Mga Palaaboton sa Paraiso Angay Bisan pa sa Pagkamasukihon sa Tawo
1. Sa paglabay sa panahon, diin nakita ang unang lalaki ug babaye ug diha sa unsang palibot?
ANG panahon milabay. Ang unang lalaki ug babaye dili na inosente sa ilang pagkahubo. Sila nasapotan na—sa tag-as nga bisteng panit sa hayop. Sila didto sa gawas sa ganghaan sa hingpit nga tanaman sa Eden. Sila nagtalikod sa tanaman. Gitan-aw nila ang talan-awon sa ilang unahan. Ang wala-matikad nga dapit mao lang ang ilang nakita. Dayag nga wala kana mapanalangini sa Diyos. Sa ilang atubangan ang katunokan ug kasampinitan nakita. Dili ba kini ang yuta nga gisugo nga ilang pagadag-on? Oo, apan ang unang lalaki ug babaye wala na didto sa tuyo nga pakaylapon ang tanaman sa Eden ngadto nianang wala-matikad nga yuta.
2. Nganong ang lalaki ug babaye wala mosulay sa pagsulod pag-usab sa Paraisong tanaman?
2 Sa maong kaatbang nga talan-awon, nganong wala sila moliso ug mosulod na usab sa Paraisong tanaman? Sayon nga isugyot, apan tan-awag unsay diha sa ilang likod sa ganghaan sa tanaman. Mga linalang nga wala pa nila sukad igkita, bisan sulod sa tanaman, ang mga kerubin, ug ang nagsigang sulab sa espada nga padayong nagatuyok sa kaugalingon. Ang lalaki ug ang babaye dili makaagi niana nga buhi pasulod sa tanaman!—Genesis 3:24.
3. Unsay nahitabo nga nausab kaayo ang kahimtang sa unang magtiayon?
3 Unsay nahitabo? Kini dili misteryo nga komplikado kaayo nga makalibog sa siyensiya sa kaliboan ka katuigan. Kini yanong gisaysay. Ang unang lalaki ug babaye nakabaton sa kahibulongang mga palaaboton nga gibutang sa sugo sa Diyos sa ilang atubangan sa adlaw sa ilang kaminyoon apan sa kondisyon nga magmasinugtanon sila sa ilang langitnong Amahan sa labing gamayng butang. Ang ilang hingpit nga pagkamasinugtanon pagasulayan sa pagdili sa usa ka pagkaon: Dili sila magakaon sa bunga sa “kahoy sa kahibalo sa maayo ug daotan.” (Genesis 2:16, 17) Kon mokaon sila nga supak sa mga mando sa Diyos, sila tinong mamatay. Kana ang gisulti ni Adan, ingong propeta sa Diyos, ngadto sa iyang asawa, ang mas batang tawhanong linalang. Apan katingalahan, kadtong na·chashʹ, kadtong bitin, wala motuo sa kamatuoran sa gisulti sa Diyos kang Adan sa Iyang pasidaan batok sa pagkaon sa gidiling “kahoy sa kahibalo sa maayo ug daotan.” Gilimbongan sa bitin ang babaye ngadto sa pagtuo nga ang paglapas sa kasugoan sa Diyos ug ang pagkaon sa gidiling bunga mosangpot sa iyang pagkahimong sama sa Diyos ug maghimo kaniyang independente gikan sa Diyos aron sa paghukom kon unsay maayo ug kon unsay daotan.—Genesis 3:1-5.
Dili Tinumotumong Asoy
4, 5. Sa unsang paagi gipakita ni apostol Pablo nga ang asoy sa paglimbong sa bitin sa unang babaye dili tinumotumo?
4 Dili katuohan? Mopatim-aw bang sama kaayo sa usa ka sugilambong, usa ka estoryang dili tinuod nga wala ipasukad sa tinuod nga mga hitabo ug busa dili madawat sa nalamdagang hamtong nga mga kaisipan karon? Dili, dili alang sa kaylap gihapong gibasa nga magsusulat, usa ka kasaligang magsusulat, usa ka apostol nga linaing pagkapili, kinsa nasayod sa katukma sa iyang gisulat. Ngadto sa kongregasyon sa hamtong nga mga Kristohanon sa maalamon-sa-kalibotang siyudad sa Corinto, ang maong apostol Pablo misulat: “Ako nahadlok nga basi, maingon nga ang bitin nagpanulay kang Eva tungod sa pagkamalalangon niini, ang inyong mga hunahuna basin madaot nga mahilayo sa katim-os ug kaputli nga iya ni Kristo.”—2 Corinto 11:3.
5 Si Pablo wala magtumong sa usa ka kasugiran, usa ka sugilambong, ug gamiton ang maong hinandurawng butang sa paghimo sa iyang punto uban niadtong mga taga-Corinto, kinsa nasinati kaayo sa mga kasugiran sa paganong Gregong relihiyon. Sa pagkutlo gikan sa dinasig Hebreohanong Kasulatan, nga iyang gipahayag nga “ang pulong sa Diyos,” gipamatud-an ni Pablo nga “ang bitin nanulay kang Eva tungod sa pagkamalalangon niini.” (1 Tesalonica 2:13) Dugang pa, sa nagsulat ngadto sa Kristohanong magtatan-aw nga gitugyanan sa katungdanan sa pagtudlo sa “sumbanan sa maayong mga pulong,” si apostol Pablo miingon: “Si Adan mao ang unang gibuhat, dayon si Eva. Gawas pa, si Adan wala malimbongi, apan ang babaye sa bug-os nalimbongan ug nakasala.”—2 Timoteo 1:13; 1 Timoteo 2:13, 14.
6. (a) Sa unsang paagi ang paglapas ni Adan sa Diyos lahi sa iya sa babaye? (b) Nganong kita makatino nga ang babaye wala magmaomao sa estorya bahin sa bitin?
6 Ang pagkanalimbongan sa babaye pinaagi sa bitin maoy usa ka tinuod nga hitabo, dili tumotumo, sama ra ka tino nga ang sangpotanan sa iyang masukihong pagkaon gikan sa gidiling bunga maoy mapait nga mga kamatuoran sa kasaysayan. Busa tapos makalapas sa Diyos, gihaylo niya ang iyang bana nga moduyog niya sa pagkaon, apan ang iyang pagkaon maoy dili tungod kay siya nalimbongan usab sa bug-os. (Genesis 3:6) Ang asoy sa pagsudya sa Diyos kanila sa ulahi nagaingon: “Ug ang lalaki miingon: ‘Ang babaye nga imong gihatag aron mahauban kanako, siya ang naghatag kanako sa bunga gikan sa kahoy ug mao nga ako mikaon.’ Niana si Jehova nga Diyos miingon ngadto sa babaye: ‘Unsa ba kining inyong gibuhat?’ Niini ang babaye mitubag: ‘Ang bitin—kini naglimbong kanako ug mao nga ako mikaon.’” (Genesis 3:12, 13) Ang babaye wala magmaomao sa usa ka estorya bahin niadtong na·chashʹ, niadtong bitin, ug si Jehova nga Diyos wala mag-isip sa iyang katin-awan nga usa ka minaomao, usa ka tumotumo. Giisip niya kadtong bitin ingong instrumento sa paglimbong sa babaye mao nga nakalapas batok Kaniya, ang iyang Diyos ug Maglalalang. Dili angayan sa kahalangdon sa Diyos nga tagdon ang tinumotumo lamang nga bitin.
7. (a) Giunsa pagbatbat sa asoy sa Bibliya ang paghukom sa Diyos sa bitin? (b) Sa unsang paagi ang bitin nga naglimbong sa unang babaye makalimbong usab kanato? (Iapil ang komento diha sa potnot.)
7 Sa pagbatbat sa paghukom sa Diyos niadtong bitin sa tanaman sa Eden, ang asoy nagaingon: “Ug si Jehova nga Diyos miingon ngadto sa bitin: ‘Tungod kay gibuhat mo kini, ikaw tinunglo sa tanan nga gipaaghop nga kahayopan ug sa tanang mapintas nga mananap sa kapatagan. Ikaw magakamang sa imong paglakaw ug ang abog mao ang imong pagakan-on sa tanang adlaw sa imong kinabuhi. Ug igabutang ko ang panagkaaway tali kanimo ug sa babaye ug tali sa imong binhi ug sa iyang binhi. Siya magasamad kanimo sa ulo ug ikaw magasamad kaniya sa tikod.’” (Genesis 3:14, 15) Ang bisan unsang ugdang nga hukmanan magatagad sa tinuod nga mga hitabo ug magapinig sa tinuod nga ebidensiya, dili sa mga tumotumo. Si Jehova nga Diyos wala maghimo sa iyang kaugalingon nga buangbuang, hungog, pinaagi sa pagtumong sa iyang pagsilot ngadto sa tinumotumong bitin kondili nagpakanaog sa hukom diha sa tinuod, naglungtad nga linalang nga masudyaan. Kini mahimong, dili kataw-anan, apan makaluluoy kon ang mao mismong bitin naglimbong kanato sa paghunahuna nga siya wala gayod maglungtad, nga siya tinumotumo lamang, nga siya dili paninglon tungod sa kadaotan sa yuta.a
8. Unsang hukom ang gipakanaog sa Diyos diha sa babaye, ug uban ang unsang sangpotanan alang sa iyang mga anak babaye ug mga apong babaye?
8 Sa pag-isip sa pamulong sa babaye nga naglangkit sa bitin ingong usa ka kamatuoran, ang rekord mahitungod sa asawa sa lalaki nagaingon: “Ngadto sa babaye siya miingon: ‘Padaghanon ko ang kasakit sa imong pagpanamkon; sa mga kasakit sa pagpanganak ikaw manganak, ug ang imong pangandoy maoy alang sa imong bana, ug siya magabuot kanimo.’” (Genesis 3:16) Walay ingon niini ang nahiapil sa pagpanalangin sa Diyos sa iyang pagkaminyo kang Adan sa dihang ang Diyos miingon kanila: “Sumanay ug dumaghan kamo ug pun-on ninyo ang yuta.” (Genesis 1:28) Kanang bulahang sugo sa hingpit tawhanong magtiayon nagpailag daghan nga pagpanamkon alang sa babaye apan walay hinobrang kasakitan ug labihang kasakitan sa pagpanganak ug walay pagdaugdaog kaniya sa bana. Ang hukom nga gipahamtang diha sa malapasong babaye magaapektar sa iyang mga anak babaye ug mga apong babaye sa sunodsunod nga kaliwatan.
Kasugoan sa Diyos Gipadako Tungod sa Pagsilot Kang Adan
9, 10. (a) Unsang pasidaan ang gihatag sa Diyos nga direkta kang Adan, ug unsa unya ang sangpotanan kon tumanon sa Diyos ang maong silot? (b) Unsang hukom ang gihatag sa Diyos batok kang Adan?
9 Apan, unsang nabag-ong mga kahimtang ang maambitan sa babaye uban sa lalaki nga iyang gihaylo sa pagduyog niya sa paglapas? Ngadto sa maong lalaki, ang Diyos laktud miingon: “Mahitungod sa kahoy sa kahibalo sa maayo ug daotan dili kamo magakaon gikan niana, kay sa adlaw nga kamo mokaon gikan niana kamo mamatay gayod.” (Genesis 2:17) Ang Diyos, nga Maghuhukom, magatuman ba sa kinalabwang silot tungod lamang sa pagkaon ni Adan sa usa ka bunga? Hunahunaa kon unsay kahulogan sa maong pagpatuman sa maong silot! Kana sa kaugalingon mogun-ob nianang makapatandog nga kalaoman nga gihambin ni Adan ug Eva sa adlaw sa ilang kaminyoon, ang kalaoman nga pun-on ang tibuok yuta sa ilang mga liwat, uban sa hingpit tawhanong banay nga magapuyong malinawon sa usa ka paraisong yuta sa walay kataposan sa pagkabatan-on nga dayon, diha sa malinawong relasyon uban sa ilang Diyos ug langitnong Amahan! Sa pagkamatuod, dili pakyason sa Diyos ang iyang kahibulongang katuyoan alang sa katawhan ug alang sa yutan-ong pinuy-anan sa tawo pinaagi sa pig-ot nga pagpatuman sa silot nga kamatayon diha sa unang tawhanong mga ginikanan sa tanang tawo! Apan pamati sa balaang hukom sumala sa tin-awng nahitala diha sa asoy sa Bibliya:
10 “Ug kang Adan siya miingon: ‘Tungod kay nagpatalinghog ka sa tingog sa imong asawa ug mikaon gikan sa kahoy nga mahitungod niini gihatag ko kining sugoa, “Dili ka magakaon gikan niini,” tinunglo ang yuta tungod kanimo. Sa kasakit ikaw magakaon sa abot niini sa tanang adlaw sa imong kinabuhi. Ug kini magapatubo alang kanimo sa katunokan ug kasampinitan, ug magakaon ka sa talamnon sa kapatagan. Sa singot sa imong nawong magakaon ka sa tinapay hangtod nga ikaw mobalik sa yuta, kay gikan niana ikaw gikuha. Kay abog ka ug sa abog ka mobalik.’”—Genesis 3:17-19.
11. Unsang mga kamatuoran mahitungod sa pagkamasinugtanon ang nagailustrar sa pagkaangay sa hukom sa Diyos batok kang Adan?
11 Ang maong paghukom nagkahulogan sa pagpatuman sa silot nga kamatayon diha sa tawo bisan unsay sangpotanan ngadto sa katuyoan sa Diyos nga pun-on ang paraisong yuta sa hingpit nga mga lalaki ug mga babaye nga mahigugmaon ug malinawong magapuyo sa tingob ug magatikad sa walay kataposan ug magaatiman sa tibuok-yutang Paraisong tanaman. Ang lalaki namati sa tingog sa iyang asawa inay sa tingog sa Diyos nga nagsugo niya nga dili mokaon gikan sa gidiling “kahoy sa kahibalo sa maayo ug daotan.” Ug kon siya mismo wala magsugot sa tingog sa iyang Diyos ug Maglalalang, siya ba sa walay-pagsumpaki magatudlo sa iyang mga anak sa pagbuhat niana? Ang iya bang kaugalingong panig-ingnan mahimong puntong hisgotanan sa pagtudlo kanila sa pagsugot kang Jehova nga Diyos?—Itandi ang 1 Samuel 15:22.
12, 13. (a) Sa unsang paagi ang sala ni Adan makaapektar sa iyang mga anak? (b) Nganong si Adan dili angay mabuhing walay kataposan sa Paraiso o bisan sa yuta?
12 Ang mga anak ba ni Adan makaarang sa pagsunod sa hingpit sa kasugoan sa Diyos, sama sa iyang nahimo sa nangagi diha sa iyang tawhanong pagkahingpit? Sumala sa paglihok sa mga balaod sa panulondon, dili ba niya ipasa ang iyang kahuyangan ug hilig sa pagsupak sa tingog sa Diyos ug mamati sa laing tingog? Ang matuod nga kasaysayan nagatagana sa mga tubag sa maong mga pangutana.—Roma 5:12.
13 Ang mao bang tawo si kinsa, tungod lamang sa usa ka tawhanong linalang, mitalikod sa hingpit nga pagkamasinugtanon ngadto sa Diyos ingong ekspresyon sa hingpit nga gugma sa Diyos takos mabuhi sa walay kataposan sa Paraiso o bisan na lamang sa yuta? Luwas ba kaha bisan ang pagtugot kaniya nga mabuhi sa yuta sa walay kataposan? Ang pagtugot ba kaniya nga mabuhing walay kataposan sa yuta diha sa iyang kalapasan magpadako sa kasugoan sa Diyos ug magpasundayag sa Iyang absolutong hustisya, o magtudlo ba kanag kawalay-tahod sa kasugoan sa Diyos ug magpasabot nga ang pulong sa Diyos dili kasaligan?
Gipadlas Gikan sa Tanaman sa Eden
14. Giunsa sa pagbatbat sa talaan sa Bibliya ang pagsilot sa Diyos kang Adan ug sa iyang asawa?
14 Ang talaan sa Bibliya nagasugid kanato sa unsang paagi ang Diyos naghukom niining mga butanga: “Ug si Jehova nga Diyos nagbuhat ug hatag-as nga mga biste sa panit sa hayop alang kang Adan ug sa iyang asawa ug nagbiste kanila. Ug si Jehova nga Diyos miingon: ‘Ania karon, ang tawo nahimong sama kanato sa pagkaila sa maayo ug sa daotan, ug karon aron siya dili makatuy-od sa iyang kamot ug makakuha usab sa bunga gikan sa kahoy sa kinabuhi ug makakaon ug mabuhi sa panahong walay katinoan,—’ Niana si Jehova nga Diyos nagpagawas kaniya sa tanaman sa Eden aron tikaron ang yuta nga gikan niana siya gikuha. Ug busa gipadlas niya ang tawo ug gibutang sa sidlakan sa tanaman sa Eden ang mga kerubin ug ang nagsigang sulab sa espada nga kanunayng nagtuyok aron sa pagbantay sa dalan paingon sa kahoy sa kinabuhi.”—Genesis 3:21-24.
15. (a) Giunsa sa Diyos pagpakitag konsiderasyon sa pagbati sa kaulaw ni Adan ug sa iyang asawa tungod kay hubo? (b) Sa unsang paagi ang unang magtiayon gipadlas gikan sa tanaman sa Eden? (c) Unsang nabalhing kahimtang ang giatubang ni Adan ug sa iyang asawa sa gawas sa tanaman sa Eden?
15 Ang balaang Maghuhukom nagpakitag konsiderasyon sa pagbati sa kaulaw nga sa maong panahon gibati sa mga makasasalang si Adan ug sa iyang asawa tungod kay hubo. Sa usa ka paagi nga wala ipahayag, iyang gitagan-an silag hatag-as nga mga biste sa panit sa hayop ilis sa tapis nga mga dahon sa igos nga ilang gitahi sa ilang kaugalingon. (Genesis 3:7) Ang bisteng panit sa hayop mas malungtaron ug maghatag nilag labawng panalipod batok sa tunok ug sampinit ug ubang makatusok nga mga butang sa gawas sa tanaman sa Eden. Tungod kay nagbatog daotang konsensiya tapos makasala, misulay sila sa pagtago aron dili hikit-an sa Diyos taliwala sa kakahoyan sa tanaman sa Eden. (Genesis 3:8) Karon, tapos masiloti, naagoman nila ang usa ka matang sa balaanong pagpiit tungod kay gipadlas sa Diyos gikan sa tanaman. Gipadlas sila paingon sa silangan, ug sa wala madugay sila nahigawas na sa tanaman, nga sa walay kataposan gidid-an sa pagsulod niana. Dili na sila magbuhat aron padak-on ang maong tanaman ug pakaylapon ang Paraisong mga kahimtang ngadto sa kinatumyan sa yuta. Sukad niadto, sila magakaon ug tinapay nga ginama gikan sa talamnon sa kapatagan, apan kana dili magsustento kanila sa walay kataposan sa tawhanong kinabuhi. Sila giputol gikan sa “kahoy sa kinabuhi.” Tapos sa pila ka panahon—unsa ka dugay?—sila mamatay gayod!
Dili-Mapakyas nga Unang Katuyoan ni Jehova
16. Unsay wala tuyoa sa Diyos nga buhaton, ug ngano?
16 Ang Diyos mihukom ba sa paglaglag sa yuta, uban sa bulan ug sa adlaw ug mga bituon, diha sa tibuok-kalibotang sunog tungod kay nakasala batok kaniya ang maong duha ka linalang nga gikan sa abog? Kon iyang buhaton kana, dili ba kana magkahulogan nga napakyas siya sa iyang mahimayaong katuyoan, ang tanan tungod sa gisugdan sa usa ka na·chashʹ? Ang usa lamang ka bitin makabungkag ba sa tibuok katuyoan sa Diyos? Gipadayag niya ang iyang katuyoan ngadto kang Adan ug Eva sa adlaw sa ilang kaminyoon sa gipanalanginan niya sila ug gisultihan kon unsa ang iyang kabubut-on alang kanila: ang pagpuno sa tibuok yuta sa hingpit tawhanong kabanayan, uban sa tibuok yuta nga gigamhan ngadto sa kahingpitan sa tanaman sa Eden, ug uban sa tanang tawo nga malinawong nagsakop sa tanang ubos nga linalang sa yuta ug sa katubigan niini. Usa ka magilakong panan-awon sa katuyoan sa Diyos nalampos, nga ang pagpangandam niana iyang gihimo sa unom ka adlaw nga buhat sa pagpanglalang latas sa yugtong linibo ka katuigan! Ang mao bang dalayegong katuyoan karon dili matuman tungod lamang sa usa ka bitin ug pagkamasukihon sa unang tawhanong magtiayon? Dili gayod!—Itandi ang Isaias 46:9-11.
17. Unsay gihukom sa Diyos nga buhaton bahin sa adlaw nga ikapito, ug busa sa unsa mosangpot kining adlawa?
17 Kadto adlaw gihapon nga igpapahulay, ang adlaw nga ikapito, ni Jehova nga Diyos. Gihukom niya nga panalanginan kanang adlawa ug balaanon. Dili niya itugot nga may maghimo niana nga tinunglong adlaw, ug ang bisan unsang tunglo nga ilaraw ni bisan kinsa nga ipahamtang nianang adlaw sa iyang pahulay iyang supakon ug himoon nga panalangin, nga himoon kanang adlawa mosangpot nga binulahan. Kana magbilin sa tibuok nga yuta nga usa ka balaang dapit, uban sa kabubut-on sa Diyos nga mamatuman dinhi sa yuta maingon nga kini natuman sa langit, ug kini pinaagi sa kabanayan sa hingpit nga mga tawo.—Itandi ang Mateo 6:10.
18, 19. (a) Nganong ang nagaantos nga mga kaliwat sa makasasalang unang magtiayon makamaya? (b) Unsay hisgotan sa umaabot nga mga lindog sa Ang Bantayanang Torre?
18 Ang Diyos wala mobating pakyas. Siya wala magbiya sa iyang katuyoan. Gihukom niya nga bayawon ang iyang kaugalingon ingong sa bug-os Usang kasaligan nga nagatuyo ug nagatuman kon unsay iyang ginatuyo, uban sa bug-os angayang pasidungog sa iyang kaugalingon. (Isaias 45:18) Ang dili-hingpit, nagaantos nga mga kaliwat sa makasasalang unang magtiayon makamaya ug makapanglantaw sa unahan sa matinumanong pagtuman sa Diyos sa iyang orihinal nga katuyoan uban ang walay-kataposang kaayohan alang kanila. Nga nahitabo na, ang mga milenyo sa iyang adlawng igpapahulay milabay na, ug ang kataposang bahin nianang adlawa nga magbaton sa iyang linaing panalangin haduol na gayod. Ang “gabii” sa iyang adlaw nga igpapahulay umalagi, ug sama sa tanang nag-unang unom ka adlaw sa paglalang, ang “buntag” kinahanglang moabot. Sa diha nga kining “buntag” makaabot sa iyang kahingpitan ug magpadayag sa bug-os sa tanang tumatan-aw sa mahimayaong pagkatuman sa wala-mabalhing katuyoan sa Diyos, posible nga kini itala: ‘Ug may kagabhion ug may kabuntagon, ang adlaw nga ikapito.’ Kahibulongan gayod nga palaaboton!
19 Kining tanan lalim nga palandongon! Ug sa umaabot nga mga lindog sa Ang Bantayanang Torre, daghan pa ang igasulti mahitungod sa kahimut-anang mga palaaboton sa Paraiso sa unahan alang sa masinugtanong mga tawo, nga mga nahigugma sa kasugoan sa Diyos.
[Mga Footnote]
a Sa Pinadayag 12:9, si Satanas nga Yawa gipaila ingong “ang unang bitin”; ug sa Juan 8:44, si Jesu-Kristo naghisgot kaniya ingong “ang amahan sa bakak.”
Unsay Imong Ikasulti?
◻ Nganong ang unang tawhanong magtiayon nawad-an sa ilang Paraisong pinuy-anan?
◻ Nganong nahibalo kita nga ang pagkanalimbongan ni Eva pinaagi sa usa ka bitin dili tinumotumo?
◻ Unsang silot ang gipamulong sa Diyos diha sa babaye?
◻ Unsang silot ang gipamulong sa Diyos diha kang Adan, ug nganong kadto nagpadako sa kasugoan sa Diyos?
◻ Nganong ang Diyos wala mobatig kapakyasan bahin sa iyang katuyoan nga pun-on ang yuta sa hingpit nga mga tawo diha sa Paraiso?