Ang Hunahuna sa Bibliya

Ang Diyos ba Anaa sa Tanang Dapit?

DAGHANG tawo ang nagtuo nga ang Diyos anaa sa tanang dapit ug sa tanang butang. Ang maalamong hari nga si Solomon nangamuyo kang Jehova: “Maminaw ka unta gikan sa mga langit, ang imong pihong dapit nga puloy-anan.” (1 Hari 8:30, 39) Busa, sumala sa Bibliya si Jehova nga Diyos adunay puloy-anan. Si Solomon nagtawag sa puloy-anan sa Diyos ingong “mga langit.” Apan unsay buot ipasabot niana?

Usahay, ang Bibliya naggamit sa pulong nga “langit” ug “mga langit” sa pagtumong sa pisikal nga uniberso nga naglibot sa yuta. (Genesis 2:1, 4) Sanglit ang Diyos maoy naglalang sa tanang butang, ang iyang puloy-anan naglungtad na sa wala pa niya lalanga ang pisikal nga uniberso. Busa, ang Diyos wala magpuyo sa usa ka pisikal nga dapit. Nan, kon ang Bibliya maghisgot bahin sa langit nga puloy-anan ni Jehova nga Diyos, kini wala magtumong sa usa ka dapit diha sa kalangitan o sa kawanangan, kondili sa espirituhanong dapit.

Kahibulongang Panan-awon

Ang Bibliya naghubit kon unsa ka nindot ang puloy-anan ni Jehova pinaagi sa usa ka panan-awon nga gihatag kang apostol Juan. Sa maong panan-awon, nakita ni Juan ang bukas nga pultahan sa langit ug unya nakadungog siyag tingog nga nag-ingon: “Saka ngari.”—Pinadayag 4:1.

Dayon, nakita ni Juan diha sa maong panan-awon si Jehova nga Diyos mismo. Kini maoy bahin sa iyang nakita: “Dihay usa ka trono nga nahimutang sa langit . . . Ang naglingkod may panagway nga sama sa usa ka batong haspe ug sa usa ka bililhong pulag-bulok nga bato, ug ang trono gilibotan sa usa ka balangaw nga sama ug esmeralda tan-awon. . . . Gikan sa trono anaay nagapanggula nga mga kilat ug mga tingog ug mga dalugdog . . . Ug atubangan sa trono anaay morag usa ka dagat nga bildo nga sama ug kristal.”—Pinadayag 4:2-6.

Kini maoy tataw nga paghubit sa makapahinganghang katahom ug walay-katumbas nga kahalangdon ni Jehova. Ug matikdi ang palibot sa trono ni Jehova. Ang balangaw nagpakita nga dunay kalinaw. Ang mga kilat, tingog, ug dalugdog nagpasiugda sa gahom sa Diyos. Ang dagat nga bildo nagtumong sa hinlong baroganan niadtong anaa sa presensiya sa Diyos.

Tinuod simboliko ang maong hulagway, apan daghan kitag makat-onan niini bahin sa puloy-anan sa Diyos. Gitino ni Jehova nga dunay hingpit nga kahusay sa langit. Walay kagubot sa iyang puloy-anan.

Anaa sa Tanang Dapit sa Tanang Panahon?

Sanglit si Jehova adunay puloy-anan, kana nagpasabot nga siya dili presente sa tanang dapit sa tanang panahon. Nan, unsaon niya pagkahibalo ang mga panghitabo? (2 Cronicas 6:39) Ang usa maoy pinaagi sa iyang balaang espiritu, o aktibong puwersa. Ang salmista misulat: “Asa man ako paingon gikan sa imong espiritu, ug asa man ako mokalagiw gikan sa imong atubangan? Kon ako mosaka sa langit, ikaw atua didto; ug kon ibuklad ko ang akong higdaanan sa Sheol [lubnganan], tan-awa! ikaw atua didto.”—Salmo 139:7-10.

Aron masabtan kon unsa kalayo ang maabot sa balaang espiritu sa Diyos, handurawa ang adlaw. Kini nahimutang sa usa ka dapit apan ang enerhiya niini makaabot sa dakong bahin sa yuta. Sa susama, si Jehova nga Diyos anaa sa iyang puloy-anan. Apan makahimo siya sa pagpatuman sa iyang kabubut-on bisan asang dapita sa uniberso. Dugang pa, si Jehova makagamit sa iyang balaang espiritu aron mahibaloan ang mga panghitabo sa tanang dapit ug sa tanang panahon. Busa ang 2 Cronicas 16:9 nag-ingon: “Kon mahitungod kang Jehova, ang iyang mga mata nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.”

Dugang pa, ang Diyos adunay espiritung mga linalang nga nailalom sa iyang pagmando—ang mga manulonda. Gipakita sa Bibliya nga ang gidaghanon sa mga manulonda mahimong moabot ug gatosan ka milyon—lagmit bilyonbilyon o kapin pa.a (Daniel 7:10) Ang Bibliya adunay daghang asoy bahin sa mga manulonda nga nagsilbing hawas sa Diyos ug mianhi sa yuta, nakigsulti sa mga tawo, ug mihatag ug taho ngadto sa Diyos. Pananglitan, sa panahon ni Abraham, gisusi sa mga manulonda ang pagtuaw maylabot sa Sodoma ug Gomora. Mihukom ang Diyos sa paglaglag sa maong siyudad, lagmit human niya madawat ang taho sa mga manulonda.—Genesis 18:20, 21, 33; 19:1, 13.

Busa gipakita sa Bibliya nga dili kinahanglan nga si Jehova nga Diyos anaa sa tanang dapit. Pinaagi sa iyang balaang espiritu ug sa mga manulonda, siya bug-os nga mahibalo kon unsay nagakahitabo sa iyang mga linalang.

Tin-aw nga ang Bibliya makatabang kanato nga mas makaila sa atong Maglalalang. Gikan niini atong nakat-onan nga ang Diyos adunay puloy-anan nga gitawag ug langit, usa ka espirituhanong dapit nga dili sakop sa pisikal nga mga langit. Kauban niya ang bilyonbilyong gamhanan nga espiritung mga linalang nga nagpuyo usab sa espirituhanong dapit. Ug sa iyang puloy-anan anaa ang kalinaw, gahom, ug kaputli. Ang Bibliya nagpasalig kanato nga sa gitakdang panahon ang mga tawo makatagamtam ug malinawong kahimtang dinhi sa yuta sama nianang sa langit.—Mateo 6:10.

[Footnote]

NAKAPAMALANDONG KA BA?

● Ang Diyos ba anaa sa tanang dapit?—1 Hari 8:30, 39.

● Unsa kalayo ang maabot sa balaang espiritu sa Diyos?—Salmo 139:7-10.

[Blurb sa panid 29]

Ang adlaw anaa sa usa ka dapit, apan ang enerhiya niini makaabot sa dakong bahin sa yuta. Sa susama, ang Diyos anaa sa iyang puloy-anan, apan ang iyang balaang espiritu makaabot bisan asa sa uniberso