Gipabilhan Mo ba Gayod ang Gasa sa Diyos nga Kaminyoon?
“Hinaot si Jehova maghatag kaninyog gasa, ug ang matag usa kaninyo makakaplag ug kapahulayan diha sa balay sa iyang bana.”—RUTH 1:9.
PANGITAA ANG MGA TUBAG:
Nganong makaingon kita nga gipabilhan sa mga alagad sa Diyos sa karaang panahon ang iyang gasa nga kaminyoon?
Giunsa nato pagkahibalo nga importante kang Jehova kon kinsay atong minyoan?
Unsang tambag bahin sa kaminyoon ang gusto nimong ipadapat?
1. Unsay reaksiyon ni Adan dihang siya nakabatog asawa?
“KINI sa kataposan bukog sa akong mga bukog ug unod sa akong unod. Kini siya pagatawgon nga Babaye, tungod kay gikan sa lalaki kini siya gikuha.” (Gen. 2:23) Pagkamalipayon sa unang lalaki, si Adan, nga nakabatog asawa mao nga siya nakasulti niining balaknong mga pulong! Human gipahinanok si Adan, gikuha ni Jehova ang usa sa mga gusok ni Adan ug gihimo kining maanyag nga babaye. Si Adan nagngalan kaniyag Eva. Sila gihiusa sa Diyos diha sa kaminyoon. Kay gigamit man ni Jehova ang gusok ni Adan sa paghimo kang Eva, sila mas suod kay ni bisan kinsang magtiayon karon.
2. Nganong magkagustohanay ang lalaki ug babaye?
2 Tungod sa dili hitupngang kaalam ni Jehova, gilalang niya ang mga tawo nga mobatig romantikong gugma. Tungod niini magkagustohanay ang lalaki ug babaye. Ang The World Book Encyclopedia nag-ingon: “Ang lalaki ug babaye nga magminyo nagdahom nga makabatog seksuwal nga relasyon ug permanenteng romantikong atraksiyon.” Nahitabo usab kini taliwala sa katawhan ni Jehova.
SILA NAGPABILI SA GASA NGA KAMINYOON
3. Sa unsang paagi nakabatog asawa si Isaac?
3 Ang matinumanong si Abraham nagtahod sa sukdanan ni Jehova sa kaminyoon. Busa iyang gipaadto sa Mesopotamia ang iyang kinatigulangang sulugoon aron sa pagpangitag asawa para kang Isaac. Dunay maayong resulta ang pag-ampo sa sulugoon. Ang diyosnon nga si Rebeca nahimong asawa ni Isaac ug may papel sa kahikayan ni Jehova sa pagpreserbar sa binhi ni Abraham. (Gen. 22:18; 24:12-14, 67) Hinuon wala kini magpasabot nga magbuotbuot kitag pangitag pangasaw-onon para sa uban, bisag maayo pa ang atong intensiyon. Kadaghanan karon mao nay mopili sa ilang minyoan. Siyempre dili magbuot ang Diyos kon kinsay minyoan sa usa, apan siya motabang sa mga Kristohanon bahin niini ug sa ubang butang kon sila moampo kaniya ug magpagiya sa iyang balaang espiritu.—Gal. 5:18, 25.
4, 5. Nganong makaingon ka nga nagkahigugmaay gayod ang Sulamita ug ang magbalantay?
4 Sa karaang Israel, may matahom nga dalagang Sulamita nga giagda sa iyang mga higala nga mahimong usa sa mga asawa ni Haring Solomon. Apan gibadlong niya sila: “Gipapanumpa ko kamo, Oh mga anak nga babaye sa Jerusalem, nga dili ninyo palihokon o pukawon ang gugma sa sulod nako hangtod nga kini buot na.” (Awit 8:4) Ang Sulamita dunay hinigugma nga usa ka magbalantay sa karnero. Siya mapaubsanong miingon: “Ako usa lamang ka safron sa patag daplin sa baybayon, usa ka lirio sa ubos nga kapatagan.” Apan ang magbalantay mitubag: “Sama sa usa ka lirio taliwala sa tunokong mga bunglayon, mao man usab ang akong hinigugma taliwala sa mga anak nga babaye”! (Awit 2:1, 2) Nagkahigugmaay gayod silang duha.
5 Kay mas gihigugma sa Sulamita ug sa magbalantay ang Diyos, seguradong lig-on ang ilang kaminyoon sa umaabot. Gani siya miingon sa iyang hinigugmang magbalantay: “Ibutang ako ingong timbre diha sa imong kasingkasing, ingong timbre diha sa imong bukton; kay ang gugma kusganon sama sa kamatayon, ang pagpangayog bug-os nga pagkamahinalaron sama ka lig-on sa Sheol. Ang mga dinilaab niini maoy mga dinilaab sa kalayo, ang siga ni Jah [kay kini gikan kaniya]. Ang daghang katubigan dili makaarang sa pagpalong sa gugma, ni ang mga suba makabanlas niini. Kon ang usa ka tawo maghatag sa tanang bililhong butang sa iyang balay tungod sa gugma, ang mga tawo tinong magtamay niini.” (Awit 8:6, 7) Kon ikaw usa ka alagad ni Jehova ug nagplanong magminyo, dili ba ingon usab niana nga gugma ug debosyon ang imong gidahom sa imong minyoan?
IMPORTANTE SA DIYOS KON KINSAY IMONG MINYOAN
6, 7. Giunsa nato pagkahibalo nga importante sa Diyos kon kinsay atong minyoan?
6 Importante kang Jehova kon kinsay imong minyoan. Pananglitan, iyang gipasidan-an ang mga Israelinhon bahin sa mga taga-Canaan ug nagsugo: “Dili ka makig-alyansa sa kaminyoon uban kanila. Ang imong anak nga babaye dili mo ihatag ngadto sa iyang anak nga lalaki, ug ang iyang anak nga babaye dili mo kuhaon alang sa imong anak nga lalaki. Kay iyang italikod ang imong anak sa pagsunod kanako, ug sila tinong moalagad ug laing mga diyos; ug ang kasuko ni Jehova mosilaob gayod batok kaninyo, ug siya maglaglag kanimo sa madali.” (Deut. 7:3, 4) Gatosan ka tuig sa ulahi, ang saserdoteng si Esdras miingon: “Kamo wala magmatinumanon sa pagkaagi nga kamo nagpapuyo sa mga langyawng asawa aron sa pagdugang sa pagkasad-an sa Israel.” (Esd. 10:10) Gisultihan usab ni apostol Pablo ang iyang mga isigka-Kristohanon: “Ang usa ka asawa nagapos sulod sa tanang panahon nga buhi ang iyang bana. Apan kon ang iyang bana mahikatulog sa kamatayon, siya gawasnon nga magminyo kang bisan kinsa nga buot niya, lamang diha sa Ginoo.”—1 Cor. 7:39.
7 Kon ang usa ka dedikadong alagad ni Jehova nagminyog dili magtutuo, siya misupak sa Diyos. Ang mga Israelinhon sa adlaw ni Esdras wala magmatinumanon kay sila nagminyog mga langyaw. Sayop gayod nga pakamenoson ang tin-awng mga sugo sa Diyos diha sa Kasulatan. (Esd. 10:10; 2 Cor. 6:14, 15) Ang Kristohanon nga magminyog dili-magtutuo maoy dili maayong panig-ingnan ug walay tinuod nga pagpabili sa gasa sa Diyos nga kaminyoon. Tungod niini, mahimong mawad-an siyag mga pribilehiyo sa kongregasyon. Dili usab makataronganon nga dahomon ang mga panalangin sa Diyos ug sa samang higayon moampo, ‘Diyos nga Jehova, tinuyo kong misupak nimo. Pero hinaot panalanginan gihapon ko nimo.’
ANG ATONG LANGITNONG AMAHAN NAHIBALO KON UNSAY LABING MAAYO
8. Nganong angay natong sundon ang mga instruksiyon sa Diyos bahin sa kaminyoon?
8 Ang imbentor sa usa ka makina nahibalo kon sa unsang paagi kini moandar. Kon kinahanglan kining asembolon, siya makahatag ug mga instruksiyon bahin niini. Apan komosta kon dili nato kini sundon ug asembolon kini sa kaugalingon natong paagi? Mahimong madaot kini—kana kon moandar. Busa kon buot natong magmalipayon sa atong kaminyoon, angay natong sundon ang mga instruksiyon nga gihatag ni Jehova, ang Tagmugna sa kaminyoon.
9. Nganong makaingon kita nga si Jehova nakasabot nga ang tawo mobatig kamingaw ug nahibalo sa kalipay nga ikahatag sa kaminyoon?
9 Si Jehova nahibalo sa tanan bahin sa tawo ug sa kaminyoon. Gusto niya nga sila ‘mosanay ug modaghan’ mao nga gibutang niya kanila ang seksuwal nga panginahanglan. (Gen. 1:28) Ang Diyos nakasabot nga ang tawo mobatig kamingaw, kay sa wala pa lalanga ang unang babaye, siya miingon: “Dili maayo nga mag-inusara ang tawo. Himoan ko siyag kauban ug katabang nga angay kaniya.” (Gen. 2:18, Ang Bag-ong Maayong Balita Biblia) Nahibalo usab si Jehova sa kalipay nga matagamtam sulod sa kaminyoon.—Basaha ang Proverbio 5:15-18.
10. Unsay angayng hinumdoman sa mga magtiayon bahin sa ilang seksuwal nga relasyon?
10 Tungod sa sala ug pagkadili-hingpit nga gipasa ni Adan sa tanang tawo, walay hingpit nga kaminyoon karon. Apan ang mga alagad ni Jehova magmalipayon gihapon kon ilang sundon ang Bibliya. Pananglitan, tagda ang tin-awng tambag ni Pablo bahin sa seksuwal nga relasyon sulod sa kaminyoon. (Basaha ang 1 Corinto 7:1-5.) Ang Kasulatan wala mag-ingon nga ang pagbatog anak mao lang ang katuyoan sa seksuwal nga relasyon sa magtiayon. Kini makatagbaw sa ilang emosyonal ug pisikal nga panginahanglan. Apan ang dili normal nga pagpakigsekso dili makapahimuot sa Diyos. Niining importanteng bahin sa ilang kaminyoon, buot gayod sa Kristohanong mga magtiayon nga trataron ang ilang kapikas sa malumong paagi ug magpakitag tinuod nga gugma sa usag usa. Ug angay nilang likayan ang mga buhat nga dili makapahimuot kang Jehova.
11. Sa unsang paagi si Ruth gipanalanginan tungod sa iyang pagkamaunongon kang Jehova?
11 Ang kaminyoon angay nga makapalipay, dili makaguol ug makalaay. Ang Kristohanong panimalay angay nga maoy dapit sa pahulay ug kalinaw. Tagda ang nahitabo mga 3,000 ka tuig na kanhi. Ang tigulang balo nga si Noemi ug ang iyang duha ka balong umagad nga si Orpa ug Ruth nagbaktas gikan sa Moab paingon sa Juda. Giingnan ni Noemi ang iyang mga umagad nga mobalik sa ilang yutang natawhan. Apan ang Moabihanon nga si Ruth wala mobiya kang Noemi. Siya nagmaunongon sa matuod nga Diyos ug gipasaligan nga makadawat ug hingpit nga ganti gikan kang Jehova kay siya midangop Kaniya. (Ruth 1:9; 2:12) Si Ruth nagpabili ug nagtahod gayod sa gasa sa Diyos nga kaminyoon, ug siya naminyo kang Boaz nga usa ka matuod nga magsisimba ni Jehova. Dihang si Ruth banhawon didto sa paraiso, malipay gayod siyang mahibalo nga nahimo siyang katigulangan ni Jesu-Kristo. (Mat. 1:1, 5, 6; Luc. 3:23, 32) Pagkatalagsaong mga panalangin ang iyang nadawat tungod sa iyang pagkamaunongon kang Jehova!
MAAYONG TAMBAG ARON MAGMALAMPOSON ANG KAMINYOON
12. Asa makaplagan ang maayong tambag bahin sa kaminyoon?
12 Ang Diyos nagtug-an kanato kon unsay gikinahanglan aron magmalamposon ang kaminyoon. Walay tawo nga mas nahibalo niana. Ang Bibliya mao ang bugtong tinubdan sa maayong tambag bahin sa kaminyoon ug kanunay kining husto. Busa ang usa nga mohatag ug tambag angayng magbase niini sa mga sukdanan sa Bibliya. Pananglitan, si apostol Pablo misulat: “Kinahanglang higugmaon gayod sa matag usa ang iyang asawa sama sa iyang kaugalingon; sa laing bahin, ang asawa angay nga adunay halawom nga pagtahod sa iyang bana.” (Efe. 5:33) Tin-aw kaayo kini nga tambag ug masabtan sa tanang hamtong nga mga Kristohanon. Apan ang pangutana mao, Ila ba kining ipadapat? Oo, kon sila nagpabili sa gasa sa Diyos nga kaminyoon.a
13. Unsay lagmit mahitabo kon dili ipadapat ang tambag sa 1 Pedro 3:7?
13 Ang Kristohanong bana mahigugmaong magtratar sa iyang asawa. Si apostol Pedro misulat: “Kamong mga bana, magpadayon sa pagpuyo sa samang paagi uban kanila sumala sa kahibalo, nga maghatag kanila ug kadungganan samag ngadto sa usa ka sudlanan nga mas mahuyang, ang babaye, sanglit kamo mga manununod man usab uban kanila sa dili-takos nga pabor sa kinabuhi, aron nga dili mababagan ang inyong mga pag-ampo.” (1 Ped. 3:7) Ang mga pag-ampo sa bana mababagan kon dili niya ipadapat ang tambag ni Jehova. Mahimong maapektohan ang espirituwalidad sa magtiayon, nga lagmit moresultag mga problema, panaglalis, ug dili maayong pagtratar sa usag usa.
14. Unsay ikatabang sa usa ka mahigugmaong asawa sa iyang pamilya?
14 Ang asawa nga nagpadapat sa tambag sa Bibliya ug nagpagiya sa balaang espiritu dakog mahimo aron magmalinawon ug magmalipayon ang iyang panimalay. Siyempre higugmaon gayod sa Kristohanong bana ang iyang asawa ug panalipdan siya sa pisikal ug sa espirituwal. Kay gusto man sa asawa nga higugmaon siya sa iyang bana, angay niyang ipakita ang mga hiyas nga maghimo kaniyang hiligugmaon. Ang Proverbio 14:1 nag-ingon: “Ang babayeng tinuod nga maalamon nagtukod sa iyang balay, apan ang buangbuang naglumpag niana pinaagi sa iyang mga kamot.” Ang maalamon ug mahigugmaong asawa dakog ikatabang aron magmalamposon ug magmalipayon ang iyang pamilya. Iyang gipakita usab nga siya nagpabili gayod sa gasa sa Diyos nga kaminyoon.
15. Unsay gitambag diha sa Efeso 5:22-25?
15 Kon sundogon sa mga magtiayon ang panig-ingnan ni Jesus sa pagtratar sa kongregasyon, ilang gipakita nga sila nagpabili sa gasa sa Diyos nga kaminyoon. (Basaha ang Efeso 5:22-25.) Ang magtiayon nga naghigugmaay gayod sa usag usa maoy mapaubsanon ug dili magbungolay o magpakitag mga hiyas nga makadaot sa ilang kaminyoon. Panalanginan gayod ni Jehova ang mga magtiayon nga sama niini!
AYAW IPABULAG NI BISAN KINSA
16. Nganong nagpabiling tagsaanon ang ubang Kristohanon?
16 Bisag ang kadaghanan nagplanong magminyo, ang pipila ka alagad ni Jehova nagpabiling tagsaanon kay wala makakitag isigkamagtutuo nga gusto nilang minyoan. Ang uban usab wala ra magminyo aron makagugol ug mas dakong panahon sa pag-alagad kang Jehova nga walay mga kabaldahan. Siyempre, ang pagkatagsaanon kinahanglang pahimuslan nga dili molapas sa mga sukdanan ni Jehova.—Mat. 19:10-12; 1 Cor. 7:1, 6, 7, 17.
17. (a) Unsay giingon ni Jesus bahin sa kaminyoon? (b) Kon ang usa mosugod na sa pagkaibog sa kapikas sa laing tawo, unsay kinahanglan dayon niyang himoon?
17 Tagsaanon man o minyo, angay natong hinumdoman ang giingon ni Jesus: “Wala ba ninyo mabasa nga [ang Diyos] nga naglalang kanila sukad sa sinugdan nagbuhat kanila nga lalaki ug babaye ug nag-ingon, ‘Tungod niini ang usa ka lalaki mobiya sa iyang amahan ug sa iyang inahan ug moipon sa iyang asawa, ug ang duha mahimong usa ka unod’? Mao nga dili na sila duha, kondili usa ka unod. Busa, kon unsay gihiusa pagyugo sa Diyos ayaw ipabulag ni bisan kinsang tawo.” (Mat. 19:4-6) Ang pagkaibog sa kapikas sa laing tawo maoy sala. (Deut. 5:21) Kon ang usa ka Kristohanon mibati na niini nga kaibog, kinahanglang langkaton dayon niya kining hugaw nga tinguha bisag masakitan pa siya tungod sa pagtugot niini nga makagamot sa iyang kasingkasing. (Mat. 5:27-30) Angay gayong tul-iron ang maong panghunahuna ug putlon ang makasasalang pangibog sa malimbongong kasingkasing.—Jer. 17:9.
18. Unsay angay natong bation bahin sa gasa sa Diyos nga kaminyoon?
18 Bisan kadtong diyutay lang o walay kahibalo bahin kang Jehova ug sa iyang makapalipayng gasa nga kaminyoon nagtahod ug nagpabili niini. Dili ba mas labaw pa natong tahoron ug pabilhan kini nga gasa kay kita dedikadong mga alagad sa “malipayong Diyos” nga si Jehova? Angay natong ipakita sa atong pagkinabuhi nga ato gayong gipabilhan ang gasa sa Diyos nga kaminyoon.—1 Tim. 1:11.
[Footnote]
a Alang sa dugang detalye bahin sa kaminyoon, tan-awa ang kapitulo 10 ug 11 sa librong Magpabilin Kamo sa Gugma sa Diyos.
[Blurb sa panid 6]
Ang maayong kaminyoon makapasidungog kang Jehova ug makapalipay sa tibuok pamilya
[Hulagway sa panid 5]
Gipabilhan ni Ruth ang gasa sa Diyos nga kaminyoon
[Hulagway sa panid 7]
Imo ba gayong gipabilhan ang gasa ni Jehova nga kaminyoon?