BESOR, BUL-OGANANG WALOG SA

Usa ka bul-oganang walog nga gihisgotan lamang maylabot sa paggukod ni David sa nanulong nga mga Amalekanhon nga nag-ilog ug nagsunog sa siyudad sa Ziklag. (1Sa 30:​1, 10, 21) Dayag nga niadtong higayona kini nga mga manunulong nagpaingon sa habagatan ngadto sa ilang pinuy-anan nga teritoryo sa Negeb, apan ang tukmang direksiyon sa ilang panaw wala hisgoti. Busa, ang bul-oganang walog sa Besor, ang dapit nga gipahulayan sa 200 ka sundalo ni David tungod sa kakapoy, dili gayod matino. Apan, sa katibuk-an gihunahuna nga lagmit kini mao ang Wadi Ghazzeh (Nahal Besor), usa ka dakong lugot sa HK sa Ziklag nga moagos paingon sa Mediteranyo sa ubos sa Gaza.

Human sa iyang kadaogan batok sa mga Amalekanhon, ang pagbahinbahin ni David sa mga inagaw ngadto sa iyang mga manggugubat nga nagpabilin didto sa walog aron sa pagbantay sa mga bagahe, lagmit maoy pagsunod sa prinsipyo nga unang gipahayag ni Jehova sa Numeros 31:​27, human sa Israelinhong kadaogan batok sa Midian. Si David, human niadto, nagpadayon niini nga buhat ingong “usa ka regulasyon ug usa ka hudisyal nga hukom alang sa Israel.”​—1Sa 30:21-25.