KADES

[Balaang Dapit], KADES-BARNEA [Balaang Dapit sa Barnea].

Usa ka dapit nga gikampohan sa mga Israelinhon didto sa kamingawan nga nahimutang sa kinatumyan sa teritoryo sa Edom duol “sa dalan paingon sa Sur,” lagmit ang modernong Darb el-Shur nga nagsukad sa Hebron paingon sa Ehipto. (Gen 16:​7, 14; Num 20:14-16 [Ang Heb. nga ʽir (siyudad) diha sa Num 20:16 sa yano nagkahulogang kampo; itandi ang Num 13:19.]) Lagmit ang gilay-on sa Kades-barnea gikan sa Horeb maoy 11 ka adlaw nga panaw agi sa Bukid sa Seir.​—Deu 1:2.

Ang Kades gihisgotan nga nahimutang sa Kamingawan sa Paran ug sa Kamingawan sa Zin. Lagmit nga ang Zin ug Paran maoy magkasikbit nga mga kamingawan nga nag-abot sa Kades, ug busa, ang Kades ikaingong nahimutang sa bisan hain niini nga dapit. O, ang Kamingawan sa Zin tingali maoy bahin sa mas dakong Kamingawan sa Paran. (Num 13:26; 20:1) Sa panahon ni Abraham kining dapita nailhan ingong En-mispat ug ingong Kades. (Gen 14:7; 20:1) Tingali kini mao ra usab ang dapit sa Kedes.​—Jos 15:​21, 23.

Ang ʽAin Qedeis, mga 80 km (50 mi) sa HHK sa Beer-seba, gituohan nga lagmit mao ang Kades. Taliwala sa usa ka awaaw nga kamingawan (itandi ang Deu 1:19), ang lunsay ug matam-is nga tubig sa tubod sa Qedeis nagsustento sa usa ka tubigang dapit nga may mga balili, mga kahoykahoy, ug mga kahoy. Dihay duha usab ka laing mga tubod sa maong dapit, ang ʽAin el-Qudeirat ug ʽAin el-Qeseimeh. Karong adlawa ang kinadak-an sa tulo ka tubod mao ang ʽAin el-Qudeirat, ug tungod niini mas gituohan sa pipila nga mao kini ang Kades-barnea. Apan, ang ʽAin Qedeis mao ang kinasidlakang tubod. Busa, ang pagtuo nga ang ʽAin Qedeis mao ang Kades-barnea daw mas mohaom sa kahubitan sa S-K nga ruta sa habagatang utlanan sa Canaan: ang Kades-barnea (ʽAin Qedeis?), Hazar-addar (ʽAin el-Qudeirat?), ug Azmon (ʽAin el-Qeseimeh?).​—Num 34:​3-5.

Kon ang mga Israelinhon nagkampo gayod niining dapita, tungod sa gidak-on sa panon sa katawhan sila sa walay duhaduha migamit niining tulo ka tubod. Pananglitan, sa wala pa motabok sa Jordan, ang kampo mipahiluna “gikan sa Bet-jesimot hangtod sa Abel-sitim.” (Num 33:49) Kana adunay distansiya nga mga 8 km (5 mi), pinasukad sa gituohang nahimutangan sa maong mga dapit. Ang gilay-on gikan sa Kades-barnea (ʽAin Qedeis) ngadto sa Azmon (ʽAin el-Qeseimeh) maoy mga 14 km (8.5 mi); ug ngadto sa Hazar-addar (ʽAin el-Qudeirat) maoy 9 km (5.5 mi). Busa, ang posibilidad sa paggamit nila sa tanang tulo ka tubod maoy makataronganon. Posible usab nga ang tibuok dapit gitawag ug Kades-barnea ug kining ngalana napreserbar diha sa ngalan sa HS nga tubod.​—Tan-awa ang ADDAR Num. 2; AZMON.

Sa ikaduhang tuig human sa ilang Pagpanggula sa Ehipto, ang mga Israelinhon namiya sa Hazerot ug nagkampo sa Kades-barnea. (Itandi ang Num 10:​11, 12, 33, 34; 12:16; 13:26.) Dayon si Moises nagpadala ug 12 ka tawo aron mangespiya sa Yutang Saad. Napulo niining mga espiyaha nagdalag daotang taho, nga miresulta sa pagbagulbol ug pagrebelde sa mga Israelinhon. Busa, gisilotan ni Jehova ang nasod nga maglatagaw sa kamingawan. Human niana ang pagsulay sa Israel nga ilogon ang Canaan nga walay pagpaluyo ug pagtultol sa Diyos misangpot sa makauulaw nga kapildihan. (Num 13:1-16, 25-29; 14:1-9, 26-34, 44, 45; 32:7-13; Deu 1:41-45) Sulod sa taudtaod nga panahon human niadto ang mga Israelinhon nagpabilin sa Kades-barnea. (Deu 1:46) Apan dili katuyoan ni Jehova nga sila magpabilin didto. Una pa niana siya miingon kanila: “Sanglit ang mga Amalekanhon ug ang mga Canaanhon nagpuyo man sa ubos nga patag, ugma [usa ka Heb. nga idiom nga nagkahulogang “sa ulahi,” sama sa Ex 13:14] liko kamo ug panglakaw paingon sa kamingawan agi sa dalan sa Pulang Dagat.”​—Num 14:25.

Busa, ang mga Israelinhon mibiya sa Kades-barnea ug naglatagaw sa kamingawan sulod sa 38 ka tuig. (Deu 2:​1, 14) Mopatim-aw nga sulod niining mga tuiga sila miestar sa 18 ka lainlaing mga dapit, kay mao kini ang gidaghanon sa ilang mga pagkampo nga gitala human makabiya ang mga Israelinhon sa Hazerot. (Itandi ang Num 12:16–​13:​3, 25, 26; 33:16-36.) Bisan tuod ang Israel nagkampo sa Kades human makabiya sa Hazerot, ang Numeros 33:18 wala maghisgot sa Kades human sa Hazerot. Kini lagmit gituyo pagtangtang o tingali, ingon sa gisugyot sa uban kanhi, ang Kades lagmit mao ra usab ang Ritma.

Sa kataposan mopatim-aw nga ang mga Israelinhon nahibalik sa Kades sa unang bulan sa ika-40 nga tuig human sa Pagpanggula. (Num 20:1; 33:36-39) Ang igsoong babaye ni Moises nga si Miriam namatay didto. Sa ulahi, si Moises ug Aaron nawad-an sa pribilehiyo sa pagsulod sa Yutang Saad tungod kay napakyas sa pagbalaan kang Jehova maylabot sa milagrosong tagana sa tubig alang sa mga Israelinhon nga nagkampo sa Kades. Unya, gikan didto, si Moises mihangyo sa Edom nga tugotan sila nga moagi sa teritoryo niini. (Num 20:1-17) Kini nga hangyo gibalibaran, ug mopatim-aw nga ang mga Israelinhon nagpabilin pag dugaydugay sa Kades (Num 20:18; Huk 11:​16, 17) una pa mopadayon paingon sa Yutang Saad agi sa Bukid sa Hor. (Num 20:22; 33:37) Sa dihang sila nakaabot sa Kapatagan sa Moab, sa S sa Jordan, gitudlo ni Jehova ang Kades-barnea ingong bahin sa habagatang utlanan sa Yutang Saad. (Num 33:50; 34:4) Sa ulahi, ang mga Israelinhon ilalom ni Josue nagsakop sa dapit gikan sa Kades-barnea hangtod sa Gaza (Jos 10:41), ug ang Kades-barnea nahimutang sa habagatang utlanan sa Juda.​—Jos 15:1-4.

Ang Salmo 29:8 nag-ingon nga ang tingog ni Jehova nagpahinabo sa Kamingawan sa Kades nga ‘maglimbaglimbag.’ Ang gihisgotan dinhi lagmit nagtumong sa usa ka makusog nga bagyo nga mohuros gikan sa kabukiran sa A paingon sa rehiyon sa Kades sa H ug didto maghuyop sa mga balas nga kon tan-awon samag naglimbaglimbag nga kamingawan.