FEATURE
Karaang Ehipto
TUNGOD kay ang Israel kanunayng nakiglabot sa Ehipto, ang Bibliya naundan ug daghang detalye bahin nianang yutaa. Pinaagi sa mga panghitabo sa Ehipto, ang ngalan mismo ni Jehova nabayaw sa kahibulongang paagi.
MAP: Karaang Ehipto
Ang Ehipto maoy usa ka yuta diin gisimba ang daghang diyos. Ang pipila ka hayop giisip nga mga diyos; ang uban giisip nga sagrado alang sa espesipikong mga diyos sa mga Ehiptohanon. Dili ikahibulong nga si Moises miingon nga kon ang Israel magtanyag ug mga halad nga hayop kang Jehova didto sa Ehipto, kini magpahinabo sa katawhan nga mohimog kapintasan batok kanila. (Ex 8:26) Atong masabtan usab kon nganong ang Israel, samtang didto sa kamingawan nga nangandoy nga mobalik sa Ehipto, migamit ug usa ka inumol nga estatwa sa nating baka diha sa ilang gitawag nga “usa ka pista alang kang Jehova.”—Ex 32:1-5.
Ang lain pang prominenteng bahin sa pagsimba sa mga Ehiptohanon mao ang pagtuo sa kinabuhi luyo sa kamatayon. Kini nga pagtuo makita diha sa ilang batasan sa pag-embalsamar sa mga patay ug sa pagtukod ug dagkong mga lubnganan aron sa pagpasidungog kanila.
Bisan pag si Moises “natudloan sa tanang kaalam sa mga Ehiptohanon,” ang iyang gitala nga kasugoan labot sa pagsimba kang Jehova wala gayod mahugawi sa mga tinuohan sa mga Ehiptohanon. (Buh 7:22) Ang iyang gisulat wala maggikan sa tawo kondili maoy inspirado sa Diyos.
Estatwa nga naghawas kang Amenhotep III nga may gihabogong halos 18 m (60 p) nga makaplagan duol sa Thebes. Kini nga mga estatwa dayag nga gituyo sa paghimo aron ang katawhan mahingangha pag-ayo
Usa ka dakong bantayog nga nag-asoy sa buluhatong pagpanukod ni Tutankhamen; apan sa ulahi ang inskripsiyon gipausab ni Haring Horemheb aron ipasidungog ang maong buhat ngadto kaniya. Ang maong pagkadili-matinud-anon komon sa karaang Ehiptohanong mga rekord
Usa ka triad nga nagpakita kang Ramses II nga nataliwad-an sa diyos nga si Amon ug sa diyosa nga si Mut. Si Paraon giisip nga usa ka diyos, ang buhi nga Horus
Si Paraon Taharqa nga nagyukbo sa atubangan ni Horus, kansang materyalisadong lawas giisip ni Taharqa nga mao siya. Ang mga hayop maoy prominente sa relihiyon sa Ehipto
Dagko kaayong mga haligi sa templo sa Luxor.
Usa ka agianan nga may naglaray nga mga sphinx padulong sa templo ni Amon-Ra sa Luxor
Usa ka bahin sa “Book of the Dead” ( Basahon sa mga Patay [sa ubos] ), nga gibutang uban sa usa ka gipreserbar nga patayng lawas; kini naundan sa sinulat nga mga orasyon nga yamyamon sa namatay ingong proteksiyon ug sa paggiya kaniya diha sa paghukom sa kinabuhi human sa kamatayon
Ang diyosa-langit nga si Nut nga gilibotan sa mga simbolo sa zodiac. Ang astrolohiya, nga naggikan sa Babilonya, nahimong bahin sa relihiyon sa Ehipto
Ang Ehipto nagdepende sa hiktin ug tabunok nga walog ubay sa Suba sa Nilo. (Kining tabunok nga dapit gikoloran ug berde diha sa mapa sa panid 531.) Sa unahan makita ang kalit nga kausaban gikan sa mga tanaman ngadto sa desyerto
Usa ka paraon nga nagsakay sa iyang karo. Ang maong mga karo maoy bahin sa militaryong kasangkapan sa Ehipto ug gani ginabaligya ngadto sa ubang kanasoran
Diha sa mga paril sa templo ni Amon-Ra sa Karnak, gitala ni Seti I ang iyang mga kadaogan sa pagpakiggubat; ang mga binihag gipakita nga gihawiran pinaagi sa ilang buhok. Ingon sa angayng dahomon, ang mga kadaogan mapasigarbohong gitala diha sa Ehiptohanong mga monyumento