Mga Pangutana Gikan sa mga Magbabasa

◼ Nganong gipameligro ni David si Ahimelech nga hataas nga saserdote, nga maoy miagak sa kamatayon sa saserdote, sumala sa giangkon ni David diha sa 1 Samuel 22:22?

Sa aktuwal, ang 1 Samuel 22:22 wala magpakita nga nasayod nang daan si David nga iyang mga lihok moresultag kamatayon kang Ahimelech. Ang bersikulo nag-ingon: “Ug si David miingon kang Abiathar [anak ni Ahimelech]: ‘Hibaloan ko niadtong adlawa, kay si Doeg nga Edomanhon didto, nga sa walay duhaduha siya [Doeg] mosugilon gayod kang Saul. Ako nakasala sa tanang kalag sa balay sa imong amahan [Ahimelech].’”

Si David, nga mikalagiw gikan sa nasukong Haring Saul, miadto sa Nob, diin didto ang hataas nga saserdoteng si Ahimelech. Tingali sa kabalaka nga mapugos ang hataas nga saserdote sa pagtug-an sa nahimutangan ni David ngadto sa hari, wala itug-an ni David ang tinuod nga katarongan sa iyang paggawas sa Jerusalem. Apan ang iyang presensiya sa Nob namatikdan. Ang Edomanhong ginganlag Doeg nakakita kang David ug tapos niana mitaho sa maong butang ngadto sa nasukong Saul.

Apan, walay makita diha sa asoy, nga nagpamatuod nga nasayod nang daan si David sa presensiya ni Doeg. Si Doeg “didto niadtong adlawa, nga gihawiran sa atubangan ni Jehova.” (1 Samuel 21:7) Hayan, si David nakurat, nga nakit-an siya sa walay prinsipyong si Doeg uban kang Ahimelech. Apan, ang nahitabo na, nahitabo na. Dili na kana mabag-o pa ni David, ni, makasanta siya sa makalilisang nga mga sangpotanan sa kasuko nga gipahamtang ni Saul diha sa hataas nga saserdote ug sa uban pang mga saserdote, maingon man sa kababayen-an, kabataan, ug kahayopan sa Nob.​—1 Samuel 22:9-19.

Uban niini sa hunahuna, matikdi pag-usab ang makasubong mga pulong ni David kang Abiathar, nga nakalingkawas sa pagpamatay: “Hibaloan ko niadtong adlawa, nga si Doeg nga Edomanhon didto . . . ” Atong nasabtan nga ang punto ni David mao, ‘Nahibalo ako niadtong adlawa, dihang nakita ko nga si Doeg nakakita kanako uban kang Ahimelech . . . ’ Apan ulahi na kaayo. Wala dahomang didto si Doeg ug nakakita kang David nga nakigsulti sa hataas nga saserdote. Busa nagtuo si David nga ibutyag ni Doeg kining mga butanga kang Saul. Maoy hinungdan nga miadmiter si David sa ulahi kang Abiathar nga sad-an, bisag dili-direktang nakabahin si David sa miresultang pagpamatay. Iyang giawhag si Abiathar sa pagpabilin uban kaniya, sanglit misalig si David sa pagtultol ug panalipod ni Jehova.​—1 Samuel 22:22, 23.

◼ Kinahanglan ba nga duha o tulo ka igsoong lalaki ang motuslob sa usa diha sa Kristohanong bawtismo?

Sumala sa naandang paagi usa ka lalaking ministro ang gikinahanglan sa pagbawtismog indibiduwal.

Bisag wala mohatag ang Bibliya ug mga lagda nga sundon maylabot sa Kristohanong bawtismo, may makat-on kita gikan sa rekord sa Bibliya. Ang bawtismo sa tubig ni Jesus ilabinang matudloon.

Ang Bibliya nagtaho: “Niadtong panahona si Jesus gikan sa Galilea miadto kang Juan [Bawtista] sa Jordan, aron magpabawtismo kaniya.” (Mateo 3:13) Matikdi nga kini nag-ingon “kaniya,” dili kanila. Ang asoy sa Ebanghelyo walay gipakitang timaan nga may kauban si Juan sa pagbawtismo kang Jesus. Sa pagkatinuod, walay mga tumatan-aw niadtong bawtismoha, kay si Juan lamang sa sinugdan ang nagpaila kang Jesus nga mao “ang Kordero sa Diyos nga magakuha sa sala sa kaalibotan.” (Juan 1:29, 33, 34) Nan, ang bawtismo ni Jesus, nahimong sumbanan sa bug-os nga paglubog sa tubig, apan nagsugyot usab kini nga ang usa ka lalaki nga alagad sa Diyos maoy mohimo sa bawtismo.

Hayan may usa ug daghang mga saksi dihang gibawtismohan si Filipe nga Etiopianhong eunoko diha sa “usa ka linaw nga tubig,” apan nag-inusara si Filipe sa pagbawtismo. (Buhat 8:36-39) Dugang pa, ang rekord sa Bibliya sa ubang mga bawtismo wala magpakita nga dunay duha o tulo ka igsoon nga mitabang sa pagtuslob sa tawo ilalom sa tubig ug dayon sa paghaw-as nianang bag-ong igsoong lalaki o babaye gikan niana. Apan sa kadaghanang mga kahimtang, adunay mga tumatan-aw, kun mga saksi, sa mga bawtismo.

Sa pagkatinuod, sa nangaging katuigan adunay linaing mga situwasyon nga kinahanglang tagdon kon may himoong mga bawtismo. Pananglitan, kon walay laing lugar nga may tubig kondili ang sulog ug delikadong suba, aron malikayan ang katalagman mahimong irekomendar nga duha ka igsoon ang mohimo sa bawtismo. O sa pisikal nga kondisyon sa kandidato, sama sa paralitiko o tinuod nga maluya, nagkinahanglag kapin sa usa ka igsoon ang mohimo sa bawtismo. Apan, kini maoy tagsaong mga kaso nga atimanon sa maalamong paagi. Ang naandan taliwala sa mga Saksi ni Jehova mao lamang kanang usa ka lalaki sa pagtuslob sa usa ka kandidato sa bawtismo.