagahatag sa ilang mga kinabuhi diha sa dili-mabungkag nga integridad ngadto sa Diyos. Tungod sa ilang pagtuo ug gugma, ang maong mga indibiduwal hingpit nga nagpamatuod nga si Satanas dili makapaliso sa tanang tawo batok sa Diyos.
20. Unsay gipamatud-an sa padayong pagtugot ni Jehova sa pagkadaotan ug pag-antos bahin sa Diyos ug sa katawhan?
20 Sa kataposan, ang pagtugot ni Jehova nga magpadayon ang pagkadaotan ug pag-antos nakataganag pamatuod nga si Jehova lamang, nga Maglalalang, ang may katakos ug katungod sa pagmando ibabaw sa katawhan alang sa ilang walay-kataposang pagkabulahan ug kalipay. Sa daghang siglo, ang mga tawo nakasulay na sa daghang matang sa kagamhanan. Apan unsay resulta? Ang komplikadong mga suliran ug kalisdanan nga giatubang sa mga nasod karon maoy dakong pamatuod nga sa pagkatinuod, ingon sa gipunting sa Bibliya, “ang tawo nagagahom sa tawo sa iyang kadaotan.” (Ecclesiastes 8:9) Si Jehova lamang ang makatabang kanato ug makatuman sa iyang orihinal nga katuyoan. Sa unsang paagi niya kini himoon, ug kanus-a?
21. Unsay pagahimoon kang Satanas, ug kinsay pagagamiton sa pagpalampos niini?
21 Dihadiha pagkabiktima ni Adan ug Eva sa laraw ni Satanas, ang Diyos mipahibalo sa Iyang katuyoan may kalabotan sa paagi sa kaluwasan. Mao kini ang gipahayag ni Jehova may kalabotan kang Satanas: “Ibutang ko ang panagkaaway sa taliwala mo ug sa babaye ug sa taliwala sa imong binhi ug sa iyang binhi. Siya magasamad sa imong ulo ug ikaw magasamad sa iyang tikod.” (Genesis 3:15) Kadtong maong pahayag migarantiya nga ang Yawa dili tugotang mohimo sa iyang daotang mga buhat hangtod sa hangtod. Ingong Hari sa Mesiyanikong Gingharian, ang gisaad nga Binhi, si Jesu-Kristo, ‘magasamad kang Satanas sa ulo.’ Oo, “sa dili madugay,” si Jesus magadugmok sa rebeldeng si Satanas!—Roma 16:20.
UNSAY IMONG BUHATON?
22. (a) Unsang mga pangutana ang kinahanglang atubangon nimo? (b) Bisan tuod gipahimungtan ni Satanas kadtong mga matinumanon sa Diyos, bahin sa unsa nga sila makatino?
22 Human masayod sa mga isyu nga nalangkit, kang kansang kiliran ka modapig? Pamatud-an ba nimo pinaagi sa imong mga lihok nga ikaw usa ka maunongong tigpaluyo ni Jehova? Sanglit si Satanas nasayod nga hamubo na ang iyang panahon, iyang himoon kutob sa iyang maarangan nga pahamungtan kadtong buot mohupot sa integridad sa Diyos. (Pinadayag 12:12) Apan makapangayo kag tabang sa Diyos tungod kay “si Jehova mahibalo kon unsaon sa pagpahigawas sa katawhan nga may diyosnong pagkamahinalaron gikan sa pagsulay.” (2 Pedro 2:9) Dili niya itugot nga tintalon ka labaw sa imong maagwanta, ug siya usab mohimog lutsanan aron ikaw makaagwanta sa mga tintasyon.—1 Corinto 10:13.
23. Alang sa unsa nga kita masaligong makapaabot?
23 Sa masaligon, molantaw kita sa panahon sa dihang ang Haring si Jesu-Kristo molihok batok kang Satanas ug sa tanang nagasunod kaniya. (Pinadayag 20:1-3) Wagtangon ni Jesus kadtong tanang responsable sa mga kaalaotan ug kasamok nga giantos sa katawhan. Hangtod nianang panahona, usa sa ilabinang masakit nga matang sa pag-antos mao ang pagkawala sa atong mga minahal diha sa kamatayon. Basaha ang sunod nga kapitulo sa pagsusi kon unsay mahitabo kanila.
TAKSA ANG IMONG KAHIBALO
Sa unsang paagi nasayod kita nga si Jehova wala magpahinabo sa tawhanong pag-antos?
Unsang mga isyu ang gibangon ni Satanas sa Eden ug napatin-aw sa adlaw ni Job?
Unsay napamatud-an sa pagtugot sa Diyos sa pag-antos?