Pag-organisar Karon Alang sa Usa ka Libo ka Tuig nga Umaabot

“Sila . . . magamando nga mga hari uban kaniya sulod sa usa ka libo ka tuig.”—PINADAYAG 20:6.

1. Unsa unya ang kahimtang sa yuta sa kapin sa usa ka libo ka tuig gikan karon?

UNSA! Gipasabot ba namo nga kapig usa ka libo ka tuig gikan karon, ang katawhan ania gihapon sa yuta? Kana gayod ang among gipasabot! Ug dili lang kana, ang tanang tawo unya hingpit sa lawas, kasingkasing, ug hunahuna​—sama sa unang lalaki ug babaye sa sinugdan sa paglungtad sa tawo niining yutaa. Oo, usa ka libo ka tuig gikan karon, ang mga tawo maanaa unya sa dagway ug kasamahan sa ilang Diyos ug Tigpasig-uli. (Genesis 1:26-30) Magpahimulos unya sila sa tugob sa kinabuhi diha sa “tanaman sa Eden,” usa ka paraisong makapahimuot, sa nahinloan nang yuta nga dili maghuot ang mga tawong nagapuyo. (Genesis 2:15) Kining tanan maoy sa katumanan unya sa unang katuyoan sa Maglalalang alang sa yuta ug niadtong magapuyo ibabaw niini. Kining nindot nga kahimoan magbayaw kaniya ingong kasaligan sa iyang mahigugmaong saad nga panalanginan ang tanang tawo bisan pa sa tanang pagsupak.

2. Sa unsang paagi ang mga tawo mga 19 ka siglo kanhi nakapanan-aw kon sama sa unsa ang nahingpit nga katawhan?

² Kanang bulahang kahimoan magpurongpurong sa Usa ka Libo ka Tuig nga Pagmando sa Diyos pinaagi sa iyang hinimayang Anak, nga migugol ug 33 1/2 ka tuig sa yuta ingong hingpit nga tawo kapig 19 ka siglo kanhi. Mahitungod sa matang sa dagway nga iyang gipadayag niadtong panahona, atong mabasa: “Ang Pulong nahimong unod ug mipuyo sa atong taliwala, ug kita nakakita sa iyang himaya, usa ka himaya nga sama sa iya sa usa ka bugtong-inanak nga anak gikan sa usa ka amahan; ug siya puno sa dili-takos nga kalulot ug kamatuoran.” (Juan 1:14) Busa diha kang Jesu-Kristo, ang mga tawo sa Israel nakakita kon unsay dagway sa usa ka hingpit tawhanong linalang. (Lucas 3:23, 38) Oo, 19 ka siglo kanhi nakita sa pila ka tawo kon unsay dagway sa nahingpit nga katawhan diha sa umaabot yutan-ong Paraiso.

3, 4. (a) Unsa ka dugay gayod ang pagmando ni Jehova pinaagi ni Jesu-Kristo ug sa 144,000? (b) Unsang pamulonga ang gigamit alang nianang yugtoa sa panahon, ug sa unsang paagi kana gibanaag diha sa mga titulo sa pipila ka basahon sa Watch Tower?

³ Ang gidugayon sa pagmando sa Gingharian ni Jehova pinaagi ni Jesu-Kristo ug sa iyang 144,000 hinimayang tinun-an gitagna nga usa ka libo ka tuig. Mahitungod nianang Usa ka Libo ka Tuig nga Pagmando, ang tigulang nga apostol Juan misulat: “Nakita ko ang mga trono, ug dihay naglingkod kanila, ug gihatag kanila ang gahom sa paghukom. Oo, nakita ko ang mga kalag niadtong gipamatay pinaagi sa atsa tungod sa pagpamatuod nila kang Jesus ug tungod sa pagpahayag mahitungod sa Diyos, ug kadtong wala magsimba sa mapintas nga mananap o sa larawan niini ug kadtong wala makadawat ug patik sa ilang agtang ug sa ilang kamot. Ug sila nangabuhi ug nagmando ingong mga hari uban kang Kristo sulod sa usa ka libo ka tuig. (Ang nahibilin sa mga patay wala mabuhi hangtod natapos ang usa ka libo ka tuig.) Kini mao ang unang pagkabanhaw. Malipayon ug balaan si bisan kinsang may bahin sa unang pagkabanhaw; ibabaw kanila ang ikaduhang kamatayon walay gahom, apan sila mahimong mga saserdote sa Diyos ug kang Kristo, ug magamando ingong mga hari uban kaniya sulod sa usa ka libo ka tuig.”​—Pinadayag 20:4-6.

⁴ Sanglit ang usa ka libo ka tuig maoy usa ka milenyo, kanang yugtoa gitawag Milenyong Pagmando ni Kristo. Kadtong nagadawat ug nagatudlo niining doktrinaha sa Bibliya usahay ginatawag millenarians o chiliasts, sumala sa Gregong pulong alang sa “libo.” Makaiikag, ang mga tomo sa Studies in the Scriptures (nga gipatik niadto sa Watch Tower Bible and Tract Society) sa sinugdan gitawag Millennial Dawn. Ug ang basahon sa awit nga gigamit niadto sa Internasyonal nga mga Estudyante sa Bibliya may titulong Hymns of the Millennial Dawn.

5. Unsa unya ang kahimtang ni Satanas ug sa mga demonyo panahon sa Usa ka Libo ka Tuig nga Pagmando ni Kristo?

⁵ Ang pamulong “usa ka libo ka tuig” sa Pinadayag 20:4 dili simboliko apan nagatumong sa usa ka libo ka solar nga katuigan. Sulod sa maong Milenyo, si Satanas nga Yawa ug ang iyang demonyong panon atua sa bung-aw, kay una sa paghisgot mahitungod sa Usa ka Libo ka Tuig nga Pagmando ni Kristo, si apostol Juan miingon: “Nakita ko ang usa ka manulonda nga nanaog gikan sa langit nga may dalang yawi sa bung-aw ug usa ka dakong talikala sa iyang kamot. Ug iyang gisakmit ang dragon, ang unang bitin, nga mao ang Yawa ug Satanas, ug gigapos siya sulod sa usa ka libo ka tuig. Ug iyang gitambog siya ngadto sa bung-aw ug gitakpan kini ug gitimrihan kini ibabaw niya, aron siya dili na makalimbong sa kanasoran hangtod nga natapos ang usa ka libo ka tuig. Tapos niining mga butang siya pagabuhian sa makadiyut.”​—Pinadayag 20:1-3.

6. (a) Unsang petsaha ang gihatag sa pila ka Romano Katoliko alang sa kataposan sa Usa ka Libo ka Tuig nga Pagmando ni Kristo? (b) Kon tinuod ang mga pangangkon sa Katoliko, unsa na ka dugay ang makadiyut nga panahon nga pagbuhi kang Satanas gikan sa way-kinutobang gahong?

⁶ Ang pila ka Romano Katoliko miangkon nga ang Usa ka Libo ka Tuig nga Pagmando ni Jesu-Kristo natapos sa 1799 sa dihang ang Pranses nga kasundalohan nagbihag sa Roma ug nagpalagpot sa papa ingong magmamando niini, mao nga siya gidistiyero ingong binilanggo ngadto sa Pransiya, diin siya didto namatay. Ang Katolikong klero nag-ingon nga si Satanas ug iyang mga demonyo niadto gibuhian gikan sa “waykinutobang gahong,” “bung-aw,” aron ipadayon ang ilang panglimbong “sa makadiyut.” (Pinadayag 20:1-3, Katolikong Douay Version) Kon kana tinuod, kana magpasabot nga ang “makadiyut” nagpadayon na sa 190 ka tuig, nga wala pay nakitang kataposan.

7. Unsay ginapaila sa Bibliya mahitungod sa panahon ug kinaiyahan sa Milenyong Pagmando ni Jesu-Kristo?

⁷ Ugaling, sumala sa Kasulatan ang tinuod nga Milenyong Pagmando ni Jesu-Kristo umaabot pa. Ang pagkatuman karon sa tagna sa Bibliya nagapakita nga kini duol na kaayo. Sulod sa tinuod nga Milenyo, si Satanas ug iyang mga demonyo igatambog gayod sa bung-aw, ug si Jesu-Kristo ug iyang 144,000 kaubang manununod magahari ibabaw sa tanang tawo nga walay pagbalda gikan sa organisasyon sa Yawa. Ang walay-kataposang pagpanalangin sa tanang linukat nga katawhan, ingong katumanan sa tugon ni Jehova uban sa iyang “higalang” si Abraham, mosugod uban sa “dakong panon,” nga makalabang sa walay-ingong “kasakitan” nga niana matapos kining daotang sistema. Kini makaabot ngadto sa binilyong tawong patay nga gilukat sa “dugo sa Kordero,” si Jesu-Kristo. (Santiago 2:21-23; Pinadayag 7:1-17; Genesis 12:3; 22:15-18; Mateo 24:21, 22) Alang sa maong katuyoan, kini sila pagabanhawon gikan sa ilang pagkatulog sa kamatayon diha sa handumanang mga lubnganan ngadto sa kinabuhi sa yuta.​—Juan 5:28, 29.

Usa ka Kristohanong Organisasyon

8. Unsang organisasyon ang gibatbat sa librong The New Creation, apan unsang organisasyonal nga buluhaton ang wala niana mapanan-aw?

⁸ Sa pagpalampos sa balaang katuyoan, naunag mga siglo ang usa ka bag-ong organisasyon kay sa maong mga panalangin. Mahitungod sa maong organisasyon, atong mabasa: “Kon ang usa nahiusa kang Kristo, siya usa ka bag-ong nalalang.” “Ang sirkunsisyon walay bili o ang pagkawalay-sirkunsisyon, apan ang usa ka bag-ong nalalang [usa ka bag-ong linalang, King James Version] bililhon.” (2 Corinto 5:17; Galacia 6:15) Niadtong 1904, ang librong The New Creation miawhag sa pagtagad sa maong bag-ong organisasyon nga milungtad sa unang siglo K.P. (Studies in the Scriptures, Serye VI, Tun-anan V, nga nag-ulohang “Ang Organisasyon sa Bag-ong Nalalang”) Tungod sa hunahuna niini kon unsay kahulogan sa pagkatapos sa Hentil nga mga Panahon sa 1914, kanang libroha wala magpanan-aw sa talagsaong organisasyonal nga buluhaton nga mahitabo tapos sa nakapainutil nga mga epekto sa unang gubat sa kalibotan sa kasaysayan sa tawo.​—Lucas 21:24, KJ.

9. Unsang higayon ang gipahimuslan sa nahibilin sa bag-ong linalang?

⁹ Ang pagkaluwas sa nahibilin sa espirituwal bag-ong nalalang hangtod sa kataposan sa Gubat sa Kalibotan I sa 1918 ug ilang pagpabiling buhi diha sa unod hangtod sa tapos-gubat nga tuig sa 1919 gikatingad-an. Apan ang mga kahimtang sa milenyo wala pa magsugod. Nan, dayag nga may dako pang buluhaton alang sa nahibilin sa bag-ong nalalang nga pagabuhaton sa yuta una maangkon ang langitnong paglaom nga makaambit uban kang Jesu-Kristo sa buluhaton sa milenyo. Busa, ang dakong panginahanglan maoy alang sa pagbuhi ug pag-organisar na usab sa nahibilin. Busa, uban ang wala-magun-ob nga pagtuo ug kadasig alang sa kulbahinam nga buluhaton sa unahan, gipahimuslan nila ang higayon.

10. Unsang mga pangutana ang mitungha bahin sa minilyon nga gidahom nga makalabang-buhi ngadto sa bag-ong sistema sa mga butang?

¹⁰ Ang pagkaluwas sa yuta sa pipila sa katawhan latas sa kalaglagan niining daotang sistema ug ngadto sa Milenyong Pagmando ni Jesu-Kristo gidahom sa dinihogang nahibilin. Kini matuod ilabina tapos sa pakigpulong publiko nga “Minilyong Buhi Karon Mahimong Dili na Gayod Mamatay” nga gihatag sa Los Angeles, California, sa tuig sa gubat nga 1918. Maorganisar ba ang minilyong umaabot nga maluwas sa Har–​Magedon? (Pinadayag 16:14-16) Sa dili pa pasudlon sa Milenyo aron mahimong bahin sa “bag-ong yuta,” moapil ba sila sa buluhatong pagsangyaw sa Gingharian duyog sa nahibilin? (2 Pedro 3:13) Kining mga pangutanaha pagatubagon sa human-gubat nga mga panghitabo.

11. (a) Unsay pagabuhaton sa ubang mga karnero nga mahimong usa ka panon uban sa nahibilin? (b) Nganong ang kalainan sa mga paglaom dili hinungdan sa pagkabahinbahin tali sa nahibilin ug sa ubang mga karnero?

¹¹ Ang mosuod nga mga pulong sa Maayong Magbalantay, si Jesu-Kristo, sa angay napadayag: “Ako adunay ubang mga karnero, nga wala niining torila; kini usab akong pagadad-on, ug sila mamati sa akong tingog, ug sila mahimong usa ka panon, usa ka magbalantay.” (Juan 10:16) Kon ang dinihogang nahibilin kinahanglang organisahon alang sa tapos-gubat nga buluhaton sukad sa 1919 paunahan ug kon sa ulahi ang ubang mga karnero mahimong usa ka panon uban sa nahibilin sa maong toril, nan unsa man? Aw, kadtong ubang mga karnero kinahanglan usab maorganisar duyog sa maong nahibilin! Ang kamatuorang ang ubang mga karnero may lahing paglaom​—nga mao ang kinabuhi sa yutan-ong paraisong makapahimuot​—dili hinungdan sa pagkabahin tali kanila ug sa nahibilin. Ang tanan nagsunod lamang sa usa ka Magbalantay, ug walay pagkabulag tali sa duha ka grupo hangtod pagahimayaon ang dinihogang nahibilin diha sa Gingharian.

12. (a) Unsay labi pang hinungdanon kay sa kaluwasan sa katawhan? (b) Kanus-a ug nganong nahimong hinungdanon kaayo ang pagmantala sa Gingharian?

¹² Ang pagkaluwas sa mga tawo gikan sa sala ug kamatayon, ang pagkatapos sa pagmando sa kalibotan ni Satanas, ug ang pagpasig-uli sa masinugtanong katawhan sa Paraiso nga napasig-uli sa tibuok yuta maoy talagsaong mga bahin sa mahigugmaong katuyoan ni Jehova. Bisan pa niana, may butang nga labi pang hinungdanon sa tibuok uniberso. Unsa ba kana? Kini mao ang pagbayaw sa tibuok-yutang pagkasoberano ni Jehova nga Diyos uban sa pagbalaan sa iyang balaang ngalan. Ang pagkatukma sa panahon sa pagmantala sa Gingharian ni Jehova pinaagi sa nagamandong Hari, si Jesu-Kristo, gipasiugda sa 1922 sa ikaduhang kombensiyon sa Cedar Point, Ohio sa Internasyonal nga mga Estudyante sa Bibliya. Sanglit ang Hentil nga mga Panahon natapos sa 1914, kadto angay nang panahon sa pagtuman sa matagnaong mga pulong ni Jesus: “Kining maayong balita sa gingharian igawali sa tibuok gipuy-ang yuta alang sa usa ka pamatuod sa tanang nasod; ug unya ang kataposan moabot.” (Mateo 24:14) Ang Gingharian nga magbayaw sa unibersohanong pagkasoberano ni Jehova ug magbalaan sa iyang balaang ngalan natukod na sa langit sa 1914, ug si Jesu-Kristo nagmando sa taliwala sa iyang mga kaaway. Kadto mao ang talagsaong maayong balita nga igawali pinaagi sa tanang galamiton nga anaa aron imantala ang Hari ug ang iyang Gingharian!

13. Alang sa buluhatong pagmantala sa Gingharian, unsay gitagana sa Diyos, ug ngano?

¹³ Si Jehova maoy usa ka organisador sa tibuok-kalibotang sukod, kay siya mao ang Labing Hataas, ang Supremo. Siya karon nagatino nga maorganisar sa bug-os, dinhi sa yuta, ang buluhaton sa pagmantala sa iyang Gingharian sa tibuok kalibotan sa dili pa moabot ang kataposan niining sistemaha. Ang mga membro sa buhi pang nahibilin sa mga dinihogan, sa ingon, gibugkos ngadto sa usa ka internasyonal nga organisasyon aron sa pagtuman sa iyang kabubut-on. Kini sila kinahanglang magmantala ngadto sa kalibotan nga tungod sa paghagit ni Satanas sa unibersohanong pagkasoberano ni Jehova, ang kamatuoran ug ang pagkamatarong sa maong pagkasoberano kinahanglang bayawon, pakamatarongon, sa tanang panahon.

Una-Milenyo nga Organisasyon

14. (a) Una pa sa atong Komung Panahon, unsang organisasyon ang nahimong yutan-ong bahin sa tibuok-kalibotang organisasyon ni Jehova? (b) Sa unsang paagi si David napamatud-ang usa ka talagsaong organisador?

¹⁴ Sulod sa 15 ka siglo una sa atong Komung Panahon, si Jehova nga Diyos may makitang organisasyon sa yuta. Gigamit niya ang propetang si Moises ingong Iyang tigpataliwala aron sa pag-organisar sa nasod sa Israel tapos maluwas kini gikan sa Ehipto, ang unang imperyo sa kalibotan sa kasaysayan sa Bibliya. Ubos sa Moisesnong Kasugoan, ang Israel nahimong makitang bahin sa tibuok-kalibotang organisasyon ni Jehova. Usa ka talagsaong organisador taliwala sa maong pinili nga katawhan sa Diyos mao ang magbalantay-hari nga si David, nga bahin kaniya atong mabasa: “Si David nagbahinbahin kanila [ang mga Levihanon nga nag-alagad sa sangtuwaryo ni Jehova], nga nagtawag sumala kang Gerson, Coath, ug Merari, ang mga anak ni Levi.” “Iyang giorganisar sila [ang mga saserdote] pinaagi sa pagripa taliwala kanila, kay dihay balaang mga opisyal ug mga opisyal sa Diyos sa banay ni Eleazar ug sa iya ni Itamar.”​—1 Cronicas 23:3, 6; 24:1, 5, The New English Bible.

15. (a) Sa unsang paagi ang mga Israelinhon migawas sa Ehipto? (b) Kinsa usab ang mipalabi sa pagbiya sa Ehipto, ug nganong sila nagpabiling uban sa mga Israelinhon?

¹⁵ Ginatos ka tuig una sa panahon ni David, sa migawas ang mga Israelinhon sa Ehipto, sila wala magkabuagsa sa paggawas apan mipahawa sa hapsayng paagi. Kadto nagpasabot sa maayong pag-organisar sa bahin sa ilang tigpataliwala, si Moises. Ang usa ka dakong panon sa mga dili-Israelinhon mikuyog kanila, nga mipalabing manimpalad uban sa katawhan sa tighimog-milagro nga Diyos, si Jehova, kinsa mas gamhanan kay sa tanang diyos sa Ehipto. Bisan pa sa daghang kalisdanan, sa kaulahian kining “dako kaayong panon” nga may maayong kabubut-on sa pinilang katawhan ni Jehova kauban pa nila didto sa makalilisang nga kamingawan sa Sinai. (Exodo 12:37-51; Numeros 11:4) Uban sa mga Israelinhon, ang nagkasagol nga kapid-an lagmit misulod sa Yutang Saad ilalom sa pagpanguna sa manununod ni Moises, si Josue, kay gitino sa Diyos ng mahimo ang tagana didto alang nianang langyawng mga pumoluyo.

16. (a) Kinsay gilandongan sa dako kaayong nagkasagol nga panon? (b) Unsay kinahanglang buhaton nila aron maluwas sa kataposan niining sistemaha?

¹⁶ Kadtong dako kaayong panon gikan sa Paraonhong Ehipto naglandong sa dakong panon sa ika-20ng siglo. Sila dili espirituwal nga mga Israelinhon kondili maoy ubang mga karnero sa Maayong Magbalantay, si Jesu-Kristo. Kauban sa dinihogang nahibilin, sila nagapanglantaw sa bug-os nga pagkaluwas gikan sa antitipikong Ehipto, ang sistema sa mga butang sa kalibotan diin ang Dakong Paraon, si Satanas nga Yawa, mao ang diyos. (Juan 10:16; 2 Corinto 4:4; Pinadayag 7:9) Apan unsay ilang pagabuhaton aron makalabang sa mabangisong pagkalaglag sa daang kalibotan ni Satanas ug makasulod sa gisaad nga bag-ong kalibotan ilalom sa Dakong Josue, si Jesu-Kristo? (2 Pedro 3:13) Kinahanglang sila mosunod sa organisasyonal nga mga kahikayan sa pinakauyok sa makitang organisasyon ni Jehova, ang dinihogang nahibilin.

17. Niining disorganisadong kalibotan, unsay ginabuhat sa mga sakop sa dakong panon, ug unsay ilang gipanan-aw?

¹⁷ Ilabina sukad sa tungatunga sa ikaupat nga dekada sa ika-20ng siglo ang dakong panon sa ubang mga karnero gidala nganha sa organisadong usa ka panon ilalom sa hinimayang usa ka Magbalantay, ang nagmandong Hari, si Jesu-Kristo. Sa usa ka kalibotan nga dugang ug dugang nagakaorganisado bisan pa sa paglungtad sa organisasyong Hiniusang Kanasoran, kadtong sakop niining dakong panon bug-os kasingkasing nga nagapaluyo sa dinihogang nahibilin ug sa ingon nagahatag ebidensiya sa makapahiusang gahom sa balaang espiritu ni Jehova. Nga determinado, sila nagapabiling organisado uban sa nahibilin samtang nagapanglantaw sa espesyal nga pag-alagad sa yuta sulod sa Usa ka Libo ka Tuig nga Paghari ni Jesu-Kristo.

Unsay Imong mga Hunahuna?

◻ Unsay gipaila sa Kasulatan bahin sa panahon ug kinaiyahan sa Milenyong Pagmando ni Jesu-Kristo?

◻ Unsay labi pang hinungdanon kay sa kaluwasan sa katawhan?

◻ Una pa sa atong Komung Panahon, unsang organisasyon ang nahimong yutan-ong bahin sa tibuok-kalibotang organisasyon ni Jehova?

◻ Sa unsang paagi kadtong gilandongan sa dako kaayong nagkasagol nga panon makalabang-buhi ngadto sa Usa ka Libo ka Tuig nga Pagmando?