LEKSIYON 26
Nganong Naay Pagkadaotan ug Pag-antos?
Kon naay daotan kaayong panghitabo, natural lang nga mangutana tag, “Ngano?” Malipay gyod ta kay ang Bibliya naghatag ug klarong tubag niana nga pangutana!
1. Unsay gihimo ni Satanas mao nga mitungha ang pagkadaotan sa kalibotan?
Si Satanas nga Yawa mirebelde sa Diyos. Gusto ni Satanas nga siya ang magmando, mao nga iyang giimpluwensiyahan ang unang mga tawo, si Adan ug Eva, nga morebelde pod sa Diyos. Gihimo kini ni Satanas pinaagi sa pagsulti ug bakak kang Eva. (Genesis 3:1-5) Iyang gipatuo si Eva nga naay maayong butang nga gihikaw si Jehova kaniya. Sumala pa kang Satanas, ang mga tawo kuno mas magmalipayon kon ilang supakon ang Diyos. Gisulti ni Satanas ang unang bakak dihang giingnan niya si Eva nga dili siya mamatay. Tungod ana, gitawag sa Bibliya si Satanas nga “bakakon ug ang amahan sa bakak.”—Juan 8:44.
2. Unsay gipili ni Adan ug Eva nga himoon?
Si Jehova mahinatagon kaayo kang Adan ug Eva. Miingon siya nga makakaon sila sa bunga sa tanang kahoy sa tanaman sa Eden gawas lang sa usa ka kahoy. (Genesis 2:15-17) Pero midesisyon sila nga mokaon sa bunga sa gidili nga kahoy. Si Eva “mikuhag bunga niini ug mikaon.” Sa ulahi, si Adan “mikaon sab” niini. (Genesis 3:6) Silang duha misupak sa Diyos. Kay hingpit si Adan ug Eva, natural lang gyod unta nila ang paghimo kon unsay husto. Pero kay mipili sila nga mosupak sa Diyos, sila nakasala ug ilang gisalikway ang iyang pagmando. Tungod sa ilang desisyon, sila nag-antos pag-ayo.—Genesis 3:16-19.
3. Unsay epekto kanato sa desisyon ni Adan ug Eva?
Dihang nakasala si Adan ug Eva, sila nahimong dili hingpit, ug ang pagkadili-hingpit ilang napasa sa tanan nilang kaliwat. Bahin kang Adan, ang Bibliya nag-ingon: “Ang sala misulod sa kalibotan pinaagi sa usa ka tawo ug ang kamatayon pinaagi sa sala, [ug] ang kamatayon mikaylap sa tanang tawo.”—Roma 5:12.
Mag-antos ta tungod sa lainlaing rason. Usahay mag-antos ta tungod sa atong sayop nga mga desisyon. Usahay pod mag-antos ta tungod sa sayop nga mga desisyon sa uban. Ug usahay mag-antos ta kay matayming nga naa ta sa usa ka lugar unya naay daotang mahitabo.—Basaha ang Ecclesiastes 9:11.
TUN-IG DUGANG
Sayra kon nganong dili ang Diyos ang hinungdan sa pagkadaotan ug pag-antos sa kalibotan karon ug kon unsay iyang bation dihang mag-antos ta.
4. Kon kinsay hinungdan sa atong pag-antos
Daghag nagtuo nga ang Diyos ang nagmando sa tibuok kalibotan. Tinuod ba na? I-play ang VIDEO.
Basaha ang Santiago 1:13 ug 1 Juan 5:19, ug dayon hisgoti kini nga pangutana:
Ang Diyos ba ang hinungdan sa pag-antos ug pagkadaotan?
5. Kon unsay resulta sa pagmando ni Satanas
Basaha ang Genesis 3:1-6, ug dayon hisgoti kini nga mga pangutana:
Unsa nga bakak ang gisulti ni Satanas?—Tan-awa ang bersikulo 4 ug 5.
Giunsa pagpatuo ni Satanas si Eva nga naay maayong butang nga gihikaw si Jehova sa mga tawo?
Sumala kang Satanas, gikinahanglan ba sa mga tawo si Jehova ingong ilang Magmamando aron magmalipayon sila?
Basaha ang Ecclesiastes 8:9, ug dayon hisgoti kini nga pangutana:
Sulod sa panahon nga dili si Jehova ang Magmamando sa kalibotan, unsay nahitabo?
Sa primero, si Adan ug Eva hingpit ug sila nagpuyo sa Paraiso. Pero naminaw sila kang Satanas ug mirebelde kang Jehova
Human sa rebelyon, mikaylap sa kalibotan ang sala, pag-antos, ug kamatayon
Wad-on ni Jehova ang sala, pag-antos, ug kamatayon. Dayon, ang mga tawo mahimo nang hingpit ug magpuyo na sa Paraiso
6. Dili balewalaon ni Jehova ang atong pag-antos
Nakita ba sa Diyos ang atong pag-antos? Konsideraha kon unsay giingon ni Haring David ug apostol Pedro. Basaha ang Salmo 31:7 ug 1 Pedro 5:7, ug dayon hisgoti kini nga pangutana:
Unsay imong gibati sa pagkahibalo nga nakita ni Jehova ang atong pag-antos ug iya tang gimahal?
7. Taposon sa Diyos ang tanang pag-antos sa tawo
Basaha ang Isaias 65:17 ug Pinadayag 21:3, 4, ug dayon hisgoti kini nga pangutana:
Nganong makapahupay ang pagkahibalo nga wad-on ni Jehova ang mga epekto sa tanang dili maayong butang nga naeksperyensiyahan sa mga tawo?
Nahibalo ba ka?
Dihang gisulti ni Satanas ang unang bakak, iyang gibutangbutangan si Jehova. Nagpasabot ni nga iyang gidaot ang reputasyon ni Jehova ingong rasonable ug mahigugmaon nga Magmamando. Dihang wad-on ni Jehova ang pag-antos sa mga tawo sa dili madugay, iyang ibalik ang iyang maayong reputasyon. Sa ato pa, iyang pamatud-an nga ang iyang pagmando mao ang pinakamaayo. Ang paghinlo, o pagbindikar, sa ngalan ni Jehova mao ang pinakaimportante sa tibuok uniberso.—Mateo 6:9, 10.
ANG UBAN MOINGON: “Pagbuot sa Diyos nga mag-antos ta.”
Unsay imong isulti?
SUMARYO
Si Satanas nga Yawa ug ang unang duha ka tawo mao ang pangunang hinungdan sa pagkadaotan sa kalibotan. Dili gyod balewalaon ni Jehova ang atong pag-antos, ug sa dili madugay iya ning wad-on.
Review
Unsa nga bakak ang gisulti ni Satanas nga Yawa kang Eva?
Unsay epekto kanatong tanan sa pagrebelde ni Adan ug Eva?
Giunsa nato pagkahibalo nga dili balewalaon ni Jehova ang atong pag-antos?
SUSIHA
Sayra kon unsa ang sala base sa Bibliya.
Sayrag dugang ang isyu nga gibangon ni Satanas nga Yawa sa tanaman sa Eden.
“Nganong Gitugotan sa Diyos ang Pag-antos?” (Ang Bantayanang Torre, Enero 1, 2014)
Sayra ang makapahupay nga mga tubag sa usa ka lisod nga pangutana.
“Nganong Nahitabo ang Holocaust? Nganong Wala Kini Pugngi sa Diyos?” (Web article)
Tan-awa kon unsay nakat-onan sa usa ka tawo bahin sa pag-antos nga iyang nakita.