Malipayon Mo kon Inyo Ning Buhaton

 1. Unsay epekto kanato sa hakog nga panggawi sa kalibotan?

NGANONG lisod ang pagpadapat sa atong nakat-onan sa Pulong sa Diyos? Usa ka rason niana mao nga kinahanglan tang magpaubos aron mahimo kon unsay husto, ug posibleng mawala ang atong pagkamapainubsanon. Niining “kataposang mga adlaw,” daghan ang ‘mahigugmaon sa kaugalingon, mahigugmaon sa salapi, mapagawalon, mapahitas-on, ug walay pagpugong-sa-kaugalingon.’ (2 Tim. 3:1-3) Dihang ang hakog nga panggawi mabalita ug mapopular pa gani, ang alagad sa Diyos lagmit makasaway ana pero masina siya sa daw maayong mga resulta. (Sal. 37:1; 73:3) Tingali makapangutana ka: ‘Duna ba gyoy kaayohan kon unahon nako ang uban imbes ang kaugalingon? Kon mogawi ko ingong “mas ubos,” tahoron kaha ko sa mga tawo?’ (Luc. 9:48) Kon magpaimpluwensiya ta niana nga espiritu sa kalibotan, madaot ang atong maayong relasyon sa mga igsoon ug ang atong ilhanan ingong Kristohanon. Apan kon tun-an nato ang maayong mga ehemplo diha sa Bibliya ug sundogon kana, mapanalanginan ta.

 2. Unsay atong makat-onan sa matinumanong mga alagad sa Diyos kaniadto?

² Kon gusto natong sundogon ang matinumanong mga alagad sa Diyos kaniadto, kinahanglan natong susihon kon unsay ilang gihimo nga miresultag maayo. Sa unsang paagi sila nahimong higala sa Diyos, nahimong inuyonan niya, ug nahatagag kusog sa pagtuman sa iyang kabubut-on? Kon pamalandongon nato nâ, molig-on ang atong pagtuo.

3, 4. (a) Sa unsang paagi makadawat tag espirituwal nga giya? (b) Nganong makaingon ta nga ang espirituwal nga pagkaon dili lang basta pagkuhag kahibalo?

³ Daghan tag madawat nga maayong tambag ug pagbansay gikan sa Bibliya, atong mga publikasyon, website, tigom ug asembliya, ug sa JW Broadcasting. Apan sumala sa giingon ni Jesus sa Juan 4:34, ang espirituwal nga pagkaon dili lang basta pagkuhag kahibalo. Siya miingon: “Ang akong pagkaon mao ang pagbuhat sa kabubut-on niya nga nagpadala kanako ug ang paghuman sa iyang buluhaton.”

⁴ Para kang Jesus, apil sa espirituwal nga pagkaon ang pagsunod sa giya sa Diyos. Sa unsang paagi nahisama nig pagkaon? Ang atong lawas mabusog ug mohimsog kon mokaon tag sustansiyadong pagkaon. Sa susama, madasig ta ug molig-on ang atong pagtuo sa kinabuhing walay kataposan kon buhaton nato ang kabubut-on sa Diyos. Pananglitan, may mga higayon ba nga miadto ka sa tigom sa pagsangyaw nga gikapoy pero pagkahuman ug sangyaw nalipay ka ug nadasig?

 5. Unsay mga panalangin kon magmaalamon ta?

⁵ Ang pagtuman sa instruksiyon sa Diyos nagpasabot ug kaalam. (Sal. 107:43) Ug panalanginan gyod ang mga maalamon. “Ang tanang ubang butang nga makapahimuot kanimo dili makatumbas niini. . . . Kini maoy kahoy sa kinabuhi niadtong mga nagakupot niini, ug kadtong mga nagahawid niini pagatawgong malipayon.” (Prov. 3:13-18) Si Jesus miingon: “Kon nahibalo kamo niining mga butanga, malipayon kamo kon inyo kining buhaton.” (Juan 13:17) Magmalipayon ang mga tinun-an ni Jesus kon padayon nilang tumanon ang gisugo niya. Dili kay kausa ra nila gisunod ang gitudlo ug ehemplo ni Jesus. Nahimo ning bahin sa ilang kinabuhi.

 6. Nganong kinahanglan nga padayon natong ipadapat ang atong nakat-onan?

⁶ Karon, importante pod ang padayong pagpadapat sa atong nakat-onan. Sa pag-ilustrar, ang usa ka mekaniko naa tingaliy mga gamit, materyales, ug kahibalo. Pero dili siya makabenepisyo niana kon dili nâ niya gamiton. Taas na tingali siyag eksperyensiya sa pagkamekaniko, pero kinahanglang padayon ni niyang gamiton aron magpabilin siyang hanas. Sa susama, malipay tingali ta sa atong nalampos dihang atong gipadapat ang gitudlo sa Bibliya. Pero padayon lang tang magmalipayon kon atong ipadapat ang instruksiyon ni Jehova kada adlaw.

 7. Unsay angay natong buhaton sa atong makat-onan gikan sa mga ehemplo sa Bibliya?

⁷ Atong hisgotan ang pipila ka magkalahing situwasyon diin malisdan tingali ta sa pagpaubos. Ato pong tan-awon kon giunsa ni pag-atubang sa matinumanong mga alagad kaniadto. Molig-on ta sa espirituwal kon dili lang impormasyon ang atong konsiderahon. Busa pamalandonga kon unsaon nimo pagpadapat ang maong mga punto, ug buhata dayon kana.

8, 9. Unsay gipakita sa Buhat 14:8-15 bahin sa pagkamapainubsanon ni Pablo? (Tan-awa ang hulagway sa sinugdan sa artikulo.)

⁸ Kabubut-on sa Diyos nga “ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Tim. 2:4) Unsay imong panglantaw sa lainlaing matang sa tawo nga wala pa mahibalo sa kamatuoran? Bisag miadto si apostol Pablo sa mga sinagoga aron tudloan kadtong may kahibalo na bahin sa Diyos, dili lang mga Hudiyo ang iyang gisangyawan. Ang reaksiyon sa mga tawong nagsimbag mga diyosdiyos nagsulay sa pagkamapainubsanon ni Pablo.

⁹ Pananglitan, sa unang misyonaryong biyahe ni Pablo, sila ni Bernabe nasaypan sa mga taga-Licaonia ingong mga superhero​—ilang mga diyosdiyos nga si Zeus ug Hermes nga nahimong tawo. Gipahimuslan ba ni Pablo ug Bernabe ang maong oportunidad? Giisip ba nila kini ingong kahigayonan nga makapahulay sa mga paglutos nga ilang naeksperyensiyahan sa duha ka siyudad nga ilang gibisita? Naghunahuna ba sila nga ang pagkasikat makatabang sa pagpakaylap sa maayong balita? Wala gyod! Hinunoa, ila dayong gigisi ang ilang sinina ug gisinggitan ang mga tawo: “Nganong nagabuhat kamo niining mga butanga? Kami usab mga tawo nga sama ra kaninyog mga kaluyahon.”​—Buh. 14:8-15.

10. Nganong giisip ni Pablo ug Bernabe ang ilang kaugalingon nga parehas sa mga taga-Licaonia?

¹⁰ Dihang miingon si Pablo ug Bernabe nga dili pod sila hingpit, wala nila ipasabot nga parehas silag gisimba niadtong mga pagano. Di ba gipadala man sila sa Diyos ingong mga misyonaryo? (Buh. 13:2) Di ba gidihogan man sila sa balaang espiritu ug may nindot nga paglaom? Oo, pero nasabtan nila nga makadawat pod ug samang panalangin ang mga taga-Licaonia kon maminaw sila sa maayong balita.

11. Dihang magsangyaw, unsaon nato pagsundog ang pagkamapainubsanon ni Pablo?

¹¹ Unsaon nato pagsundog ang pagkamapainubsanon ni Pablo? Una, dili ta angayng magdahom o modawat ug pagdayeg tungod sa atong nalampos sa tabang ni Jehova. Maayong pangutan-on nato ang kaugalingon: ‘Giunsa nako paglantaw ang akong gisangyawan? May diskriminasyon ba ko sa pipila ka grupo sa mga tawo?’ Makapalipay nga ang mga Saksi ni Jehova sa tibuok kalibotan nangitag mga tawo sa ilang teritoryo nga maminaw sa maayong balita. Usahay, kinahanglan silang mokat-on sa pinulongan ug kostumbre sa mga tawo nga gipakaubos sa kadaghanan. Ang mga Saksi wala gyod maghunahuna nga labaw sila. Hinunoa, gusto nilang masabtan ang matag tawo aron matandog kini sa mensahe sa Gingharian.

12. Giunsa pagpakita ni Epafras nga wala lang siya maghunahuna sa kaugalingon?

¹² Ang laing paagi nga ikapakita nato ang pagkamapainubsanon mao ang pag-ampo para niadtong ‘nakabaton na ug pagtuo nga sama sa atoa.’ (2 Ped. 1:1) Gibuhat nâ ni Epafras. Katulo lang siya hisgoti sa Bibliya​—sa mga sulat lang ni Pablo. Samtang napriso sa Roma, gisulatan ni Pablo ang mga Kristohanon sa Colosas nga si Epafras “kanunayng nanlimbasog alang [kanila] sa iyang mga pag-ampo.” (Col. 4:12) Nailhan pag-ayo ni Epafras ang mga igsoon, ug gimahal gyod niya sila. Bisag “isigkabinilanggo” siya ni Pablo, wala niya kalimti ang espirituwal nga panginahanglan sa uban. (Filem. 23) Ug may gibuhat siya bahin ana. Di ba wala lang siya maghunahuna sa kaugalingon? Dako gyod ug epekto ang pag-ampo para sa atong mga igsoon, ilabina kon hinumdoman nato ang matag usa kanila, nga hisgotan pa gani ang ilang ngalan.​—2 Cor. 1:11; Sant. 5:16.

13. Unsaon nimo pagsundog si Epafras diha sa imong mga pag-ampo?

¹³ Hunahunaa kon kang kinsang ngalan ang imong hisgotan diha sa pag-ampo. Sama ni Epafras, daghan sa atong mga igsoon ang nag-ampo para sa mga kakongregasyon ug pamilya nga may bug-at nga responsibilidad o nag-atubag seryosong mga desisyon o tentasyon. Daghan ang nag-ampo para niadtong nalista sa artikulo sa jw.org nga “Mga Saksi ni Jehova nga Napriso Tungod sa Ilang Relihiyon.” (Tan-awa ang BALITA > MGA KASO SA KORTE.) Dugang pa, iampo pod nato kadtong namatyan, nakaeksperyensiyag katalagman ug gubat, ug naglisod sa pinansiyal. Oo, daghan sa atong mga igsoon ang nagkinahanglan sa atong mga pag-ampo ug makabenepisyo niini. Kon ato silang iampo, wala lang ta maghunahuna sa kaugalingon, naghunahuna sab ta sa uban. (Filip. 2:4) Dunggon ni Jehova ang maong mga pag-ampo.

14. Giunsa pagpakita ni Jehova nga siya ang pinakamaayong ehemplo sa pagpaminaw?

¹⁴ Ang laing paagi nga mapakita nato ang pagkamapainubsanon mao ang pagkaandam maminaw. Ang Santiago 1:19 nag-ingon nga kinahanglan tang “magmaabtik sa pagpaminaw.” Si Jehova mismo ang pinakamaayong ehemplo ana. (Gen. 18:32; Jos. 10:14) Konsideraha ang atong makat-onan sa Exodo 32:11-14. (Basaha.) Bisag wala kinahanglana ni Jehova ang opinyon ni Moises, gihatagan gihapon niya kinig kahigayonan sa pagsulti sa gibati niini. Mapailobon ka bang maminaw sa tawong masalaypon ug dayon sundon ang iyang giingon? Hinunoa, si Jehova mapailobong maminaw sa mga tawong nag-ampo niya nga may pagtuo.

15. Unsaon nato pagsundog si Jehova sa pagtahod sa uban?

¹⁵ Maayong pangutan-on nato ang kaugalingon: ‘Kon si Jehova mapainubsanong maminaw sa mga tawo sama sa iyang gihimo kang Abraham, Raquel, Moises, Josue, Manoa, Elias, ug Ezequias, di ba angay pod nakong tahoron ang mga igsoon, dayegon sila, paminawon ang ilang opinyon, ug sundon pa gani ang ilang maayong mga ideya? May kakongregasyon ba ko o membro sa pamilya nga nagkinahanglan karon sa akong atensiyon? Unsay kinahanglan nakong himoon bahin ana?’​—Gen. 30:6; Maghu. 13:9; 1 Hari 17:22; 2 Cron. 30:20.

16. Unsay gihimo ni Haring David dihang gihagit ni Simei?

¹⁶ Ang pagkamapainubsanon makatabang pod sa pagpugong sa kaugalingon dihang may mohagit nato. (Efe. 4:2) Ang nindot nga pananglitan niini mabasa sa 2 Samuel 16:5-13. (Basaha.) Si David ug ang iyang mga alagad giinsulto ug giatake ni Simei, nga paryente ni Haring Saul. Giantos kana ni David bisag kaya unta nâ niyang pahunongon. Unsay gihimo ni David aron iyang makontrol ang kaugalingon? Matubag nato kana pinaagi sa pagsusi sa ikatulong Salmo.

17. Unsay nakatabang kang David sa pagpugong sa kaugalingon, ug unsaon nato siya pagsundog?

¹⁷ Ang superskripsiyon sa Salmo 3 nagpakita nga gikomposo ni dihang si David ‘mikalagiw tungod kang Absalom nga iyang anak.’ Ang bersikulo 1 ug 2 haom nga naghisgot sa mga panghitabo sa Ikaduhang Samuel kapitulo 16. Dayon gipasiugda sa Salmo 3:4 ang pagsalig ni David: “Motawag ako kang Jehova, ug siya motubag kanako gikan sa iyang bukid nga balaan.” Sa susama, makaampo ta dihang atakehon. Ingong tubag, si Jehova magtagana sa iyang balaang espiritu nga makatabang nato sa paglahutay. Makahunahuna ka bag situwasyon diin kinahanglan kang magpugong sa kaugalingon o magpasaylo niadtong nakapasakit nimo? Masaligon ba ka nga nakita ni Jehova ang imong kasakit ug panalanginan ka niya?

18. Unsay kaayohan kon ipadapat nato ang instruksiyon sa Diyos?

¹⁸ Kon buhaton nato ang atong nahibaloan nga husto, makadawat tag daghang panalangin. Mao diay nga ang Proverbio 4:7 nag-ingon nga “ang kaalam mao ang pangunang butang”! Bisag ang kaalam gibase sa kahibalo, nag-apil kini sa mga desisyon nga atong himoon dili lang sa impormasyon nga atong nasabtan. Bisan ang mga hulmigas nagpakitag kaalam. Gipakita nila ang natural nga kaalam pinaagi sa pagpangandam ug pagkaon panahon sa ting-init. (Prov. 30:24, 25) Ang Kristo, “ang kaalam sa Diyos,” pirmeng nagbuhat sa mga butang nga makapalipay sa Amahan. (1 Cor. 1:24; Juan 8:29) Nahibalo ang Diyos sa kalainan tali sa paghimog hustong desisyon ug pagbuhat sa maong desisyon. Ug iyang panalanginan ang mga mapainubsanon, malahutayon, ug ang nagpadapat sa ilang nahibaloan nga husto. (Basaha ang Mateo 7:21-23.) Busa, paningkamoti nga ang kongregasyon mahimong dapit diin ang tanan mapainubsanong nag-alagad kang Jehova. Ang pagpadapat sa atong nahibaloan nga husto nagkinahanglag panahon ug pailob, pero timailhan nâ sa pagkamapainubsanon nga makahatag ug kalipay karon ug hangtod sa kahangtoran.