Taliabot na ang Hinabang Alang sa Gutom!
‘UNSANG matanga sa gutom?’ tingali mangutana ka. Gutom alang sa espirituwal nga pagkaon! Usa ka karaan nga Hebreohanong manalagna mitagna bahin niining maong gutom: “‘Tan-awa! Ang mga adlaw moabot,’ mao ang giingon sa Soberanong Ginoong Jehova, ‘ug ako magpadalag gutom sa yuta, usa ka gutom, dili sa tinapay, ug usa ka kauhaw, dili sa tubig, kondili sa pagpatalinghog sa mga pulong ni Jehova.’” (Amos 8:11) Aron makatabang sa pag-alibyo sa espirituwal nga gutom, ang 48 ka membro sa ika-112 nga klase sa Watchtower Bible School of Gilead, nga nahimutang sa Patterson, New York, mangadto sa 19 ka lainlaing mga kayutaan diha sa 5 ka kontinente ug mga isla sa dagat.
Mangadto sila nga nasangkapan, dili sa literal nga karne ug lugas, kondili sa kahibalo, kasinatian, ug pagbansay. Sulod sa lima ka bulan sila nakigbahin sa matukiong pagtuon sa Bibliya nga gidisenyo sa pagpalig-on sa ilang pagtuo alang sa misyonaryong pag-alagad sa langyawng mga teritoryo. Sa Marso 9, 2002, ang 5,554 nga nanambong alang sa programa sa graduwasyon malipayong naminaw.
Si Stephen Lett, kinsa nag-alagad ingong membro sa Nagamandong Lawas sa mga Saksi ni Jehova, madasigong nagbukas sa programa. Gihatagan niyag linaing pag-abiabi ang daghang bisita gikan sa lainlaing mga bahin sa kalibotan. Dayon ang mga pulong ni Jesus, “Kamo ang kahayag sa kalibotan” iyang gipadapat ngadto sa buluhaton sa umaabot nga mga misyonaryo. (Mateo 5:14) Siya mipatin-aw: ‘Sa inyong mga teritoryo inyong “hatagag kahayag” ang lainlaing mga bahin sa makapahingangha nga mga buhat ni Jehova, nga magatabang sa mga matinud-anog-kasingkasing nga makita ang katahom ni Jehova ug ang iyang mga katuyoan.’ Gidasig ni Brader Lett ang mga misyonaryo sa paggamit sa kahayag sa Pulong sa Diyos sa pagyagyag sa kangitngit sa bakak nga mga doktrina ug sa paggiya sa mga tawong nangita sa kamatuoran.
Hustong Tinamdan Hinungdanon sa Kalamposan
Human sa pangbukas nga pakigpulong sa tsirman, si Baltasar Perla, membro sa Komite sa Sanga sa Tinipong Bansa, mihatag sa unang pakigpulong sa serye sa mga pakigpulong nga gidisenyo sa pagtabang sa mga graduwado nga mahimong malamposong mga misyonaryo. Iyang gitagik ang temang “Magmaisogon ug Magmakusganon ug Lihok.” (1 Cronicas 28:20) Si Haring Solomon sa karaang Israel nakadawat ug malisod nga tahas nga wala pa gayod niya mahimo sukad—ang pagtukod ug templo sa Jerusalem. Milihok si Solomon, ug pinaagi sa pagpaluyo ni Jehova ang templo natapos. Nagpadapat sa maong pagtulon-an ngadto sa klase, si Brader Perla miingon: ‘Nakadawat kamo ug bag-ong asaynment, nga mao ang pagkahimong misyonaryo, ug kamo kinahanglang magmaisogon ug magmakusganon.’ Ang mga estudyante nahupay gayod sa pasalig nga dili sila talikdan o biyaan ni Jehova basta magpabilin silang suod kaniya. Natandog ni Brader Perla ang mga mamiminaw pinaagi sa paghinapos uban niining personal nga komento: ‘Dako ang inyong mahimong kaayohan ingong mga misyonaryo. Mga misyonaryo ang naghatod sa kamatuoran ngadto sa akong pamilya ug kanako!’
“Dangop Kang Jehova Alang sa Kalamposan” mao ang tema sa pakigpulong nga gihatag ni Samuel Herd, laing membro sa Nagamandong Lawas. Ang mga estudyante nagsugod ug usa ka karera diha sa misyonaryong buluhaton, ug ang ilang kalamposan nag-agad pag-ayo sa ilang relasyon kang Jehova. Si Brader Herd nagtambag kanila: ‘Nakatigom kamo ug daghang kahibalo sa Bibliya pinaagi sa inyong pagtungha sa Gilead. Kamo malipayong nagdawat. Apan karon, alang sa tinuod nga kalamposan, kamo kinahanglang magsugod sa pagpanghatag sa inyong nakat-onan.’ (Buhat 20:35) Daghan ang kahigayonan nga mahimo kini sa mga misyonaryo samtang ilang ‘ibubo ang ilang kaugalingon’ alang sa uban.—Filipos 2:17.
Unsang panamilit nga tambag ang gihatag sa mga instruktor alang sa mga estudyante? Gipasukad ni Mark Noumair ang iyang tema diha sa Ruth 3:18, “Paghulat Una Hangtod nga Imong Masayran ang Sangpotanan Niini.” Naggamit sa panig-ingnan ni Naomi ug Ruth, gidasig sa mamumulong ang mga graduwado sa pagpakitag bug-os nga pagsalig sa mga kahikayan nga gipahiluna sa yutan-ong organisasyon sa Diyos ug sa pagtahod sa teokratikanhong awtoridad. Nagtandog sa kasingkasing sa mga estudyante, si Brader Noumair miingon: ‘Tingali duna unyay mga higayon sa dihang dili ninyo masabtan kon nganong gihimo ang usa ka desisyon nga nag-apektar kaninyo o sa dihang kamo tingali dunay hugot nga pagbati nga ang usa ka butang kinahanglang himoon sa laing paagi. Unsay inyong buhaton? Kamo ba mangunay sa paglihok o kamo ba ‘mohulat una’ nga nagsalig sa pagtultol sa Diyos, masaligon nga sa ngadtongadto, iyang ipahinabo ang maayong resulta?’ (Roma 8:28) Ang tambag nga ‘isentro ang pagtagad diha sa pagpauswag sa intereses sa Gingharian, nga ginapunting ang pagtagad sa kon unsay ginahimo sa organisasyon ni Jehova inay kay sa mga personalidad sa tawo,’ tino nga mapuslanon alang sa umaabot nga mga misyonaryo diha sa ilang langyawng mga teritoryo.
Si Wallace Liverance, kinsa usa ka misyonaryo kanhi ug karon nag-alagad ingong instruktor sa Gilead, mihatag sa kataposang pakigpulong sa unang serye sa mga pakigpulong. Ang tema sa iyang pakigpulong maoy “Padayong Isentro ang Pagtagad, Padayon sa Pag-alagad sa Diyos.” Iyang gipakita nga nasabtan ni manalagnang Daniel nga haduol na ang pagpahigawas sa mga Israelinhon gikan sa pagkaulipon tungod kay iyang nakita nga napukan ang Babilonya ug tungod sa tagna ni Jeremias. (Jeremias 25:11; Daniel 9:2) Nagbantay si Daniel sa orasan ni Jehova, ug nakatabang kana kaniya nga padayong isentro ang pagtagad diha sa katumanan sa katuyoan sa Diyos. Sa kasukwahi, ang mga Israelinhon sa adlaw ni manalagnang Haggeo miingon: “Ang panahon wala pa moabot.” (Haggeo 1:2) Wala nila isentro ang ilang pagtagad diha sa panahon diin sila nagkinabuhi, hinunoa ilang gisentro ang ilang pagtagad sa ilang kaugalingong kaharuhay ug sa pagtagbaw sa kaugalingon, ug gibiyaan ang buluhaton nga tungod niana sila gipagawas sa Babilonya, nga mao ang pagtukod pag-usab sa templo. Si Brader Liverance mihinapos: “Busa padayong isentro ang inyong pagtagad pinaagi sa paghupot sa katuyoan ni Jehova diha sa inyong kaisipan sa tanang panahon.”
Ang instruktor sa Gilead nga si Lawrence Bowen mao ang mamumulong sa bahin nga may temang “Panalanginan ni Jehova Kadtong Naggamit sa Buhing Pulong.” (Hebreohanon 4:12) Kini nga bahin naghisgot mahitungod sa mga kasinatian sa klase diha sa kanataran, nga nagpasiugda kon sa unsang paagi panalanginan ni Jehova kadtong naggamit sa Bibliya sa pagsangyaw ug pagpanudlo. Ang mamumulong miingon nga si Jesu-Kristo nagpakita ug maayong panig-ingnan alang sa tanang ministro sa Diyos: ‘Si Jesus matinud-anong nag-ingon nga ang iyang gitudlo dili gikan sa iyang kaugalingong pagbulot-an, kondili siya nagsulti sa Pulong sa Diyos.’ Ang mga matinud-anog-kasingkasing miila sa kamatuoran ug positibong misanong niini. (Juan 7:16, 17) Ingon usab niini ang nagakahitabo karon.
Ang Pagbansay sa Gilead Nagsangkap sa Usa Alang sa Matag Maayong Buhat
Sunod, ang dugay nang mga membro sa pamilyang Bethel nga si Richard Abrahamson ug Patrick LaFranca miinterbiyo sa unom ka graduwado sa Gilead nga nag-alagad na karon diha sa lainlaing matang sa espesyal nga bug-os-panahong pag-alagad. Ang mga graduwado sa ika-112 nga klase nadasig sa pagkadungog nga katuigan sa ulahi kadtong unom, walay sapayan sa ilang mga asaynment sa pagkakaron, padayong naggamit sa pagbansay nga ilang nadawat sa Gilead maylabot sa pagtuon sa Bibliya, pagpanukiduki, ug pakigsinabtanay sa mga tawo.
Si Theodore Jaracz, membro sa Nagamandong Lawas, mihatag sa pangunang pakigpulong sa programa. Kini may ulohang “Kon Unsay Nahimo sa Paglahutay Batok sa Satanikong Pagdumot.” Sa milabayng lima ka bulan, ang mga estudyante nagpuyo diha sa usa ka mahigugmaon ug teokratikanhong palibot. Apan, sumala sa ilang gitun-an sa klasehanan, kita nagkinabuhi taliwala sa kalibotan sa kaaway. Ang katawhan ni Jehova ginaatake sa tibuok kalibotan. (Mateo 24:9) Naggamit ug ubay-ubayng asoy sa Bibliya, gipakita ni Brader Jaracz nga ‘kita ilabinang puntirya sa Yawa. Kinahanglang atong lig-onon ang atong relasyon kang Jehova ug magmalig-on sa pag-atubang sa mga pagsulay.’ (Job 1:8; Daniel 6:4; Juan 15:20; Pinadayag 12:12, 17) Si Brader Jaracz mihinapos nga bisan nagpadayon ang pagdumot batok sa katawhan sa Diyos, ‘walay hinagiban nga buhaton batok kanato ang magmalamposon, sumala sa giingon sa Isaias 54:17. Paneguroon ni Jehova nga kita maluwas sa iyang gitakdang panahon ug paagi.’
Kay ‘bug-os nga nasangkapan,’ ang mga graduwado sa ika-112 nga klase sa Gilead tino nga dakog mahimo sa pag-alibyo sa gutom sa espirituwal nga pagkaon diha sa kayutaan nga ilang pagaalagaran. (2 Timoteo 3:16, 17) Kami maikagong magpaabot sa mga taho kon sa unsang paagi ilang gihatag ang makapahimsog nga mensahe ngadto sa mga tawo niining mga nasora.
[Kahon sa panid 23]
ESTADISTIKA SA KLASE
Gidaghanon sa mga nasod nga gihawasan: 6
Gidaghanon sa mga nasod nga gipadalhan: 19
Gidaghanon sa mga estudyante: 48
Aberids nga edad: 33.2
Aberids nga katuigan sa kamatuoran: 15.7
Aberids nga katuigan sa bug-os-panahong ministeryo: 12.2
[Hulagway sa panid 24]
Ika-112 nga Migraduwar nga Klase sa Watchtower Bible School of Gilead
Sa listahan sa ubos, ang mga laray ginumerohan gikan sa atubang ngadto sa likod, ug ang mga ngalan gilista gikan sa wala ngadto sa tuo sa matag laray.
(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.