ARGOB

[Bugon sa Yuta].

1. Lagmit usa sa mga tawo nga gipatay kauban ni Haring Pekahias sa Israel niadtong mga 778 W.K.P., pinaagi sa usa ka mangingilog nga ginganlan ug Peka, kinsa gitabangan sa maong krimen sa 50 ka Gileadnon.​—2Ha 15:23-25.

2. Usa ka rehiyon sa Basan nga nailog samtang ang Israel didto pa sa S sa Jordan ug nga nahimong bahin sa teritoryo sa tribo ni Manases. Mopatim-aw nga kini maoy sentro sa pangagamhanan sa gingharian ni Og ug gihubit nga adunay 60 ka kinutaang mga siyudad gawas pa sa daghan kaayong lungsod diha sa kabanikahan. (Deu 3:​4, 5, 13, 14) Kini mao ang “yuta sa mga Repaim,” o yuta sa mga higante.

Ang Argob nahimutang sa S sa Dagat sa Galilea. Bisan tuod ang gituohang nahimutangan sa Argob mao ang Al-Ledja, usa ka dapit nga natabonan ug laba nga mga 32 km (20 mi) sa H sa Damasco, ang kahubitan sa Deuteronomio bahin sa usa ka dapit nga may mga lungsod diha sa kabanikahan daw mopabor sa tabunok nga kapatagan dapit sa K sa Al-Ledja nga lagmit nahimutang sa tunga sa rehiyon tali sa Nahr al-Ruqad, Nahr al-ʽAlan, ug Nahal Yarmuk. Diha niining halapad nga patag sa bukid, ang mga siyudad walay kinaiyanhong mga depensa ug nagkinahanglan ug ‘habog nga mga paril’ nga gihisgotan sa Kasulatan. Adunay mga kagun-oban sa maong dagkong mga siyudad nga nagkatag sa tibuok teritoryo sa Basan.

Sa panahon ni Haring Solomon ang Argob maoy bahin sa usa sa 12 ka distrito nga gipadumala sa mga luyoluyo nga may kaakohan sa pagtaganag pagkaon sa panimalay sa hari.​—1Ha 4:​7, 13.