Pabilin Diha sa “Siyudad nga Dalangpanan” ug Mabuhi!
“Siya kinahanglang magpuyo sa iyang siyudad nga dalangpanan hangtod sa kamatayon sa hataas nga saserdote.”—NUMEROS 35:28.
1. Kinsa ang Tigpanimalos sa dugo, ug unsang lihok ang iyang himoon sa dili madugay?
ANG Tigpanimalos sa dugo ni Jehova, si Jesu-Kristo, hapit nang mohampak. Uban sa iyang panon sa mga manulonda, kini nga Tigpanimalos sa dili madugay molihok batok sa tanang dili-mahinulsolong sad-an sa dugo. Oo, si Jesus mag-alagad ingong Tigpatay sa Diyos sa panahon sa duol nang nagsingabot nga “dakong kasakitan.” (Mateo 24:21, 22; Isaias 26:21) Ang katawhan unya dili makaikyas sa mga sangpotanan sa ilang pagkasad-an sa dugo.
2. Unsa ang bugtong matuod nga dapit nga dalangpanan, ug unsang mga pangutana nga nagkinahanglag mga tubag?
2 Ang dalan ngadto sa kaluwasan mao ang paglakaw diha sa dalan sa antitipikong siyudad nga dalangpanan ug pagdagan alang sa imong kinabuhi! Kon pasudlon sa siyudad, ang mikalagiw kinahanglang magpabilin didto, tungod kay mao lamang kini ang tinuod nga dapit nga dalangpanan. Apan tingali mangutana ka, ‘Sanglit ang kadaghanan kanato wala man gayod makapatay ug tawo, tinuod ba gayod nga kita sad-an sa dugo? Nganong si Jesus ang Tigpanimalos sa dugo? Unsa ang modernong-adlawng siyudad nga dalangpanan? Aduna bay usa nga luwas nga makabiya niana?’
Tinuod ba Gayod nga Kita Sad-an sa Dugo?
3. Unsang bahin sa Moisesnong Kasugoan ang makatabang kanato sa pagkasabot nga ang binilyon sa yuta may bahin sa pagkasad-an sa dugo?
3 Ang usa ka bahin sa Moisesnong Kasugoan makatabang kanato sa pagsabot nga ang binilyon sa yuta may bahin sa pagkasad-an sa dugo. Gipahamtangan sa Diyos ang mga Israelinhon ug tulubagon sa tanan nga pag-ulag-dugo. Kon may tawong nakit-an nga gipatay ug wala mahibal-i ang mamumuno, sukdon sa mga maghuhukom ang distansiya sa palibot nga mga siyudad aron matino ang kinaduolang siyudad. Aron dili mahimong sad-an, ang mga ansiano nianang daw sad-an nga siyudad maglunggo sa liog sa usa ka nati, wala pa magamit sa pagtrabaho nga baka didto sa patag nga walog nga wala pa matikad. Himoon kini atubangan sa mga saserdoteng Levihanon ‘tungod kay gipili sila ni Jehova sa paghusay sa mga panag-away bahin sa mapintas nga mga buhat.’ Ang mga ansiano sa siyudad manghunaw sa ilang mga kamot sa ibabaw sa baka ug magaingon: “Ang among mga kamot wala mag-ula niining dugoa, ni ang among mga mata nakakita niana. Ayaw kini ipahamtang diha sa imong katawhang Israel, nga gitubos mo, Oh Jehova, ug ayaw itugot nga ang pagkasad-an sa dugo sa walay sala magpabilin sa taliwala sa imong katawhan nga Israel.” (Deuteronomio 21:1-9) Dili buot ni Jehova nga Diyos nga ang yuta sa Israel mahugawan sa dugo o ang mga tawo niini magpas-an sa pagkasad-an sa dugo nga tulubagon sa tanan.
4. Unsay rekord sa Babilonyang Bantogan labot sa pagkasad-an sa dugo?
4 Oo, adunay ingon niana nga tulubagon sa tanan, o tulubagon sa komunidad, nga pagkasad-an sa dugo. Palandonga ang dakong pagkasad-an sa dugo nga makita sa Babilonyang Bantogan, ang kalibotanong empiryo sa bakak nga relihiyon. Tinuod, siya nahubog sa dugo sa mga alagad ni Jehova! (Pinadayag 17:5, 6; 18:24) Ang mga relihiyon sa Kakristiyanohan nangangkon nga nagsunod sa Prinsipe sa Pakigdait, apan ang mga gubat, relihiyosong mga inkwisisyon, ug makamatayng mga krusada naghimo kanila nga sad-an sa dugo atubangan sa Diyos. (Isaias 9:6; Jeremias 2:34) Sa pagkatinuod, kinahanglang pas-anon niya ang dakong pagkasad-an tungod sa mga kamatayon sa minilyon sa duha ka gubat sa kalibotan niining sigloha. Busa, ang mga sumusunod sa bakak nga relihiyon maingon man ang mga tigpaluyo ug mga entrante sa tawhanong panaggubat sad-an sa dugo atubangan sa Diyos.
5. Sa unsang paagi ang ubang tawo nahisama sa tawong nakapatay nga wala tuyoa sa Israel?
5 Ang pipila ka tawo nakapahinabog kamatayon sa tawo nga tinuyo o gumikan sa pagkadanghag. Ang uban nakigbahin sa dinaghang pagpamatay, nga tingali nadani sa mga lider sa relihiyon nga kini maoy kabubut-on sa Diyos. Ang uban pa naglutos ug nagpatay sa mga alagad sa Diyos. Apan, bisan pag kita wala makahimo niining mga butanga, may bahin kita sa tulubagon sa komunidad sa kamatayon sa tawhanong kinabuhi tungod kay kita wala mahibalo sa balaod ug sa kabubut-on sa Diyos. Kita nahisama sa tawong nakapatay nga wala tuyoa ‘kinsa nakapatay ug iyang isigkatawo nga wala mahibalo niini ug wala magdumot kaniya sa miagi nga panahon.’ (Deuteronomio 19:4) Kining mga tawhana angay mangayo sa Diyos ug kaluoy ug kinahanglang modagan ngadto sa antitipikong siyudad nga dalangpanan. Kay kondili peligrong masugatan nila ang Tigpanimalos sa dugo.
Hinungdanong mga Papel ni Jesus
6. Nganong ikaingon nga si Jesus mao ang labing suod nga paryente sa katawhan?
6 Sa Israel ang tigpanimalos sa dugo mao ang labing duol nga paryente sa biktima. Aron mapanimaslan ang tanang gipamatay sa yuta ug ilabina ang mga gipamatayng mga alagad ni Jehova, ang presenteng-adlawng Tigpanimalos sa dugo kinahanglang paryente sa tanang katawhan. Kana nga papel gidula ni Jesu-Kristo. Siya natawo ingong tawong hingpit. Gitugyan ni Jesus ang iyang walay sala nga kinabuhi diha sa kamatayon ingong halad lukat, ug human sa iyang pagkabanhaw sa langit, iyang gipresentar ang bili niini ngadto sa Diyos alang sa makasasala himalatyong mga kaliwat ni Adan. Si Kristo sa ingon nahimong Manunubos sa katawhan, ang atong labing suod nga paryente—ang may katungod nga Tigpanimalos sa dugo. (Roma 5:12; 6:23; Hebreohanon 10:12) Si Jesus nailhan ingong igsoon sa iyang dinihogan nagsunod-sa-tunob nga mga sumusunod. (Mateo 25:40, 45; Hebreohanon 2:11-17) Ingong langitnong Hari siya nahimong ang “Amahan nga Walay Kataposan” niadtong makabenepisyo sa iyang halad ingong iyang yutan-ong mga ginsakpan. Kini sila mabuhing walay kataposan. (Isaias 9:6, 7) Busa tukmang gitudlo ni Jehova kining Paryente sa katawhan ingon nga mao ang Tigpanimalos sa dugo.
7. Ingong dakong Hataas nga Saserdote, unsay ginahimo ni Jesus alang sa mga tawo?
7 Si Jesus usab maoy usa ka walay sala, nasulayan, may simpatiya nga Hataas nga Saserdote. (Hebreohanon 4:15) Niana nga kapasidad iyang gipadapat ang bili sa iyang nagatabon-sa-sala nga halad ngadto sa katawhan. Ang mga siyudad nga dalangpanan gitukod “alang sa mga anak sa Israel ug alang sa mga langyawng molupyo ug sa mga lalin nga anaa sa taliwala nila.” (Numeros 35:15) Busa ang dakong Hataas nga Saserdote unang nagpadapat sa bili sa iyang halad ngadto sa iyang dinihogang mga sumusunod, “ang mga anak sa Israel.” Karon kini gipadapat ngadto sa ‘langyawng mga molupyo’ ug ‘mga lalin’ diha sa antitipikong siyudad nga dalangpanan. Kining “ubang mga karnero” ni Ginoong Jesu-Kristo naglaom nga mabuhing walay kataposan sa yuta.—Juan 10:16; Salmo 37:29, 34.
Ang Siyudad nga Dalangpanan Karon
8. Unsa ang antitipikong siyudad nga dalangpanan?
8 Unsa ang antitipikong siyudad nga dalangpanan? Dili kini usa ka lugar sa geograpiya nga sama sa Hebron, nga usa sa unom ka Levihanong mga siyudad nga dalangpanan ug pinuy-anan sa hataas nga saserdote sa Israel. Ang siyudad nga dalangpanan karon mao ang tagana sa Diyos sa pagpanalipod kanato batok sa kamatayon tungod sa paglapas sa iyang sugo bahin sa pagkabalaan sa dugo. (Genesis 9:6) Tinuyo o wala tuyoa, ang matag usa nga maglalapas nianang sugoa kinahanglang mangayog pasaylo sa Diyos ug sa pagpanas sa iyang sala pinaagi sa pagtuo sa dugo sa Hataas nga Saserdote, si Jesu-Kristo. Ang dinihogang mga Kristohanon nga adunay langitnong mga paglaom ug ang “dakong panon” nga adunay yutan-ong mga palaaboton nagpahimulos sa mga kaayohan sa nagatabon-sa-sala nga halad ni Jesus ug anaa sa antitipikong siyudad nga dalangpanan.—Pinadayag 7:9, 14; 1 Juan 1:7; 2:1, 2.
9. Sa unsang paagi si Saulo sa Tarsus nakalapas sa sugo sa Diyos bahin sa dugo, apan sa unsang paagi gipasundayag niya ang kausaban sa tinamdan?
9 Sa wala pa siya mahimong Kristohanon, si apostol Pablo nakalapas sa sugo bahin sa dugo. Ingong Saulo sa Tarsus, iyang gilutos ang mga sumusunod ni Jesus ug giuyonan pa gani ang pagpatay kanila. “Bisan pa,” miingon si Pablo, “ako gipakitaan ug kaluoy, tungod kay ako walay-alamag ug milihok uban ang kawalay pagtuo.” (1 Timoteo 1:13; Buhat 9:1-19) Si Saulo may mahinulsolong tinamdan, nga sa ulahi gipamatud-an pinaagi sa daghang buhat sa pagtuo. Apan labaw pa sa pagtuo sa lukat ang gikinahanglan aron makasulod sa antitipikong siyudad nga dalangpanan.
10. Sa unsang paagi posibleng mabatonan ang maayong konsensiya, ug unsa ang kinahanglang himoon aron mahuptan kana?
10 Ang usa ka tawong nakapatay nga wala tuyoa makapuyo sa usa sa mga siyudad nga dalangpanan sa Israel gawas lamang kon siya makapamatuod nga siya may maayong konsensiya sa Diyos may kalabotan sa pag-ulag dugo. Aron makabaton ug maayong konsensiya, kinahanglang magpasundayag kita ug pagtuo sa halad ni Jesus, maghinulsol sa atong mga sala, ug mag-usab sa atong dalan. Kinahanglang mangayo kitag maayong konsensiya diha sa mainampoong pagpahinungod sa Diyos pinaagi ni Kristo, simbolohan kini pinaagi sa bawtismo sa tubig. (1 Pedro 3:20, 21) Kining maayong konsensiya nagtugot kanato sa pagbaton ug mahinlong relasyon uban kang Jehova. Ang bugtong paagi aron mahuptan ang maayong konsensiya mao ang pagsunod sa mga kinahanglanon sa Diyos ug sa pagtuman sa buluhaton nga gitudlo kanato diha sa antitipikong siyudad nga dalangpanan, sama sa pagsunod sa mga mikalagiw diha sa karaang dalangpanang mga siyudad sa Kasugoan ug sa pagtuman sa ilang tinudlong mga buluhaton. Ang pangunang buluhaton sa katawhan ni Jehova karon mao kanang pagmantala sa mensahe sa Gingharian. (Mateo 24:14; 28:19, 20) Ang paghimo nianang buluhatona makatabang kanato nga mahimong mapuslanong mga lumolupyo sa presenteng-adlawng siyudad nga dalangpanan.
11. Unsa ang kinahanglang likayan aron kita magpabilin nga luwas sulod sa siyudad nga dalangpanan karon?
11 Ang pagbiya sa siyudad nga dalangpanan karon maoy pagladlad sa atong kaugalingon sa kalaglagan, kay ang Tigpanimalos sa dugo sa dili magdugay molihok batok sa tanan nga sad-an sa dugo. Dili kini ang panahon nga masakpan diha sa gawas niining nagapanalipod nga siyudad o sa peligrosong lugar duol sa utlanan sa mga sibsibanan niini. Basin mahigawas kita sa antitipikong siyudad nga dalangpanan kon mawad-an kitag pagtuo sa nagatabon-sa-sala nga halad sa Hataas nga Saserdote. (Hebreohanon 2:1; 6:4-6) Dili usab kita mahilwas sa kapeligrohan kon ginasunod nato ang kalibotanong mga paagi, nga dili bug-os nga nakig-uban sa organisasyon ni Jehova, o halayo gikan sa matarong nga mga sukdanan sa atong langitnong Amahan.—1 Corinto 4:4.
Gipagawas Gikan sa Siyudad nga Dalangpanan
12. Hangtod kanus-a magpabilin ang sad-an sa dugo sa miagi nga panahon diha sa antitipikong siyudad nga dalangpanan?
12 Ang usa ka tawong nakapatay nga wala tuyoa sa Israel kinahanglang magpabilin sa siyudad nga dalangpanan “hangtod sa kamatayon sa hataas nga saserdote.” (Numeros 35:28) Busa hangtod kanus-a ang mga sad-an sa dugo sa miagi nga panahon magpabilin sa antitipikong dalangpanang siyudad? Hangtod nga dili na sila magkinahanglan sa mga pag-alagad sa Hataas nga Saserdote, si Jesu-Kristo. “Siya makahimo usab sa pagluwas sa bug-os kanilang kinsa nagaduol sa Diyos pinaagi kaniya,” miingon si Pablo. (Hebreohanon 7:25) Samtang magpadayon pa ang bisan unsang mga lama sa sala ug kanhing pagkasad-an sa dugo, ang mga pag-alagad sa Hataas nga Saserdote gikinahanglan aron ang mga tawong dili-hingpit makabaton ug matarong nga baroganan sa Diyos.
13. Kinsa ang presenteng-adlawng “mga anak sa Israel,” ug hangtod kanus-a sila kinahanglang magpabilin sa “siyudad nga dalangpanan”?
13 Hinumdomi nga ang karaang mga siyudad nga dalangpanan gitukod alang sa “mga anak sa Israel,” sa langyawng mga molupyo, ug sa mga lalin. “Ang mga anak sa Israel” mao ang espirituwal nga mga Israelinhon. (Galacia 6:16) Sila kinahanglang magpabilin sa antitipikong siyudad nga dalangpanan samtang buhi pa sila sa yuta. Ngano? Tungod kay sila anaa pa gihapon sa dili-hingpit nga unod ug busa nagkinahanglan sa nagatabon-sa-sala nga bili sa ilang langitnong Hataas nga Saserdote. Apan sa dihang kining dinihogang mga Kristohanon mamatay ug pagabanhawon ngadto sa espirituhanong kinabuhi sa langit, sila dili na magkinahanglan sa nagatabon-sa-sala nga mga pag-alagad sa Hataas nga Saserdote; pagabiyaan na nila sa dayon ang unod ug pagkasad-an sa dugo nga nalangkit niini. Ngadto niining nabanhawng mga dinihogan, ang Hataas nga Saserdote namatay diha sa usa ka nagatabon-sa-sala, mapanalipdanong kapasidad.
14. Unsa pay gikinahanglan aron kadtong adunay langitnong palaaboton magpabilin sa dalangpanang siyudad karong adlawa?
14 Tungod sa pagkatawhanon mismo gikinahanglan nga kadtong mahimong “kaubang mga manununod ni Kristo” sa langit magpabilin diha sa antitipikong dalangpanang siyudad hangtod nga matinumanon nilang matapos ang ilang yutan-ong dalan diha sa kamatayon. Inigkamatay nila, ilang ihalad ang tawhanong kinaiyahan sa walay kataposan. (Roma 8:17; Pinadayag 2:10) Ang halad ni Jesus ikapadapat lamang ngadto niadtong nakabaton ug tawhanong kinaiyahan. Busa, ang Hataas nga Saserdote namatay ngadto sa espirituwal nga Israel sa dihang pagabanhawon sila ingong espirituhanong mga linalang kinsa magpuyo sa walay kataposan sa langit ingong “mga mag-aambit sa kinaiyahan nga iya-sa-Diyos.”—2 Pedro 1:4.
15. Kinsa ang modernong-adlawng ‘langyawng mga molupyo’ ug ‘mga lalin,’ ug unsay buhaton sa dakong Hataas nga Saserdote alang kanila?
15 Kanus-a ang Hataas nga Saserdote “mamatay” may kalabotan sa modernong-adlawng ‘langyawng mga molupyo’ ug ‘mga lalin,’ nga nagtugot kanila sa pagbiya sa antitipikong siyudad nga dalangpanan? Kining mga sakop sa dakong panon dili makagawas niining siyudad nga dalangpanan human gilayon sa dakong kasakitan. Nganong dili? Tungod kay anaa pa man gihapon sila sa ilang dili-hingpit, makasasalang unod ug kinahanglang magpabilin ilalom sa panalipod sa Hataas nga Saserdote. Pinaagi sa ilang pagpahimulos sa iyang nagatabon-sa-sala nga mga pag-alagad sa panahon sa iyang usa ka libo ka tuig nga pagkahari ug pagkasaserdote, sila makabaton ug tawhanong kahingpitan. Unya ipresentar sila ni Jesus ngadto sa Diyos alang sa kataposan, mahukmanon sa dayon nga pagsulay sa ilang integridad pinaagi sa pagbuhi kang Satanas ug sa iyang mga demonyo sa makadiyut. Tungod kay nakalabang sila niini nga pagsulay uban sa pag-uyon sa Diyos, ipahayag sila ni Jehova nga matarong. Sa ingon maabot nila ang kabug-osan sa tawhanong kahingpitan.—1 Corinto 15:28; Pinadayag 20:7-10.a
16. Kanus-a nga ang mga makalabang buhi sa dakong kasakitan wala nay dugang panginahanglan alang sa nagatabon-sa-sala nga mga pag-alagad sa Hataas nga Saserdote?
16 Busa, ang mga makalabang buhi sa dakong kasakitan kinahanglang maghupot ug maayong konsensiya pinaagi sa pagpabilin sa antitipikong dalangpanang siyudad hangtod sa kataposan sa Usa ka Libo ka Tuig nga Pagmando ni Kristo. Ingong nahingpit nga katawhan, sila dili na magkinahanglan sa nagatabon-sa-sala nga mga serbisyo sa Hataas nga Saserdote ug mogula ilalom sa iyang panalipod. Nan si Jesus namatay alang kanila ingong Hataas nga Saserdote, kay dili na siya kinahanglang molihok alang kanila pinaagi sa nagahinlo nga dugo sa iyang halad. Niana unyang panahona ilang biyaan ang antitipikong siyudad nga dalangpanan.
17. Nganong dili na kinahanglang mosulod pa sa antitipikong siyudad nga dalangpanan ug magpabilin didto kadtong pagabanhawon sa panahon sa Usa ka Libo ka Tuig nga Pagmando ni Kristo?
17 Kinahanglan ba nga kadtong binanhaw sa panahon sa Usa ka Libo ka Tuig nga Pagmando ni Kristo mosulod sa antitipikong siyudad nga dalangpanan ug magpabilin didto hangtod mamatay ang hataas nga saserdote? Dili, tungod kay pinaagi sa pagkamatay ila nang nabayran ang silot sa ilang pagkamakasasala. (Roma 6:7; Hebreohanon 9:27) Bisan pa, tabangan sila sa Hataas nga Saserdote nga makaabot sa kahingpitan. Kon malamposon nilang malabang ang kataposang pagsulay human sa Milenyo, ipahayag usab sila sa Diyos nga matarong nga may garantiya nga kinabuhing walay kataposan sa yuta. Siyempre, ang pagkapakyas sa pagsunod sa mga kinahanglanon sa Diyos mosangpot ug silot nga kamatayon ug kalaglagan diha kang bisan kinsa nga mga tawo nga dili makalabang sa kataposang pagsulay ingong mga maghuhupot sa integridad.
18. Mahitungod sa pagkahari ug pagkasaserdote ni Jesus, unsa ang magpabilin uban sa katawhan sa walay kataposan?
18 Ang hataas nga mga saserdote sa Israel sa ngadtongadto nangamatay. Apan si Jesus “nahimong hataas nga saserdote sa paagi nga sama kang Melquisedek hangtod sa hangtod.” (Hebreohanon 6:19, 20; 7:3) Busa ang pagkatapos sa katungdanan ni Jesus ingong tigpataliwala nga Hataas nga Saserdote sa katawhan dili magtapos sa iyang kinabuhi. Ang maayong mga epekto sa iyang pag-alagad ingong Hari ug Hataas nga Saserdote magpabilin sa katawhan sa walay kataposan, ug ang mga tawo utangan niya hangtod sa kahangtoran tungod kay siya nakaalagad niining mga kapasidara. Dugang pa, si Jesus sa walay kataposan magapanguna diha sa putli nga pagsimba kang Jehova.—Filipos 2:5-11.
Bililhong mga Pagtulon-an Alang Kanato
19. Unsang pagtulon-an bahin sa pagdumot ug gugma ang makat-onan gikan sa tagana sa mga siyudad nga dalangpanan?
19 Kita makakat-on ug daghang pagtulon-an gikan sa tagana sa mga siyudad nga dalangpanan. Pananglitan, walay tawong nakapatay nga may mabunoong pagdumot sa iyang biktima ang tugotan sa pagpuyo sa siyudad nga dalangpanan. (Numeros 35:20, 21) Busa nganong tugotan ni bisan kinsa diha sa antitipikong siyudad nga dalangpanan ang pagdumot sa igsoon nga maugmad sa iyang kasingkasing? “Ang matag usa nga nagadumot sa iyang igsoon maoy usa ka mamumuno,” misulat si apostol Juan, “ug nahibalo kamo nga walay mamumuno nga kaniya nagapabilin ang kinabuhing walay-kataposan.” Busa pasagdi nga kita ‘magpadayon sa paghigugma sa usag usa, tungod kay ang gugma gikan sa Diyos.’—1 Juan 3:15; 4:7.
20. Aron mapanalipdan batok sa Tigpanimalos sa dugo, unsay kinahanglang buhaton niadtong anaa sa antitipikong mga siyudad nga dalangpanan?
20 Aron mapanalipdan batok sa tigpanimalos sa dugo, ang tawong nakapatay nga wala tuyoa kinahanglang magpabilin sa siyudad nga dalangpanan ug dili maglaaglaag lapas sa mga sibsibanan niini. Komosta kadtong anaa sa antitipikong siyudad nga dalangpanan? Aron maluwas gikan sa dakong Tigpanimalos sa dugo, kinahanglang dili sila mogawas sa siyudad. Sa pagkamatuod, sila kinahanglang magbantay batok sa mga pangabig sa pag-adto sa daplin sa mga sibsibanan, sa mahulagwayong pagkasulti. Sila kinahanglang magbantay sa dili pagtugot nga maugmad sa ilang mga kasingkasing ang paghigugma sa kalibotan ni Satanas. Kini nagkinahanglag pag-ampo ug paningkamot, apan ang ilang mga kinabuhi nagadepende niini.—1 Juan 2:15-17; 5:19.
21. Unsang magantihong buluhaton ang ginahimo niadtong anaa sa siyudad nga dalangpanan karon?
21 Ang mga tawong nakapatay nga wala tuyoa sa karaang mga siyudad nga dalangpanan kinahanglang mahimong mabungahong mga mamumuo. Sa susama, ang dinihogang “mga anak sa Israel” naghatag ug maayong panig-ingnan ingong mga mamumuo sa pag-ani ug mga magmamantala sa Gingharian. (Mateo 9:37, 38; Marcos 13:10) Ingong ‘langyawng mga molupyo’ ug ‘mga lalin’ karon sa dalangpanang siyudad, ang mga Kristohanon nga may yutan-ong mga palaaboton may pribilehiyo sa pagbuhat niining nagaluwas-ug-kinabuhi nga buluhaton uban sa mga dinihogan nga ania pa sa yuta. Ug pagkamagantihon nga buluhaton kini! Kadtong matinumanong nagtrabaho diha sa antitipikong siyudad nga dalangpanan makaikyas sa walay kataposang kamatayon sa mga kamot sa Tigpanimalos sa dugo. Hinunoa, sila makakuhag walay kataposang mga kaayohan gikan sa iyang pag-alagad ingong dakong Hataas nga Saserdote sa Diyos. Magpabilin ka ba diha sa siyudad nga dalangpanan ug mabuhing walay kataposan?
[Footnote]
Unsay Imong Tubag?
◻ Nganong ikaingon nga ang binilyon sa yuta sad-an sa dugo?
◻ Unsang mga papel ang gidula ni Jesu-Kristo may kalabotan sa katawhan?
◻ Unsa ang antitipikong siyudad nga dalangpanan, ug sa unsang paagi ang usa makasulod niana?
◻ Kanus-a makagawas ang mga tawo gikan sa antitipikong dalangpanang siyudad?
◻ Unsang hinungdanong pagtulon-an ang atong makat-onan gikan sa tagana sa mga siyudad nga dalangpanan?
[Halagway sa panid 16]
Nahibalo ka ba kon unsang hinungdanong mga papel ang gidula ni Jesu-Kristo?