ZEBADIAS

[Hinaot si Jehova Mogasa].

1. Usa ka Benjaminhon, anak nga lalaki o kaliwat ni Beria.​—1Cr 8:​1, 15, 16.

2. Usa ka Benjaminhon, anak nga lalaki o kaliwat ni Elpaal.​—1Cr 8:​1, 17, 18.

3. Usa ka Benjaminhong manggugubat nga mianib sa kasundalohan ni David didto sa Ziklag; anak nga lalaki ni Jeroham nga gikan sa Gedor.​—1Cr 12:​1, 2, 7.

4. Pag-umangkong lalaki ni Joab ug pangulo sa ikaupat nga dibisyon sa kasundalohan nga nagrelibohay sa matag bulan. Ang paghisgot kaniya ingong ‘sunod sa iyang amahan nga si Asahel’ lagmit nagpasabot nga siya mipuli sa katungdanan human gipatay si Asahel. (2Sa 2:23) O kon kining binulan nga kahikayan giorganisar human sa kamatayon ni Asahel, nan kini nagpasabot nga si Zebadias gitudlo nga magdumala sa usa ka dibisyon nga ginganlan sa ngalan ni Asahel.​—1Cr 27:​1, 7; tan-awa ang ASAHEL Num. 1.

5. Usa ka magbalantay-sa-ganghaan nga apil sa pag-organisar ni David sa mga buluhaton sa mga Levihanon; anak nga lalaki ni Meselemias nga usa ka Korehanon.​—1Cr 26:​1, 2.

6. Usa sa mga Levihanon nga gipadala ni Jehosapat sa iyang ikatulo nga tuig, sa 934 W.K.P., aron sa pagtudlo sa balaod ni Jehova sa mga siyudad sa Juda.​—2Cr 17:7-9.

7. Usa ka pangulo sa banay sa Juda, anak nga lalaki ni Ismael nga lakip niadtong gitudlo ni Haring Jehosapat nga magdumala sa legal nga mga kaso.​—2Cr 19:8-11.

8. Pangulo sa balay o banay sa amahan ni Sepatias. Ang anak nga lalaki ni Miguel nga si Zebadias nanguna sa 80 ka lalaki sa banay sa iyang amahan sa pagbalik ngadto sa Jerusalem uban kang Esdras niadtong 468 W.K.P.​—Esd 8:​1, 8.

9. Usa sa mga saserdote sa banay ni Imer kinsa lakip niadtong giawhag ni Esdras nga hunongon ang ilang mga pakig-alyansa sa kaminyoon uban sa mga langyaw.​—Esd 10:​19, 20.