Ang Kaalam nga “Makakita Kon Unsay Mahitabo”
“SILA maoy mga tawo nga nawad-an sa ilang maayong panabot ug walay salabotan. Kon sila maalamon pa unta, sila makasabot niini ug makakita kon unsay mahitabo kanila.”—Deuteronomio 32:28, 29, Beck.
Kining mga pulonga gisulti ni Moises ngadto sa mga Israelinhon samtang sila nagbarog sa utlanan sa Yutang Saad. Si Moises nagtagna sa panahon sa dihang ilang isalikway si Jehova ug ipakamenos ang mga resulta sa ilang mga lihok. Sa misunod nga mga siglo, ang katawhan sa Israel—lakip ang daghang hari—nagbalewala sa mga pahimangno sa Diyos.
Si Solomon, pananglitan, nahibalo sa sugo sa Diyos nga dili mangasawa sa mga magsisimba sa mga diyosdiyos gawas kang Jehova. (Deuteronomio 7:1-4) Bisan pa niana, nakabaton siyag “daghang langyawng asawa.” Ang resulta? Ang talaan sa Bibliya nag-ingon: “Nahitabo nga sa panahon sa pagkatigulang ni Solomon nga ang iyang mga asawa nagpaliso sa iyang kasingkasing sa pagsunod sa ubang mga diyos; ug ang iyang kasingkasing wala mapamatud-ing bug-os uban kang Jehova nga iyang Diyos sama sa kasingkasing ni David nga iyang amahan.” (1 Hari 11:1, 4) Bisan ug usa ka maalamong tawo, si Solomon walay maayong panabot sa ‘pagkakita kon unsay mahitabo” kon iyang supakon ang sugo sa Diyos.
Komosta kita? Atong malikayan ang daghang kasakit kon atong hatagan ug igong paghunahuna ang mga desisyon sa kinabuhi. Pananglitan, ang mga Kristohanon gitambagan nga “hinloan [ang ilang kaugalingon] sa tanang kahugawan sa unod ug espiritu.” (2 Corinto 7:1) Maalamon kini, apan daghan ang walay maayong panabot sa pagkakita kon unsay mahitabo kon ilang isalikway ang tambag ni Pablo. Pananglitan, daghang batan-on naghugaw sa ilang lawas pinaagi sa pagpanabako, nga naghunahunang kini makahimo kanilang suheto ug hamtong tan-awon. Pagkamakapasubo sa dihang, sa ulahing bahin sa kinabuhi, daghan ang mag-antos sa mga sakit sa kasingkasing, kanser sa baga, o emphysema ingong resulta!
Hinungdanon ang paghatag ug ugdang nga pagtagad sa mga resulta sa atong mga desisyon ug mga lihok. May maayong rason nga si Pablo misulat: “Bisan unsay ginapugas sa usa ka tawo, kini usab iyang anihon; tungod kay siya kinsa nagapugas alang sa iyang unod moani ug pagkadunot gikan sa iyang unod, apan siya kinsa nagapugas alang sa espiritu moani ug kinabuhing walay-kataposan gikan sa espiritu.”—Galacia 6:7, 8.