Padayong Ipakita ang Maunongong Gugma sa Usag Usa

1-2. Unsay maayong mga rason kon nganong angay tang magpakitag maunongong gugma sa usag usa?

DUNAY maayong mga rason kon nganong angay tang magpakitag maunongong gugma sa usag usa. Unsa ang pipila niana? Matikdi kon giunsa kana pagtubag sa mosunod nga mga panultihon sa Bibliya: “Ayawg tugoti nga biyaan ka sa maunongong gugma ug pagkamatinumanon. . . . Unya uyonan ka sa Diyos ug sa mga tawo ug isipon ka ingong tawo nga lawom ug pagsabot.” “Ang tawo nga may maunongong gugma makahatag ug kaayohan sa iyang kaugalingon.” “Kadtong nagtinguhag pagkamatarong ug maunongong gugma makakaplag ug kinabuhi.”—Prov. 3:3, 4; 11:17, footnote; 21:21.

² Kini nga mga panultihon naghisgot ug tulo ka rason kon nganong angay tang magpakitag maunongong gugma. Una, kon magpakita tag maunongong gugma, mahimo tang bililhon sa Diyos. Ikaduha, ang pagpakita niini makahatag natog kaayohan karon. Pananglitan, makabaton tag tinuod nga mga higala. Ikatulo, ang pagpakitag maunongong gugma moresultag mga panalangin sa umaabot, apil na ang kinabuhing walay kataposan. Busa, duna tay maayong mga rason nga sundon ang pahinumdom ni Jehova: “Ipakita ang maunongong gugma ug kaluoy sa inyong pagpakiglabot sa usag usa.”—Zac. 7:9.

 3. Unsang mga pangutana ang atong tubagon niining artikuloha?

³ Niining artikuloha, tubagon nato ang upat ka pangutana. Kang kinsa ta angayng magpakitag maunongong gugma? Unsay atong makat-onan sa basahon sa Ruth maylabot sa pagpakitag maunongong gugma? Unsaon nato pagpakitag maunongong gugma karon? Unsay mga kaayohan kon magpakita tag maunongong gugma?

 4. Unsaon nato pagsundog si Jehova sa pagpakitag maunongong gugma? (Marcos 10:29, 30)

⁴ Sa ato nang nahisgotan sa miaging artikulo, si Jehova nagpakitag maunongong gugma—ang iyang mainitong gugma nga molungtad hangtod sa hangtod—niadto lang nahigugma ug nag-alagad kaniya. (Dan. 9:4) Gusto natong ‘sundogon ang Diyos, ingong minahal nga mga anak.’ (Efe. 5:1) Busa gusto natong magpakitag suod, lawom nga pagbati para sa atong mga igsoon, nga magpalihok nato sa pag-unong kanila.—Basaha ang Marcos 10:29, 30.

5-6. Unsay kasagarang pagsabot sa mga tawo sa pulong nga “pagkamaunongon”? Paghatag ug pananglitan.

⁵ Seguradong mouyon ka nga kon mas masabtan nato ang kahulogan sa maunongong gugma, mas mapakita nato ni sa mga igsoon. Aron mas masabtan nato ang maunongong gugma, ato ning itandi sa pagkamaunongon, sumala sa pagsabot sa kadaghanang tawo niana nga termino. Niay pananglitan.

⁶ Ang tawo nga nagtrabaho sa usa lang ka kompaniya sulod sa daghang katuigan matawag ug maunongong empleyado. Pero sa tanang tuig nga nagtrabaho siya niana nga kompaniya, tingali wala gyod niya makita sa personal ang mga tag-iya niini. Basin may mga higayon nga dili siya uyon sa mga polisiya sa kompaniya. Wala niya mahala ang kompaniya, pero nagtrabaho siya tungod sa suweldo. Padayon siyang magtrabaho didto hangtod nga moretiro siya, gawas kon tanyagan siyag mas maayong trabaho sa laing kompaniya.

7-8. (a) Unsay magpalihok sa usa sa pagpakitag maunongong gugma? (b) Nganong hisgotan nato ang pipila ka bersikulo sa basahon sa Ruth?

⁷ Busa, ang kalainan sa pagkamaunongon nga gihisgotan sa parapo 6 ug sa maunongong gugma mao ang motibo sa usa. Sa kapanahonan sa Bibliya, nganong ang mga alagad sa Diyos nagpakitag maunongong gugma sa usag usa? Gipakita nila ang maunongong gugma dili tungod kay obligado sila, kondili tungod kay gipalihok sila sa ilang kasingkasing. Konsideraha ang ehemplo ni David. Ang iyang kasingkasing nagpalihok niya nga magpakitag maunongong gugma sa iyang suod nga higalang si Jonatan bisan pag gusto siyang patyon sa amahan niini. Katuigan human mamatay si Jonatan, si David padayong nagpakitag maunongong gugma sa anak niini nga si Mepiboset.—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Daghan tag makat-onan bahin sa maunongong gugma pinaagi sa paghisgot sa pipila ka bersikulo sa basahon sa Bibliya nga Ruth. Unsang mga leksiyon bahin sa maunongong gugma ang atong makat-onan sa mga karakter nga gihisgotan niana nga basahon? Unsaon nato pagpadapat ang maong mga leksiyon sa atong kongregasyon?b

 9. Nganong nakahinapos si Noemi nga gisilotan siya ni Jehova?

⁹ Sa basahon sa Ruth, atong mabasa ang asoy bahin kang Noemi, sa iyang umagad nga si Ruth, ug kang Boaz, kinsa mahinadlokon sa Diyos ug paryente sa bana ni Noemi. Tungod sa gutom sa Israel, si Noemi, iyang bana, ug duha ka anak nga lalaki mibalhin sa Moab. Samtang nagpuyo didto, ang bana ni Noemi namatay. Ang iyang duha ka anak naminyo, pero makapaguol kay namatay sab sila. (Ruth 1:3-5; 2:1) Ang maong mga trahedya nakapaguol pag-ayo kang Noemi hangtod nga nawad-an siyag paglaom. Grabe kaayo ang iyang kaguol, ug nakahinapos pa gani siya nga nasuko si Jehova kaniya. Matikdi ang iyang giingon bahin sa Diyos: “Gisilotan ko ni Jehova.” “Gitugot sa Labing Gamhanan nga mahimong pait kaayo ang akong kinabuhi.” Miingon sab siya: “Gisilotan . . . ko ni Jehova nga Labing Gamhanan ug nagpahinabo siyag katalagman kanako.”—Ruth 1:13, 20, 21.

10. Unsay reaksiyon ni Jehova sa sakit nga mga pulong ni Noemi?

¹⁰ Unsay reaksiyon ni Jehova sa sakit nga mga pulong ni Noemi? Wala niya biyai ang iyang naguol nga alagad. Nagpakita hinuon siyag empatiya kaniya. Nakasabot si Jehova nga ang lisod nga mga kahimtang “makapabuang sa maalamon.” (Eccl. 7:7) Pero si Noemi nagkinahanglan gihapog tabang aron makita niya nga wala siya biyai ni Jehova. Giunsa siya pagtabang sa Diyos? (1 Sam. 2:8) Gipalihok niya si Ruth sa pagpakitag maunongong gugma kang Noemi. Kinabubut-on ug mahigugmaong gitabangan ni Ruth ang iyang ugangan aron mahibalik ang emosyonal ug espirituwal nga panimbang niini. Unsay atong makat-onan kang Ruth?

11. Nganong ang mahigugmaong mga igsoon maningkamot sa pagtabang niadtong mga magul-anon?

¹¹ Ang maunongong gugma magpalihok nato sa pagtabang niadtong mga magul-anon. Sama nga si Ruth miunong kang Noemi, ang mahigugmaong mga igsoon karon kinabubut-ong mounong sa mga igsoon nga naguol o naluya. Gimahal nila ang ilang mga igsoon, ug andam nilang buhaton ang ilang maarangan sa pagtabang kanila. (Prov. 12:25, footnote; 24:10) Uyon ni sa tambag ni apostol Pablo: ‘Hupaya ang mga naguol, tabangi ang mga luya, ug magpailob sa tanan.’—1 Tes. 5:14.

12. Sagad unsa ang pinakaepektibong paagi sa pagtabang sa naguol nga igsoon?

¹² Sagad ang pinakaepektibong paagi sa pagtabang sa naguol nga igsoon mao ang pagpaminaw kaniya ug pagpasalig kaniya nga gimahal nimo siya. Makita ni Jehova ang imong mga paningkamot sa pagtabang sa iyang bililhong mga karnero. (Sal. 41:1) Ang Proverbio 19:17 nag-ingon: “Kadtong magpakitag kaluoy sa mga pobre nagpahulam kang Jehova, ug bayran Niya siya sa iyang gibuhat.”

13. Unsay kalainan ni Ruth ug Orpa, ug nganong ang gihimo ni Ruth nagpakita sa iyang maunongong gugma? (Tan-awa ang hulagway sa atubangan sa magasin.)

¹³ Mas masabtan nato kon unsa ang maunongong gugma pinaagi sa pagkonsiderar sa nahitabo kang Noemi human mamatay ang iyang bana ug duha ka anak. Dihang nabalitaan ni Noemi nga “si Jehova nagtabang sa iyang katawhan pinaagi sa pagtagana kanilag pagkaon,” nakadesisyon siya nga mobalik sa iyang nasod. (Ruth 1:6) Sa primero, miuban kaniya ang iyang duha ka umagad. Pero samtang naglakaw sila, katulo giawhag ni Noemi ang iyang mga umagad nga mobalik sa Moab. Unsay nahitabo? Atong mabasa: “Gihalokan ni Orpa ang iyang ugangan ug mibiya. Apan si Ruth nagpabilin.” (Ruth 1:7-14) Kay gisunod ni Orpa ang giingon ni Noemi nga mopauli sa Moab, gihimo niya kon unsay gidahom kaniya. Pero si Ruth mihimog labaw pa kay sa giingon ni Noemi. Puwede unta siyang mobiya, pero tungod sa maunongong gugma, nagpabilin siya aron tabangan ang iyang paryente nga nanginahanglan. (Ruth 1:16, 17) Si Ruth miunong kang Noemi, dili tungod kay obligado siya, kondili kay gusto niya. Ang gihimo ni Ruth nagpakita sa iyang tinuod nga maunongong gugma. Unsay atong makat-onan niini nga asoy?

14. (a) Unsay gihimo sa mahigugmaong mga igsoon karon? (b) Sumala sa Hebreohanon 13:16, unsay makapalipay sa Diyos?

¹⁴ Ang maunongong gugma magpalihok nato nga mohimog labaw pa kay sa gidahom kanato. Sama kaniadto, daghan sa atong mga igsoon ang nagpakitag maunongong gugma sa ilang mga isigkamagtutuo, bisan niadtong wala nila mailhi sa personal. Pananglitan, dihang mahibaloan nila nga may nahitabong kalamidad, gusto dayon nilang mahibalo kon unsay ilang ikatabang. Kon may igsoon sa kongregasyon nga naglisod sa pinansiyal, mangita dayon silag paagi nga mahibaloan kon unsay gikinahanglan sa maong igsoon aron matabangan siya. Sama sa unang siglong mga Kristohanon sa Macedonia, sila mohimog labaw pa kay sa gidahom kanila. Sila mohimog mga sakripisyo ug mohatag pa ganig ‘mas labaw sa ilang maarangan’ aron tabangan ang mga igsoon nga nanginahanglan. (2 Cor. 8:3) Seguradong nalipay si Jehova sa maunongong gugma nga ilang gipakita!—Basaha ang Hebreohanon 13:16.

15-16. Nganong makaingon ta nga si Ruth wala gyod mohunong sa pagpaningkamot nga motabang?

¹⁵ Daghan tag makat-onan sa paagi sa pagtabang ni Ruth kang Noemi. Hisgotan nato ang pipila niini.

¹⁶ Ayawg hunong sa pagpaningkamot nga motabang. Dihang giingnan ni Ruth ang iyang ugangan nga mouban siya kaniya sa Juda, sa primero wala mosugot si Noemi. Pero wala mosurender si Ruth. Unsay resulta? “Dihang nakita ni Noemi nga desidido gyod si Ruth nga mokuyog niya, wala na niya siya papaulia.”—Ruth 1:15-18.

17. Unsay magpalihok nato nga dili dayon mosurender sa pagtabang niadtong mga naguol?

¹⁷ Ang atong makat-onan: Nagkinahanglag pailob ang pagtabang niadtong mga naguol, pero dili ta angayng mosurender sa pagtabang kanila. Sa primero, dili tingali dawaton sa igsoon ang atong tabang. Pero ang maunongong gugma magpalihok nato nga maningkamot sa pag-unong kaniya. (Gal. 6:2) Malaomon ta nga sa ngadtongadto, dawaton niya ang atong tabang ug tugotan ta sa paghupay kaniya.

18. Sa unsa posibleng nasakitan si Ruth?

¹⁸ Ayawg kahiubos. Pag-abot ni Noemi ug Ruth sa Betlehem, nakita ni Noemi ang iyang mga silingan kaniadto. Giingnan niya sila: “Maayo ang akong kahimtang sa akong paggikan, apan gipapauli ko ni Jehova nga makaluluoy.” (Ruth 1:21) Imadyina kon unsa tingali gibati ni Ruth dihang nadunggan niya ang gisulti ni Noemi! Gihimo niya ang iyang maarangan sa pagtabang kang Noemi. Si Ruth mihilak uban niya, naghupay kaniya, ug miuban niyag lakaw sulod sa pipila ka adlaw. Pero bisan pa nianang tanan, si Noemi miingon: “Gipapauli ko ni Jehova nga makaluluoy.” Pinaagi sa pagsulti niana, morag wala pabilhi ni Noemi ang tabang ni Ruth, kinsa nagbarog tupad niya. Posibleng nasakitan si Ruth sa gisulti ni Noemi. Pero miunong gihapon siya kang Noemi.

19. Unsay makatabang nato sa pag-unong niadtong naguol?

¹⁹ Ang atong makat-onan: Ang usa ka naguol nga igsoon makasulti tingalig sakit nga mga pulong—bisan pa sa tanan natong paningkamot nga tabangan siya. Pero dili ta angayng mahiubos. Mounong ta sa atong igsoon nga nanginahanglan, ug mangayo tag tabang kang Jehova aron makakita tag paagi sa paghupay kaniya.—Prov. 17:17.

20. Unsay nakahatag kang Ruth ug kusog aron makalahutay?

²⁰ Ihatag ang gikinahanglang pagdasig. Si Ruth nagpakitag maunongong gugma kang Noemi, pero si Ruth mismo nagkinahanglag pagdasig. Ug gipalihok ni Jehova si Boaz sa pagdasig kaniya. Giingnan ni Boaz si Ruth: “Hinaot gantihan ni Jehova ang imong gibuhat, ug hinaot hatagan kag hingpit nga suhol ni Jehova nga Diyos sa Israel kay midangop ka ilalom sa iyang mga pako.” Natandog pag-ayo si Ruth sa giingon ni Boaz. Tungod niana, si Ruth miingon kaniya: “Gihupay ko nimo ug gipasaligan.” (Ruth 2:12, 13) Gidasig ni Boaz si Ruth sa panahon nga gikinahanglan niya kini, ug kini nakahatag kang Ruth ug kusog nga iyang gikinahanglan aron makalahutay.

21. Base sa Isaias 32:1, 2, unsay ihatag sa mahigugmaong mga ansiyano?

²¹ Ang atong makat-onan: Kadtong nagpakitag maunongong gugma sa uban usahay nagkinahanglan pod ug pagdasig. Gikomendahan ni Boaz si Ruth dihang namatikdan niya ang kaayo niini kang Noemi. Sa susama, ang mga ansiyano mohatag sab ug komendasyon dihang mamatikdan nila nga ang mga igsoon mahigugmaong mitabang sa uban. Ang paghatag ug kinasingkasing nga komendasyon sa panahon nga gikinahanglan kini sa mga igsoon makahatag nilag kusog aron makalahutay.—Basaha ang Isaias 32:1, 2.

22-23. Sa unsang paagi nausab ang panghunahuna ni Noemi, ug ngano? (Salmo 136:23, 26)

²² Paglabayg pipila ka panahon, si Boaz naghatag ug daghang pagkaon kang Ruth ug Noemi. (Ruth 2:14-18) Unsay reaksiyon ni Noemi sa pagkamahinatagon ni Boaz? Siya miingon: “Hinaot panalanginan siya ni Jehova, kinsa kanunayng nagpakitag maunongong gugma sa mga buhi ug mga patay.” (Ruth 2:20a) Nausab gyod ang panghunahuna ni Noemi! Sa miagi, siya naghilak nga miingon: “Gisilotan ko ni Jehova,” pero karon siya malipayong miingon: ‘Si Jehova kanunayng nagpakitag maunongong gugma.’ Unsa kahay nakapausab sa panghunahuna ni Noemi?

²³ Nakita ra gyod ni Noemi nga wala siya pasagdi ni Jehova. Gigamit ni Jehova si Ruth aron ubanan siya sa iyang pagbalik sa Juda. (Ruth 1:16) Nakita sab ni Noemi ang tabang ni Jehova dihang si Boaz, nga usa sa ilang “mga manlulukat,” mahigugmaong mihatag kanilag daghang pagkaon.c (Ruth 2:19, 20b) Tingali nakaingon si Noemi, ‘Wala gyod diay ko biyai ni Jehova. Kanunay siyang nag-uban nako!’ (Basaha ang Salmo 136:23, 26.) Seguradong mapasalamaton si Noemi nga wala mosurender si Ruth ug Boaz sa pagtabang kaniya! Nalipay gyod silang tulo nianang nindot kaayo nga resulta.

24. Nganong gusto natong magpadayon sa pagpakitag maunongong gugma sa atong mga igsoon?

²⁴ Unsay atong nakat-onan sa basahon sa Ruth bahin sa maunongong gugma? Ang maunongong gugma magpalihok nato nga dili dayon mosurender sa pagtabang sa mga igsoon nga naguol. Magpalihok sab ni nato sa paghimog mga sakripisyo aron tabangan sila. Ang mga ansiyano angayng mohatag ug kinasingkasing ug gikinahanglang pagdasig ngadto sa mga igsoon nga nagpakitag maunongong gugma sa uban. Dihang makita nato kon sa unsang paagi ang mga nagmagul-anon nalagsik pag-usab sa espirituwal, malipay kaayo ta. (Buh. 20:35) Pero unsa ang kinalabwang rason kon nganong angay tang magpadayon sa pagpakitag maunongong gugma? Tungod kay gusto natong sundogon ug mapalipay si Jehova, kinsa “dagaya sa maunongong gugma.”—Ex. 34:6; Sal. 33:22.