PAGSULTIG PASIPALA

Pagbungat ug makainsulto nga mga pulong ngadto sa usa ka tawo, nga magsultig maabusohong mga pulong kaniya.

Alang sa mga Israelinhon, ang pagsultig pasipala o pagpanghimaraot sa ilang mga ginikanan maoy usa ka sala nga pagasilotan ug kamatayon. (Ex 21:17; Mat 15:4; Mar 7:10) Sama sa binaba nga pag-abuso, ang pisikal nga pag-abuso sa mga ginikanan naggikan sa samang daotang disposisyon ug, busa, pareho ra ug silot. (Ex 21:15) Sanglit ang mga ginikanan maoy mga hawas ni Jehova sa ilang mga anak, ang usa ka anak nga nagsultig pasipala sa iyang mga ginikanan sama rag nagsultig pasipala sa Diyos.​—Itandi ang Ex 20:12.

Ang nahiangay nga pagtahod kinahanglang ipakita usab ngadto sa mga magmamando sa Israel. Mao nga si apostol Pablo, bisan pag gitratar sa dili-makataronganong paagi, nangayog pasaylo tungod sa iyang dili-tinuyo nga pagsultig mga pulong nga giisip sa uban nga mapasipalahon batok sa hataas nga saserdote.​—Ex 22:28; Buh 23:1-5.

Ang tinuyong pagsultig pasipala walay luna taliwala sa unang-siglong mga Kristohanon. (1Co 6:​9, 10; 1Pe 3:​8, 9) Ang usa nga sad-an sa nabatasan ug tinuyo nga pagpangdaot sa uban palagpoton gikan sa kongregasyon.​—1Co 5:11-13.

Tungod kay daw walay bili ug dili popular sa kalibotan gumikan sa ilang kalihokan ug mensahe, ang mga sumusunod ni Jesu-Kristo sagad maoy tumong sa pagsultig pasipala. (Itandi ang Ju 9:​28, 29; 17:14; 1Co 1:18; 4:11-13.) Apan sila dili angayng mobalos pinaagi sa pagsultig pasipala sa mga magsusupak. Niining bahina si Kristo Jesus nagtaganag panig-ingnan alang kanila. (1Pe 2:​21, 23) Bisag giakusahan ingong tawong palainom, ulitan, ahente sa Yawa, maglalapas sa Igpapahulay, ug usa ka tigpasipala sa Diyos, si Kristo Jesus wala mobalos pinaagi sa pagsultig pasipala sa iyang mga magsusumbong. (Mat 11:19; 26:65; Luc 11:15; Ju 9:16) Sa dihang gipasakaan siyag bakak nga mga sumbong sa atubangan ni Pilato, si Jesus nagpakahilom lamang. (Mat 27:12-14) Ang pagsundog sa Kristohanon sa panig-ingnan ni Jesus makahatag ug maayong epekto ngadto sa pipila ka magsusupak, nga tungod niana sila makaamgo nga ang ilang mapasipalahong mga pulong wala diay bisan unsang pasikaranan. Kini nga pagkaamgo lagmit motultol pa gani kanila nga mahimong mga tighimaya sa Diyos.​—Itandi ang Rom 12:17-21; 1Pe 2:12.

Ang mga Kristohanon kinahanglang mag-amping nga sila mogawi sa maayong paagi aron walay katarongan nga ang mga magsusupak makasultig pasipala batok kanila. Kini mao ang punto nga gipasiugda ni apostol Pablo bahin sa batan-ong mga babayeng balo diha sa kongregasyon. Sanglit sila mahilig sa pagtabitabi ug nanghilabot sa mga kalihokan sa ubang mga tawo, siya nagdasig kanila sa pagminyo ug sa pag-atiman sa ilang mga anak ug sa pagdumala ug panimalay. Tungod kay puliki nga mga asawa, sila dili makaaghat sa bisan kinsang magsusupak nga magsultig pasipala sa mga Kristohanon ingong mga tabian ug mga hilabtanon sa mga kalihokan sa ubang mga tawo.​—1Ti 5:​13, 14.

Ang pipila nga wala mouban kang Jesu-Kristo samtang dinhi pa siya sa yuta nagpakita pinaagi sa ilang mga lihok nga sila ‘dapig kaniya’ ug dili daling moduyog sa mga magsusupak sa pagsultig pasipala kaniya. Kini mao ang kahimtang sa usa ka tawo nga nagpalayas ug mga demonyo pinasukad sa ngalan ni Jesus, lagmit tungod kay gihatagan ug gahom sa Diyos sa pagbuhat niana. Si Juan ug ang uban nanghinapos nga kining tawhana angayng pahunongon, tungod kay siya wala magkuyogan kanila. Apan si Jesus miingon: “Ayaw ninyo sulayi ang pagpugong kaniya, kay walay usa nga mohimog gamhanang mga buhat pinasukad sa akong ngalan ang makahimo dayon sa pagpasipala [sa literal, pagsultig daotan] batok kanako.” (Mar 9:38-40) Sa panahon nga gipahayag ni Jesus kining mga pulonga ang Hudiyohanong kongregasyon giila pa gihapon sa Diyos ug ang pagtukod sa Kristohanong kongregasyon maoy umalabot pa. (Itandi ang Mat 16:18; 18:15-17.) Dugang pa, wala isugo ni Jesus nga ang tanang magtutuo mokuyog kaniya. (Mar 5:18-20) Busa, ang usa ka Hudiyo nga sakop sa katawhan nga gipakigsaaran sa Diyos ug nagbuhat ug gamhanang mga buhat pinasukad sa ngalan ni Jesus nagpamatuod nga siya adunay pag-uyon sa Diyos. Apan, sa dihang natukod na ang Kristohanong kongregasyon, ang mga tawo nga nagtinguha sa pag-uyon sa Diyos kinahanglang makig-uban niini nga kongregasyon ingong matinumanong mga sumusunod ni Jesu-Kristo. (Itandi ang Buh 2:​40, 41.) Ang pagbuhat lamang ug gamhanang mga buhat pinasukad sa ngalan ni Jesus dili na mahimong ebidensiya nga ang usa ka tawo maoy dapig kang Jesu-Kristo, ni garantiya kini nga ang maong tawo dili mahimong sad-an sa pagsultig pasipala batok sa Anak sa Diyos.​—Mat 7:21-23; tan-awa ang MAPASIPALAHONG SINULTIHAN; PASIPALA.