Sa Unsang Paagi Imong Giatubang ang mga Panagbingkil?

ADLAW-ADLAW makiglabot kita sa lainlaing mga personalidad. Kini kasagarang mohatag kanatog kalipay ug bag-ong mga panglantaw. Usahay, mopatungha usab kinig mga panagbingkil, ang pipila niini seryoso samtang ang uban maoy ginagmay lamang nga mga kakulian diha sa atong inadlaw-adlawng kinabuhi. Kon unsa mang matanga kini, ang atong paagi sa pag-atubang sa atong mga panagbingkil makaapektar kanato sa mental, emosyonal, ug espirituwal nga paagi.

Ang pagpaningkamot sa pagsulbad sa atong mga panagbingkil kutob sa atong maarangan makaamot sa atong pagtagamtam ug mas himsog nga kinabuhi ug mas malinawong mga relasyon sa uban. Matod pa sa usa ka karaang panultihon: “Ang kalmado nga kasingkasing mao ang kinabuhi sa unod.”—Proverbio 14:30.

Ang lahi kaayong panultihon tinuod usab: “Sama sa usa ka siyudad nga nalumpag, nga walay kuta, mao ang tawo nga walay pagpugong sa iyang espiritu.” (Proverbio 25:28) Kinsa kanato ang gusto nga daling maimpluwensiyahan sa sayop nga mga hunahunang makapalihok kanato sa dili hustong mga paagi—mga paagi nga makadaot sa uban ug kanato? Mao gayod kanay ipahinabo sa dili makontrolar, masuk-anong mga reaksiyon. Diha sa Wali sa Bukid, si Jesus nag-awhag nga atong susihon ang atong tinamdan, nga mahimong mag-impluwensiya sa atong paagi sa pag-atubang sa bisan unsang panagbingkil nato sa uban. (Mateo 7:3-5) Imbes nga magmahinawayon kita sa uban, kita angayng maghunahuna kon sa unsang paagi nato maugmad ug mamentinar ang panaghigalaay uban niadtong may lainlaing mga panglantaw ug mga kagikan.

Atong Tinamdan

Ang unang lakang aron masulbad ang gihanduraw o tinuod nga panagbingkil mao ang pag-ila nga kita daling masayop sa hunahuna ug tinamdan. Ang Kasulatan nagpahinumdom kanato nga kitang tanan makasala “ug wala makaabot sa himaya sa Diyos.” (Roma 3:23) Dugang pa, ang salabotan mahimong magpadayag nga dili laing tawo ang hinungdan sa atong problema. May kalabotan niini, atong tagdon ang kasinatian ni Jonas.

Kay gisugo ni Jehova, si Jonas miadto sa siyudad sa Nineve aron sa pagsangyaw bahin sa nagsingabot nga paghukom sa Diyos sa mga molupyo niini. Ang makapalipayng resulta mao nga ang tibuok siyudad sa Nineve naghinulsol ug nagpasundayag ug pagtuo sa matuod nga Diyos. (Jonas 3:5-10) Gibati ni Jehova nga tungod sa ilang mahinulsolong tinamdan sila angayng pasayloon, busa wala niya sila laglaga. “Apan, alang kang Jonas kadto dili gayod makapahimuot, ug siya nanginit sa kasuko.” (Jonas 4:1) Makapatingala ang sanong ni Jonas sa kaluoy ni Jehova. Ngano mang masuko si Jonas kang Jehova? Dayag, si Jonas nalinga sa iyang kaugalingong mga pagbati, naghunahuna nga naulawan siya sa komunidad. Wala niya pabilhi ang kaluoy ni Jehova. Sa maluloton, gitugotan ni Jehova si Jonas nga makasinati ug praktikal nga leksiyon nga nakatabang kaniya sa pag-usab sa iyang tinamdan ug makakita sa hataas nga bili sa kaluoy sa Diyos. (Jonas 4:7-11) Tataw nga kinahanglang usbon ang tinamdan ni Jonas, dili ang iyaha ni Jehova.

Kinahanglan ba usab natong usbon usahay ang atong tinamdan bahin sa usa ka butang? Si apostol Pablo nagtambag kanato: “Manguna sa pagpakitag pasidungog sa usag usa.” (Roma 12:10) Unsay iyang ipasabot? Sa usa ka bahin, siya nagdasig kanato nga magmakataronganon ug trataron ang ubang mga Kristohanon uban ang lalom nga pagtahod ug dignidad. Naglakip kini sa pag-ila nga ang matag indibiduwal dunay pribilehiyo sa kagawasan sa pagpili. Gipahinumdoman usab kita ni Pablo: “Ang matag usa magapas-an sa iyang kaugalingong luwan.” (Galacia 6:5) Busa, sa dili pa mahimong hinungdan sa di-pagsinabtanay ang mga panagbingkil, pagkamaalamong hunahunaon kon ang ato ba mismong tinamdan ang kinahanglang bag-ohon! Kinahanglang maningkamot gayod kita sa pagpabanaag sa hunahuna ni Jehova ug sa pagpatunhay sa pakigdait uban niadtong tinuod nga nahigugma sa Diyos.—Isaias 55:8, 9.

Atong Paagi sa Pagsulbad

Handurawa ang duha ka bata nga nag-ilogay sa usa ka dulaan, nag-anam kakusog ang pagbira sa matag usa aron siyay makakuha. Tingali giduyogan pa sa masuk-anong mga pulong ang pag-ilogay hangtod nga sa kataposan buhian kini sa usa o dunay laing tawo nga mangilabot.

Ang asoy sa Genesis nagtug-an kanato nga nadungog ni Abraham nga dihay panaglalis tali sa iyang mga magbalantay sa kahayopan ug niadtong sa iyang pag-umangkong si Lot. Si Abraham mihimog unang lakang sa pagduol kang Lot ug miingon: “Palihog, ayaw tugoting magpadayon ang bisan unsang away tali kanako ug kanimo ug tali sa akong mga magbalantay sa kahayopan ug sa imong mga magbalantay sa kahayopan, kay kita managsoon.” Determinado si Abraham nga dili tugotan ang bisan unsang panag-away nga makadaot sa ilang relasyon. Unsa ang kapildihan? Andam siyang mosakripisyo sa iyang pribilehiyo sa pagpili ingong mas magulang; andam siyang mopahiuyon. Gitugotan ni Abraham si Lot sa pagpili kon diin niya gustong dad-on ang iyang panimalay ug kahayopan. Gipili ni Lot ang lunhawng dapit sa Sodoma ug Gomora. Nagbulag si Abraham ug Lot nga may pakigdait.—Genesis 13:5-12.

Aron mamentinar ang atong malinawong relasyon sa uban, kita ba andam nga molihok sumala sa espiritu nga gipakita ni Abraham? Kini nga hitabo sa Bibliya naghatag kanatog maayo kaayong panig-ingnan nga sundogon sa dihang mag-atubang ug panagbingkil. Si Abraham mihangyo: “Ayaw tugoting magpadayon ang bisan unsang away.” Ang tinuod nga tinguha ni Abraham mao nga makab-ot ang usa ka malinawong solusyon. Tino nga ang ingon nianang hangyo aron mahuptan ang malinawong relasyon makatabang sa paghiklin sa bisan unsang di-pagsinabtanay. Dayon nanghinapos si Abraham sa mga pulong “kay kita managsoon.” Ngano mang isakripisyo ang maong bililhong relasyon para lamang sa personal nga kagustohan o garbo? Gisentro ni Abraham ang iyang hunahuna sa kon unsa ang importante. Iya kining gihimo nga may pagtahod-sa-kaugalingon ug dungog, sa samang higayon naghatag ug dignidad sa iyang pag-umangkon.

Bisan tuod motungha ang mga kahimtang nga kinahanglang dunay laing tawong mangilabot aron mahusay ang panagbingkil, pagkamaayo kon ang kahimtang mahusay sa pribado! Si Jesus nagdasig kanato sa paghimo sa unang lakang sa pagpakigdait sa atong igsoon, nga mangayog pasaylo kon gikinahanglan.a (Mateo 5:23, 24) Kini nagkinahanglag pagkamapaubsanon, o mapaubsanong hunahuna, apan si Pedro misulat: “Baksi ninyong tanan ang inyong kaugalingon sa pagkamapaubsanon sa hunahuna ngadto sa usag usa, tungod kay ang Diyos nagasupak sa mga mapahitas-on, apan siya nagahatag ug dili-takos nga kalulot sa mga mapainubsanon.” (1 Pedro 5:5) Ang atong paagi sa pagtratar sa atong mga isigkamagsisimba dunay direktang epekto sa atong relasyon sa Diyos.—1 Juan 4:20.

Sa sulod sa Kristohanong kongregasyon, mahimong gikinahanglan nga dili nato iinsistir ang usa ka katungod aron mamentinar ang kalinaw. Ubay-ubay niadtong nakig-uban karon sa mga Saksi ni Jehova nahimong bahin sa panimalay sa matuod nga mga magsisimba sa Diyos sa milabayng lima ka tuig. Pagkadakong kalipay ang nahatag niini sa atong mga kasingkasing! Ang atong paagi sa paggawi seguradong makaapektar kanila ug sa uban diha sa kongregasyon. Usa kini ka maayong rason aron kita mag-amping ug maayo sa atong pagpili ug kalingawan, pasatiempo, kalihokan uban sa mga higala, o panarbaho, nga naghatag ug pagtagad sa kon unsay pag-ila sa uban kanato. May mga lihok o mga pulong ba kita nga masaypan pagsabot ug sa ingon mahimong hinungdan sa pagkapandol sa uban?

Si apostol Pablo nagpahinumdom kanato: “Ang tanang butang subay sa balaod; apan dili ang tanang butang may kaayohan. Ang tanang butang subay sa balaod; apan dili ang tanang butang mopalig-on. Padayong ipapangita sa matag usa, dili ang iyang kaugalingon nga kaayohan, apan nianang sa laing tawo.” (1 Corinto 10:23, 24) Ingong mga Kristohanon, kita tinuod nga nabalaka bahin sa pagpalig-on sa gugma ug paghiusa sa Kristohanong panag-igsoonay.—Salmo 133:1; Juan 13:34, 35.

Makaayo nga mga Pulong

Ang mga pulong dunay gamhanang epekto sa ikaayo. “Ang makapahimuot nga mga pulong maoy usa ka udlan, matam-is sa kalag ug makaayo sa kabukogan.” (Proverbio 16:24) Ang asoy bahin sa paglikay ni Gideon sa posibleng panag-away batok sa tribo ni Epraim nag-ilustrar sa pagkatinuod niining maong panultihon.

Si Gideon, nga nalambigit pag-ayo sa pakiggubat batok sa Midian, nangayog tabang sa tribo ni Epraim. Apan, pagkatapos sa gubat, gisukmatan sa tribo ni Epraim si Gideon ug masuk-anong nagreklamo tungod kay wala siya mangayog tabang kanila sa pagsugod pa lang unta sa panag-away. Ang rekord nag-ingon nga “sila mainitong nangitag away kaniya.” Si Gideon mitubag: “Unsa karon ang akong nabuhat kon itandi kaninyo? Dili ba ang pagpanghagdaw sa Epraim maayo pa kay sa pagpamupo ug ubas sa Abiezer? Nganha sa inyong kamot gitugyan sa Diyos ang mga prinsipe sa Midian nga si Oreb ug si Zeeb, ug unsa may akong nabuhat kon itandi kaninyo?” (Maghuhukom 8:1-3) Pinaagi sa iyang maayong-pagkapili, makapakalmang mga pulong, nalikayan ni Gideon ang mahimo untang usa ka malaglagong gubat tali sa mga tribo. Kadtong mga membro sa tribo ni Epraim may problema sa pagpakaimportante-sa-kaugalingon ug garbo. Apan, wala kana magpugong kang Gideon sa pagpangitag paagi aron matigayon ang malinawong resulta. Mahimo ba usab nato kana?

Moulbo tingali ang kasuko sa uban ug maoy hinungdan sa ilang kasilag kanato. Ilha ang ilang pagbati, ug paningkamoti nga masabtan ang ilang panglantaw. Dili kaha sa usa ka paagi nakaamot kita sa ilang pagbati? Kon mao, nganong dili dawaton ang atong bahin sa pagpatungha sa problema ug ipahayag ang atong kasubo tungod kay atong gipasamot ang problema. Ang pipila ka maayong-pagkahunahuna nga mga pulong mahimong makapasig-uli sa nadaot nga relasyon. (Santiago 3:4) Ang uban nga nabikil nagkinahanglan lang tingali sa atong malulotong pagpasalig. Ang Bibliya nag-ingon nga “kon walay kahoy nga isugnod ang kalayo mapalong.” (Proverbio 26:20) Oo, ang maayong pagkapiling mga pulong nga isulti diha sa hustong espiritu “makapahilayo sa kaaligutgot” ug makaayo.—Proverbio 15:1.

Si apostol Pablo nag-awhag: “Kon posible, kutob sa nagaagad kaninyo, magmadaiton sa tanang tawo.” (Roma 12:18) Tinuod nga dili kita makakontrolar sa pagbati sa uban, apan makahimo kita sa atong bahin sa pagpalambo sa kalinaw. Imbes kontrolahon sa atong dili-hingpit nga mga sanong o nianang sa uban, makalihok kita karon sa pagpadapat sa maayong mga prinsipyo sa Bibliya. Ang pag-atubang sa mga panagbingkil sa paagi nga gitudlo ni Jehova kanato moresulta sa atong walay kataposang kalinaw ug kalipay.—Isaias 48:17.

[Footnote]

[Hulagway sa panid 24]

Iinsistir ba nato nga ang atong gusto maoy matuman?

[Hulagway sa panid 25]

Si Abraham nagpakitag maayong panig-ingnan sa pagkamapahiuyonon aron masulbad ang panagbingkil