Ang Pagkamasinugtanon ba sa Kanunay Angay?
“NADUNGOG mo ba ako?” gisinggitan sa inahan ang batang si Johnnie sa iyang paggula sa pultahan. Dili, siya wala magsusi sa pandungog ni Johnnie. Gipaneguro niya nga siya mosugot kaniya ug mopauli sa balay sa tukmang panahon.
Sa pagkamatuod, ang pagdungog ug pagsugot nalambiggit. Busa, dili katingalahang sa orihinal nga mga pinulongan sa Bibliya, ang mga pulong nagkahulogang pagkamasinugtanon may kaamgid sa pagdungog. Apan kang kinsa man kita mamati? Angay bang kita mosugot sa tanan nga mangayo niana? Ug ang pagkamasinugtanon ba sa kanunay angay?
Sa Dihang Angay ang Pagkamasinugtanon
Ang pagkamasinugtanon ngadto sa atong Maglalalang, si Jehova nga Diyos, sa kanunay angay. Ingong atong Magbubuhat ug ang Tinubdan sa kinabuhi, siya ang unang makaangkon sa pagkamasinugtanon sa iyang mga linalang. (Salmo 95:6, 7) Ingong Supremong Soberano, si Jehova nagadelegar usab sa iyang awtoridad o pagbulot-an ngadto sa uban nga makakab-ot sa iyang mga sukdanan, ug kini nagahimo sa atong pagkamasinugtanon kanila nga nahiangay. Nahauna kanila mao si Jesu-Kristo. Sukad 1914 siya nahimong tinudlo-sa-Diyos nga Hari sa langitnong Gingharian “aron ang mga katawhan, nasodnong mga pundok ug mga pinulongan ngatanan magaalagad kaniya.” (Daniel 7:13, 14) Dugang pa, ingong Ulo sa Kristohanong kongregasyon, si Jesus naghatag ug awtoridad sa uban diha niana, nga nagahimong nahiangay ang atong pagkamasinugtanon ngadto sa maong mga ubos nga magbalantay.—Hebreohanon 13:17.
Si Jehova nagbutang usab ug mga latid bahin sa pagkamasinugtanon sulod sa pamilya. Ang mga anak gitambagan nga “magmasinugtanon sa ilang mga ginikanan nga nahiusa sa Ginoo.” (Efeso 5:21–6:3) Ang mga Kristohanon gipahinumdoman gani nga “magpasakop ug magmasinugtanon kamo sa mga kagamhanan ug sa mga pagbulot-an ingong mga pamunoan.” (Tito 3:1) Hinuon, niining tanan kinahanglan bang absoluto ang pagkamasinugtanon? Kini ba sa kanunay angay?
Sa Dihang Dili Angay ang Pagkamasinugtanon
Hinuon, ang pagpamati niadtong wala tugyanig awtoridad gikan kang Jehova mahimong mosangpot sa katalagman. Ang unang tawo, si Adan, “namati” sa tingog ni Eva ug miduyog kaniya sa pagkaon gikan sa kahoy sa kahibalo sa maayo ug daotan. (Genesis 3:17) Unsa ang sangpotanan? “Tungod sa pagkamasupilon sa usa ka tawo daghan ang nahimong mga makasasala.” (Roma 5:19) Pagkamalaglagon ang resulta gumikan sa pagpamati sa sayop nga tawo.
Bisan pa niana, sa kanunay husto ba ang pagpamati niadtong gisaligan sa mga posisyong may awtoridad? Dili kon sulayan nila ang paggamit sa ilang awtoridad sa dili-diyosnong paagi. Pananglitan, nahiuyon sa prinsipyo sa pagsugot “sa mga agalon sa unodnong diwa,” kita magmasinugtanon sa atong mga amo. Apan unsa na man kon sila mosugo kanato sa pagbuhat sa butang nga nahisupak sa mga kasugoan sa Diyos nga labing gamhanan? Ang giingon ni Pablo sunod nagpaila sa tukmang buhaton: “Dili pinaagi sa pag-alagad sumala sa panan-aw ingong mga tigpahimuot sa mga tawo, kondili ingong mga ulipon ni Kristo, nga magabuhat sa kabubut-on sa Diyos sa bug-os kalag.” (Efeso 6:5, 6) Sa laing okasyon, si Pedro ug ang ubang apostol miingon: “Kinahanglang among sugton ang Diyos ingong magmamando inay ang mga tawo.”—Buhat 5:29.
Ang samang prinsipyo mapadapat sulod sa pamilya. Kay wala magpabili sa balaang mga kinahanglanon, ang usa ka bana tingali dili gustong ang iyang asawa motambong nga regular sa Kristohanong mga miting. Pananglit kon siya mopugos kaniya, nga mogamit pa sa kapintasan, sumala sa mahitabo usahay, aron sa pagpugong kaniya sa pag-adto sa Kristohanong mga miting. Unsay pagabuhaton niya? Kon mopahiuyon siya, basin mameligro ang iyang espirituwalidad, ug ang iya sa iyang pamilya, ug mawad-an sa kinabuhing walay kataposan. Dili ba mas maayo ang pagsugot kang Jehova, kay nakaamgo nga walay tawo, bisan pa ang iyang bana, ang gihatagag pagbulot-an sa paglapas sa sugo nga ‘dili isalikway ang panagkatigom sa atong kaugalingon’?—Hebreohanon 10:25.
Ang bana ni Miyoko mitutol nga ang iyang kinitaan “giusikan” sa pagtambong sa mga miting nga wala niya kauyoni. Sa kadugayan, gihunong niya ang paghatag ug kuwarta alang sa panimalay, ug si Miyoko kinahanglang mobaktas ug usa ka oras ngadto sa Kingdom Hall.
Misurender ba siya? Wala. Miduol siya kang Jehova sa pag-ampo ug gianalisar ang iyang kahimtang. Kay nakaamgo sa hinungdan sa pagsupak sa iyang bana, gihukom ni Miyoko ang pagbatog trabaho nga mao ang paghatod sa mga peryodiko. Misugot ang iyang bana, basta iyang ihatag kaniya ang katunga sa iyang suweldo.
Sa makausa pa, miampo siya nga kon maoy kabubut-on ni Jehova, duol ra unta ang iyang ruta. Kasagaran, mokabat sa usa ka tuig o labaw pa aron maangkon ang gusto sa usa. Apan, katingalahan, sulod sa unom ka semana gitanyagan si Miyoko sa ruta nga duol gayod sa iyang balay. Kay nadasig sa hunahuna nga gidungog ni Jehova ang iyang mga pag-ampo, siya nagtrabaho gikan sa 4:30 hangtod 6:00 kada buntag. Sa pagkakita niadto, ang tinamdan sa iyang bana inanay nga nausab, ug siya nahimong matinabangon. Maingon nga si Miyoko, kinsa regular nga nag-alagad nga auxiliary payunir, nagpalandong ug nag-analisar sa iyang kaugalingong situwasyon, nag-ampo bahin niana ug dayon milihok nga positibo, imong hidiskobrehang kini mosangpot sa panalangin ni Jehova.
Hinuon, tingali may linaing mga hinungdan nga tungod niana ang usa ka banang dili magtutuo mohangyo tingali sa iyang asawa nga mopalta sa Kristohanong miting. Basin buhaton niya kana nga walay tuyo sa pagdaot sa iyang pagsimba ug pag-alagad kang Jehova nga Diyos. Ang pagsabot sa mga prinsipyo nga nalangkit motabang sa Kristohanong babaye sa paghukom sa husto sumala sa iyang linaing sirkumstansiya.
Sa dugang paghisgot sa ulohan, unsa man kon mandoan siya sa iyang bana nga dili dad-on ang ilang mga anak ngadto sa Kristohanong mga miting? Siyempre, siya nasayod nga bisan pag dili modawat sa pagkaulo ni Kristo, siya gihapon mao ang ulo sa pamilya. (1 Corinto 11:3) Ug bisan pa niana, anaa usab sa iyang kasingkasing ang espirituwal nga kaayohan sa mga anak, ingon man ang kaugalingon niyang tinguha sa pagsugot kang Jehova. Tinong usa ka pagsulay sa iyang pagtuo ang pagtuman sa iyang mga obligasyon niining tanang bahin. Ang pag-ampo kang Jehova alang sa kaalam ug pagkamasinaboton tinong makatabang. (Santiago 1:5; Filipos 4:6, 7) Ang mataktikanhong pagpangatarongan uban sa iyang bana ug pagsulting maayohon, pagpakitag mahilomon ug malumong espiritu, makatabang usab sa pagsulbad sa suliran.—Colosas 4:6; 1 Pedro 3:1-5.
Ang usa ka Kristohanong babaye sa Yamato, Hapon, miatubang sa ingon nga situwasyon sa diha nga gidid-an siya sa iyang bana sa pagdala sa ilang tulo ka anak ngadto sa mga miting. Unsay iyang mahimo? Makugihon niyang gitudloan ang iyang mga anak sa balay, ug sa dihang sila edaran na sa paghimo sa ilang kaugalingong mga desisyon, ang matag usa mibarog dapig kang Jehova ug misugod sa pagtambong sa mga miting. Kay nasuko, ang bana nagpadlas kanilang tanan gikan sa iyang balay.
Nakakitag trabaho ang asawa ug mipuyong temporaryo sa apartment sa usa ka sister. Apan wala niya pasagdi nga kana kutob ra niana. Siya mibalik sa balay sa iyang bana ug miluto sa iyang pagkaon. Sa kataposan, tapos sa usa ka bulan o kapin pa, sila gidawat pagbalik sa bana ug wala na mosupak kanila. Talagsaong balos tungod sa iyang matinumanong dalan!
“Sulayi ang Dinasig nga mga Pahayag”
Komosta ba ang awtoridad diha sa Kristohanong kongregasyon? Sanglit kadtong anaa sa responsableng mga posisyon gitudlo pinaagi sa paglihok sa balaang espiritu ug gibase nila ang ilang tambag ug pahimangno sa Pulong sa Diyos, kita makatinong ang pagkamasinugtanon sa tinudlong awtoridad diha sa Kristohanong kongregasyon nahiangay. (Buhat 20:28; Hebreohanon 13:17) Apan kini wala magkahulogan nga atong sugton ang maong awtoridad nga dili hatagag nahaigong pagtagad ang ginasulti. Ngano?
Si apostol Juan mihatag niining tambaga: “Ayaw ninyo pagtuohi ang tanang dinasig nga pahayag, kondili sulayi ang dinasig nga mga pahayag sa pagsusi kon sila nagagikan sa Diyos.” (1 Juan 4:1) Kini wala magkahulogang kita angay magmatahapon sa tanang butang ginasulti kanato sa uban. Hinunoa, ibutang nato sa hunahuna ang mga pulong ni Pablo sa Galacia 1:8: “Bisan pag kami o ang usa ka manulonda gikan sa langit magapahayag kaninyo ingon nga maayong balita sa butang labaw kay sa among gipahayag kaninyo ingon nga maayong balita, ipatunglo siya.”
Ang impormasyon ba sa atong atubangan lahi kay sa gitudlo kanato pinaagi sa “matinumanon ug maalamong ulipon”? Ang tawo bang nagasabwag nianang mensahea nagapahayag sa pagpasidungog sa ngalan ni Jehova, o siya ba nagasulay sa pagbayaw sa iyang kaugalingon? Ang impormasyon ba nahiuyon sa katibuk-ang mga pagtulon-an sa Bibliya? Kini mao ang mga pangutana nga motabang kanato sa ‘pagsulay’ sa bisan unsa nga daw kuwestiyonable. Kita gitambagan nga “tinoa ang tanang butang; pangupti sa hugot ang maayo.”—Mateo 24:45; 1 Tesalonica 5:21.
Ang usa ka makaiikag nga pananglitan mao si Maghuhukom Gideon. Sa pagtino nga si Jehova nagauban kaniya, gisugyot ni Gideon ang usa ka pagsulay: “Ania akong ibutang ang balhibo sa karnero sa giukan,” siya miingon kang Jehova. “Kon ang yamog maanaa sa balhibo lamang apan sa tibuok yuta may pagkamala, nan ako mahibalo nga imong pagaluwason ang Israel pinaagi kanako.” Sa gipahinabo ni Jehova sumala sa gihangyo, buot ni Gideon ang dugang pasalig: “Palihog, mahitabo nga mamala ang balhibo lamang, ug sa tibuok yuta may yamog.”—Maghuhukom 6:37-39.
Si Gideon ba sobra ka mainampingon o matahapon? Lagmit dili, kay gidawat ni Jehova ang iyang hangyo sa duha ka panahon ug gibuhat ang sumala sa iyang gihangyo. Buot matino ni Gideon ang pagkamatarong sa iyang posisyon. Kay wala makabaton sa sinulat nga Pulong sa Diyos sama kanato, kadto labing epektibong paagi nga si Gideon “makatino.” Bisan pa niana, sa nadawat niya ang pasalig, estrikto niyang gisunod ang mga mando gikan ni Jehova bisan pag ang pagpaaway sa 300 ka tawo batok sa kasundalohan sa kaaway nga 135,000 daw mahikogon gikan sa tawhanong punto de vista. (Maghuhukom 7:7; 8:10) Ginapakita ba nato ang samang tinamdan pinaagi sa pagsusi sa Pulong sa Diyos kon unsa gayod ang kabubut-on ni Jehova ug unya pagsugot niana?
Ang Labing Maalamong Pagpili
Si Jehova wala magdahom nga kita magpadayag sa binuta nga daling pagtuo. Dili niya buot gikan kanato ang matang sa pagkamasinugtanon nga mabatonan sa usa ka magbabansay gikan sa usa ka mananap nga may busal o latigo. Kana ang hinungdan iyang giingnan si David: “Ayaw kamo pagpanig-ingon sa usa ka kabayo o mula nga walay salabotan, kansang pagkabisog pagapugngan sa bocado o rinda.” (Salmo 32:9) Hinunoa, gihatag kanato ni Jehova ang katakos sa panghunahuna ug pagkamasinaboton aron nga, pinasukad sa salabotan, kita makapili sa pagsugot kaniya.
Sa Hapones, ang pulong kiku (pagpamati) nagaapil sa kahulogan dili lamang sa pagpatalinghog ug pagsugot kondili sa paghukom usab kon kaha maayo o daotan ang usa ka butang. Sa dihang may mosulti kanato, maayo nga mamati sa maong kahulogan aron nga sa dihang magmasinugtanon, kita mosugot dili lamang tungod sa yanong daling pagtuo kondili kay gipili. Sa dihang ang atong langitnong Amahan, si Jehova nga Diyos, mosulti, kon kaha pinaagi sa iyang Pulong, ang Bibliya, o pinaagi sa iyang yutan-ong organisasyon, labi pang hinungdanon nga kita mamati ug magmasinugtanon, sa ingon magpamatuod nga kita masinugtanong mga magsisimba nga dili magpabaya sa mahigugmaong pahinumdom: “Nadungog mo ba ako?”
[Hulagway sa panid 29]
Kinsa ba ang angay kong pamation?
[Hulagway sa panid 31]
Si Gideon nangita sa kabubut-on ni Jehova ug nagsugot kaniya