Kapahulayan sa Diyos—Unsa Kini?
‘Adunay nagpabilin nga usa ka igpapahulay alang sa katawhan sa Diyos.’—HEB. 4:9.
1, 2. Unsay atong makat-onan sa Genesis 2:3, ug unsang mga pangutana ang motungha?
SA UNANG kapitulo sa Genesis, atong nasayran nga sulod sa unom ka masambingayong adlaw, ang Diyos nag-andam sa yuta ingong puy-anan sa tawo. Ang pagtapos sa matag yugto gipaila sa mosunod nga mga pulong: “Dihay kagabhion ug dihay kabuntagon.” (Gen. 1:5, 8, 13, 19, 23, 31) Apan bahin sa ikapitong adlaw, ang Bibliya nag-ingon: “Gipanalanginan sa Dios ang adlaw nga ikapito ug nagbalaan niini; tungod kay niini nagpahulay siya gikan sa tanan niyang buhat nga gibuhat ug nahimo sa Dios.”—Gen. 2:3, Ang Balaang Kasulatan.
2 Matikdi ang pulong ‘nagpahulay.’ Kana nagpaila nga ang ikapitong adlaw—ang “adlaw” sa kapahulayan sa Diyos—wala pa matapos sa dihang gisulat ni Moises ang Genesis niadtong 1513 W.K.P. Nagpadayon pa ba karon ang adlaw sa kapahulayan sa Diyos? Kon mao, makasulod ba kita niana? Ang mga tubag niini nga mga pangutana hinungdanon kanato.
Si Jehova ‘Nagpahulay’ ba Gihapon?
3. Sa unsang paagi ang mga pulong ni Jesus sa Juan 5:16, 17 nagpaila nga ang ikapitong adlaw wala pa matapos sa unang siglo?
3 Dunay duha ka katarongan kon nganong makaingon kita nga ang ikapitong adlaw nagpadayon gihapon sa unang siglo K.P. Una, tagda ang gitubag ni Jesus sa iyang mga magsusupak nga nagsaway kaniya tungod sa pagpang-ayo sa adlaw sa Igpapahulay, nga giisip nilang usa ka buluhaton. Ang Ginoo miingon kanila: “Ang akong Amahan nagpadayon sa pagbuhat hangtod karon, ug ako nagpadayon sa pagbuhat.” (Juan 5:16, 17) Unsay iyang gipasabot? Sama ra nga siya miingon: ‘Ako ug ang akong Amahan managsamag buluhaton. Sanglit ang akong Amahan nagpadayon sa pagbuhat sulod sa iyang Igpapahulay, nga mikabat nag libolibo ka katuigan, puwede ra sab kong makatrabaho bisan sa Igpapahulay.’ Busa, gipasabot ni Jesus nga maylabot sa yuta, ang dakong adlaw nga Igpapahulay sa Diyos nga mao ang ikapitong adlaw wala pa matapos sa panahon ni Jesus.a
4. Unsa ang dugang rason nga gihatag ni Pablo nga nagpakita nga ang ikapitong adlaw nagpadayon gihapon sa iyang adlaw?
4 Ang ikaduhang rason gihatag ni apostol Pablo. Sa pagkutlo sa Genesis 2:2 bahin sa kapahulayan sa Diyos, si Pablo misulat: “Kita nga nagpasundayag ug pagtuo mosulod niana nga kapahulayan.” (Heb. 4:3, 4, 6, 9) Busa ang ikapitong adlaw nagpadayon gihapon sa adlaw ni Pablo. Kanus-a matapos ang ikapitong adlaw?
5. Unsay katuyoan sa ikapitong adlaw, ug kanus-a bug-os matuman ang maong katuyoan?
5 Aron matubag kana, angay natong hinumdoman ang katuyoan sa ikapitong adlaw. Ang Genesis 2:3 nagpatin-aw: “Ang Diyos nagpanalangin sa ikapitong adlaw ug naghimo niining sagrado.” Ang maong adlaw ‘gihimong sagrado’—gibalaan, o gilain ni Jehova—aron bug-os matuman ang iyang katuyoan. Ang katuyoan maoy aron ang yuta puy-an sa masinugtanong katawhan nga mag-atiman niini ug sa tanang buhing linalang diha niini. (Gen. 1:28) Kanay hinungdan nga si Jehova nga Diyos ug si Jesu-Kristo, ang “Ginoo sa igpapahulay,” “nagpadayon sa pagbuhat hangtod karon.” (Mat. 12:8) Ang adlaw sa kapahulayan sa Diyos magpadayon hangtod bug-os matuman ang iyang katuyoan. Kini matapos human sa Usa ka Libo ka Tuig nga Pagmando ni Kristo.
Ayawg ‘Kahulog sa Samang Sumbanan sa Pagkadili-Masinugtanon’
6. Unsang mga pananglitan ang nagsilbing pasidaan alang kanato, ug unsay atong makat-onan niana?
6 Ang katuyoan sa Diyos tin-awng gisaysay kang Adan ug Eva, apan sila milihok nga sukwahi niana. Human kang Adan ug Eva, minilyon sa katawhan ang nahimong dili masinugtanon. Bisan ang piniling katawhan sa Diyos, ang Israel, nahulog ngadto sa balikbalik nga pagkadili-masinugtanon. Si Pablo nagpasidaan sa unang-siglong mga Kristohanon nga bisan ang pipila kanila mahimong dili-masinugtanon sama sa mga Israelinhon. Siya misulat: “Busa buhaton nato ang kutob sa atong maarangan nga makasulod niana nga kapahulayan, kay basin may usa nga mahulog sa samang sumbanan sa pagkadili-masinugtanon.” (Heb. 4:11) Matikdi nga gipakita ni Pablo nga ang mga dili-masinugtanon dili makasulod sa kapahulayan sa Diyos. Unsay kahulogan niana kanato? Kana ba nagpasabot nga kon kita molihok nga supak sa katuyoan sa Diyos, dili kita makasulod sa kapahulayan sa Diyos? Ang tubag niana hinungdanon kaayo kanato, ug dugang nato kanang hisgotan. Apan, hisgotan una nato ang daotang panig-ingnan sa mga Israelinhon ug kon nganong wala sila makasulod sa kapahulayan sa Diyos.
“Dili Sila Makasulod sa Akong Kapahulayan”
7. Unsay katuyoan ni Jehova sa iyang pagluwas sa mga Israelinhon gikan sa Ehipto, ug unsay gidahom gikan kanila?
7 Sa 1513 W.K.P., gipadayag ni Jehova kang Moises ang iyang katuyoan bahin sa mga Israelinhon. Ang Diyos miingon: “Manaog ako sa pagluwas kanila gikan sa kamot sa mga Ehiptohanon ug sa pagpagawas kanila gikan sa maong yuta [Ehipto] ngadto sa usa ka yuta nga maayo ug haluag, ngadto sa usa ka yuta nga nagaagay sa gatas ug dugos.” (Ex. 3:8) Si Jehova nagluwas sa mga Israelinhon “gikan sa kamot sa mga Ehiptohanon” aron himoon silang iyang katawhan, sumala sa gisaad kang Abraham. (Gen. 22:17) Ang Diyos naghatag sa mga Israelinhon ug mga balaod aron makabaton silag maayong relasyon kaniya. (Isa. 48:17, 18) Siya miingon kanila: “Kon kamo hugot nga magasugot sa akong tingog ug magatuman gayod sa akong pakigsaad [sumala sa Balaod], nan kamo tinong mahimong akong linaing katigayonan gikan sa tanang ubang mga katawhan, tungod kay ang tibuok yuta akoa man.” (Ex. 19:5, 6) Busa, ang mga Israelinhon padayong makapahimulos ug linaing relasyon uban sa Diyos kon sundon nila ang iyang mga balaod.
8. Unsa untay kahimtang sa mga Israelinhon kon nagmasinugtanon pa sila sa Diyos?
8 Hunahunaa ang kahimtang sa mga Israelinhon kon nagmasinugtanon pa sila sa Diyos! Panalanginan ni Jehova ang ilang umahan, ubasan, ug kahayopan. Sila panalipdan gikan sa ilang mga kaaway. (Basaha ang 1 Hari 10:23-27.) Sa dihang mitungha ang Mesiyas, makita unta niya nga ang Israel independente gihapon nga nasod ug wala mailalom sa Roma. Kini usa unta ka modelong gingharian sa silingang mga nasod, nga magpamatuod nga ang pagkamasinugtanon ngadto sa matuod nga Diyos magdalag espirituwal ug materyal nga mga panalangin.
9, 10. (a) Nganong sayop ang tinguha sa Israel nga mobalik sa Ehipto? (b) Sa unsang paagi maapektohan ang pagsimba sa mga Israelinhon kon namalik sila sa Ehipto?
9 Talagsaon gayod ang pribilehiyo sa Israel—ang paglihok uyon sa katuyoan ni Jehova, nga moresulta sa mga panalangin dili lamang sa ilang kaugalingon kondili sa tanang pamilya sa yuta! (Gen. 22:18) Apan sa katibuk-an, ang maong rebelyosong henerasyon wala magpakitag interes nga mahimong modelong gingharian ilalom sa pagmando sa Diyos. Gusto pa gani nilang mobalik sa Ehipto! (Basaha ang Numeros 14:2-4.) Nan, kon mobalik sila sa Ehipto, unsaon nila pagkooperar sa katuyoan sa Diyos nga himoong modelong gingharian ang Israel? Dili gayod kana mahimo. Sa pagkatinuod, kon namalik pa sila sa Ehipto, dili gayod sila makatuman sa Moisesnong Balaod ug makabenepisyo sa kahikayan ni Jehova alang sa kapasayloan sa ilang mga sala. Pagkamubo sa ilang panglantaw! Bantog ra nga si Jehova miingon bahin sa mga rebelde: “Napungot ako niini nga kaliwatan ug miingon, ‘Kanunay silang mahisalaag sa ilang mga kasingkasing, ug wala sila mahibalo sa akong mga dalan.’ Busa sa akong kasuko ako nanumpa, ‘Dili sila makasulod sa akong kapahulayan.’”—Heb. 3:10, 11; Sal. 95:10, 11.
10 Ang ilang tinguha nga mobalik sa Ehipto nagpakita nga wala nila pabilhi ang espirituwal nga mga panalangin nga ilang nadawat, nga nagpalabi hinuon sa mga puerro, sibuyas, ug ahos didto sa Ehipto. (Num. 11:5) Sama sa ingratong si Esau, gusto sa mga rebelde nga ibaylo ang ilang espirituwal nga panulondon sa lamiang pagkaon.—Gen. 25:30-32; Heb. 12:16.
11. Ang kawalay-pagtuo ba sa mga Israelinhon sa adlaw ni Moises nakaapektar sa katuyoan sa Diyos?
11 Bisan pa sa kawalay pagtuo sa henerasyon sa mga Israelinhon nga mibiya sa Ehipto, si Jehova ‘nagpadayon sa pagbuhat’ nga mapailobon aron matuman ang iyang katuyoan, nga nagsentro sa iyang pagtagad sa sunod nga henerasyon. Ang bag-ong henerasyon mas masinugtanon kay sa ilang mga ginikanan. Uyon sa sugo ni Jehova, sila misulod sa Yutang Saad ug misugod sa pagpangdaog. Sa Josue 24:31, atong mabasa: “Ang Israel nagpadayon sa pag-alagad kang Jehova sa tanang adlaw ni Josue ug sa tanang adlaw sa mga ansiyano kansang mga adlaw milugway pa human kang Josue ug kinsa nahibalo sa tanang buhat ni Jehova nga iyang gibuhat alang sa Israel.”
12. Sa unsang paagi kita nahibalo nga kita makasulod sa kapahulayan sa Diyos karon?
12 Apan ngadtongadto, kadtong masinugtanon nga henerasyon nangamatay ug napulihag usa ka henerasyon nga ‘wala makaila kang Jehova ug sa iyang gibuhat alang sa Israel.’ Ug “ang mga anak sa Israel nagbuhat kon unsay daotan sa mga mata ni Jehova ug nag-alagad sa mga Baal.” (Maghu. 2:10, 11) Ang Yutang Saad wala mahimong tinuod nga “dapit nga kapahulayan” alang kanila. Tungod sa ilang pagkadili-masinugtanon, sila wala makapahimulos ug dumalayong kalinaw uban sa Diyos. Si Pablo misulat bahin kanila: “Kon gidala pa sila ni Josue ngadto sa usa ka dapit nga kapahulayan, ang Diyos dili na unta maghisgot pa sa ulahi ug laing adlaw.” Dayon, siya miingon: “Busa adunay nagpabilin nga usa ka pagpahulay sa igpapahulay alang sa katawhan sa Diyos.” (Heb. 4:8, 9) Ang “katawhan sa Diyos” nga gihisgotan ni Pablo mao ang mga Kristohanon. Nagpasabot ba kana nga ang mga Kristohanon makasulod sa kapahulayan sa Diyos? Segurado gayod—ang Hudiyo ug dili-Hudiyo nga mga Kristohanon!
Ang Pipila Wala Makasulod sa Kapahulayan sa Diyos
13, 14. Unsay koneksiyon sa pagsunod sa Moisesnong Balaod ug sa pagsulod sa kapahulayan sa Diyos (a) sa adlaw ni Moises? (b) sa unang siglo?
13 Si Pablo misulat sa Hebreohanong mga Kristohanon kay siya nabalaka nga ang pipila kanila wala molihok uyon sa katuyoan sa Diyos. (Basaha ang Hebreohanon 4:1.) Sa unsang diwa? Sila nagsunod gihapon sa pipila sa Moisesnong Balaod. Sulod sa mga 1,500 ka katuigan, ang mga Israelinhon nga buot magkinabuhi uyon sa katuyoan sa Diyos kinahanglang mosunod sa Balaod. Apan, pinaagi sa kamatayon ni Jesus, ang Balaod natapos. Ang pipila ka Kristohanon wala moila niana, ug sila miinsistir sa pagpadayon sa pagsunod sa pipila ka bahin sa Balaod.b
14 Gipatin-aw ni Pablo ngadto sa mga nagsunod sa Balaod nga ang pagkahataas nga saserdote ni Jesus, bag-ong pakigsaad, ug ang espirituwal nga templo maoy labaw kay sa karaang mga katumbas niini. (Heb. 7:26-28; 8:7-10; 9:11, 12) Busa, gigamit ni Pablo ang senemanang Igpapahulay aron ipatin-aw kon sa unsang paagi ang mga Kristohanon makasulod sa kapahulayan ni Jehova. Siya misulat: “Adunay nagpabilin nga usa ka pagpahulay sa igpapahulay alang sa katawhan sa Diyos. Kay ang tawo nga nakasulod sa kapahulayan sa Diyos nakapahulay usab gikan sa iyang kaugalingong mga buhat, sama nga mipahulay ang Diyos gikan sa iyang mga buhat.” (Heb. 4:8-10) Ang maong Hebreohanong mga Kristohanon dili na angayng maghunahuna nga kinahanglan silang mosunod sa Moisesnong Balaod aron uyonan ni Jehova. Sukad sa Pentekostes 33 K.P., siya naghatag sa iyang pag-uyon ngadto sa mga nagpasundayag ug pagtuo kang Jesu-Kristo.
15. Nganong gikinahanglan ang pagkamasinugtanon aron kita makasulod sa kapahulayan sa Diyos?
15 Nganong ang mga Israelinhon sa adlaw ni Moises wala makasulod sa Yutang Saad? Tungod sa pagkadili-masinugtanon. Unsay nakapugong sa pipila ka Kristohanon sa adlaw ni Pablo sa pagsulod sa kapahulayan sa Diyos? Mao gihapon—pagkadili-masinugtanon. Wala nila ilha nga natuman na ang katuyoan sa Balaod ug nga si Jehova naggiya sa iyang katawhan sa laing direksiyon.
Pagsulod sa Kapahulayan sa Diyos Karon
16, 17. (a) Sa unsang paagi kita makasulod sa kapahulayan sa Diyos karon? (b) Unsay atong hisgotan sa sunod artikulo?
16 May pipila ka Kristohanon karon ang moinsistir nga kinahanglang sundon ang pipila ka bahin sa Moisesnong Balaod aron maluwas. Ang inspiradong mga pulong ni Pablo sa mga taga-Efeso tin-aw kaayo: “Pinaagi niining dili-takos nga kalulot, sa pagkatinuod, kamo giluwas pinaagi sa pagtuo; ug kini dili tungod kaninyo, kini gasa sa Diyos. Dili, kini dili tungod sa mga buhat, aron walay tawo nga may pasukaranan sa pagpanghambog.” (Efe. 2:8, 9) Nan, sa unsang paagi ang mga Kristohanon makasulod sa kapahulayan sa Diyos? Gipili ni Jehova ang ikapitong adlaw—iyang adlaw sa kapahulayan—aron bug-os nga matuman ang iyang katuyoan bahin sa yuta. Kita makasulod sa kapahulayan ni Jehova—o moduyog sa iyang pagpahulay—pinaagi sa pagbuhat uyon sa iyang katuyoan nga gipadayag kanato pinaagi sa iyang organisasyon.
17 Sa laing bahin, kon dili nato pabilhan ang binase-sa-Bibliya nga tambag sa matinumanon ug maalamong ulipon, ug mag-independente, kita nagasupak sa katuyoan sa Diyos. Kini makadaot sa atong malinawong relasyon kang Jehova. Sa sunod artikulo, hisgotan ang pipila ka kahimtang diin atong ikapakita ang pagkamasinugtanon ngadto sa Diyos. Ang mga desisyon nga atong himoon magpakita kon kita ba nakasulod sa kapahulayan sa Diyos.
[Mga footnote]
a Ang mga saserdote ug Levihanon nagtrabaho sa templo sa Igpapahulay ug “nagpabiling walay sala.” Ingong hataas nga saserdote sa dakong espirituwal nga templo sa Diyos, si Jesus makahimo sa iyang espirituwal nga buluhaton nga dili mahadlok nga makalapas sa Igpapahulay.—Mat. 12:5, 6.
b Wala mahibaloi kon may Hudiyo bang mga Kristohanon nga nagtanyag ug mga halad sa Adlaw sa Pagtabon sa Sala, bisan human sa Pentekostes 33 K.P. Ang paghimo niadto nagpakita nga wala nila pabilhi ang halad ni Jesus. Apan, kita nahibalo nga ang pipila ka Hudiyong Kristohanon nagsunod gihapon sa ubang mga tradisyon nga nalangkit sa Balaod.—Gal. 4:9-11.
Mga Pangutana nga Palandongon
• Unsay katuyoan sa ikapitong adlaw nga kapahulayan sa Diyos?
• Nganong nahibalo kita nga ang ikapitong adlaw nagpadayon karon?
• Nganong ang mga Israelinhon sa adlaw ni Moises ug ang pipila sa unang-siglong mga Kristohanon wala makasulod sa kapahulayan sa Diyos?
• Sa unsang paagi kita makasulod sa kapahulayan sa Diyos karon?
[Blurb sa panid 27]
Makasulod kita sa adlaw sa kapahulayan ni Jehova kon kita mosunod kaniya ug sa iyang organisasyon
[Mga hulagway sa panid 26, 27]
Unsay gikinahanglan aron ang katawhan sa Diyos makasulod sa iyang kapahulayan?