Kon Unsay Gipakita sa Bibliya Bahin sa Awtor Niini

 1. Nganong mapasalamaton ka tungod sa Bibliya?

MAPASALAMATON gyod ta kang Jehova nga Diyos tungod sa Bibliya. Niini nga basahon, gihatagan ta niyag maalamong tambag nga makatabang nato sa pag-atubang sa mga problema karon. Gihatagan pod ta niyag nindot nga paglaom sa umaabot. Labaw sa tanan, nahibaloan nato sa Bibliya ang lainlaing hiyas ni Jehova. Samtang atong pamalandongon ang iyang nindot nga mga hiyas, matandog gyod ang atong kasingkasing ug mapalihok ta nga makigsuod sa atong Diyos pinaagi sa pagpakighigala kaniya.​—Sal. 25:14.

 2. Sa unsang mga paagi gipaila ni Jehova ang iyang kaugalingon?

² Gusto ni Jehova nga mailhan siya sa mga tawo. Kaniadto, gipaila niya ang iyang kaugalingon pinaagi sa mga damgo, panan-awon, ug mga anghel. (Num. 12:6; Buh. 10:3, 4) Pero matun-an kaha nato ni nga mga damgo, panan-awon, o mensahe gikan sa mga anghel kon wala ni ipasulat? Kanay rason nga naggamit si Jehova ug mga tawo aron “isulat sa usa ka basahon” kon unsay gusto niya nga atong mahibaloan. (Jer. 30:2) Kay “ang dalan sa matuod nga Diyos hingpit,” makasalig ta nga ang maong paagi sa pagpakigkomunikar kanato mao ang pinakamaayo ug makatabang nato.​—Sal. 18:30.

 3. Unsay gihimo ni Jehova aron mapreserbar ang Bibliya? (Isaias 40:8)

³ Basaha ang Isaias 40:8. Ang Pulong sa Diyos naghatag ug maayong giya sa matinumanong mga lalaki ug babaye sulod na sa linibo ka katuigan. Sa unsang paagi naposible na? Ang Kasulatan gisulat kaniadto sa madunot nga mga materyales, maong wala nay nabilin nga orihinal nga mga dokumento karon. Pero giseguro ni Jehova nga makopya ang balaang sinulat. Bisag dili hingpit ang mga tigkopya, nag-amping sila pag-ayo. Bahin sa Hebreohanong Kasulatan, ang usa ka eskolar misulat: “Makaingon ta nga wala gyoy laing karaang basahon nga tukma kaayong pagkakopya.” Busa bisag dugay nang panahon ang milabay, bisag madunot nga materyales ang gigamit, ug bisag dili hingpit ang mga tigkopya, makaseguro ta nga ang atong mabasa sa atong Bibliya karon mao gyod ang panghunahuna sa Awtor niini, si Jehova.

 4. Unsay atong hisgotan niining artikuloha?

⁴ Ang “matag maayong gasa ug matag hingpit nga regalo” naggikan kang Jehova. (Sant. 1:17) Ang Bibliya mao ang usa sa pinakamaayong regalo nga gihatag ni Jehova kanato. Ang regalo dakog ikasulti bahin sa naghatag niini​—nga nakaila gyod siya nato ug nahibalo siya sa atong panginahanglan. Tinuod pod na bahin kang Jehova, ang naghatag sa Bibliya. Dihang atong susihon kini nga regalo, daghan tag makat-onan bahin niya. Makat-onan nato nga nakaila gyod siya nato ug nahibalo siya sa atong panginahanglan. Niining artikuloha, atong hisgotan kon sa unsang paagi ang Bibliya nagpakita sa tulo ka hiyas ni Jehova: ang iyang kaalam, hustisya, ug gugma. Ato unang hisgotan kon sa unsang paagi ang Bibliya nagpakita sa kaalam sa Diyos.

 5. Unsa ang usa ka paagi nga ang Bibliya nagpakita sa kaalam sa Diyos?

⁵ Nahibalo si Jehova nga gikinahanglan nato ang iyang maalamong tambag. Ug ang iyang regalo, ang Bibliya, puno sa iyang kaalam. Ang tambag sa Bibliya maayog epekto sa mga tawo. Kini makabag-o sa kinabuhi. Dihang gisulat ang unang mga basahon sa Bibliya, giingnan ni Moises ang katawhan sa Diyos, ang mga Israelinhon: “Dili kini kay walay pulos nga pulong para kaninyo kay nagdepende niini ang inyong kinabuhi.” (Deut. 32:47) Kadtong mosunod sa Bibliya makabatog malamposon ug malipayong kinabuhi. (Sal. 1:2, 3) Bisag dugay nang gisulat ang Pulong sa Diyos, makabag-o gihapon ni sa kinabuhi sa mga tawo. Pananglitan sa jw.org, sa serye nga “Ang Bibliya Makabag-o sa Kinabuhi,” naay kapig 50 ka tinuod nga mga eksperyensiya nga nagpakita kon sa unsang paagi ang Bibliya nakahatag ug dakong kaayohan sa mga tawo nga nagsunod niini.​—1 Tes. 2:13.

 6. Nganong makaingon ta nga ang Bibliya dili pareho sa ubang libro?

⁶ Walay laing basahon nga pareho sa Pulong sa Diyos. Ngano? Kay ang Awtor niana nga basahon, si Jehova nga Diyos, gamhanan, walay kataposan, ug dili matupngan ang iyang kaalam. Dili sama kang Jehova, ang mga awtor sa ubang libro mamatay, ug ang tambag niini nga mga libro dili na praktikal paglabay sa panahon. Pero ang maalamong mga prinsipyo sa Bibliya kanunayng praktikal ug nakatabang sa mga tawo nga nabuhi sa lainlaing panahon. Samtang atong basahon ang Bibliya ug pamalandongon ang atong nakat-onan, gamiton sa Awtor niini ang iyang gamhanang balaang espiritu aron tabangan ta nga makita kon unsaon pagpadapat ang mga tambag sa Bibliya. (Sal. 119:27; Mal. 3:16; Heb. 4:12) Oo, ang buhi nga Awtor sa Bibliya gusto kaayong motabang nimo. Dili ba maayo kaayo na nga rason nga basahon ang Bibliya kada adlaw?

 7. Sa unsang paagi ang Bibliya nakapahiusa sa katawhan sa Diyos kaniadto?

⁷ Naay laing talagsaong paagi nga ang Bibliya nagpakita sa kaalam sa Diyos. Kini nakapahiusa sa iyang katawhan. Dihang ang mga Israelinhon misulod sa Yutang Saad, nagpuyo sila sa dakodako nga lugar. Ang uban nahimong mga mangingisda, ang uban nagbuhig mga baka, ug ang uban nanguma. Ang mga Israelinhon nga nagpuyo sa usa ka lugar dakog purohan nga mawad-ag interes sa ilang mga isigka-Israelinhon nga nagpuyo sa ubang mga bahin sa nasod. Pero nagsugo si Jehova nga ang mga Israelinhon magtigom sa lainlaing okasyon aron maminaw samtang basahon ug ipatin-aw ang iyang Pulong. (Deut. 31:10-13; Neh. 8:2, 8, 18) Imadyina kon unsa kahay gibati sa usa ka matinumanong Israelinhon dihang miabot siya sa Jerusalem ug nakita niya ang milyonmilyong isigkamagsisimba gikan sa lainlaing bahin sa nasod! Busa gitabangan ni Jehova ang iyang katawhan nga magpabiling nahiusa. Sa ulahi, dihang naporma ang Kristohanong kongregasyon, ang mga sakop niini lainlaig pinulongan ug kahimtang sa kinabuhi. Pero tungod sa ilang gugma sa Kasulatan, nagkahiusa sila sa pagsimba sa tinuod nga Diyos. Kadtong nahimong mga magtutuo nakasabot sa Pulong sa Diyos tungod sa tabang sa ilang isigkamagsisimba ug sa pagtigom uban kanila.​—Buh. 2:42; 8:30, 31.

 8. Sa unsang paagi ang Bibliya nakapahiusa sa katawhan ni Jehova karon?

⁸ Ang atong maalamong Diyos padayong nagtudlo ug naghiusa sa iyang katawhan pinaagi sa Bibliya. Dinhi gikan ang espirituwal nga pagkaon nga atong napahimuslan. Regular tang magtigom sa Kingdom Hall ug sa mga asembliya ug kombensiyon aron maminaw samtang basahon ug ipatin-aw ang Bibliya. Busa dako gyog tabang ang Bibliya sa pagtuman sa katuyoan ni Jehova nga ang iyang mga magsisimba “magkahiusa sa pag-alagad kaniya.”​—Sof. 3:9.

 9. Unsang hiyas ang gikinahanglan aron masabtan ang mensahe sa Bibliya? (Lucas 10:21)

⁹ Konsideraha ang laing ebidensiya sa kaalam ni Jehova. Gipasulat niya ang daghang bahin sa Bibliya sa paagi nga masabtan lang sa mapainubsanong mga tawo. (Basaha ang Lucas 10:21.) Daghan ang gabasag Bibliya. Ang usa ka eskolar miingon nga mas daghang tawo ang gabasag Bibliya kay sa ubang libro, ug ila gyod ning gibasag maayo. Pero kadto lang mapainubsanon ang tinuod nga nakasabot ug nagpadapat sa giingon niini.​—2 Cor. 3:15, 16.

10. Unsa ang laing paagi nga ang Bibliya nagpakita sa kaalam ni Jehova?

¹⁰ Naa pay laing paagi nga ang Bibliya nagpakita sa kaalam ni Jehova. Gigamit ni Jehova ang Bibliya dili lang aron tudloan ta ingong grupo kondili aron tudloan ug hupayon pod ta ingong indibiduwal. Dihang basahon nato ang Pulong ni Jehova, bation gyod nato nga interesado siya sa matag usa nato. (Isa. 30:21) Dihang naa kay problema, dili ba kadaghan kang nakabasag teksto nga morag para gyod nimo? Pero ang Bibliya nakatandog pod sa minilyong tawo. Nganong naa ni praktikal nga impormasyon nga mohaom sa imong kahimtang? Tungod kay maalamon kaayo ang Awtor sa Bibliya.​—2 Tim. 3:16, 17.

11. Giunsa pagpakita sa Diyos nga wala siyay pagpihigpihig dihang gisulat ang Bibliya?

¹¹ Ang hustisya mao ang laing hiyas ni Jehova. (Deut. 32:4) Ang hustisya konektado kaayo sa pagkadili-mapihigon, ug si Jehova patas kanunay. (Buh. 10:34, 35; Roma 2:11) Ang iyang pagkadili-mapihigon makita diha sa mga pinulongan nga iyang gigamit sa pagpasulat sa Bibliya. Kadaghanan sa unang 39 ka basahon sa Bibliya gisulat sa Hebreohanong pinulongan, nga maoy daling masabtan sa katawhan sa Diyos niadtong panahona. Pero sa unang siglo C.E., ang Gregong pinulongan mao nay kasagarang gigamit, busa ang kataposang 27 ka basahon sa Bibliya gisulat niana nga pinulongan. Wala ipasulat ni Jehova ang iyang Pulong sa usa lang ka pinulongan. Karon, ang halos walo ka bilyong tawo sa yuta lainlaig pinulongan. Busa sa unsang paagi sila makakat-on bahin kang Jehova?

12. Unsa ang usa ka paagi nga ang Daniel 12:4 natuman niining kataposang mga adlaw?

¹² Pinaagi kang propetang Daniel, nagsaad si Jehova nga sa panahon sa kataposan, “ang tinuod nga kahibalo” nga naa sa Bibliya “modagaya.” Daghan ang makasabot niini. (Basaha ang Daniel 12:4.) Ang usa ka rason nga ang maong kahibalo midagaya maoy tungod sa paghubad, pag-publish, ug pag-apod-apod sa Bibliya ug sa binase sa Bibliya nga mga publikasyon. Sa tanang basahon sa tibuok kalibotan, ang Bibliya ang pinakadaghag hubad ug pinakadaghag kopya nga naapod-apod. Ang mga hubad sa Bibliya nga giimprenta sa mga kompaniya usahay mahal kaayo. Pero ang katawhan ni Jehova naghubad sa tibuok Bibliya o sa bahin niini sa kapig 240 ka pinulongan, ug wala ni bayad. Tungod ana, ang mga tawo gikan sa tanang nasod nakakat-on sa “maayong balita sa Gingharian” samtang wala pa ang kataposan. (Mat. 24:14) Kay si Jehova Diyos sa hustisya, gihatagan niyag kahigayonan ang daghang tawo nga makaila niya pinaagi sa pagbasa sa iyang Pulong. Iya nang gihimo kay gimahal kaayo niya ang tanang tawo.

13. Nganong makaingon ta nga ang Bibliya nagpakita sa gugma ni Jehova? (Juan 21:25)

¹³ Ang Bibliya nagpakita sa kinalabwang hiyas sa Awtor niini​—ang gugma. (1 Juan 4:8) Konsideraha kon unsay gipasulat ug wala ipasulat ni Jehova diha sa Bibliya. Iyang gipasulat kon unsay atong gikinahanglan aron masuod ta niya, magmalipayon karon, ug makadawat ug kinabuhing walay kataposan. Pero kay gimahal ta ni Jehova, wala ta niya paulanig impormasyon nga dili kinahanglan.​—Basaha ang Juan 21:25.

14. Sa unsang paagi ang nasulat sa Bibliya nagpakita pod sa gugma sa Diyos?

¹⁴ Makita pod ang gugma ni Jehova sa iyang paagi sa pagpakigkomunikar nato kay iya tang gipakitaag dignidad. Diha sa Bibliya, wala siya maghatag ug daghan kaayong balaod, nga mora bag but-an niya ang tanang bahin sa atong kinabuhi. Hinuon, migamit siyag tinuod nga mga estorya, makapainteres nga mga tagna, ug praktikal nga tambag aron tabangan ta nga masabtan kon unsay angay ug dili nato angayng himoon. Niining mga paagiha, ang Pulong sa Diyos nagdasig nato nga higugmaon ug sundon siya nga kinasingkasing.

15. (a) Sa unsang paagi gipakita ni Jehova nga interesado siya sa mga nagabasa sa iyang Pulong? (b) Sa hulagway, kinsa nga mga karakter sa Bibliya ang gipamalandong sa bata, sa brader, ug sa tigulang nga sister? (Gen. 39:1, 10-12; 2 Hari 5:1-3; Luc. 2:25-38)

¹⁵ Gipakita sa Bibliya nga si Jehova interesado kaayo nato. Sa unsang paagi? Ang iyang Pulong daghag estorya bahin sa mga karakter sa Bibliya nga mibatig lainlaing emosyon. Makasabot gyod ta nila kay sila “may pagbati nga sama kanato.” (Sant. 5:17) Labaw sa tanan, dihang pamalandongon nato kon giunsa pagtratar ni Jehova ang mga tawo nga sama nato, mas masabtan nato nga siya “mabination kaayo ug maluluy-on.”​—Sant. 5:11.

16. Unsay atong makat-onan bahin kang Jehova dihang makabasa tag mga karakter sa Bibliya nga nakahimog sayop? (Isaias 55:7)

¹⁶ Gipakita sab sa Bibliya ang gugma ni Jehova sa laing paagi. Ang Bibliya nagpasalig nga dili ta biyaan sa Diyos kon makahimo tag sayop. Ang mga Israelinhon balikbalik nga nakasala kang Jehova, pero dihang sinsero silang naghinulsol, gipasaylo sila sa Diyos. (Basaha ang Isaias 55:7.) Ang mga Kristohanon pod sa unang siglo nahibalo nga gimahal kaayo sila sa Diyos. Ubos sa paggiya sa Diyos, gidasig ni apostol Pablo ang iyang mga isigkamagtutuo nga ‘pasayloon ug hupayon’ ang lalaki nga naghimog seryosong sala pero naghinulsol. (2 Cor. 2:6, 7; 1 Cor. 5:1-5) Makapalipay gyong mahibaloan nga wala isalikway ni Jehova ang iyang mga magsisimba tungod lang kay nakasala sila. Hinuon tungod sa iyang gugma, iya silang gitabangan, gitul-id, ug gidasig nga mobalik kaniya. Nagsaad siya nga kana poy iyang himoon sa tanang mahinulsolong makasasala karon.​—Sant. 4:8-10.

17. Nganong espesyal kaayo nga regalo ang Bibliya?

¹⁷ Si Jehova naghatag natog nindot kaayo nga regalo. Nganong espesyal kaayo ang iyang Pulong? Sa ato nang nakat-onan, ang Bibliya nagpakita sa kaalam, hustisya, ug gugma sa Diyos. Kini nga basahon nagpamatuod nga gusto ni Jehova nga mailhan nato siya. Gusto niya nga mahimo nato siyang higala.

18. Unsaon nato pagpakita nga mapasalamaton ta sa “maayong gasa” o regalo ni Jehova nga Bibliya?

¹⁸ Dili gyod nato balewalaon ang “maayong gasa” o regalo sa Diyos, ang Bibliya. (Sant. 1:17) Busa padayon natong ipakita ang atong apresasyon niini nga regalo. Mahimo nato na pinaagi sa pagbasa ug pagpamalandong sa Bibliya. Kon ato nang himoon, makaseguro ta nga ang Awtor niini magpanalangin sa atong mga paningkamot ug atong “makaplagan ang kahibalo sa Diyos.”​—Prov. 2:5.