MARA

[Mapait].

1. Ang ngalang Mara maoy gisugyot sa balong asawa ni Elimelek nga itawag kaniya aron ipahayag ang mapait niyang gibati tungod sa kamatayon sa iyang bana ug ni Malon ug Kilion nga iyang mga anak nga lalaki. Si Noemi mibiya sa Betlehem nga may bana ug duha ka anak nga lalaki (Ru 1:​1, 2), apan mipauli gikan sa Moab ingong masulub-on ug wala nay anak nga balo. Niadtong tungora ang daan niyang mga higala, ang kababayen-an sa Betlehem, nangutana: “Si Noemi ba kini?” Kay nagmagul-anon pa gihapon, siya mitubag: “Ayaw ako tawga ug Noemi [nagkahulogang “Akong Kahimuot”].

Tawga ako ug Mara [nagkahulogang “Mapait”], kay ang Labing Gamhanan naghimong mapait kaayo alang kanako. Tugob ako sa akong paggikan, ug walay dala sa dihang gipapauli ako ni Jehova.”​—Ru 1:19-21.

2. Usa sa unang mga gikampohan sa Israel didto sa Peninsula sa Sinai. Ginganlan kini ug “Mara” tungod kay mapait ang tubig nga nakaplagan didto. (Ex 15:23; Num 33:8) Bisag bag-o lang nga giluwas gikan sa mga Ehiptohanon didto sa Pulang Dagat, ang mga Israelinhon tungod sa kawalay pagtuo nagbagulbol sa dihang dili nila mainom ang tubig didto sa Mara. Human niadto, sa sugo ni Jehova, gilabay ni Moises ang usa ka kahoy ngadto sa tubig, ug ang tubig nahimong tam-is. Wala nganli sa Bibliya kon unsang matanga sa kahoy kadto, ug busa walay pasikaranan sa pag-ila niini. Siyempre, mahimong tultolan ni Jehova si Moises ngadto sa usa ka espesipikong matang sa kahoy nga may kinaiyanhong sambog nga makapatam-is sa tubig. Apan dili kinahanglan nga mangita pa ug siyentipikanhon o kinaiyanhong pagpatin-aw labot niini, sanglit sa walay duhaduha ang pagpatam-is sa tubig maoy milagroso.​—Ex 15:23-25; itandi ang 2Ha 2:19-22; 4:38-41.

Gigamit ni Jehova ang mga panghitabo sa Mara aron masulayan ang mga Israelinhon sa ilang pagtuo sa iyang katakos sa pag-atiman kanila. Sanglit ang dili maayong tubig makapahinabog sakit (2Ha 2:19), ang pagpatam-is sa tubig nag-ilustrar sa katakos ni Jehova sa pagpanalipod sa mga Israelinhon gikan sa mga balatian nga naagoman sa mga Ehiptohanon. Ang “regulasyon” nga gitudlo ni Jehova kaniadto sa mga Israelinhon mao: Ang pagkamasinugtanon kaniya ingong ilang Diyos magpanalipod kanila nga dili mataptan sa mga balatian nga iyang gipadangat sa mga Ehiptohanon.​—Ex 15:​25, 26.

Ang Mara sagad nga gituohan nga mao ang ʽEin Hawwara nga 80 km (50 mi) sa HHS sa modernong Suez, pipila lang ka milya pailaya gikan sa Pulang Dagat.