ITLOG
Mga glandula sa lalaki sa pagsanay. Ang balaod sa Diyos ngadto sa Israel nagdili nga mahimong saserdote ang usa ka lalaki nga napusa ang mga itlog, ingong usa sa daghang depekto sa lawas nga makadiskuwalipikar kaniya. (Lev 21:17-21, 23) Kining hataas nga sukdanan alang sa pagkasaserdote nahiuyon sa pagkabalaan sa katungdanan sa mga saserdote ingong mga hawas sa pagkabalaan ni Jehova atubangan sa Israel. Kini nahiuyon usab sa kamatuoran nga ang pagkasaserdote sa Israel naghulagway sa langitnong pagkasaserdote ni Kristo ug sa iyang kongregasyon sa luyoluyong mga saserdote, nga taliwala kanila walay nakaplagang lama. (Heb 7:26; Efe 5:27; Pin 14:1, 5; 20:6) Dugang pa, buot sa Diyos nga ang mga saserdote makapanganak aron adunay manunod kanila. Apan, sumala sa Balaod ang tawo nga may ingon niana nga depekto mahimong mokaon sa balaang mga butang nga gitagana ingong pagkaon sa mga saserdote.—Lev 21:21, 22.
Sa samang mga katarongan ang usa ka hayop nga ang mga itlog napusa, napigsat, o naputol, o nabunlot dili mahimong ihalad. (Lev 22:24; itandi ang Mal 1:6-8; 1Pe 1:19.) Tungod niini ang mga Israelinhon wala magkapon sa ilang mga hayop, kay gilatid sa Balaod nga ang tanang binuhing mga hayop nga ihawon alang sa pagkaon dad-on ngadto sa sangtuwaryo aron ihawon ug kaonon ingong usa ka halad-sa-panag-ambit. Ang samang balaod gipadapat didto sa Yutang Saad alang niadtong nagpuyo duol sa Jerusalem.—Lev 17:3-5; Deu 12:20-25.
Dugang pa ang Balaod mabasa: “Walay tawong gikapnan pinaagi sa pagpigsat sa mga itlog o giputlan sa iyang kinatawo nga makasulod sa kongregasyon ni Jehova.” (Deu 23:1) Ang maong ‘pagkapon’ wala malangkit sa mga depekto sa pagkatawo o sa aksidente. (Itandi ang Lev 21:17-21; Deu 25:11, 12.) Busa, dayag nga kini maylabot sa tinuyo nga pagkapon alang sa imoral nga mga katuyoan, sama sa homoseksuwalidad. Ang maong tawo kinahanglang dili pasudlon sa kongregasyon, dili tugotang makig-uban niini, sa ingon nagpanalipod sa kaputli niini.
Ang pagtahod ni Jehova sa katungod sa lalaki nga makabaton ug mga anak pinaagi sa iyang asawa, ug sa gahom sa pagsanay nga Iyang gihatag sa lalaki ug sa babaye, gipasiugda sa Balaod. Ang kaminyoon sa bayaw nga lalaki gilatid aron magpadayon ang linya sa banay, ngalan, ug panulondon sa lalaki. (Deu 25:5-10) Human gilayon sa pagpahayag niini nga kahikayan, ang Balaod nag-ingon nga kon ang duha ka lalaki nagbugnoay sa usag usa ug ang asawa sa usa ka lalaki nagbunlot sa pribadong mga bahin sa laing lalaki aron tabangan ang iyang bana (usa ka buhat nga mahimong makadaot sa gahom sa pagsanay sa lalaki), ang iyang kamot pagaputlon. (Deu 25:11, 12) Busa ang balaod nga mata sa mata dili mapadapat dinhi. (Deu 19:21) Wala ilatid sa Diyos nga daoton ang mga sangkap sa pagsanay sa babaye o sa iyang bana. Niana nga paagi ang kaminyoon magmabungahon pa gihapon, sanglit ang linya sa banay sa iyang bana magpadayon pa pinaagi niini.
Sulod sa Kristohanong kongregasyon, ang mga tawo nga gikapon dili babagan nga makasulod, sanglit ang Balaod gihiklin na pinasukad sa halad ni Kristo. (Col 2:13, 14) Bisan pa niana, ang balaod nga gikutlo sa itaas nag-ilustrar sa pagtamod sa Diyos sa mga sangkap sa pagsanay ug kusganong nagpakita nga ang usa ka operasyon nga magdaot sa katakos sa pagsanay sa usa ka tawo tungod lamang kay siya walay pagpabili sa gasa gikan sa Diyos maoy sayop.
Kinatawo. Ang Hebreohanong pulong alang sa “unod” (ba·sarʹ) gigamit sa Kasulatan diha sa Levitico 15:2, 3 maylabot sa kinatawo sa lalaki, ingong bulag sa itlog.—Tan-awa ang HINLO, PAGKAHINLO; itandi ang Isa 57:8, ftn sa Rbi8.
Ang kinatawo sa lalaki gisimba sa mga pagano sa karaang kapanahonan, sama sa gihimo karong adlawa sa pipila ka nasod. Gihisgotan sa Ezequiel 8:17 (ftn sa Rbi8) nga ang maong pagsimba nakatakod sa apostatang mga Israelinhon sa adlaw ni Ezequiel.