MIKAL

[lagmit, Kinsa ang Sama sa Diyos?].

Manghod nga anak nga babaye ni Haring Saul nga nahimong asawa ni David. Gitanyag ni Saul ang iyang magulang nga anak nga babayeng si Merab ngadto kang David ingong asawa apan gihatag siya ngadto sa laing lalaki. Apan, si Mikal “nahigugma kang David,” ug siya gitanyag ni Saul ngadto kang David kon iyang madala ang mga yamis sa usa ka gatos ka Filistehanon, kay gihunahuna ni Saul nga mamatay si David sa pagsulay sa pagpatay sa ingon kadaghan nga manggugubat nga kaaway. Gidawat ni David ang maong hagit, gidala kang Saul ang 200 ka yamis sa mga Filistehanon, ug gihatag si Mikal ingong asawa. Apan human niadto “misamot pa gayod ang kahadlok ni Saul kang David” ug nahimong iyang kaaway sa dugayng panahon. (1Sa 14:49; 18:17-29) Sa ulahi, sa dihang dili na gayod mabangbang ang pagdumot ni Saul kang David, gitabangan ni Mikal si David aron makaikyas sa kapungot sa hari. Sulod sa dugayng panahon nga wala si David, si Mikal gipaminyo ni Saul kang Palti nga anak nga lalaki ni Lais nga taga-Galim.​—1Sa 19:11-17; 25:44.

Sa dihang si Abner sa ulahi nagtinguha sa paghimog pakigsaad uban kang David, si David nagdumili sa pagpakigkita kaniya gawas kon iyang madala si Mikal uban kaniya. Si David, pinaagig mensahero, nagpresentar sa iyang gipangayo ngadto sa anak nga lalaki ni Saul nga si Is-boset, ug si Mikal gikuha gikan sa iyang bana nga si Paltiel (Palti) ug gibalik ngadto kang David.​—2Sa 3:12-16.

Gisilotan Tungod sa Pagtamay Kang David. Sa dihang si David ingong hari nagsugo nga dad-on ang arka sa pakigsaad ngadto sa Jerusalem ug nagpakita sa iyang kalipay alang sa pagsimba kang Jehova pinaagi sa pagsayaw sa hilabihan, nga “nagbakos ug epod nga lino,” nakita siya ni Mikal gikan sa bentana ug “nagtamay kaniya sulod sa iyang kasingkasing.” Sa dihang mipauli si David sa iyang panimalay, gipahayag ni Mikal ang iyang pagbati sa makantalitahong paagi, nga nagpakitag kawalay pagpabili sa kasibot nga gipasundayag ni David alang sa pagsimba kang Jehova ug nagpaila nga iyang gibati nga migawi si David sa pagkawalay dignidad. Gibadlong siya ni David ug dayag nga gisilotan usab siya pinaagi sa dili pagpakigdulog pa kaniya, mao nga siya namatay nga walay anak.​—2Sa 6:14-23.

Nagmatuto sa mga Anak sa Iyang Igsoon. Ang asoy sa 2 Samuel 21:8 naghisgot bahin sa “lima ka anak nga lalaki ni Mikal nga anak nga babaye ni Saul nga gipanganak niya kang Adriel,” ug kini sila nalakip sa mga membro sa panimalay ni Saul nga gitugyan ni David ngadto sa mga Gabaonhon isip bayad tungod sa pagsulay ni Saul sa pagpuo kanila. (2Sa 21:​1-10) Ang mopatim-awng panagsumpaki tali sa 2 Samuel 21:8 ug sa 2 Samuel 6:​23, nga nagpakita nga si Mikal namatay nga walay anak, lagmit masulbad pinasukad sa gituohan sa pipila ka komentarista nga kini nga mga anak mao ang lima ka anak nga lalaki sa igsoon ni Mikal nga si Merab ug nga si Mikal mao ang nagpadako kanila human sa sayong kamatayon sa ilang inahan.​—Tan-awa ang MERAB.