BUL

[gikan sa lintunganayng pulong nga nagkahulogang “bunga; abot”].

Ang ikawalong lunar nga bulan sa sagradong kalendaryo sa mga Israelinhon nga katumbas sa ikaduhang bulan sa sekular nga kalendaryo. (1Ha 6:​37, 38; Gen 7:11) Kini naglakip sa bahin sa Oktubre ug bahin sa Nobyembre. Human sa pagkadestiyero sa Babilonya, kini nga bulan gitawag ug Marhesvan o Markesvan, nga sa ulahi gipamubo ingong Hesvan. Kini nga mga ngalan human sa pagkadestiyero dili makita diha sa Bibliya apan makaplagan diha sa Hudiyohanong Talmud, sa mga sinulat ni Josephus, ug sa ubang mga sinulat.

Ang Bul moabot sa hapit nang mosugod ang ting-ulan sa tinghunlak. (Deu 11:14; Joe 2:23; San 5:7) Kini mao ang bulan nga tingpugas sa sebada ug trigo, ug sa amihanang Galilea mao ang ting-ani sa mga olibo. Ang mga magbalantay sa karnero niining panahona magdala na pagbalik sa ilang mga panon sa karnero gikan sa kapatagan aron protektahan sila panahon sa mga bulan nga tingtugnaw ug ting-ulan.

Sumala sa Genesis 7:11 ug 8:​14, ang Lunop sa adlaw ni Noe nagsugod sa ika-17 nga adlaw sa “ikaduha nga bulan,” ug sa mao usab nga bulan usa ka lunar nga tuig ug napulo ka adlaw sa ulahi ang yuta namala. Bahin niini, si Josephus (Jewish Antiquities, I, 80 [iii, 3]) mikomento: “Kini nga katalagman nahitabo sa ikaunom ka gatos nga tuig sa pagmando ni Noe, panahon sa ikaduhang bulan kanhi, nga gitawag sa mga Macedonianhon nga Dius ug sa mga Hebreohanon nga Marsuan, sumala sa han-ay sa kalendaryo nga ilang gisunod didto sa Ehipto.” Busa, sumala ni Josephus, ang ikaduhang bulan sa panahon ni Noe maoy katumbas sa bulan sa Bul, o Marhesvan.

Human sa Pagpanggula gikan sa Ehipto, ang Bul nahimong ikawalong bulan sa sagradong kalendaryo, ug niining bulana natapos ni Solomon ang pagtukod sa templo sa Jerusalem. (1Ha 6:38) Si Jeroboam, ang nagtukod sa mibulag nga amihanang gingharian sa Israel, nagbuotbuot sa paghimo niining bulana ingong bulan sa kapistahan, ingong bahin sa iyang plano sa pagpaliso sa pagtagad sa katawhan gikan sa Jerusalem ug sa mga kapistahan niini.​—1Ha 12:​26, 31-33.