Pagkamatarong Magabayaw sa Usa ka Nasod

HUMAN sa daghang adlaw nga pag-ulan, pagkadakong kalipay nga momata ug makakita sa adlaw nga nagsidlak diha sa walay panganod nga langit! Ang yuta napreskohan, ug karon ang mga tanom molabong. Gigamit ni Jehova nga Diyos sa usa ka higayon ang maong hulagway sa pag-ilustrar sa mga panalangin sa matarong nga pagmando. Ngadto kang Haring David siya nag-ingon: “Kon ang usa nga naghari sa katawhan matarong, nga naghari diha sa kahadlok sa Diyos, nan mahisama siya sa kahayag sa kabuntagon, sa dihang mosidlak ang adlaw, usa ka butang nga wala gayoy panganod. Gikan sa kahayag, gikan sa pag-ulan, mogitib ang balili sa yuta.”​—2 Samuel 23:3, 4.

Ang mga pulong sa Diyos napamatud-ang tinuod sa panahon sa matarong nga pagmando sa anak ni David, si Haring Solomon. Ang Bibliya nagtaho: “Ang Juda ug Israel nagpadayon sa pagpuyo sa kasegurohan, ang tagsatagsa ilalom sa iyang parras ug ilalom sa iyang kahoy nga higuera, gikan sa Dan ngadto sa Beer-sheba, sa tanang adlaw ni Solomon.”​—1 Hari 4:25.

Ang karaang Israel maoy piniling nasod sa Diyos. Iyang gihatag kanila ang iyang mga balaod ug giingnan sila nga kon ilang sundon ang iyang tingog, sila iyang “ibayaw ibabaw sa tanang mga nasod sa yuta.” (Deuteronomio 28:1) Dili ang kaugalingong pagkamatarong sa Israel kondili ang pagkamatarong ni Jehova ang nagbayaw kanila. Ang kasugoan nga gihatag kanila sa Diyos mas superyor kay sa kasugoan sa mga nasod sa ilang palibot. Ingong mga tawo, sila mga dili hingpit sama sa tanan niadtong mga nasora. Busa, ngadto sa superyor nga Kasugoan ni Jehova ug sa ilang estriktong pagsunod niana ikapasidungog ang ilang pagkabinayaw labaw sa mga nasod. Sa dihang ilang sundon ang kasugoan ni Jehova, ilang natagamtam ang iyang pag-uyon ug panalangin. Naagian kini ni Haring Solomon panahon sa iyang pagmando. Siya nakaingon: “Ang pagkamatarong maoy magtuboy sa usa ka nasod, apan,” siya nagpasidaan, “ang sala maoy usa ka butang nga makauulaw alang sa mga nasod.”​—Proverbio 14:34.

Ikasubo, tungod sa masubsob nga mga buhat sa kalapasan, ang nasod sa Israel gibutang sa ubos nga kahimtang. Naagoman nila ang nasodnong kaulawan. Kini sa ulahi misangpot sa ilang permanenteng pagkasinalikway pabor sa usa ka bag-ong espirituwal nga nasod.​—Mateo 21:43.

Espirituwal nga Israel

Sa usa ka tigom sa Kristohanong nagamandong lawas sa Jerusalem, si Santiago, nga usa ka lumad nga Hudiyo, ubos sa pagdasig miingon nga ang Diyos ‘nagliso sa iyang pagtagad ngadto sa kanasoran aron sa pagkuha gikan kanila ug usa ka katawhan alang sa iyang ngalan.’ (Buhat 15:14) Gitawag ni apostol Pablo kining bag-ong Kristohanong nasod nga “ang Israel sa Diyos.” (Galacia 6:16) Mahitungod sa katuyoan sa ilang pagkatinawag, si Pedro nagsulat: “Kamo maoy ‘usa ka piniling rasa, usa ka harianong pagkasaserdote, usa ka balaan nga nasod, usa ka katawhan alang sa linaing pagpanag-iya, aron nga sa kaylap inyong ipahayag ang mga kahamili’ sa usa nga nagtawag kaninyo gikan sa kangitngit ngadto sa iyang katingalahang kahayag.” (1 Pedro 2:9) Ingong katawhan nga pinili sa Diyos, sila angay mosidlak ingong mga tigdala sa kahayag sa kalibotan. Ang pagkamatarong ni Jehova magbayaw kanila.​—Filipos 2:15.

Ang pagpili niining espirituwal nga mga Israelinhon mahimong ikapanag-ing sa pagmina ug diyamante. Sa dihang makakalot ug bato nga may diyamante, mahimong magpatungha lamang kini ug 1 ka kilate (200 miligramo) matag 3 ka toneladang yuta. Ang usa ka paagi nga gigamit kaniadto sa pagpinig sa mga diyamante naglakip sa pagmikskla sa tubig ug sa batong may diyamante ug ang miksklada ipaagas ibabaw sa mga lamesa nga dunay grasa. Ang mga diyamante dili-mabasa ug tubig, ug mopilit kini sa grasa samtang ang wala kinahanglanang materyal mabanlas. Sa maong ang-ang ang mga diyamante dahol pa. Hinunoa, human matabas ug mapasinaw, magpabanaag kinig kahayag sa tanang direksiyon.

Sama sa dili-mabasa nga mga diyamante nga dili bahin sa materya sa palibot niini, ang katawhan ni Jehova nahimulag sa kalibotan. (Juan 17:16) Sa unang higayon nga nadani sa kahayag, hayan kulang sila ug brilyo. Apan ang Pulong ug espiritu ni Jehova magmugna sulod sa ilang kahiladman ug usa ka bag-ong pagkatawo, ug sila mosidlak ingong mga tigdala sa kahayag niining kalibotana. Kini maoy tungod sa pagkamatarong ni Jehova nga sila ginatuboy ug nagpabanaag sa mahimayaong kahayag sa kamatuoran sa Gingharian sa tanang direksiyon, dili tungod sa ilang kaugalingong pagkamatarong.

Apan, gikan sa ulahing bahin sa unang siglo K.P., ang apostasiya misulod sa mga kongregasyon ug daghan ang naapektohan. Ang gitawag-kunohay nga mga Kristohanon nahimong bahin sa kanasoran sa kalibotan ug dili mailhan nga lahi sa kalibotan sa ilang palibot.

Karon usa ka kasaligang nanghibilin sa espirituwal nga mga Israelinhon ang napasig-uli sa pag-uyon ni Jehova. Gibulag nila ang ilang kaugalingon gikan sa kalibotan ug gihinloan ang ilang kaugalingon “sa tanang kahugawan sa unod ug espiritu.” (2 Corinto 7:1) Sa pagkinabuhing hinlo ug matarong sa atubangan ni Jehova, ilang gituboy ang iyang pagkamatarong. Kini nagbayaw kanila sa hataas nga posisyon sa pag-uyon nga labaw sa kanasoran sa kalibotan. Pinaagi sa ilang masibotong pagwali sa maayong balita sa Gingharian, usa ka dakong internasyonal nga panon ang nadani ngadto kang Jehova ug nahimong bahin sa iyang katawhan.​—Pinadayag 7:9, 10.

Ang Kalibotan Makakita sa Kalainan

Ang mga awtoridad sa kalibotan usahay modayeg sa panggawi sa mga alagad sa Diyos. Usa ka higayon sa miagi, ang pangulong opisyal sa seguridad sa Pretoria Show Grounds, Habagatang Aprika, mikomento bahin sa panggawi sa mga Saksi ni Jehova, gikan sa tanang rasa, nga migamit niadtong mga pasilidara alang sa ilang tinuig nga mga kombensiyon. Apil sa ubang mga butang, siya nagsulat: “Ang matag usa matinahoron, ang mga tawo nagsulti sa malulotong paagi sa usag usa, ang tinamdan nga gipakita sa miaging pipila ka adlaw​—kining tanan nagpamatuod sa kalibre sa mga membro sa inyong sosyedad, ug nga ang tanan magkaubang nagkinabuhi ingong usa ka malipayong pamilya.”

Ang katawhan ni Jehova makaamot sa pagkamatarong sa iyang nasod dili lamang sa maong dagkong mga panagkatigom kondili usab diha sa ilang pribadong mga kinabuhi. Pananglitan, ang sanga sa Watch Tower Society sa Habagatang Aprika nakadawat ug sulat gikan sa usa ka babaye sa Johannesburg, nga nag-ingon: “Sa miaging semana nagmaneho ako nga dihay pitaka sa atop sa akong kotse. Nahulog kini sa Jan Smuts Avenue ug napunitan uban sa tanang unod niini sa usa sa membro sa inyong kongregasyon, si Gn. R—, kinsa mitawag sa telepono ug giuli kini kanako. . . . Nakaapresyar gayod ako niining pagkamatinud-anon nga nahimong usa ka pangitaon nga hiyas niining presenteng mga panahon ug nakadayeg sa inyong kongregasyon tungod sa pagtukod ug mga prinsipyo nga ginasunod sa inyong mga membro.”

Oo, pinaagi sa pagsunod sa matarong nga mga prinsipyo ni Jehova, ang iyang katawhan malahi gikan sa kalibotan. Sanglit ginapasundayag nila ang pagkamatarong ni Jehova, ang mga matinud-anon ug kasingkasing nadani sa Kristohanong kongregasyon. Natural lamang nga madani sa usa ka butang nga hinlo ug lunsay. Pananglitan, usa ka estranyo mitambong sa tigom sa mga Saksi ni Jehova sa Zurich, Switzerland, ug miingon nga buot niyang mahimong membro sa kongregasyon. Siya miingon nga gipalagpot ang iyang igsoong babaye tungod sa imoralidad ug midugang nga buot niyang magpasakop sa usa ka organisasyon nga “dili magpalabay sa daotang panggawi.” Bisan ang New Catholic Encyclopedia miangkon nga ang mga Saksi ni Jehova ilado ingong “usa sa labing-maayog-batasan nga mga grupo sa kalibotan.”

Samtang ang pagkamatarong makapatuboy, ang sala makahatag kaulawan sa maayong ngalan sa usa, ilabina kon ang seryosong sala nabaniog sa komunidad. Antoson sa Kristohanong kongregasyon usahay ang kaulawan nga mahan-ok niana kon ang indibiduwal nga membro makahimog dako nga sala. Masabtan, ang matinumanong membro sa kongregasyon makapanalipod sa maayong ngalan sa kongregasyon pinaagi sa pagpakita nga ang nakahimog daotan gidisiplina sa maluloy-ong paagi, sa ato pa, uyon sa Kasulatanhong mga prinsipyo. Kon may nagpakasala ug dili maghinulsol, siya ipagawas gikan sa kongregasyon​—palagpoton.​—1 Corinto 5:9-13.

Kon Nganong ang Pipila Gipalagpot

Bisan tuod pipila ka libo ang gipalagpot gikan sa Kristohanong kongregasyon matag tuig, gamay lamang kini nga porsentahe sa hapit lima ka milyong mga Saksi sa tibuok kalibotan. Nganong ang ingon ka hingaping lakang himoon batok kang bisan kinsa diha sa Kristohanong kongregasyon? Ang matang sa daotang buhat maoy usa sa mga hinungdan. Apan ang labing importanteng hinungdan maoy kon ang nakahimog daotan tinuod gayod nga mahinulsolon tungod sa seryosong kalapasan nga nahimo. Kon tinuod gayod siya nga nagbasol, midangop kang Jehova diha sa kinasingkasing nga pag-ampo, nga nangayog pasaylo sa sala nga nahimo batok Kaniya, ug nangayog tabang sa responsableng mga lalaki diha sa kongregasyon, hayan siya tabangan nga makabalik sa pag-uyon sa Diyos ug magpabiling bahin sa kongregasyon.​—Proverbio 28:13; Santiago 5:14, 15.

Kon ang usa ka bata nga may maayo, himsog nga relasyon sa iyang amahan makahimog usa ka butang nga makapaguol sa amahan, kinahanglang ipasig-uli dayon nilang duha kanang bililhong relasyon. Sa susama, sa dihang atong ipahinungod ang atong mga kinabuhi kang Jehova, misulod kita ngadto sa labing bililhong relasyon uban kaniya. Busa, sa dihang makahimo kitag usa ka butang nga makapaguol kaniya, kinahanglang molihok dayon kita sa paningkamot nga mapasig-uli kanang maong relasyon uban sa atong Langitnong Amahan.

Ikalipay, ang pipila nga anaa sa napalagpot nga kahimtang nagpadapat sa ilustrasyon sa usikang anak. Si Jehova dinha gipakasama sa mahigugmaong Amahan nga andam sa pagdawat ug balik sa usa ka mahinulsolong makasasala kon mag-usab siya ug mangayog pasaylo sa Diyos. (Lucas 15:11-24) Ang tinuod, kinasingkasing nga paghinulsol ug pagpalayo sa daotan maoy usa ka paagi sa pagbalik ngadto sa pag-uyon ni Jehova ug sa Kristohanong kongregasyon. Ang pipila ka mahinulsolong mga mamumuhat ug daotan nga mibating nahugno ubos sa kabug-at sa ilang pagbating sad-an napalihok sa paghinulsol ug sa paghimog mga lakang aron makabalik sa mahigugmaong palibot sa Kristohanong kongregasyon. Sa maong paagi naapresyar nila ang mga pulong ni Jehova sa Isaias 57:15.

Aron masanta ang mga indibiduwal sa pagbalik ngadto sa mahigugmaong pag-atiman ni Jehova, buot ipakita ni Satanas nga walay kapasayloan sa nahimong mga sala. Apan ang halad lukat ni Kristo Jesus igo sa pagtabon sa mga sala kang bisan kinsa nga maghinulsol​—oo, bisan ang napanunod nga sala “sa tibuok kalibotan.” (1 Juan 2:1, 2) Ang usa ka sala nga wala malakip sa lukat mao ang sala batok sa balaang espiritu sa Diyos, nga nahisama sa tinuyong rebelyon batok sa paglihok sa espiritu sa Diyos, sama sa dagkong mga sala ni Judas Iscariote ug sa kadaghanang eskriba ug mga Pariseo.​—Mateo 12:24, 31, 32; 23:13, 33; Juan 17:12.

Pagtuboy sa Pagkamatarong ni Jehova

Sanglit ang nanghibilin sa espirituwal nga mga Israelinhon napasig-uli sa pag-uyon ni Jehova niadtong 1919, sila nahimong labaw ug labaw nga binayaw gikan sa nagapalibot nga kalibotan. Kini dili tungod sa bisan unsang pagkamaayo sa ilang bahin kondili tungod sa ilang kinabubut-ong pagpasakop sa mga balaod ug mga sukdanan ni Jehova. Ingong resulta, minilyon sa “ubang mga karnero” ni Kristo nadani sa pagpakig-uban sa espirituwal nga Israel ingong maunongong mga kauban. (Juan 10:16) Kining maong katawhan nakahatag himaya ug dungog kang Jehova diha sa kalibotan nga halayo kaayo gikan sa matarong nga mga sukdanan sa Diyos. Nahisama kini sa giingon kas-a sa magasing Personality sa Habagatang Aprika: “Ang mga Saksi ni Jehova dayag nga dagaya sa maayong mga hiyas ug halos walay daotang mga hiyas.”

Aron maampingan kining binayaw nga posisyon diha sa dili-diyosnong kalibotan, ang matag indibiduwal nga membro sa Kristohanong kongregasyon kinahanglang magkinabuhi sa usa ka mahinlo, matul-id nga kinabuhi sa atubangan ni Jehova. Sa Bibliya, ang langitnong organisasyon ni Jehova gilarawan sa mahinlong mga butang. Makita kini ingong usa ka matahom nga babaye nga nasaptan ug adlaw ug ang bulan anaa sa ilalom sa iyang mga tiil. (Pinadayag 12:1) Ang Bag-ong Jerusalem gihubit ingong usa ka balaang siyudad, matahom ug panagway. (Pinadayag 21:2) Ang matinumanong mga membro sa pangasaw-onon ni Kristo gihatagan ug “sanag, hinlo, pinong lino.” (Pinadayag 19:8) Kadtong membro sa dakong panon makita nga “nagsininag mga puting taas-nga-bisti.” (Pinadayag 7:9) Ang mga tawo nga kiling sa pagkamatarong nadani ngadto sa hinlo nga organisasyon. Sa kasukwahi, ang organisasyon ni Satanas mahugaw. Ang iyang relihiyosong sistema gihulagway ingong babayeng bigaon, ug kadtong anaa sa gawas sa balaang siyudad gihubit ingong mahugaw, dili hinlo.​—Pinadayag 17:1; 22:15.

Ang walay kataposang kinabuhi gisaad sa mga matarong. Ang natigom nga katawhan nga nagtuboy sa pagkamatarong ni Jehova adunay paglaom nga makalabang buhi sa kataposan niining daotang sistema. “Ang usa nga nagapaminaw kanako . . . magapuyo sa kasegurohan ug dili matugaw gumikan sa kahadlok sa katalagman,” misaad ang Diyos diha sa Proverbio 1:33.

Pagkamakapalipay unya sa dihang ang Dakong Solomon, si Kristo Jesus, magmando ibabaw nianang bag-ong kalibotan sa pagkamatarong, diha sa kahadlok kang Jehova! (2 Pedro 3:13) Mahisama unya kini sa kahayag sa kabuntagon sa dihang mosidlak na ang adlaw, usa ka buntag nga walay panganod. Ang tanang molupyo sa yuta magpuyo sa kasegurohan, ang matag usa maglingkod ubos sa iyang kaugalingong parras ug higuera, pagaingnon pa. Patahomon sa matarong nga tawhanong katilingban ang yuta ug magpuyo sa haom niini nga dapit diha sa uniberso alang sa walay kataposang kadayeganan sa atong Diyos, si Jehova.​—Mikas 4:3, 4; tan-awa usab ang Isaias 65:17-19, 25.

[Picture Credit Line sa panid 26]

Garo Nalbandian