Posible ba Gayod ang Walay-Kataposang Kinabuhi?
“Magtutudlo, unsang maayo ang kinahanglan kong buhaton aron makaangkon ug kinabuhing walay-kataposan?”—MATEO 19:16.
1. Unsay ikaingon bahin sa gitas-on sa atong tawhanong kinabuhi?
ANG Persianong Haring Xerxes I, nailhan sa Bibliya ingong Ahasuero, nag-inspeksiyon sa iyang mga sundalo una pa sa gubat sa tuig 480 W.K.P. (Ester 1:1, 2) Sumala sa Gregong historyano nga si Herodotus, ang hari mihilak samtang gitan-aw niya ang iyang mga tawo. Ngano man? “Nakapasubo kanako,” miingon si Xerxes, “sa dihang namalandong ako sa mubo nga kinabuhi sa tawo. Kay niining tanang lalaki, walay mausa ang mabuhi usa ka gatos ka tuig gikan karon.” Ikaw usab lagmit nakamatikod nga makapasubo ang kamubo sa kinabuhi ug nga walay usa nga gustong matigulang, masakit, ug mamatay. Oh, kon makapahimulos lamang kita sa kinabuhi diha sa kahimsog ug kalipay sa pagkabatan-on!—Job 14:1, 2.
2. Unsang paglaom ang nabatonan sa daghan, ug ngano?
2 Makahuloganon, ang The New York Times Magazine sa Septiyembre 28, 1997, may artikulong “Gusto Nilang Mabuhi.” Mikutlo kini sa usa ka tigdukiduki kinsa mipatugbaw: “Ako nagtuo gayod nga mahimong kita ang unang kaliwatan nga mabuhi sa walay kataposan”! Tingali ikaw usab nagtuo nga posible ang walay-kataposang kinabuhi. Basin naghunahuna ka ug ingon niana tungod kay ang Bibliya nagsaad nga mahimo kitang mabuhi sa walay kataposan dinhi sa yuta. (Salmo 37:29; Pinadayag 21:3, 4) Bisan pa niana, ang pipila ka tawo nagtuo nga ang walay-kataposang kinabuhi posible tungod sa mga katarongan gawas nianang makaplagan sa Bibliya. Ang pagkonsiderar sa duha niining mga katarongana motabang kanato sa pag-apresyar nga ang walay-kataposang kinabuhi posible gayod.
Gidisenyo nga Mabuhi sa Walay Kataposan
3, 4. (a) Nganong ang pipila nagtuo nga mahimo gayod kitang mabuhi sa walay kataposan? (b) Unsay giingon ni David bahin sa iyang pagkaumol?
3 Ang usa ka katarongan nga daghan ang nagtuo nga ang mga tawo mahimo gayod nga mabuhi sa walay kataposan adunay kalabotan sa kahibulongang paagi nga kita gihimo. Pananglitan, tinuod nga milagroso kon sa unsang paagi kita naumol sulod sa tagoangkan sa atong inahan. Usa ka pangunang awtoridad bahin sa pagkatigulang misulat: “Human sa paghimo sa mga milagro nga nagdala kanato gikan sa pagsamkon ngadto sa pagkatawo ug dayon sa seksuwal nga pagkahamtong ug pagkahingkod, ang kinaiyahan wala mopili sa paglaraw sa morag mas elementaryang mekanismo aron lamang mamentinar kanang maong mga milagro sa walay kataposan.” Oo, sa pagkonsiderar sa atong milagrosong pagkahimo, ang pangutana magpabilin, Nganong kinahanglan kitang mamatay?
4 Mga milenyo kanhi ang magsusulat sa Bibliya nga si David namalandong nianang maong mga milagro, bisan tuod dili niya aktuwal nga makita ang sulod sa tagoangkan sama sa mahimo sa mga siyentipiko karon. Gihinuktokan ni David ang iyang kaugalingong pagkahimo sa dihang, sumala sa iyang gisulat, siya ‘gitabonan diha sa tagoangkan sa iyang inahan.’ Nianang panahona, siya miingon, ‘ang iyang mga rinyon gihimo.’ Naghisgot usab siya bahin sa pagkaumol sa iyang “mga bukog” sa dihang, sumala sa iyang giingon, “ako gihimo sa tago.” Dayon naghisgot si David bahin sa “wala pa mahingpit ang akong lawas” ug miingon may kalabotan sa maong wala pa mahingpit nga lawas sulod sa tagoangkan sa iyang inahan: “Ang tanang bahin niini nahisulat sa basahon.”—Salmo 139:13-16.
5. Unsang mga milagro ang nalangkit sa pagkaumol nato diha sa tagoangkan?
5 Dayag, walay literal nga sinulat-sa-kamot nga plano sa pag-umol kang David sulod sa tagoangkan sa iyang inahan. Apan sa pagpamalandong ni David sa paghimo sa iyang “mga rinyon,” sa iyang “mga bukog,” ug sa uban niyang mga parte sa lawas, para kaniya morag ang pagkahimo niini maoy sumala sa usa ka plano—nga ang tanan, ingnon ta, “nahisulat sa basahon.” Morag ang pertilisadong selula sulod sa iyang inahan may dakong lawak nga puno sa mga basahon nga may detalyadong instruksiyon kon unsaon pag-umol ang bata ug kining komplikadong mga instruksiyon gipasa ngadto sa matag mitunghang selula. Busa, ang magasing Science World naggamit sa masambingayong mga pulong nga ‘ang matag selula sa nagatubo nga bata dunay kompletong aparador sa mga plano.’
6. Unsay pamatuod nga kita, sumala sa gisulat ni David, “gihimo sa kahibulongang paagi”?
6 Naghunahuna ka na ba sukad mahitungod sa milagrosong pag-obra sa atong lawas? Ang biologong si Jared Diamond miingon: “Atong pulihan ang mga selula nga naghapin sa atong tinai kas-a matag pipila ka adlaw, kadtong naghapin sa pantog kas-a matag duha ka bulan, ug ang atong mga selula sa pulang dugo kas-a matag upat ka bulan.” Siya mihinapos: “Ang kinaiyahan nagbungkag kanato ug nagpasig-uli kanato matag adlaw.” Unsa ba gayoy kahulogan niana? Kana nagpasabot nga bisag pila pa ka tuig nga kita tingali mabuhi—8, 80, o bisan 800—ang atong pisikal nga lawas magpabiling batan-on kaayo. Usa ka siyentipiko kas-a nagbanabana: “Sa usa ka tuig duolan sa 98 porsiyento sa atong mga atomo karon pulihan sa ubang mga atomo nga atong gipasulod sa lawas diha sa atong hangin, pagkaon, ug ilimnon.” Sa pagkatinuod, sumala sa pagdayeg ni David, kita “gihimo sa kahibulongang paagi.”—Salmo 139:14.
7. Pinasikad sa disenyo sa atong pisikal nga lawas, unsay gihinapos sa pipila?
7 Pinasikad sa disenyo sa atong pisikal nga lawas, usa ka awtoridad bahin sa pagkatigulang miingon: “Dili dayag kon nganong ang pagkatigulang mahitabo.” Morag kita mabuhi gayod sa walay kataposan. Ug mao kiniy hinungdan kon nganong ang mga tawo naningkamot sa pagkab-ot niining tumonga pinaagi sa ilang teknolohiya. Dili pa kaayo dugay kanhi, si Dr. Alvin Silverstein misulat nga masaligon diha sa iyang librong Conquest of Death: “Atong sulbaron ang kahulogan sa kinabuhi. Atong masabtan . . . kon sa unsang paagi matigulang ang tawo.” Uban sa unsang mga sangpotanan? Siya mitagna: “Wala nay mga ‘tigulang,’ kay ang kahibalo nga magtugot sa pagbuntog sa kamatayon magpahinabo usab ug walay-kataposang pagkabatan-on.” Sa pagkonsiderar sa modernong siyentipikanhong pagsusi sa pagkagama sa tawo, ang hunahuna ba sa walay-kataposang kinabuhi morag imposible kaayo? Dunay laing mas lig-on nga rason sa pagtuo nga ang walay-kataposang kinabuhi posible.
Ang Tinguha nga Mabuhi sa Walay Kataposan
8, 9. Unsang kinaiyanhong tinguha ang nabatonan sa mga tawo latas sa kasaysayan?
8 Nakamatikod ka ba gayod nga ang pagkabuhi sa walay kataposan maoy kinaiyanhong tinguha sa tawo? Usa ka doktor misulat diha sa usa ka Aleman nga magasin: “Ang pangandoy sa walay-kataposang kinabuhi lagmit sama ka tigulang sa tawo.” Naghubit sa gituohan sa karaang mga taga-Uropa, ang The New Encyclopædia Britannica nag-ingon: “Ang takos nga mga tawo mabuhi sa walay kataposan diha sa usa ka matahom nga palasyo nga inadornohag bulawan.” Ug, oh, pagkadaghang gihimo sa tawo sa paningkamot nga matagbaw kanang sukaranang tinguha sa walay-kataposang kinabuhi!
9 Ang The Encyclopedia Americana nag-ingon nga sa Tsina kapin sa 2,000 ka tuig kanhi, “ang mga emperador ug usab ang [ordinaryong] mga tawo, ubos sa pagpanguna sa Taoistang mga pari, mibiya sa trabaho aron sa pagpangita sa ilimnon sa kinabuhi”—usang gitawag nga tuboran sa pagkabatan-on. Sa pagkatinuod, latas sa kasaysayan, ang mga tawo nagtuo nga pinaagi sa pag-inom ug nagkalainlaing mga sinagol, o bisan sa pag-inom sa usa ka matang sa tubig, sila mahimong magpabiling batan-on.
10. Unsang modernong paningkamot ang gihimo aron makab-ot ang padayon nga pagkinabuhi?
10 Ang modernong mga paningkamot sa pagsulay sa pagtagbaw sa kinaiyanhong tinguha sa tawo alang sa walay-kataposang kinabuhi susamang talagsaon. Usa ka iladong pananglitan mao ang batasan sa pagpabagtik diha yelo sa tawong namatay gumikan sa sakit. Gihimo kini sa paglaom nga mahibalik ang kinabuhi sa usa ka umaabot nga panahon sa dihang ang tambal alang sa maong sakit nahimo na. Ang usa ka tigpasiugda niini nga batasan, nga gitawag ug cryonics, misulat: “Kon ang atong pagkamalaomon mapamatud-ang husto ug nahibaloan kon unsaon pagtambal o pag-ayo sa tanang kadaot—lakip na sa mga kaluyahon sa pagkatigulang—nan kadtong ‘mamatay’ karon duna unyay walay-kataposang padayon nga pagkinabuhi sa umaabot.”
11. Nganong ang mga tawo nagtinguha nga mabuhi sa walay kataposan?
11 Ngano, mangutana ka tingali, nga kining tinguhaa alang sa walay-kataposang kinabuhi natisok pag-ayo sa atong hunahuna? Tungod ba kini kay “gibutang [sa Diyos] ang pagkawalay-kataposan diha sa hunahuna sa tawo”? (Ecclesiastes 3:11, Revised Standard Version) Kini maoy usa ka butang nga seryosong palandongon! Hunahunaa ra: Nganong mabatonan nato ang kinaiyanhong tinguha nga mabuhi sa dayon—sa walay kataposan—kon dili katuyoan sa atong Maglalalang nga kining tinguhaa pagatagbawon? Ug mahigugmaon ba alang kaniya nga molalang kanato uban ang tinguha sa walay-kataposang kinabuhi ug unya pakyason kita pinaagi sa dili gayod pagtugot kanato nga makab-ot kanang maong tinguha?—Salmo 145:16.
Kinsay Angay Natong Saligan?
12. Unsang pagsalig ang nabatonan sa pipila, apan nagtuo ka ba nga lig-on kini?
12 Asa, o sa unsa, nga angay kitang mosalig aron sa pagbaton ug walay-kataposang kinabuhi? Sa ika-20- o ika-21ng-siglong teknolohiya sa tawo? Ang artikulo sa The New York Times Magazine nga “Buot Nilang Mabuhi” naghisgot bahin sa “diyos: teknolohiya” ug sa “kasibot mahitungod sa lagmit nga mahimo sa teknolohiya.” Usa ka tigdukiduki gikaingon gani nga “malipayong masaligon . . . nga ang mga paagi sa pagmaniobra sa genetika mahimong mabatonan sa dili madugay sa pagluwas [kanato] pinaagi sa pagpahunong sa pagkatigulang, tingali sa pagbali niana.” Apan, sa pagkatinuod ang tawhanong mga paningkamot napamatud-ang dili gayod epektibo sa pagpahunong sa pagkatigulang o sa pagbuntog sa kamatayon.
13. Sa unsang paagi ang pagkahimo sa atong utok nagpakita nga katuyoan nga kita mabuhi sa walay kataposan?
13 Nagpasabot ba kini nga walay paagi sa pagbaton ug walay-kataposang kinabuhi? Wala gayod! Dunay paagi! Ang pagkahimo sa atong kahibulongang utok, uban sa halos walay-kinutoban nga kapasidad niini sa pagkat-on, kinahanglang magkombinsir kanato niini. Ang biologo sa molekula nga si James Watson nagtawag sa atong utok nga “ang labing komplikadong butang hangtod karon nga atong nadiskobre sa atong uniberso.” Ug ang neurologo nga si Richard Restak miingon: “Walay bisan unsa sa nailhang uniberso ang kaamgid niana.” Nganong makabaton kitag utok nga dunay kapasidad sa pagpondo ug pagsagop ug halos walay-kinutoban nga impormasyon ug lawas nga gidisenyo sa pag-obra sa walay kataposan kon dili katuyoan nga kita makapahimulos ug walay-kataposang kinabuhi?
14. (a) Unsang konklusyon mahitungod sa kinabuhi sa tawo ang gipunting sa mga magsusulat sa Bibliya? (b) Nganong angay kitang mosalig sa Diyos ug dili sa tawo?
14 Nan, modangat kita sa unsang bugtong makataronganon, tinuod nga konklusyon? Dili ba nga kita gidisenyo ug gilalang sa usa ka gamhanan-sa-tanan, intelihenteng Magbubuhat aron kita mabuhi sa walay kataposan? (Job 10:8; Salmo 36:9; 100:3; Malaquias 2:10; Buhat 17:24, 25) Busa, dili ba maalamong tumanon nato ang dinasig nga sugo sa salmista sa Bibliya: “Ayaw ibutang ang imong pagsalig sa mga tawong hamili, ni sa anak sa tawo, kang kinsa walay kaluwasan”? Nganong dili mosalig sa tawo? Tungod kay, sumala sa gisulat sa salmista, “ang iyang espiritu mogula, siya mobalik sa yuta; nianang adlawa ang iyang hunahuna mahanaw.” Sa pagkatinuod, bisan pa sa posibilidad nga mabuhi sa walay kataposan, ang mga tawo walay-mahimo atubangan sa kamatayon. Ang salmista mihinapos: “Malipayon ang tawo . . . kansang paglaom anaa kang Jehova nga iyang Diyos.”—Salmo 146:3-5.
Katuyoan ba Gayod Kana sa Diyos?
15. Unsay nagpakita nga katuyoan sa Diyos nga kita mabuhi sa walay kataposan?
15 Apan mangutana ka tingali, Katuyoan ba gayod sa Diyos nga makapahimulos kita ug walay-kataposang kinabuhi? Oo, katuyoan gayod! Sa makadaghan ang iyang Pulong nagsaad niana. “Ang gasa nga ginahatag sa Diyos maoy kinabuhing walay-kataposan,” nagpasalig kanato ang Bibliya. Ang alagad sa Diyos nga si Juan misulat: ‘Mao kini ang sinaad nga butang nga gisaad mismo [sa Diyos] kanato, ang walay-kataposang kinabuhi.’ Dili katingad-an nga usa ka batan-ong lalaki ang nangutana kang Jesus: “Magtutudlo, unsang maayo ang kinahanglan kong buhaton aron makaangkon ug kinabuhing walay-kataposan?” (Roma 6:23; 1 Juan 2:25; Mateo 19:16) Sa pagkamatuod, si apostol Pablo misulat mahitungod sa “paglaom sa kinabuhing walay-kataposan nga gisaad sa Diyos, si kinsa dili makabakak, sa wala pa ang kapanahonan nga dugay nang naglungtad.”—Tito 1:2.
16. Sa unsang diwa nga ang Diyos nagsaad ug walay-kataposang kinabuhi “sa wala pa ang kapanahonan nga dugay nang naglungtad”?
16 Unsay kahulogan nga ang Diyos nagsaad ug walay-kataposang kinabuhi “sa wala pa ang kapanahonan nga dugay nang naglungtad”? Ang uban naghunahuna nga si apostol Pablo nagpasabot nga una pa ang unang magtiayon, si Adan ug Eva, gilalang, katuyoan sa Diyos nga ang mga tawo mabuhi gayod sa walay kataposan. Apan, kon gitumong ni Pablo ang usa ka yugto human ang mga tawo gilalang ug sa dihang si Jehova mipahayag sa iyang katuyoan, tin-aw gihapon nga ang kabubut-on sa Diyos naglakip ug walay-kataposang kinabuhi alang sa mga tawo.
17. Nganong si Adan ug Eva gipapahawa sa tanaman sa Eden, ug nganong ang mga kerubin gibutang diha sa ganghaan?
17 Ang Bibliya nag-ingon nga sa tanaman sa Eden, “si Jehova nga Diyos nagpatubo gikan sa yuta . . . sa kahoy sa kinabuhi.” Ang rason nga gihatag sa paghingilin kang Adan gikan sa tanaman maoy aron siya “dili motuy-od sa iyang kamot ug mokuha usab sa bunga gikan sa kahoy sa kinabuhi ug mokaon ug mabuhi”—oo, sa walay kataposan! Human papahawaa si Adan ug Eva gikan sa tanaman sa Eden, si Jehova nagbutang “sa mga kerubin ug sa nagsiga nga espada nga padayong nagalisoliso aron sa pagbantay sa dalan ngadto sa kahoy sa kinabuhi.”—Genesis 2:9; 3:22-24.
18. (a) Unsa untay kahulogan sa pagkaon gikan sa kahoy sa kinabuhi alang kang Adan ug Eva? (b) Unsay gihawasan sa pagkaon gikan nianang kahoya?
18 Kon si Adan ug Eva gitugotan sa pagkaon gikan sa maong kahoy sa kinabuhi, unsa untay kahulogan niana alang kanila? Aw, ang pribilehiyo nga mabuhi sa walay kataposan sa Paraiso! Usa ka eskolar sa Bibliya mibanabana: “Ang kahoy sa kinabuhi lagmit gayod nga dunay gahom nga niana ang lawas sa tawo makalingkawas sa kaluyahon sa pagkatigulang, o sa pagkadunot nga matapos sa kamatayon.” Miangkon gani siya nga “dihay hilba sa paraiso nga makaarang sa pagsanta sa mga epekto” sa pagkatigulang. Apan, ang Bibliya wala mag-ingon nga ang kahoy sa kinabuhi mismo may nagahatag-kinabuhi nga mga katakos. Hinunoa, kanang kahoya naghawas lamang sa garantiya sa Diyos nga walay-kataposang kinabuhi ngadto sa usa nga tugotan sa pagkaon sa bunga niini.—Pinadayag 2:7.
Wala Mausab ang Katuyoan sa Diyos
19. Nganong namatay si Adan, ug nganong kita, nga iyang mga anak, mamatay usab?
19 Sa dihang nakasala si Adan, nawad-an siya sa katungod sa walay-kataposang kinabuhi alang sa iyang kaugalingon ug alang sa tanan niyang wala-pa-matawong mga anak. (Genesis 2:17) Sa dihang nahimo siyang makasasala tungod sa iyang pagkamasinupakon, nahimo siyang depektoso, dili-hingpit. Sukad niadtong panahona, ang lawas ni Adan nahimong, sa pagkatinuod, gitino nga mamatay. Sumala sa giingon sa Bibliya, “ang suhol nga ginabayad sa sala maoy kamatayon.” (Roma 6:23) Dugang pa, ang dili-hingpit nga mga anak ni Adan nahimong gitino usab nga mamatay, dili mabuhi sa walay-kataposan. Ang Bibliya mipatin-aw: “Pinaagi sa usa ka tawo [si Adan] ang sala misulod sa kalibotan ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala.”—Roma 5:12.
20. Unsay nagpakita nga katuyoan nga ang mga tawo mabuhi sa walay kataposan sa yuta?
20 Apan unsa na man kon wala makasala si Adan? Unsa na man kon wala siya mosupak sa Diyos ug gitugotan siya nga mokaon sa kahoy sa kinabuhi? Asa unta kita makapahimulos sa gasa sa Diyos nga walay-kataposang kinabuhi? Sa langit? Dili! Walay giingon ang Diyos nga si Adan gidala sa langit. Ang gihatag kaniya nga trabaho maoy dinhi sa yuta. Ang Bibliya nagsaysay nga “si Jehova nga Diyos nagpatubo gikan sa yuta sa tanang kahoy nga tilinguhaon sa panan-aw ug maayong kaonon,” ug kini miingon: “Si Jehova nga Diyos mikuha sa tawo ug nagbutang kaniya sa tanaman sa Eden aron sa pagtikad niana ug pag-atiman niana.” (Genesis 2:9, 15) Human lalanga si Eva ingong kapikas ni Adan, ang duha gihatagag dugang mga trabaho dinhi sa yuta. Giingnan sila sa Diyos: “Magmabungahon kamo ug sumanay kamo ug pun-on ninyo ang yuta ug magagahom kamo niini, ug magbaton kamo ug pagbulot-an sa ibabaw sa isda sa dagat ug sa nanaglupad nga mga linalang sa kalangitan ug sa tanang buhing linalang nga nagakamang sa ibabaw sa yuta.”—Genesis 1:28.
21. Unsang kahibulongang mga palaaboton ang napahimuslan sa unang mga tawo?
21 Hunahunaa ang kahibulongang yutan-ong mga palaaboton nga gibuksan niadtong maong mga instruksiyon gikan sa Diyos alang kang Adan ug Eva! Magmatuto silag hingpit-ug-panglawas nga mga anak nga lalaki ug babaye sa yutan-ong Paraiso. Samtang mohingkod na ang ilang hinigugmang mga anak, sila makig-ambit uban kanila sa pagkamabungahon ug sa pagbuhat ug makapahimuot nga buluhaton sa tanaman sa pagmentinar sa maong Paraiso. Nga ang tanang mananap magpasakop kanila, ang tawo magmatagbawon gayod. Hunahunaa ra ang kangaya sa pagpalapad sa mga utlanan sa tanaman sa Eden aron nga sa ngadtongadto ang tibuok yuta mahimong usa ka paraiso! Malipay ka ba sa pagkinabuhi uban ang hingpit nga mga anak nianang matahom nga yutan-ong pinuy-anan, nga walay mga kabalaka bahin sa pagkatigulang ug pagkamatay? Pasagdi ang kinaiyanhong mga kiling sa imong kasingkasing nga motubag nianang pangutanaha.
22. Nganong makaseguro kita nga ang Diyos wala mag-usab sa iyang katuyoan alang sa yuta?
22 Buweno, sa dihang si Adan ug Eva misupak ug gipapahawa sa tanaman sa Eden, giusab ba sa Diyos ang iyang katuyoan alang sa mga tawo nga mabuhi sa walay-kataposan sa Paraiso sa yuta? Wala gayod! Kon buhaton kana sa Diyos kana maoy pagdawat sa kapildihan bahin sa iyang katakos sa pagtuman sa iyang orihinal nga katuyoan. Makaseguro kita nga ang Diyos mobuhat sa kon unsay iyang gisaad, kay siya mismo mipahayag: “Mao man usab ang akong pulong nga mogula gikan sa akong baba kini mamatuman. Kini dili mobalik kanako nga walay mga resulta, kondili nga kini magabuhat sa akong gikahimut-an, ug kini mopalampos sa butang nga tungod niana kini akong gipadala.”—Isaias 55:11.
23. (a) Unsay dugang nagpalig-on nga katuyoan sa Diyos nga ang mga mahiligon sa pagkamatarong mabuhi sa walay kataposan sa yuta? (b) Unsay atong hisgotan sa sunod?
23 Nga ang katuyoan sa Diyos alang sa yuta wala mausab gitin-aw diha sa Bibliya, diin ang Diyos nagsaad: “Ang mga matarong mismo magapanunod sa yuta, ug sila magapuyo sa ibabaw niana sa walay kataposan.” Bisan si Jesu-Kristo miingon sa iyang Wali sa Bukid nga ang mga maaghop makapanunod sa yuta. (Salmo 37:29; Mateo 5:5) Apan, sa unsang paagi kita makabaton ug walay-kataposang kinabuhi, ug unsay angay natong buhaton sa pagpahimulos sa maong kinabuhi? Pagahisgotan kini sa mosunod nga artikulo.
Unsaon Nimo Pagtubag?
◻ Nganong daghan ang nagtuo nga posible ang walay-kataposang kinabuhi?
◻ Unsay angayng magkombinsir kanato nga katuyoan nga kita mabuhi sa walay kataposan?
◻ Unsay orihinal nga katuyoan sa Diyos alang sa tawo ug sa yuta?
◻ Nganong makatino kita nga ang Diyos magatuman sa iyang orihinal nga katuyoan?