Gikan sa Among mga Magbabasa
Bungot ni Jesus Diha sa inyong seryeng “Jesus—Unsa man Gayoy Iyang Hitsura? Unsa Siya Karon?” (Disyembre 8, 1998), ang inyong mga hulagway nagsugyot nga wala gisunod ni Jesus ang kasugoan nga giingon sa Levitico 19:27: “Dili ninyo pagatubtuban ang buhok sa inyong ulo, ug dili mo pagadaoton ang tumoy sa imong bungot.” Nganong dili ninyo siya ipakita sa mga hulagway nga wala putli ang mga patilya?
C. S., Inglaterra
Kining maong kasugoan dayag nga gihatag aron dili alotan sa mga Hudiyo ang ilang mga bungot o buhok diha sa paagi nga magsundog sa pipila ka paganong mga batasan. Bisan pa niana, ang sugo sa Diyos wala magpasabot nga ang mga Hudiyo dili na makaalot sa ilang mga bungot o balahibo sa nawong. Ang asoy sa 2 Samuel 19:24 nagpakita nga ang Hudiyong mga lalaki kasagarang “maggunting,” o mag-alot, sa ilang balahibo sa nawong. Kon sa unsang sukod gihimo nila kini malagmit nga nag-agad sa naglungtad nga batasan. Ang arkeolohikanhong ebidensiya nagpakita nga ang mga Hudiyo may lainlaing estilo sa bungot latas sa kasiglohan. Busa ang among mga hulagway kang Jesus nga may mubo, hapsay nga bungot ug inalotang mga patilya kaharmonya sa ebidensiya.—ED.
Pagbangga sa “Asteroid” Diha sa gula sa Enero 22, 1999, dihay artikulo nga may ulohang “Mga ‘Asteroid,’ mga Kometa, ug ang Yuta—Hapit Nang Magbanggaay?” Daghan kaayong salamat alang niining artikuloha. Kini naghatag ug katuohang pagpatin-aw sa posibleng mga kapeligrohan sa yuta. Sa tabang ni Jehova, walay mga katalagmang nahitabo. Akong gipabilhan ang pagkaprangka ug pagkamatinud-anon sa maong artikulo.
O. R., Pinlandia
Mga Abnormalidad sa Pagkaon Giluwas ninyo sa literal ang akong kinabuhi pinaagi sa Enero 22, 1999, nga seryeng, “Unsay Hinungdan sa mga Abnormalidad sa Pagkaon?” Ako may grabeng problema sa mga abnormalidad sa pagkaon 20 ka tuig na kanhi. Unya, sa milabayng napulo ka tuig o kapin pa, ako naghupot ug usa ka normal nga timbang. Apan, di pa dugay nag-antos ako gumikan sa depresyon ug nawad-ag lima ka kilo sulod sa 16 ka adlaw. Nagsugod akong matuk-an matag hungit nakog pagkaon. Nahadlok gayod ako sa akong padulngan sa ulahi. Ang mga artikulo nakatabang nako nga seryosong timbangtimbangon pag-usab ang akong kahimtang ug naghimo kanakong determinado sa pagbaton ug hustong nutrisyon. Kinasingkasing akong nagpasalamat kaninyo tungod sa inyong mahangawaon ug mahigugmaong mga artikulo.
P. M., Tinipong Bansa
Sa dihang akong gibasa kining mga artikuloha, nanglugmaw ang mga luha. Maora bag kini gisulat para gayod kanako. Kini nagtandog sa akong kasingkasing ug nagtabang kanako sa pagsabot nga kon ako mopadayon sa pagsalig kang Jehova, maayo ra ako niining sakita.
G. G., Puerto Rico
Ako 14 anyos ug buot nga magpasalamat ug dako kaninyo tungod sa mga artikulo bahin sa mga abnormalidad sa pagkaon. Nag-antos ako sa unang mga hugna sa bulimia. Wala ako mahibalo kon unsay himoon, sanglit bisan ang mga libro nga naghisgot sa maong problema wala makatabang kanako. Namatikdan sa akong mga ginikanan ang akong kahimtang ug nakigsulti kanako bahin sa mga artikulo. Daghang salamat.
N. H., Alemanya
Mga usa ka tuig ug tunga kanhi, ako nag-antos sa bulimia. Naghunahuna kong tambok ako, bisan pag dili ako sobra sa timbang. Ako nahibalo nga sayop ang hinobrang pagkaon ug pagpurga, apan dili ako makahunong. Sa tabang ni Jehova ug sa pagdasig sa suod nga mga higala, miarang-arang ako. Kining mga artikuloha nakatabang gayod kanako. Akong nasabtan nga dili lamang ako ang may ingon niini nga mga problema.
M. R., Inglaterra
Ako nagtuon sa Bibliya uban sa mga Saksi ni Jehova sulod sa duha ka tuig apan mihunong tungod sa depresyon. Ako nag-antos sa bulimia. Sanglit kanunay akong gitambalan, buot kong iapod-apod kining magasina sa akong mga doktor ug mga isigkapasyente. Naglaom ako nga magsugod na usab sa pagtuon sa Bibliya.
V. K., Republika sa Czech