Mga Pangutana Gikan sa mga Magbabasa
Kon ang usa ka Kristohanon may sakit o nagabiyahe ug busa dili makatambong sa pagsaulog sa Memorial, angay bang magsaulog siya niana usa ka bulan sa ulahi?
Sa karaang Israel ang Paskuwa gihimo matag tuig sa ika-14ng adlaw sa unang bulan, nga gitawag Nisan (o, Abib). Apan makaplagan nato ang espesyal nga tagana sa Numeros 9:10, 11: “Isulti mo sa mga anak sa Israel, nga magaingon, ‘Bisan pag si bisan kinsa kaninyo o sa inyong mga kaliwatan ang mahitabo nga mamahugaw pinaagi sa usa ka lawas sa minatay, o anaa sa pagpanaw sa halayo, siya usab magaandam sa halad sa paskuwa alang kang Jehova. Sa ikaduhang bulan [ginganlang Iyyar, o Ziv], sa ikanapulog-upat ka adlaw tali sa duha ka gabii, sila magahikay niana. Uban ang mga tinapay nga walay lebadura ug mapait nga mga utanon pagakan-on nila kana.’”
Matikding kini wala magbutang ug duha ka kapiliang mga petsa alang sa Paskuwa (Nisan 14 o Ziv 14), nga si bisan kinsang Israelinhon o panimalay libreng mopili, depende kon unsay kombenyente. Ang tagana sa usa ka pagkaon sa Paskuwa sa ikaduhang bulan maoy limitado. Eksepsiyonal nga ang usa ka Israelinhon nahimong mahugaw sa seremonyal nga paagi sa Nisan 14 o tua sa layo kaayo gikan sa dapit nga gihimo ang regular nga pagsaulog.
Ang bugtong nahitalang higayon nga kini lapnag nga gigamit maoy sa panahong gibuhi pag-usab sa matinumanong Haring Ezekias ang pagsaulog sa Piyesta sa mga Tinapay nga Walay Lebadura. Wala nay panahon sa paghikay alang sa unang bulan (ang mga saserdote wala makahikay mao usab ang katawhang nagkatigom), busa kadto gisaulog sa ika-14ng adlaw sa ikaduhang bulan.—2 Cronicas 29:17; 30:1-5.
Gawas nianang eksepsiyonal nga mga kahimtang, ang mga Hudiyo nagsaulog sa Paskuwa sa petsa nga gitudlo sa Diyos. (Exodo 12:17-20, 41, 42; Levitico 23:5) Si Jesus ug iyang mga tinun-an nagsaulog sumala sa gibaod sa Kasugoan, nga wala magpakasayon lamang sa maong petsa. Si Lucas nagtaho: “Ang adlaw sa mga tinapay nga walay igpapatubo karon miabot na, nga niana ang giihaw sa paskuwa igahalad; ug [si Jesus] nagsugo kang Pedro ug Juan, nga miingon: ‘Lumakaw kamo ug hikaya ninyo ang paskuwa alang kanato aron mangaon kita niini.’”—Lucas 22:7, 8.
Niadtong higayona gisugdan ni Jesus ang tinuig nga pagsaulog nga nailhan sa mga Kristohanon ingong Panihapon sa Ginoo. Ang bili sa pagtambong sa mga Kristohanon dili masobrahan sa pagpasiugda. Kini mao ang labing hinungdanong okasyon sa tuig alang sa mga Saksi ni Jehova. Ang mga pulong ni Jesus nagapakita ngano; siya miingon: “Ipadayon ninyo pagbuhat kini sa paghandom kanako.” (Lucas 22:19) Sa ingon, matag usa sa mga Saksi ni Jehova angay magplano ug mga bulan nga abante aron ang petsa sa pagsaulog malibre sa ubang kasabotan. Ang Panihapon sa Ginoo pagasaulogon sa Martes, Abril 6, 1993, human sa pagsalop sa adlaw sa kaugalingong dapit.
Sa talagsaong mga kaso ang wala-makita-daang kahimtang, sama sa sakit o mga suliran sa biyahe, tingali makapugong sa usa ka Kristohanon sa pagtambong sumala sa iyang naplano. Unsay pagabuhaton sa maong kahimtang?
Panahon sa saulog ang tinapay nga walay lebadura ug pulang bino igapasa, ug kadtong nadihogan sa balaang espiritu sa Diyos ug napili aron mabuhi sa langit makig-ambit. (Mateo 26:26-29; Lucas 22:28-30) Kon ang usa nga kada tuig nagapakig-ambit niining tuiga dili makagawas sa balay o ospital kay masakiton, ang mga ansiano sa lokal nga kongregasyon maghikay nga usa kanila magdala sa bahin sa tinapay ug bino ngadto sa usang masakiton, maghisgot sa nahiangayng mga teksto sa Bibliya bahin sa saulog, ug magsilbi sa mga emblema. Kon ang usa ka dinihogang Kristohanon wala sa iyang kaugalingong kongregasyon, angay hikayon niya ang pag-adto sa usa ka kongregasyon diha sa dapit nga maanaa siya nianang petsaha.
Tungod niini, maoy ubos lamang sa eksepsiyonal kaayong mga kahimtang nga ang usa ka dinihogang Kristohanon kinahanglang magsaulog sa Panihapon sa Ginoo 30 ka adlaw sa ulahi (usa ka bulan nga lunar), nga nahiuyon sa sugo sa Numeros 9:10, 11 ug sa panig-ingnan sa 2 Cronicas 30:1-3, 15.
Kadtong sakop sa kang Jesus nga “ubang mga karnero” nga matang, nga may paglaom sa kinabuhing walay kataposan sa usa ka paraisong yuta, wala mailalom sa sugo sa pag-ambit sa tinapay ug bino. (Juan 10:16) Hinungdanon ang pagtambong sa tinuig nga saulog, apan dili sila moambit sa mga emblema. Busa kon usa kanila may sakit o nagapanaw ug niana dili makatambong sa kongregasyon nianang gabhiona, siya sa pribado makabasa sa nahiangayng mga kasulatan (apil ang asoy sa pagsugod ni Jesus sa saulog) ug makaampo alang sa pagpanalangin ni Jehova sa okasyon sa tibuok nga kalibotan. Apan sa maong kahimtang dili na kinahanglan ang dugang kahikayan alang sa usa ka tigom o espesyal nga paghisgot nga Biblikanhon sa usa ka bulan sa ulahi.