Si Jehova Maghupay Kanato sa Tanan Natong Kalisdanan

1, 2. Giunsa ta paghupay ni Jehova sa atong mga kalisdanan, ug unsang pasalig ang gitagana sa iyang Pulong?

USA ka batan-ong brader nga tawgon natog Eduardo ang nakig-estorya sa usa ka hamtong nga minyong ansiyano nga si Stephen. Gihunahuna ni Eduardo ang 1 Corinto 7:28: “Sila nga [magminyo] makaagom ug kasakitan sa ilang unod.” Nangutana siya, “Unsa man ni nga ‘kasakitan,’ ug unsaon man nako ni pagsagubang kon maminyo ko?” Sa wala pa tubaga ni Stephen kanang pangutanaha, iyang gihangyo si Eduardo nga tagdon ang ubang gisulat ni apostol Pablo, nga mao, si Jehova “ang Diyos sa tanang paghupay, . . . nagahupay kanamo sa tanan namong kasakitan.”​—2 Cor. 1:3, 4.

² Si Jehova usa gayod ka mahigugmaong Amahan, ug siya nagahupay nato dihang makaatubang tag kalisdanan. Tingali naeksperyensiyahan nimo mismo ang pagtabang ug paggiya sa Diyos, sagad pinaagi sa iyang Pulong. Makaseguro ta nga gusto gyod niya ang labing maayo para kanato, sama sa iyang gihimo sa iyang mga alagad kaniadto.​—Basaha ang Jeremias 29:11, 12.

 3. Unsang mga pangutana ang atong tubagon?

³ Siyempre, mas masagubang nato ang mga problema ug kalisdanan kon mahibaloan nato ang hinungdan niini. Ug tinuod kana kon bahin sa kalisdanan diha sa kaminyoon o sa pamilya. Busa, unsa ang pipila ka realidad nga lagmit maoy hinungdan sa ‘kasakitan sa unod’ nga gihisgotan ni Pablo? Unsang mga ehemplo kaniadto ug karon ang makatabang nato aron makaplagan ang kahupayan nga atong gikinahanglan? Ang mga tubag niini makatabang nato sa paglahutay.

4, 5. Unsa ang pipila ka hinungdan sa ‘kasakitan sa unod’?

⁴ Atong mabasa ang giingon sa Diyos sa sinugdan sa kasaysayan sa tawo: “Ang lalaki mobiya sa iyang amahan ug sa iyang inahan ug siya kinahanglang moipon sa iyang asawa ug sila mahimong usa ka unod.” (Gen. 2:24) Gisulti kana ni Jehova dihang iyang gikasal ang unang tawo. Apan, sa dili hingpit nga kahimtang, ang pagminyo ug pagtukod ug bag-ong pamilya makapatungha usahay ug problema. (Roma 3:23) Siyempre, ang awtoridad sa ginikanan mapulihan sa awtoridad sa bana. Giawtorisahan siya sa Diyos nga mahimong ulo sa iyang asawa. (1 Cor. 11:3) Ang pipila ka bag-ong minyo naglisod niining bahina. Sumala sa Pulong sa Diyos, angayng dawaton sa asawa nga kinahanglan siyang magpasakop sa iyang bana imbes sa iyang ginikanan. Makapahinabo usab ug kalisdanan ang dili pagsinabtanay tali sa bag-ong minyo ug sa ilang mga ugangan ug bayaw.

⁵ Ang laing kabalaka sagad motungha dihang moingon ang asawa, “Mabdos ko.” Sagad, ang ilang kalipay bahin sa ilang umaabot nga anak masagolag gamayng kabalaka bahin sa pagpadoktor panahon sa pagmabdos o human niana. Ug angay sab konsiderahon ang mga galastohan​—sa pagkakaron ug sa umaabot. Dugang pagpasibo ang kinahanglang himoon dihang manganak na. Ang panahon ug atensiyon sa inahan mahimong mapokus na sa pag-atiman sa bata. Daghang bana ang mibating gibalewala kay ang asawa nagkapuliki sa pag-atiman sa ilang anak. Sa laing bahin, ang amahan mag-abagag bag-ong responsabilidad. Mas modako ang iyang obligasyon kay naa nay bag-ong membro sa pamilya nga kinahanglang atimanon ug tagan-an.

6-8. Sa unsang paagi makapaguol ang wala matumang pangandoy nga manganak?

⁶ May lain pang kalisdanan ang pipila ka magtiayon. Nangandoy silag anak pero wala kini matuman. Kon ang asawa dili mamabdos, maguol tingali siya pag-ayo. Wala magpasabot nga dili na ka mabalaka kon ikaw minyo o may anak, apan ang wala matumang pangandoy nga makabatog anak matawag sab ug ‘kasakitan sa unod.’ (Prov. 13:12) Kaniadto, ang pagkabaog usa ka dakong kaulawan. Si Raquel nga asawa ni Jacob mipahayag sa iyang grabeng kaguol sa pagkakita sa iyang igsoon nga may mga anak. (Gen. 30:1, 2) Ang mga misyonaryo nga naasayn sa mga nasod diin kostumbre ang pagbatog dagkong pamilya sagad pangutan-on kon nganong wala silay anak. Bisan pa sa ilang maayo ug maalamong tubag, ang reaksiyon mao, “Iampo mo namo!”

⁷ Tagda usab ang kahimtang sa usa ka sister sa England nga gusto gyong manganak, pero wala kana matuman. Dayon miabot ang panahon nga dili na gyod siya puwedeng manganak. Giangkon niya nga nahugno gyod siya, kay naamgohan niya nga ang iyang pangandoy dili mahitabo niining sistemaha sa mga butang. Sila sa iyang bana midesisyon sa pagsagop ug bata. Bisan pa niana, siya miingon: “Naguol gihapon ko. Nahibalo ko nga ang pagpanagop lahi ra kay sa ako mismo ang nanganak.”

⁸ Tinuod, ang Bibliya nag-ingon nga ang Kristohanong babaye ‘giampingang luwas pinaagi sa pagpanganak.’ (1 Tim. 2:15) Apan wala kini magpasabot nga ang pagpanganak o pagbatog mga anak moresultag kinabuhing walay kataposan. Hinunoa, nagpasabot kini nga ang usa ka babaye nga nag-atiman sa mga anak, lakip sa ubang buluhaton sa panimalay, lagmit makalikay sa pagkahimong tsismosa ug hilabtanon sa kinabuhi sa uban. (1 Tim. 5:13) Bisan pa niana, siya tingali makaatubang gihapog kalisdanan sa iyang kaminyoon ug pamilya.

 9. Unsang laing kasakitan ang mahimong maagoman sa magtiayon?

⁹ Kon maghisgot sa mga kalisdanan sa kaminyoon, may usa nga dili tingali dayon mosantop sa hunahuna​—ang kamatayon sa kapikas. Oo, ang laing kasakitan nga naagoman sa daghan mao ang kamatayon sa minahal nga kapikas. Dili tingali dahomon sa usa ka kapikas nga mahitabo kini niining sistemaha sa mga butang. Ang mga Kristohanon nagtuo sa saad ni Jesus sa pagkabanhaw. (Juan 5:28, 29) Unsay ikatabang niana ngadto sa nabalo? Makahatag kanag dakong kahupayan. Lain ni nga paagi nga ang atong mahigugmaong Amahan, pinaagi sa iyang Pulong, nagtabang ug naghupay niadtong nagsagubang ug kalisdanan. Karon, atong konsiderahon kon sa unsang paagi ang pipila ka alagad sa Diyos nakadawat ug nakabenepisyo sa paghupay nga gitagana ni Jehova.

10. Sa unsang paagi nahupayan si Ana? (Tan-awa ang hulagway sa sinugdan sa artikulo.)

¹⁰ Si Ana nga hinigugmang asawa ni Elkana nakasinatig lahi nga kasakitan. Siya baog, samtang ang laing asawa ni Elkana nga si Penina may mga anak. (Basaha ang 1 Samuel 1:4-7.) Si Ana gitamay ni Penina “tuigtuig.” Tungod niana, naguol ug nasakitan pag-ayo si Ana. Nahupayan siya dihang iyang gitugyan kang Jehova ang iyang problema pinaagi sa pag-ampo. Sa pagkatinuod, siya “nagpadayon sa pag-ampo atubangan ni Jehova.” Gidahom ba niya nga dunggon siya ni Jehova? Tingali naglaom siya niana. Bisan unsa pa man, “ang iyang nawong wala na magmabalak-on.” (1 Sam. 1:12, 17, 18) Siya misalig nga si Jehova magtapos sa iyang pagkabaog o kaha maghupay kaniya sa laing paagi.

11. Sa unsang paagi mahupayan ta sa pag-ampo?

¹¹ Ang mga kasakitan ug kalisdanan magpadayon samtang kita dili hingpit ug nagpuyo niining sistema nga gikontrolar ni Satanas. (1 Juan 5:19) Bisan pa niana, makapalipay gyong mahibalo nga si Jehova “ang Diyos sa tanang paghupay”! Ang usa ka paagi nga makatabang nato sa pagsagubang sa atong mga kasakitan o kalisdanan mao ang pag-ampo. Gipahayag ni Ana kang Jehova kon unsay naa sa iyang kasingkasing. Sa susama, panahon sa kalisdanan, kinahanglang dili ta basta mohisgot lang sa atong pagbati ngadto kang Jehova. Angay tang mangamuyo kaniya, oo, aron mapahayag nato ang atong pagbati pinaagi sa kinasingkasing nga pag-ampo.​—Filip. 4:6, 7.

12. Unsay nakatabang sa biyudang si Ana nga magmalipayon?

¹² Bisan pag mobati kitag grabeng kaguol​—tungod man sa kawalay anak o sa kamatayon sa kapikas—​mahupayan gihapon ta. Sa panahon ni Jesus, ang propetisang si Ana namatyag bana human sa pito lang ka tuig nga kaminyoon. Ang Bibliya wala maghisgot kon may anak ba siya. Unsay padayong ginahimo ni Ana bisag 84 anyos na siya? Ang Lucas 2:37 nag-ingon: “[Siya] wala gayod mopalta sa templo, nga nagahatag ug sagradong pag-alagad adlaw ug gabii uban ang mga pagpuasa ug mga pangamuyo.” Oo, si Ana nahupayan ug nalipay sa pag-alagad kang Jehova.

13. Paghatag ug pananglitan kon sa unsang paagi makapahupay ang tinuod nga higala dihang dili kana mahimo sa atong pamilya.

¹³ Kon makig-uban ta kanunay sa mga igsoon, makakita tag tinuod ug suod nga mga higala. (Prov. 18:24) Si Paula nahinumdom sa kaguol nga iyang gibati sa nag-edad siyag singko dihang mibiya sa pag-alagad ang iyang Mama. Dili sayon ang pagsagubang niini nga kasakitan. Pero nadasig kaayo siya dihang si Ann, usa ka payunir sa kongregasyon, nagpakitag personal nga interes sa iyang espirituwalidad. Si Paula miingon: “Bisag dili mi paryente ni Ann, dako kaayog tabang ang iyang pag-atiman nako. Nakatabang to nako sa pagpadayon sa pag-alagad kang Jehova.” Si Paula padayong nag-alagad nga matinumanon. Malipayon sab siya kaayo nga nakauban pag-usab ang iyang Mama sa kongregasyon. Nalipay pod si Ann, kay siya samag espirituwal nga inahan kang Paula.

14. Unsang mga panalangin ang matagamtam niadtong maghupay sa uban?

¹⁴ Mamatikdan nato nga kon magpakita tag personal nga interes sa uban, sagad makalimtan nato ang atong mga problema. Ang mga sister, minyo man o dili, nahibalo nga makapalipay kaayo ang pagpaambit sa maayong balita ingong isigkamagbubuhat sa Diyos. Tumong nila nga pasidunggan ang Diyos pinaagi sa pagbuhat sa iyang kabubut-on. Gani, ang pipila nag-isip sa pagsangyaw ingong therapy. Oo, kitang tanan makaamot sa kasuod sa kongregasyon dihang magmahunahunaon ta sa uban​—sa teritoryo man o sa kongregasyon. (Filip. 2:4) Usa ka maayong ehemplo niana si apostol Pablo. Siya nahisamag “usa ka nagpasusong inahan” niadtong anaa sa kongregasyon sa Tesalonica; siya usab samag espirituwal nga amahan.​—Basaha ang 1 Tesalonica 2:7, 11, 12.

15. Kinsa ang may pangunang responsabilidad sa pagtudlo sa mga anak?

¹⁵ Ang lain pang angay natong konsiderahon mao ang paghupay ug pagtabang nga atong gitanyag sa mga pamilya. Usahay, ang mga bag-ohan mohangyo sa hamtong nga mga magmamantala sa pagtabang nila nga tudloan sa kamatuoran ang ilang mga anak, bisan sa pag-Bible study sa mga batan-on. Sumala sa Bibliya, ang may pangunang responsabilidad sa pagtudlo ug pagbansay sa mga anak mao ang ginikanan. (Prov. 23:22; Efe. 6:1-4) Sa pipila ka kahimtang, gikinahanglan ug giapresyar ang tabang sa uban. Bisan pa niana, kinahanglan gihapong tudloan sa mga ginikanan ang ilang mga anak. Importante ang regular nga komunikasyon sulod sa pamilya.

16. Sa pagtabang sa mga bata, unsay angayng hinumdoman?

¹⁶ Kon modesisyon ang ginikanan nga lain ang modumalag pagtuon sa ilang anak, dili angayng pulihan sa nagdumala ang papel sa ginikanan. May mga kahimtang nga ang usa ka Saksi hangyoon sa pag-Bible study sa mga anak sa dili Saksing ginikanan. Bisan pa niana, angayng hinumdoman sa Saksi nga, sa iyang pagtabang sa espirituwal, wala siya mahimong ginikanan sa bata. Ug mas maayong dumalahon ang pagtuon diha mismo sa balay sa ginikanan o uban sa hamtong nga Saksi o kaha sa haom nga publikong lugar aron dili kana saypog sabot sa uban. Sa ngadtongadto, gidahom nga ang mga ginikanan mao nay moabaga sa ilang hinatag sa Diyos nga responsabilidad​—ang pag-atiman sa espirituwalidad sa ilang anak.

17. Sa unsang paagi makapahupay ang mga anak?

¹⁷ Ang mga batan-on nga makakat-on sa paghigugma sa Diyos ug sa pagsunod sa iyang tambag makahatag ug kahupayan sa pamilya. Ikapakita nila kana pinaagi sa pagtahod sa ilang ginikanan ug sa pagtabang sa pinansiyal nga paagi. Makahatag sab silag bililhong espirituwal nga tabang. Sa wala pa ang Lunop, ang kaliwat ni Set nga si Lamek nag-alagad kang Jehova. Ang maong pamilyadong tawo miingon bahin sa iyang anak nga si Noe: “Siya magdala kanato ug kahupayan gikan sa atong buhat ug gikan sa kasakit sa atong mga kamot gumikan sa yuta nga gitunglo ni Jehova.” Kana nga tagna natuman dihang gitapos ang tunglo sa yuta. (Gen. 5:29; 8:21) Sa samang paagi, ang mga anak nga mosubay sa matuod nga pagsimba makahatag ug kahupayan sa ilang pamilya, nga makatabang sa pagsagubang sa presenteng kasakitan ug sa paglahutay latas sa katalagman nga grabe pa kay sa Lunop.

18. Unsay makatabang nato sa paglahutay bisan pa sa atong mga kalisdanan o kasakitan?

¹⁸ Ang pag-ampo, pagpamalandong sa mga ehemplo diha sa Bibliya, ug suod nga relasyon sa katawhan ni Jehova nagtabang sa minilyon karon nga mahupayan sa ilang kasakitan. (Basaha ang Salmo 145:18, 19.) Ang pagkahibalo nga si Jehova ang Tuboran sa dumalayong paghupay seguradong magtabang nato sa paglahutay bisan pa sa atong mga kalisdanan​—karon ug sa umaabot.