Ang Pulong ni Jehova Buhi
Pangunang mga Punto Gikan sa Basahon sa Numeros
HUMAN nga nakagawas sila sa Ehipto, ang mga Israelinhon giorganisar ingong usa ka nasod. Wala magdugay human niana, sila mahimo untang makasulod sa Yutang Saad, apan sila napakyas. Hinunoa, sila napugos sa paglibodlibod mga kap-atan ka tuig diha sa “dako ug makalilisang nga kamingawan.” (Deuteronomio 8:15) Ngano? Ang asoy sa kasaysayan sa basahon sa Bibliya nga Numeros nagsugilon kanato kon unsay nahitabo. Angay nga matukmod kita niini nga kita kinahanglang mamati kang Jehova nga Diyos ug magpakita ug pagtahod sa iyang mga tinugyanan.
Ang basahon sa Numeros, nga gisulat ni Moises diha sa kamingawan ug sa Kapatagan sa Moab, mikobre ug 38 ka tuig ug 9 ka bulan—gikan sa 1512 W.K.P. ngadto sa 1473 W.K.P. (Numeros 1:1; Deuteronomio 1:3) Ang ngalan niini gikuha gikan sa duha ka pag-ihap sa populasyon sa mga Israelinhon, nga gihimo mga 38 ka tuig ang kal-ang. (Mga kapitulo 1-4, 26) Ang asoy gibahin sa tulo ka seksiyon. Ang unang bahin nagsugilon sa mga butang nga nahitabo sa Bukid sa Sinai. Ang ikaduha naghisgot sa mga panghitabo panahon nga naglibodlibod ang Israel sa kamingawan. Ug ang kataposang seksiyon naghisgot sa mga hitabo diha sa Kapatagan sa Moab. Samtang magbasa ka niini nga asoy, tingali mangutana ka sa imong kaugalingon: ‘Unsay gitudlo niining mga hitaboa kanako? Aduna bay mga prinsipyo niining basahona nga makahatag kanako ug kaayohan karon?’
SA BUKID SA SINAI
Ang una sa duha ka pag-ihap sa populasyon nahitabo samtang ang mga Israelinhon didto pa sa tiilan sa Bukid sa Sinai. Ang mga lalaki nga 20 ang edad ug pataas, gawas sa mga Levihanon, mitotal ug 603,550. Ang pag-ihap sa populasyon tingali gihimo alang sa katuyoan sa pagrekluta ug sundalo. Ang tibuok kampo, lakip sa kababayen-an, kabataan, ug mga Levihanon, lagmit moabot sa gidaghanon nga kapin sa tulo ka milyong tawo.
Human sa pag-ihap sa populasyon, ang mga Israelinhon nakadawat ug mga instruksiyon bahin sa kahikayan sa paglakaw diha sa kamingawan, mga detalye bahin sa mga buluhaton sa mga Levihanon ug sa pag-alagad sa tabernakulo, mga sugo bahin sa kuwarentinas, ug mga balaod may kalabotan sa mga kaso sa pangabubho ug mga panaad sa mga Nazareo. Ang kapitulo 7 nasudlan sa mga impormasyon bahin sa mga halad nga gitanyag sa mga pangulo sa tribo sa inagurasyon sa altar, ug ang kapitulo 9 naghisgot bahin sa pagsaulog sa Paskuwa. Ang tibuok katigoman gihatagan usab ug mga instruksiyon kon unsaon pagkampo ug paghipos sa kampo.
Tubag sa mga Pangutana Bahin sa Kasulatan:
2:1, 2—Unsa ang “mga ilhanan” nga maoy giya sa tulo-ka-tribo nga dibisyon sa pagkampo diha sa kamingawan? Ang Bibliya wala maghatag ug katin-awan kon unsa kini nga mga ilhanan. Apan, wala kini isipa ingong balaang mga simbolo o gihatagan ug relihiyosong kahulogan. Ang mga ilhanan gigamit alang sa usa ka praktikal nga katuyoan—pagtabang sa tawo sa pagkakita sa iyang hustong dapit diha sa kampo.
5:27—Unsay buot ipasabot sa ‘pagkuyos sa balat-ang’ sa asawa nga sad-an sa pagpanapaw? Ang pulong nga “balat-ang” gigamit dinhi sa pagtumong sa mga organo sa pagsanay. (Genesis 46:26) Ang ‘pagkuyos’ niini nagpasabot sa pagkadaot niini nga mga organo nga tungod niana dili na siya makapanganak.
Mga Leksiyon Alang Kanato:
6:1-7. Ang mga Nazareo gidid-an sa pag-inom sa produkto gikan sa paras ug sa tanang makahubog nga mga ilimnon, nga nagkinahanglag paghikaw sa kaugalingon. Kinahanglang ilang patas-on ang ilang buhok—usa ka timaan sa pagpasakop kang Jehova, sama nga ang mga babaye gisugo nga magpasakop sa ilang mga bana o mga amahan. Ang mga Nazareo kinahanglang magpabiling hinlo pinaagi sa pagpalayo gikan sa bisan unsang patayng lawas, bisan sa patayng lawas sa suod nga paryente. Ang bug-os-panahong mga alagad karon nagpakita ug espiritu sa pagsakripisyo-sa-kaugalingon maylabot sa paghikaw sa kaugalingon ug sa pagpasakop kang Jehova ug sa iyang kahikayan. Ang ubang mga asaynment tingali naglangkit sa pag-adto sa halayong yuta, diin malisod o imposibleng makapauli panahon sa paglubong sa usa ka suod nga sakop sa pamilya.
8:25, 26. Ang edaran nga mga lalaki gisugo sa pagretiro sa pinugos nga pag-alagad agig konsiderasyon sa ilang edad ug aron matino nga ang may-katakos nga mga lalaki maoy matudlo sa Levihanon nga pag-alagad. Apan, sila makahimo sa pagboluntaryo sa pagtabang sa ubang mga Levihanon. Bisag walay pagretiro sa pagkahimong magwawali sa Gingharian karon, ang prinsipyo niining balaora nagtudlo ug bililhong leksiyon. Kon tungod sa pagkatigulang ang usa ka Kristohanon dili na makahimo sa pipila ka mga obligasyon, siya mahimong makigbahin sa usa ka matang sa pag-alagad nga iya pang maarangan.
SA NAGKALAINLAING MGA DAPIT SA KAMINGAWAN
Sa dihang ang panganod sa ibabaw sa tabernakulo misaka, ang mga Israelinhon nagsugod paglakaw paingon sa desyerto nga kapatagan sa Moab nga mikabat ug 38 ka tuig ug usa o duha ka bulan. Imong makita nga mapuslanon ang pagsubay sa ilang ruta diha sa mapa sa panid 9 sa brosyur nga “Tan-awa ang Maayong Yuta,” nga gipatik sa mga Saksi ni Jehova.
Sa pagpaingon ngadto sa Kades, sa Kamingawan sa Paran, labing menos dihay tulo ka kaso sa pagbagulbol. Ang una nasanta sa dihang si Jehova nagpadala ug kalayo sa paglaglag sa pipila ka tawo. Dayon ang mga Israelinhon nangayog karne, ug si Jehova nagtagana ug mga buntog. Si Miriam ug Aaron mireklamo batok kang Moises nga tungod niini si Miriam gisanla sa makadiyot.
Samtang nagkampo sa Kades, si Moises nagpadala ug 12 ka lalaki sa pag-espiya sa Yutang Saad. Sila mipauli paglabay sa 40 ka adlaw. Kay mituo sa dili-maayong report sa napulo ka espiya, gustong batoon sa mga tawo si Moises, Aaron, ug ang matinumanong mga espiya nga si Josue ug Caleb. Buot ni Jehova nga silotan ang mga tawo ug kamatay, apan si Moises nangilabot, ug ang Diyos mipahayag nga sila maglibodlibod sa kamingawan sulod sa 40 ka tuig—hangtod ang tanan nga naihap nangamatay.
Si Jehova mihatag ug dugang mga balaod. Si Kore ug ang uban mialsa batok kang Moises ug Aaron, apan ang mga mialsa gilaglag pinaagig kalayo o gilamoy sa yuta. Pagkasunod adlaw, ang tibuok katigoman nagbagulbol batok kang Moises ug Aaron. Tungod niini, 14,700 ang nangamatay sa hampak gikan kang Jehova. Aron mapahibalo ang iyang pagpili ug hataas nga saserdote, gipabulak sa Diyos ang sungkod ni Aaron. Dayon si Jehova mihatag ug dugang mga balaod labot sa mga buluhaton sa Levihanon ug sa paghinlo sa mga tawo. Ang paggamit ug mga abo sa pula nga baka naghulagway sa paghinlo pinaagi sa halad ni Jesus.—Hebreohanon 9:13, 14.
Ang mga anak sa Israel mibalik sa Kades, diin dinhi namatay si Miriam. Ang tibuok nga katigoman nagreklamo na usab batok kang Moises ug Aaron. Ang ilang reklamo? Walay tubig. Kay napakyas man si Moises ug Aaron sa pagbalaan sa ngalan ni Jehova sa pagtagana ug tubig sa milagrosong paagi, sila nawad-an ug pribilehiyo sa pagsulod sa Yutang Saad. Ang Israel mihawa sa Kades, ug si Aaron namatay sa Bukid sa Hor. Samtang naglibotlibot sa Edom, ang mga Israelinhon gikapoy na ug nagbagulbol batok sa Diyos ug kang Moises. Si Jehova nagpadala ug malala nga mga bitin sa pagsilot kanila. Si Moises nangilabot na usab, ug gisugo siya sa Diyos sa paghimog tumbaga nga bitin ug sa pagbutang niini sa tukon aron kadtong mapaakan mamaayo pinaagi sa pagtutok niini. Ang bitin naglandong sa paglansang kang Jesu-Kristo alang sa atong walay-kataposang kaayohan. (Juan 3:14, 15) Gipildi sa Israel ang mga Amorihanon nga si Haring Sihon ug Haring Og ug gipanag-iya sa Israel ang ilang mga yuta.
Tubag sa mga Pangutana Bahin sa Kasulatan:
12:1—Nganong si Miriam ug Aaron nagreklamo batok kang Moises? Dayag nga ang tinuod nga hinungdan sa ilang pagreklamo maoy tungod sa pangandoy ni Miriam nga makabaton ug mas dakong gahom. Sa dihang ang asawa ni Moises, si Zipora, miapas kaniya sa kamingawan, si Miriam tingali nahadlok nga siya dili na lantawon ingong ang unang ginang sa kampo.—Exodo 18:1-5.
12:9-11—Nganong si Miriam lang ang gisanla? Lagmit, siya ang naghulhog sa pagreklamo ug nagkabig kang Aaron sa pagduyog kaniya. Si Aaron nagpasundayag ug hustong tinamdan pinaagi sa pagtug-an sa iyang sayop.
21:14, 15—Unsang basahona ang gihisgotan dinhi? Ang Kasulatan naghisgot sa nagkalainlaing mga basahon nga gigamit sa mga magsusulat sa Bibliya ingong reperensiya. (Josue 10:12, 13; 1 Hari 11:41; 14:19, 29) “Ang basahon sa mga Gubat ni Jehova” maoy usa niining basahona. Kini nasudlan ug makasaysayanhong asoy bahin sa mga gubat sa katawhan ni Jehova.
Mga Leksiyon Alang Kanato:
11:27-29. Si Moises naghatag ug maayong pananglitan kon unsay atong angay nga reaksiyon sa dihang makadawat ang uban ug mga pribilehiyo diha sa pag-alagad kang Jehova. Imbes magtinguha nga mahimong dungganon, si Moises nalipay sa dihang si Eldad ug Medad nagsugod sa paglihok ingong mga manalagna.
12:2, 9, 10; 16:1-3, 12-14, 31-35, 41, 46-50. Si Jehova naglaom nga ang iyang mga magsisimba magpakitag pagtahod sa hinatag-sa-Diyos nga awtoridad.
14:24. Ang yawi aron makasukol sa mga pagpit-os sa kalibotan sa paghimog daotan mao ang pag-ugmad ug “lahi nga espiritu,” o tinamdan sa hunahuna. Kini nga espiritu kinahanglang lahi nianang sa kalibotan.
15:37-41. Ang talagsaon nga mga borlas sa sidsid sa besti sa mga Israelinhon gituyo sa pagpahinumdom kanila nga sila maoy mga tawo nga gilain alang sa pagsimba sa Diyos ug sa pagtuman sa iyang mga kasugoan. Dili ba angay nga magkinabuhi usab kita subay sa mga sukdanan sa Diyos ug madayag nga lahi gikan sa kalibotan?
SA KAPATAGAN SA MOAB
Samtang ang mga anak sa Israel nagkampo sa desyerto nga kapatagan sa Moab, ang mga Moabihanon nahadlok kaayo kanila. Busa, si Balaam gisuholan ni Haring Balak sa Moab sa pagtunglo sa mga Israelinhon. Apan gipugos ni Jehova si Balaam sa pagpanalangin kanila. Ang mga babayeng Moabihanon ug Midianhon maoy gigamit sa pagdani sa mga lalaking Israelinhon sa imoralidad ug idolatriya. Tungod niini gilaglag ni Jehova ang 24,000 ka mamumuhat ug daotan. Ang hampak sa kataposan natapos sa dihang gipasundayag ni Pinehas nga dili siya makatugot nga dunay kaindig si Jehova.
Ang ikaduhang pag-ihap sa populasyon nagpakita nga walay usa sa mga lalaki nga unang naihap ang buhi gihapon, gawas kang Josue ug Caleb. Si Josue gitudlo nga mahimong puli kang Moises. Ang mga Israelinhon nakadawat ug mga instruksiyon kon unsaon pagtanyag ug nagkalainlaing mga halad ug kon unsaon pagpanaad. Ang mga tawo sa Israel nanimalos usab batok sa mga Midianhon. Si Ruben, Gad, ug ang katunga sa tribo ni Manases nagpahiluna sa sidlakan sa Suba sa Jordan. Ang Israel gihatagan ug mga instruksiyon bahin sa pagtabok sa Jordan ug sa pag-ilog sa yuta. Ang detalyadong mga utlanan sa yuta gilatid. Ang panulondon nga yuta desisyonan pinaagig ripa. Ang mga Levihanon gitudlo sa 48 ka siyudad, ug 6 niini magsilbing mga siyudad nga dalangpanan.
Tubag sa mga Pangutana Bahin sa Kasulatan:
22:20-22—Nganong misilaob ang kasuko ni Jehova batok kang Balaam? Gisultihan ni Jehova si manalagnang Balaam nga dili niya angayng tunglohon ang mga Israelinhon. (Numeros 22:12) Apan, ang manalagna mikuyog sa mga sundalo ni Balak nga ang tuyo mao ang pagtunglo sa Israel. Gusto ni Balaam nga pahimut-an ang Moabihanon nga hari ug makadawat ug ganti gikan kaniya. (2 Pedro 2:15, 16; Judas 11) Bisan sa panahon nga napugos si Balaam sa pagpanalangin imbes sa pagtunglo sa Israel, buot niyang pahimut-an ang hari pinaagi sa pagsugyot nga ipatental sa mga babaye nga nagsimba kang Baal ang Israelinhong mga lalaki. (Numeros 31:15, 16) Busa, ang hinungdan sa kasuko sa Diyos batok kang Balaam mao ang kahakog sa manalagna.
30:6-8—Mahimo bang ipanulo sa Kristohanong bana ang mga panaad sa iyang asawa? Kon bahin sa mga panaad, si Jehova nakiglabot sa iyang mga magsisimba sa tinagsatagsa. Pananglitan, ang pagpahinungod ngadto kang Jehova maoy usa ka personal nga panaad. (Galacia 6:5) Ang bana walay awtoridad sa pagnulo o pagkanselar sa ingon niini nga panaad. Apan, ang asawa kinahanglang dili manaad supak sa Pulong sa Diyos o sa iyang mga obligasyon ngadto sa iyang bana.
Mga Leksiyon Alang Kanato:
25:11. Pagkamaayong panig-ingnan sa kasibot alang sa pagsimba ni Jehova ang gipakita ni Pinehas alang kanato! Dili ba ang tinguha sa paghupot sa kongregasyon nga hinlo magpalihok kanato sa pagreport ngadto sa Kristohanong mga ansiyano kon may nahibaloan kita nga nakahimog makauulaw nga imoralidad?
35:9-29. Ang kamatuoran nga ang nakapatay nga dili-tinuyo kinahanglang mobiya sa iyang balay ug mokalagiw sa usa ka siyudad nga dalangpanan sa usa ka yugto sa panahon nagtudlo kanato nga ang kinabuhi balaan ug kita kinahanglang motahod niana.
35:33. Ang yuta nga nahugawan sa naula nga dugo sa inosente mabayran lamang pinaagi sa dugo niadtong nag-ula niana. Pagkahaom nga laglagon ni Jehova ang daotan sa dili pa himoon ang yuta nga usa ka paraiso!—Proverbio 2:21, 22; Daniel 2:44.
Ang Pulong sa Diyos Dunay Gahom
Kinahanglang magpakita kita ug pagtahod kang Jehova ug niadtong adunay mga katungdanan taliwala sa iyang katawhan. Gipasiugda ug maayo kining kamatuorana diha sa basahon sa Numeros. Pagkamaayong pagtulon-an kini sa pagpatunhay sa pakigdait ug panaghiusa sa kongregasyon karon!
Ang mga hitabo nga giasoy sa Numeros nagpakita nga kadtong dili magtagad sa ilang espirituwalidad daling mahulog sa daotang mga buhat, sama sa pagbagulbol, imoralidad, ug idolatriya. Ang uban sa mga pananglitan ug mga pagtulon-an niining basahon sa Bibliya magamit ingong basehanan alang sa lokal nga mga panginahanglan nga mga programa sa Tigom sa Pag-alagad sa mga kongregasyon sa mga Saksi ni Jehova. Oo, ‘ang pulong sa Diyos buhi ug dunay gahom’ sa atong kinabuhi.—Hebreohanon 4:12.
[Hulagway sa panid 24, 25]
Pinaagi sa milagrosong panganod ibabaw sa tabernakulo, si Jehova naghatag ug mga instruksiyon sa pagkampo ug paghipos sa Israelinhong kampo
[Mga hulagway sa panid 26]
Si Jehova takos sa atong pagsugot ug nagdahom nga kita magpakita ug pagtahod sa iyang mga tinugyanan