IBLEAM

[lagmit gikan sa lintunganayng pulong nga nagkahulogang “gilamoy”].

Usa ka siyudad sa teritoryo sa Isacar apan gipahat uban sa mga lungsod nga sakop niini ngadto sa tribo ni Manases. Apan, ang mga Manasesnon napakyas sa pagpapahawa sa mga Canaanhon gikan sa Ibleam. (Jos 17:11-13; Huk 1:27) Ang Ibleam mopatim-awng mao ra ang Bileam sa Manases nga gihatag ngadto sa Kohatnong mga Levihanon. (1Cr 6:70) Apan diha sa samang asoy nga naghisgot sa Levihanong mga siyudad sa teritoryo sa katunga sa tribo ni Manases (Jos 21:25) kini mabasa nga “Gat-rimon” inay nga “Bileam” o “Ibleam.” Sagad nga kini maoy tungod sa sayop sa magkokopya, nga ang “Gat-rimon,” ang ngalan sa usa ka siyudad sa Dan, lagmit nasubli nga wala tuyoa diha sa bersikulo 24.

Ang Ibleam gituohan nga mao ang Khirbet Belʽameh, mga 18 km (11 mi) sa HHS sa Megido.

Duol sa Ibleam, si Haring Ahazias sa Juda gipatay tungod sa sugo ni Jehu. (2Ha 9:27) Sa ulahi, ang dinastiya ni Jehu natapos sa dihang gipatay si Zacarias didto sa Ibleam (sumala sa Lagardian nga edisyon sa LXX).​—2Ha 15:10-12, JB, NW, RS.