Mga Ginikanan, Itagana ang mga Panginahanglan sa Inyong Pamilya

“Kon adunay si bisan kinsa nga wala magtagana alang sa mga iya, . . . siya naglimod sa pagtuo.”—1 TIMOTEO 5:8.

1, 2. (a) Nganong makapadasig nga makita ang mga pamilya nga nagtambong sa Kristohanong mga tigom nga magkauban? (b) Unsa ang pipila ka mga suliran nga giatubang sa mga pamilya aron dili maulahi sa tigom?

KON motan-aw ka sa imong palibot diha sa Kristohanong kongregasyon sa dili pa magsugod ang tigom, makita nimo ang hinlo ug maayog-pamiste nga mga bata nga nanglingkod tupad sa ilang mga ginikanan. Dili ba nindot nga makita ang gugma nga dayag sa maong mga pamilya—ang gugma alang kang Jehova ug sa usag usa? Apan, dali rang malimtan kon unsa ka dakong paningkamot ang gihimo aron ang pamilya dili maulahi sa mga tigom.

² Kasagaran, ang mga ginikanan puliki kaayo sa tibuok adlaw, ug sa mga gabii nga adunay tigom, mas puliki pa gani ang pamilya. Kinahanglang maghikay ug pagkaon, magbuhatbuhat diha sa balay, ug maghimog homwork. Ang mga ginikanan mao ang kinadaghanag trabaho. Tinoon nila nga ang tanan hinlo, nakakaon, ug dili maulahi. Siyempre, kon bahin sa mga bata ang wala-damhang mga problema mahimong mahitabo sa dili gayod kombenyenteng panahon. Nagisi ang karsones sa kamagulangan samtang nagdula. Nausik ang pagkaon sa kinamanghoran. Ang mga bata magsugod sa paglalis. (Proverbio 22:15) Unsay resulta? Bisan ang mainampingong pagplano sa mga ginikanan mahimong mapakyas. Sa gihapon, ang pamilya kasagarang anaa na sa Kingdom Hall sa dili pa magsugod ang tigom. Makapadasig gayod nga makita sila kanunay diha sa Kingdom Hall samtang ang mga bata modako nga nag-alagad kang Jehova!

 3. Sa unsang paagi nahibaloan nato nga gipabilhan pag-ayo ni Jehova ang mga pamilya?

³ Bisan tuod ang imong buluhaton ingong ginikanan usahay lisod, kapoy pa gani, makasalig ka nga gipabilhan pag-ayo ni Jehova ang imong mga paningkamot. Si Jehova ang Tagmugna sa kahikayan sa pamilya. Busa ang iyang Pulong nag-ingon nga ‘utang sa matag pamilya ang ngalan niini’—ang mismong paglungtad niini—kang Jehova. (Efeso 3:14, 15) Busa sa dihang kamong mga ginikanan maningkamot sa pagtuman sa inyong mga katungdanan sa pamilya sa hustong paagi, inyong gipasidunggan ang Soberanong Ginoo sa uniberso. (1 Corinto 10:31) Dili ba dako kana nga pribilehiyo? Nan, haom nga atong hisgotan ang asaynment nga gihatag ni Jehova sa mga ginikanan. Niining artikuloha, ang maong asaynment adunay kalabotan sa pagtagana sa panginahanglan sa pamilya. Sublion nato ang tulo ka paagi diin gidahom sa Diyos nga magtagana ang mga ginikanan sa ilang mga anak.

Pagtagana sa Materyal nga Paagi

 4. Diha sa pamilya, unsang mga kahikayan ang gihimo ni Jehova sa pagtagana sa mga panginahanglan sa mga anak?

⁴ Si apostol Pablo misulat: “Tino nga kon adunay si bisan kinsa nga wala magtagana alang sa mga iya, ug ilabina alang sa mga sakop sa iyang panimalay, siya naglimod sa pagtuo ug mas daotan pa kay sa tawong walay pagtuo.” (1 Timoteo 5:8) Sa paghisgot ni Pablo dinhi ug “si bisan kinsa,” kinsay diha sa iyang hunahuna? Ang ulo sa pamilya, kasagaran ang amahan. Gihatagan usab sa Diyos ang babaye ug dungganong katungdanan ingong katabang sa iyang bana. (Genesis 2:18) Ang mga babaye sa panahon sa Bibliya subsob nga motabang sa ilang mga bana sa pagtagana sa panginahanglan sa pamilya. (Proverbio 31:13, 14, 16) Karon, nagkadaghan na ang usay-ginikanan nga mga pamilya.a Daghang nag-inusara nga Kristohanong mga ginikanan ang dalayegon sa ilang pagtagana sa panginahanglan sa ilang panimalay. Siyempre, maayo nga ang pamilya adunay duha ka ginikanan, diin ang amahan maoy nanguna.

5, 6. (a) Unsa ang pipila sa mga suliran nga giatubang niadtong naningkamot sa pagtagana sa materyal nga panginahanglan sa ilang pamilya? (b) Ang paghupot sa unsang panglantaw ngadto sa sekular nga trabaho ang motabang sa Kristohanong mga magtatagana sa paglahutay?

⁵ Sa 1 Timoteo 5:8, unsang matanga sa pagtagana ang diha sa hunahuna ni Pablo? Ang konteksto nagsugyot nga siya direktang naghisgot sa materyal nga mga panginahanglan sa pamilya. Sa kalibotan karon, dunay daghang babag nga atubangon tingali sa ulo sa pamilya aron makatagana nianang paagiha. Ang kalisod sa ekonomiya komon sa tibuok kalibotan, maingon man ang pagkatangtang sa trabaho, pagkawalay-trabaho, ug kamahal sa palaliton. Unsay makatabang sa magtatagana sa paglahutay sa dihang mag-atubang sa maong mga suliran?

⁶ Angayng hinumdoman sa magtatagana nga siya nagatuman sa usa ka tinudlong buluhaton gikan kang Jehova. Ang inspiradong mga pulong ni Pablo nagpakita nga ang lalaki nga makaarang sa pagtuman niining sugoa apan wala mobuhat niini sama ra sa usa nga “naglimod sa pagtuo.” Maningkamot pag-ayo ang usa ka Kristohanon aron malikayan ang maong baroganan atubangan sa iyang Diyos. Apan, ikasubo nga daghang tawo karon sa kalibotan ang “walay kinaiyanhong pagbati.” (2 Timoteo 3:1, 3) Sa pagkatinuod, daghang amahan ang naglikay sa ilang responsibilidad, nga tungod niana walay nagsuportar sa ilang pamilya. Ang Kristohanong mga bana wala nianang matig-a, dili-seryoso nga panglantaw labot sa pagtagana sa panginahanglan sa ilang pamilya. Dili sama sa kadaghanan sa ilang mga kauban sa trabaho, ang Kristohanong mga magtatagana mag-isip bisan sa labing ubos nga mga trabaho ingong dungganon ug hinungdanon, usa ka paagi sa pagpahimuot kang Jehova nga Diyos, tungod kay kini makapaarang kanila sa pagtagana sa mga panginahanglan sa ilang mga minahal.

 7. Nganong haom nga pamalandongon sa mga ginikanan ang panig-ingnan ni Jesus?

⁷ Makaplagan usab sa mga ulo sa pamilya nga makatabang ang pagpamalandong sa hingpit nga panig-ingnan ni Jesus. Hinumdomi, ang Bibliya matagnaong naghisgot kang Jesus ingong atong “Amahang Walay Kataposan.” (Isaias 9:6, 7) Ingong “kataposang Adan,” si Jesus maoy mipuli sa “unang tawo nga si Adan” ingong amahan niadtong mga tawo nga nagpasundayag ug pagtuo. (1 Corinto 15:45) Dili sama kang Adan, kinsa nahimong hakog, nagtagana lamang sa kaugalingong panginahanglan nga amahan, si Jesus mao ang maayong amahan. Ang Bibliya miingon bahin kaniya: “Pinaagi niini atong nahibaloan ang gugma, tungod kay siya nagtugyan sa iyang kalag alang kanato.” (1 Juan 3:16) Oo, si Jesus kinabubut-ong mihalad sa iyang kinabuhi alang sa uban. Apan, sa adlaw-adlaw giuna usab niya ang mga panginahanglan sa uban kay sa iyaha diha sa ginagmayng mga paagi. Makabenepisyo kamong mga ginikanan kon sundogon ninyo kanang nagsakripisyo-sa-kaugalingon nga espiritu.

8, 9. (a) Unsay makat-onan sa mga ginikanan gikan sa mga langgam bahin sa dili-mahakogong pagtaganag pagkaon sa ilang mga kuyabog? (b) Sa unsang paagi ang daghang Kristohanong mga ginikanan nagpakita ug nagsakripisyo-sa-kaugalingon nga espiritu?

⁸ Ang mga ginikanan daghag makat-onan bahin sa dili-mahakogon nga gugma gikan sa gisulti ni Jesus ngadto sa masinupakong katawhan sa Diyos: “Pagkasubsob nga buot kong tigomon ang imong mga anak, sa paagi nga ang usa ka himungaan magatigom sa iyang mga piso ilalom sa iyang mga pako!” (Mateo 23:37) Dinhi tatawng gihubit ni Jesus ang usa ka himungaan nga nanalipod sa iyang mga piso ilalom sa iyang mga pako. Sa pagkatinuod, ang mga ginikanan dakog makat-onan gikan sa mapanalipdanong kinaiya sa inahang langgam, kinsa andam nga magpameligro sa iyang kaugalingon aron sa pagpanalipod sa iyang mga kuyabog batok sa kadaot. Apan, ang gibuhat sa ginikanang mga langgam sa adlaw-adlaw dalayegon usab. Sila magngadto-nganhi sa ilang salag sa ilang pagpangita ug pagkaon. Bisan pag gikapoy na sila, ilang ihulog ang pagkaon ngadto sa nagbuka nga mga tuka sa ilang mga kuyabog, kinsa molamoy niana ug subsob nga mangayo pag dugang. Daghan sa mga linalang ni Jehova ang “sa kinaiyanhon maalamon” sa paagi nga sila nag-atiman sa mga panginahanglan sa ilang mga anak.—Proverbio 30:24.

⁹ Sa susamang paagi, ang Kristohanong mga ginikanan sa tibuok kalibotan nagpakita ug dalayegon, nagsakripisyo-sa-kaugalingon nga espiritu. Mas palabihon ninyong mag-antos sa kadaot kay sa modangat ang kadaot sa inyong mga anak. Dugang pa, kamo kinabubut-ong naghimog adlaw-adlaw nga mga pagsakripisyo aron matagan-an ang panginahanglan sa inyong pamilya. Daghan kaninyo ang mobangon ug sayo aron mohimo sa hago o laay nga mga trabaho. Kamo naghago aron matagan-an ug sustansiyadong pagkaon ang inyong pamilya. Nanglimbasog kamo aron sa pagseguro nga ang inyong mga anak adunay hinlo nga besti, angayan nga puy-anan, ug igong edukasyon. Ug gibuhat ninyo kini adlaw-adlaw, sa tanang panahon. Segurado nga ang maong pagsakripisyo sa kaugalingon ug pagkamalahutayon makapahimuot kang Jehova! (Hebreohanon 13:16) Apan, sa samang higayon inyong nahinumdoman nga dunay mas daghang hinungdanon nga mga paagi sa pagtagana sa panginahanglan sa inyong pamilya.

Pagtagana sa Espirituwal nga Paagi

10, 11. Unsa ang labing hinungdanon sa tawhanong mga panginahanglan, ug unsay kinahanglang buhaton una sa Kristohanong mga ginikanan aron matagbaw kining maong panginahanglan sa ilang mga anak?

¹⁰ Ang pagtagana sa espirituwal nga paagi mas hinungdanon pa kay sa pagtagana sa materyal nga paagi. Si Jesus miingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.” (Mateo 4:4; 5:3) Unsay mahimo ninyong mga ginikanan sa pagtagana sa espirituwal nga paagi?

¹¹ Bahin niini, ang teksto nga subsob kaayong kutloon mao ang Deuteronomio 6:5-7. Palihog buksi ang inyong Bibliya ug basaha kanang mga bersikuloha. Matikdi nga una sa tanan ang mga ginikanan gisugo sa pag-ugmad sa ilang kaugalingong espirituwalidad, nga mag-ugmad ug gugma alang kang Jehova ug motuman sa iyang mga pulong. Oo, kinahanglang mahimo kang seryosong estudyante sa Pulong sa Diyos, nga magbasa kanunay sa Bibliya ug mamalandong niana aron maugmad nimo ang tinuod nga pagsabot ug gugma alang sa mga dalan, prinsipyo, ug mga balaod ni Jehova. Ingong resulta, ang imong kasingkasing mapuno sa makaiikag nga mga kamatuoran sa Bibliya nga magtukmod kanimo sa pagbati ug kalipay, pagtahod, ug gugma kang Jehova. Daghan kag maayong mga butang nga ikapaambit sa imong mga anak.—Lucas 6:45.

12. Sa unsang paagi masundog sa mga ginikanan ang panig-ingnan ni Jesus maylabot sa pagsilsil sa mga kamatuoran sa Bibliya diha sa ilang mga anak?

¹² Ang mga ginikanan nga lig-on sa espirituwal nasangkapan sa pagpadapat sa tambag nga makita diha sa Deuteronomio 6:7, nga “isilsil” ang mga pulong ni Jehova diha sa ilang mga anak sa tanang kahigayonan. Ang ‘pagsilsil’ nagpasabot ug pagtudlo ug pagpatisok pinaagi sa pagsubli. Nahibalo gayod si Jehova nga kitang tanan—ilabina ang mga bata—nagkinahanglan ug pagsubli aron makakat-on. Busa, gigamit ni Jesus ang pagsubli diha sa iyang ministeryo. Pananglitan, sa dihang nagtudlo sa iyang mga tinun-an nga sila angayng magmapainubsanon inay magmapahitas-on ug magmaindigon, nakakaplag siyag daghang paagi sa pagsubli sa mao gihapong prinsipyo. Siya nagtudlo pinaagi sa pagpangatarongan, pag-ilustrar, bisan sa pagpasundayag. (Mateo 18:1-4; 20:25-27; Juan 13:12-15) Apan, talagsaon nga si Jesus wala gayod magpakita ug pagkadili-mapailobon. Sa samang paagi, ang mga ginikanan kinahanglang mangitag mga paagi sa pagtudlo sa sukaranang mga kamatuoran ngadto sa ilang mga anak, nga mapailobong magsubli sa mga prinsipyo ni Jehova hangtod nga ang mga bata makasabot ug magpadapat niana.

13, 14. Unsa ang pipila ka kahigayonan diin ikasilsil sa mga ginikanan ang mga kamatuoran sa Bibliya diha sa ilang mga anak, ginamit ang unsang mga tabang?

¹³ Ang mga yugto sa pagtuon sa pamilya maoy maayong mga higayon sa pagtudlo sa mga anak. Sa pagkatinuod, ang regular, makapalig-on, malipayon nga pamilyahanong pagtuon sa Bibliya maoy hinungdanong pundasyon sa espirituwalidad sa pamilya. Ang Kristohanong mga pamilya sa tibuok kalibotan nalipay sa maong mga pagtuon, nga naggamit sa literatura nga gitagana pinaagi sa organisasyon ni Jehova ug nagpahaom sa artikulo sumala sa mga panginahanglan sa mga anak. Ang librong Pagkakat-on Gikan sa Dakong Magtutudlo maoy talagsaong gasa niining bahina, mao man usab ang librong Mga Pangutanang Gisukna sa mga Batan-on—Mga Tubag nga Mosaler.b Apan, ang pagtuon sa pamilya dili lamang mao ang panahon sa pagtudlo sa mga anak.

¹⁴ Ingon sa gipakita sa Deuteronomio 6:7, adunay daghang kahigayonan diin kamong mga ginikanan makahisgot ug espirituwal nga mga butang uban sa inyong mga anak. Kamo man magkauban sa pagbiyahe, sa pagbuhatbuhat diha sa panimalay, o sa paglingawlingaw, makakaplag kamo ug mga kahigayonan sa pagtagana sa espirituwal nga mga panginahanglan sa inyong mga anak. Siyempre, dili kinahanglang magsige kamog “diskurso” ngadto sa inyong mga anak bahin sa mga kamatuoran sa Bibliya. Hinunoa, paningkamoti nga himoon ang kabildohay sa pamilya nga makapalig-on ug langkit-sa-espirituwal nga mga butang. Pananglitan, ang magasing Pagmata! adunay mga artikulo bahin sa nagkadaiyang mga ulohan. Ang maong mga artikulo puwedeng himoong basehanan sa mga kabildohay mahitungod sa mga mananap nga gilalang ni Jehova, lainlaing mga dapit sa kalibotan nga adunay kinaiyanhong katahom, ug sa kahibulongang kadaiyahan sa mga kultura ug paagi sa pagkinabuhi sa mga tawo. Ang maong mga kabildohay hayan magtukmod sa mga bata sa pagbasa pa ug dugang sa literatura nga gitagana sa matinumanon ug maalamong ulipon nga matang.—Mateo 24:45-47.

15. Sa unsang paagi matabangan sa mga ginikanan ang ilang mga anak sa paglantaw sa Kristohanong ministeryo ingong makaiikag ug magantihon nga buluhaton?

¹⁵ Ang makapalig-on nga kabildohay uban sa inyong mga anak motabang kaninyo sa pagtagbaw sa laing espirituwal nga panginahanglan. Ang Kristohanong kabataan kinahanglang makakat-on sa pagpaambit sa ilang pagtuo ngadto sa uban sa epektibong paagi. Samtang naghisgot bahin sa usa ka makaiikag nga punto diha sa Bantayanang Torre o Pagmata! mahimong mangita kamo ug mga kahigayonan sa paglangkit sa maong artikulo ngadto sa ministeryo. Pananglitan, mahimo kamong mangutana: “Dili ba nindot kaayo kon mas daghang tawo ang mahibalo niining butanga bahin kang Jehova? Sa imong hunahuna, sa unsang paagi kaha nato mapukaw ang interes sa usa ka tawo niining ulohana?” Ang maong mga panaghisgot makatabang sa mga bata sa pag-ugmad ug mas dakong kaikag sa pagpaambit ngadto sa uban sa ilang nakat-onan. Unya, sa dihang ang inyong mga anak mokuyog kaninyo sa ministeryo, makita nila ang buhing panig-ingnan sa pagpadapat sa maong mga kabildohay. Mahimong masayran usab nila nga ang ministeryo maoy makaiikag ug makalilipay nga buluhaton, nga makahatag ug dakong katagbawan ug kalipay.—Buhat 20:35.

16. Unsay makat-onan sa mga anak sa dihang mamati sila sa mga pag-ampo sa ilang mga ginikanan?

¹⁶ Ang mga ginikanan nagtagana usab sa espirituwal nga mga panginahanglan sa ilang mga anak sa dihang mag-ampo. Gitudloan ni Jesus ang iyang mga tinun-an kon unsaon pag-ampo, ug siya nag-ampo uban kanila sa daghang higayon. (Lucas 11:1-13) Hunahunaa lang kon unsa ka daghan ang ilang nakat-onan pinaagi sa pagduyog sa pag-ampo uban sa Anak mismo ni Jehova! Sa susama, ang inyong mga anak daghag makat-onan gikan sa inyong mga pag-ampo. Pananglitan, makat-onan tingali nila nga buot ni Jehova nga kita dili magpanuko sa pagpakigsulti kaniya nga kinasingkasing, nga isulti kaniya ang bisan unsang problema nga atong gihambin. Oo, ang inyong mga pag-ampo makatabang sa inyong mga anak sa pagkakat-on ug hinungdanong espirituwal nga kamatuoran: Posible nga masuod sila sa ilang langitnong Amahan.—1 Pedro 5:7.

Pagtagana sa Emosyonal nga Panginahanglan

17, 18. (a) Sa unsang paagi gipadayag sa Bibliya ang kahinungdanon sa pagpakitag gugma ngadto sa mga anak? (b) Sa unsang paagi sundogon sa mga amahan si Jehova sa pagpakitag gugma sa ilang mga anak?

¹⁷ Siyempre, ang mga bata aduna usay hinungdanong emosyonal nga mga panginahanglan. Ang Pulong sa Diyos nagsulti sa mga ginikanan kon unsa ka hinungdanon ang pagtagana niining maong panginahanglan. Pananglitan, ang batan-ong mga babaye gitambagan sa “paghigugma sa ilang mga anak.” Ang pagbuhat nila niana nalangkit sa pagpasig-uli sa batan-ong mga babaye sa ilang kaamgohan. (Tito 2:4) Sa pagkatinuod, maalamon nga ipakita ang gugma ngadto sa usa ka bata. Kini magtudlo sa bata sa paghigugma ug maghatag kaniya ug tibuok-kinabuhi nga mga kaayohan. Sa laing bahin, dili maalamon ang dili pagpakitag gugma ngadto sa usa ka bata. Kini makapahinabog dakong kasakit ug magpadayag nga napakyas kita sa pagsundog kang Jehova, kinsa nagpakita kanato ug dakong gugma bisan pa sa atong mga kasaypanan.—Salmo 103:8-14.

¹⁸ Si Jehova gani ang unang nagpakita ug gugma sa iyang yutan-ong mga anak. Sumala sa giingon sa 1 Juan 4:19, “siya unang nahigugma kanato.” Ilabina kamong mga amahan, angay ninyong sundogon ang panig-ingnan ni Jehova, nga unang magpakita ug gugma sa inyong mga anak. Ang Bibliya nag-awhag sa mga amahan nga likayan ang pagpalagot sa ilang mga anak, “aron sila dili masubo.” (Colosas 3:21) Makapalagot gayod sa mga bata kon bation nila nga ang ilang ginikanan wala mahigugma o magpabili kanila. Ang mga amahan nga magpanuko sa pagpadayag sa ilang pagbati angayng mahinumdom sa panig-ingnan ni Jehova. Misulti pa gani si Jehova gikan langit aron ipahayag ang iyang pag-uyon ug gugma sa iyang Anak. (Mateo 3:17; 17:5) Nakapadasig gayod kadto kang Jesus! Sa susama, ang mga anak mapalig-on ug madasig pag-ayo sa matinud-anong mga pahayag sa gugma ug pag-uyon gikan sa ilang mga ginikanan.

19. Nganong hinungdanon ang disiplina, ug unsang pagkatimbang ang paningkamotang makab-ot sa Kristohanong mga ginikanan?

¹⁹ Siyempre, ang gugma sa mga ginikanan dili lamang ipadayag pinaagi sa mga pulong. Sa panguna ang gugma ipadayag pinaagi sa lihok. Ang pagtagana sa materyal ug espirituwal nga paagi mahimong usa ka paagi sa pagpadayag sa gugma sa ginikanan, ilabina kon buhaton nila kana sa paagi nga magpakita nga ang gugma mao ang pangunang nagtukmod kanila. Dugang pa, ang disiplina maoy hinungdanong paagi sa pagpadayag sa gugma sa ginikanan. Sa pagkatinuod, “ang gihigugma ni Jehova iyang ginadisiplina.” (Hebreohanon 12:6) Sa laing bahin, ang dili pagdisiplina magpakita nga gidumtan sa mga ginikanan ang ilang mga anak! (Proverbio 13:24) Kanunayng gihuptan ni Jehova ang pagkatimbang, nga nagdisiplina “sa hustong paagi.” (Jeremias 46:28) Ang maong pagkatimbang dili gayod sayon para sa dili-hingpit nga mga ginikanan. Apan, takos nga paningkamotan ninyo nga mahimong timbang. Ang lig-on, mahigugmaon nga pagdisiplina makatabang sa bata nga mahimong malipayon ug mabungahon inigkahamtong na. (Proverbio 22:6) Dili ba mao man kanay gusto sa matag Kristohanong ginikanan alang sa iyang anak?

20. Sa unsang paagi ang mga ginikanan makahatag sa ilang mga anak sa labing maayong kahigayonan sa ‘pagpili sa kinabuhi’?

²⁰ Sa dihang kamong mga ginikanan mohimo sa hinungdanong buluhaton nga gipabuhat ni Jehova kaninyo—pagtagana sa materyal, espirituwal, ug emosyonal nga mga panginahanglan sa inyong mga anak—dako ang balos nga inyong madawat. Busa hatagi ang inyong mga anak sa labing maayong kahigayonan sa ‘pagpili sa kinabuhi’ aron “magpadayong buhi.” (Deuteronomio 30:19) Kadtong mga anak nga mopili sa pag-alagad kang Jehova ug padayong mosubay sa dalan sa kinabuhi samtang sila magkahamtong makahatag ug dakong kalipay sa mga ginikanan. (Salmo 127:3-5) Ang maong kalipay magpabilin hangtod sa hangtod! Apan, sa unsang paagi ang mga batan-on makadayeg kang Jehova karon? Ang sunod nga artikulo maghisgot nianang ulohana.

[Mga footnote]

Unsaon Nimo Pagtubag?

Unsay mahimo sa mga ginikanan aron matagan-an ang ilang mga anak

• sa materyal nga paagi?

• sa espirituwal nga paagi?

• sa emosyonal nga paagi?

[Hulagway sa panid 18]

Daghang langgam ang naghago pag-ayo aron mapakaon ang ilang mga kuyabog

[Hulagway sa panid 20]

Kinahanglang ugmaron una sa mga ginikanan ang ilang kaugalingong espirituwalidad

[Hulagway sa panid 20, 21]

Ang mga ginikanan makakaplag ug daghang kahigayonan sa pagtudlo sa ilang mga anak bahin sa Maglalalang

[Hulagway sa panid 22]

Ang mga anak mapalig-on ug madasig kon ipakita sa mga ginikanan ang ilang pag-uyon