Pagpanggula Gikan sa Ehipto

SI Jehova nagsugo kang Moises sa pag-atubang kang Paraon ug, sa pagsulti pinaagi sa ngalan ni Jehova, sa pag-ingon: “Palakta ang akong katawhan.” (Ex 5:1) Si Paraon nagdumili. Dili niya buot nga mawad-an ug usa ka nasod sa mga ulipon. Dugang pa niana, si Paraon wala mahibalo, o moila, nga si Jehova mao ang matuod nga Diyos. (Ex 5:2) Gisimba ni Paraon ang mga diyos sa Ehipto ug gani giisip ang iyang kaugalingon ingong usa ka diyos! Busa mibangon ang isyu: Kinsa ang matuod nga Diyos? Pinaagi sa napulo ka hampak, si Jehova nagpahamtang ug paghukom “sa tanang diyos sa Ehipto,” nga miresulta sa pagpagawas sa Israel ug naghatag ug pamatuod nga si Jehova mao ang buhi ug matuod nga Diyos.​—Ex 12:12.

Ingong usa ka dakong grupo, ang Israel mibiya gikan sa Rameses sa Ehipto niadtong Nisan 15, 1513 W.K.P. Sa dihang ang panon mipadulong sa sidlakan, sa walay duhaduha mikuyog kanila ang uban pa gikan sa Gosen. Sa pag-abot nila sa Etam, gisugo sila ni Jehova nga “mamalik ug magkampo atubangan sa Pihahirot . . . duol sa dagat.” Alang sa mga Ehiptohanon, daw ang katawhan nasaag. (Ex 13:20; 14:1-3) Sila daw natanggong tali sa Pulang Dagat ug sa kabukiran. Sanglit anaa man sa ilang likod ang Ehiptohanong mga karo nga iggugubat, sila daw walay kalutsan! Ubos niini nga mga kahimtang nga giluwas ni Jehova ang Israel ug gilaglag si Paraon ug ang iyang kasundalohan. (Ex 14:13-31) Busa, gipasundayag ni Jehova ang iyang dakong gahom ug gipahinabo nga ang iyang gibuhat alang sa Israel pagahisgotan “sa tibuok yuta.”​—Ex 9:16; Jos 2:10; 9:9.