REPIDIM

[gikan sa lintunganayng pulong nga nagkahulogang “bukhad”; o, “pahayahay”].

Usa sa mga dapit nga gikampohan sa mga Israelinhon sa ilang pagpanaw gikan sa Pulang Dagat paingon sa Bukid sa Sinai. Sa ilang pagbiya sa Kamingawan sa Sin, sila nagkampo sa Dopka, dayon sa Alus, ug sa kataposan sa Repidim. (Ex 17:1; Num 33:12-14) Tungod kay walay tubig didto sa Repidim, ang katawhan nagreklamo ug nakiglalis kang Moises. Sa pagsunod sa sugo sa Diyos, gidala ni Moises ang pipila ka ansiyano ngadto sa “bato sa Horeb” (dayag nga ang bukirong rehiyon sa Horeb, dili ang Bukid sa Horeb) ug gihampak ang usa ka bato pinaagi sa iyang sungkod. Ang tubig miagos, nga mopatim-awng nakaabot ngadto sa katawhan nga nagkampo sa Repidim.​—Ex 17:2-7.

Ang mga Amalekanhon misulong sa mga Israelinhon didto sa Repidim, apan uban kang Josue nga maoy nangulo sa pagpakiggubat, ang katawhan sa Diyos nagbuntog sa mga manunulong. (Ex 17:8-16) Ang pagkahan-ay sa asoy diha sa rekord nagpakita nga didto ang mga Israelinhon sa Repidim sa dihang ang ugangang lalaki ni Moises nagdala kang Zipora ug sa iyang duha ka anak nga lalaki ngadto kang Moises ug nagsugyot nga siya mopili ug mga pangulo aron motabang sa paghukom sa katawhan.​—Ex 18:1-27.

Ang tukmang nahimutangan sa Repidim dili matino. Ang lainlaing dapit nga gisugyot sa mga geograpo gipasukad sumala sa ilang pagsabot sa ruta nga gipanaw sa mga Israelinhon gikan sa Kamingawan sa Sin paingon sa Bukid sa Sinai. Daghang modernong mga geograpo ang nagtuo nga ang Repidim mao ang usa ka dapit sa Wadi Refayied, dili layo sa AK sa gituohang nahimutangan sa Bukid sa Sinai. Kasikbit sa Wadi Refayied mao ang usa ka bungtod nga may samang ngalan, diin si Moises tingali nagbarog nga ang mga bukton giisa panahon sa pagpakiggubat batok sa mga Amalekanhon.