Sundoga ang Ilang Pagtuo

Siya Napalig-on sa Iyang Diyos

SI Elias nagdagan nga gisungsong ang ulan samtang mikilumkilom na. Layo pa ang iyang daganon aron makaabot sa Jezreel, ug siya dili na batan-on. Apan, walay hunong ang iyang pagdagan, kay ang “kamot ni Jehova” diha kaniya. Kini nga kalaski sa iyang lawas wala pa gayod niya sukad masinatii. Gani, naapsan niya ang matulin nga mga kabayo nga nagguyod sa karo ni Haring Ahab!—1 Hari 18:46.

Karon layo na kaayo kaniya si Haring Ahab, apan layo pa usab ang iyang panawon. Handurawang nagkipatkipat si Elias tungod sa ulan samtang siya nagdagan, nga namalandong sa labing halandomong adlaw sa iyang kinabuhi. Usa gayod kadto ka mahimayaong kadaogan alang kang Jehova, nga Diyos ni Elias, ug alang sa matuod nga pagsimba. Layo na si Elias karon gikan sa nagkisdom nga Bukid sa Carmelo diin gigamit siya ni Jehova sa milagrosong paagi sa pagpukan sa pagsimba ni Baal. Ginatos sa mga manalagna ni Baal ang napamatud-ang mini ug daotan, ug busa sila gipamatay. Dayon nag-ampo si Elias kang Jehova nga hunongon ang hulaw nga naghampak sa yuta sulod sa tulo ug tunga ka tuig. Ug unya miulan!a—1 Hari 18:18-45.

Samtang nahumod si Elias latas niining 30 ka kilometro paingon sa Jezreel, siya nagtuong matapos na ang tanan—nga si Ahab magbag-o! Human sa iyang nasaksihan, angay na gyod untang biyaan ni Ahab ang pagsimba ni Baal, pugngan ang iyang raynang si Jezebel, ug hunongon ang paglutos sa mga alagad ni Jehova.

Kon daw nangatuman ang atong gusto, natural lang nga mosanag ang atong paglaom. Tingali maghunahuna tang ang kahimtang sa atong kinabuhi magmauswagon, nga gani abi natog ang bug-at kaayong mga problema nasulbad na. Kon mao kanay gihunahuna ni Elias, dili kana ikahibulong kay siya “usa ka tawo nga may pagbati nga sama kanato.” (Santiago 5:17) Apan, sa pagkatinuod, wala pa matapos ang mga problema ni Elias. Sa misunod nga mga takna siya nahadlok ug naguol pag-ayo, nga gani buot niyang mamatay. Unsay nahitabo? Sa unsang paagi siya gitabangan ni Jehova aron mahibalik ang iyang pagtuo ug kaisog? Atong tan-awon.

Wala Damhang mga Kausaban

Pag-abot ni Ahab sa iyang palasyo sa Jezreel, siya ba gayod nabag-o ug nahimong mas espirituwal nga tawo? Atong mabasa: “Gisultihan ni Ahab si Jezebel sa tanan nga gibuhat ni Elias ug sa tanan mahitungod sa pagpatay niya sa tanang manalagna pinaagi sa espada.” (1 Hari 19:1) Matikding ang asoy ni Ahab bahin sa panghitabo sa maong adlaw wala maghisgot kang Jehova, nga Diyos ni Elias. Ang milagrosong panghitabo nianang adlawa—ang “gibuhat ni Elias,” giisip ni Ahab sa tawhanon lamang nga panglantaw. Dayag nga siya wala magtahod kang Jehova nga Diyos. Unsay reaksiyon sa mapanimaslong si Jezebel?

Nag-alintabo ang iyang kasuko! Ug tungod niini siya nagpadalag mensahe kang Elias: “Sa ingon buhaton unta sa mga diyos, ug sa ingon sila magdugang niini, kon niining panahona ugma dili ko himoon ang imong kalag sama sa kalag sa matag usa kanila!” (1 Hari 19:2) Mangilngig gayod kini nga bahad sa kamatayon! Sa laing pagkasulti, nanumpa si Jezebel nga siya ang patyon kon dili niya mapatay si Elias nianang adlawa aron mapanimaslan ang mga manalagna ni Baal. Handurawang taliwala sa unosong kagabhion si Elias nahigmata gikan sa makaluluoyng katulganan didto sa Jezreel—unya nadunggan niya kining makalilisang nga balita sa mensahero sa rayna! Unsa kahay iyang gibati?

Nadaog sa Pagkaluya ug Kahadlok

Kon gihunahuna ni Elias nga ang pagpakigbatok sa pagsimba ni Baal natapos na, nasayop siya. Determinado gihapon si Jezebel. Daghan sa iyang matinumanong mga kaubanan ang gipapatay na ni Jezebel, ug karon daw siya na ang isunod. Ang Bibliya nag-ingon: “Siya nahadlok.” Nahanduraw ba ni Elias ang makalilisang nga kamatayon nga gilaraw ni Jezebel kaniya? Kon kanunay niya kining gihunahuna, maluya gayod siya. Busa si Elias “mitindog ug milakaw alang sa iyang kalag”—siya mikalagiw aron makaikyas sa kamatayon.—1 Hari 18:4; 19:3.

Dili kay si Elias ra ang tawong may pagtuo nga gidaog sa kahadlok. Katuigan sa ulahi, ang apostol nga si Pedro mibati usab niana. Pananglitan, sa dihang gidapit ni Jesus si Pedro sa paglakaw sa tubig uban Kaniya, ang apostol nawad-ag kaisog ug misugod sa pagkaunlod “pagkakita sa unos.” (Mateo 14:30) Busa duna kitay makat-onang leksiyon kang Pedro ug Elias. Kon buot nato nga padayong magmaisogon, kinahanglang dili nato isentro ang atong pagtagad sa mga kapeligrohan nga makapahadlok kanato. Kinahanglang isentro nato ang atong pagtagad sa Tinubdan sa atong paglaom ug kusog.

“Igo na!”

Tungod sa kahadlok, si Elias mikalagiw sa habagatan-kasadpan, nga mga 150 ka kilometro paingon sa Beer-seba, usa ka lungsod duol sa habagatang utlanan sa Juda. Didto, iyang gibilin ang iyang tig-alagad ug nag-inusarang miadto sa kamingawan. Ang rekord nag-ingon nga siya milakaw ug “usa ka adlaw nga panaw,” busa mahanduraw nato nga siya migikan pagsubang sa adlaw, nga walay dalang bisan unsang balon. Samtang gibati ang grabeng kaguol ug kahadlok, iyang gitadlas ang makuyaw nga kamingawan ilalom sa naglagiting nga kainit sa adlaw. Sa dihang mitunod na ang adlaw ug mikilumkilom na, si Elias wala nay umoy. Kay gikapoy kaayo, siya milingkod ilalom sa kahoyng retama—ang bugtong kasilongan sa maong umaw nga dapit.—1 Hari 19:4.

Si Elias nag-ampo nga magul-anon kaayo. Siya nangandoy nga mamatay. Siya miingon: “Ako dili mas maayo kay sa akong mga katigulangan.” Nasayod siya nga ang iyang mga katigulangan abog ug mga bukog na lang diha sa lubnganan, nga wala nay pulos kang bisan kinsa. (Ecclesiastes 9:10) Ingon niana kawalay-pulos ang gibati ni Elias, maong siya mituaw: “Igo na!” Unsa pay kapuslanan nga mabuhi?

Angay ba tang makurat nga ang usa ka tawo sa Diyos mobati sa ingon? Dili gayod. Daghan sa matinumanong mga lalaki ug babaye diha sa Bibliya ang gihubit nga mibatig dakong kaguol nga tungod niana sila nangandoyng mamatay—lakip niini mao si Rebeca, Jacob, Moises, ug Job.—Genesis 25:22; 37:35; Numeros 11:13-15; Job 14:13.

Karon, nagkinabuhi na kita sa “makuyaw nga mga panahong lisod sagubangon,” busa dili ikatingalang daghan sa katawhan, bisan ang matinumanong mga alagad sa Diyos, usahay magmagul-anon. (2 Timoteo 3:1) Kon ingon ka niana, sundoga si Elias: Ipahungaw ang imong pagbati kang Jehova kay siya mao “ang Diyos sa tanang paghupay.” (2 Corinto 1:3) Nahupay ba niya si Elias?

Si Jehova Nagtabang sa Iyang Manalagna

Unsa kahay gibati ni Jehova samtang nagsud-ong gikan sa langit ug nakita ang iyang hinigugmang manalagna nga naghigda ilalom sa kahoy diha sa kamingawan ug nangandoyng mamatay? Dayag nga siya naluoy kaniya. Sa dihang nahinanok si Elias, si Jehova nagpadalag manulonda. Gipukaw sa manulonda si Elias pinaagi sa paghikap kaniya ug miingon: “Tindog, kaon.” Mikaon si Elias, kay ang manulonda nag-andam man kaniyag tubig ug init nga tinapay. Nakapasalamat ba siya sa manulonda? Ang asoy nag-ingon nga siya mikaon ug miinom ug mibalik pagkatulog. Naghingapin ba ang iyang kaguol maong wala na siya makapasalamat? Bisan pa niini, gipukaw na sab siya sa manulonda, tingali sa kaadlawon. Siya nag-awhag na pod kang Elias, “Tindog, kaon,” ug iya siyang gisultihan, “kay ang panaw hago kaayo alang kanimo.”—1 Hari 19:5-7.

Tungod sa paggiya sa Diyos, ang manulonda nasayod kon asa paingon si Elias. Siya usab nasayod nga dili makasugakod si Elias sa maong panaw. Makapadasig gayod ang pag-alagad sa Diyos nga mas nahibalo sa atong mga tumong ug limitasyon kay kanato! (Salmo 103:13, 14) Sa unsang paagi nakapasustenir kang Elias ang maong pagkaon?

Atong mabasa: “Siya mitindog ug mikaon ug miinom, ug siya nagpadayon paglakaw tungod sa kusog niadtong pagkaona sulod sa kap-atan ka adlaw ug kap-atan ka gabii hangtod sa bukid sa matuod nga Diyos, ang Horeb.” (1 Hari 19:8) Sama kang Moises mga unom ka siglo una pa kaniya ug kang Jesus duolag napulo ka siglo human kaniya, si Elias nagpuasa sa 40 ka adlaw ug 40 ka gabii. (Exodo 34:28; Lucas 4:1, 2) Kadto nga pagkaon wala makahanaw sa iyang mga problema, apan kadto nakapasustenir kaniya sa milagrosong paagi. Handurawa ang tigulang nga si Elias nga naghago pagbaktas kada adlaw latas sa kamingawan nga walay dalan sa halos usa ka bulan ug tunga!

Si Jehova nagtabang usab sa iyang mga alagad karon, dili pinaagig milagrosong pagkaon, apan mas labaw pa. Siya nagtagana kanila sa espirituwal nga paagi. (Mateo 4:4) Ang pagkat-on bahin sa Diyos gikan sa iyang Pulong ug sa mga publikasyon nga binase sa Bibliya nagsustenir kanato sa espirituwal nga paagi. Ang pagpahimulos sa maong espirituwal nga pagkaon tingali dili makawala sa tanan natong problema, apan kini makapalahutay kanato. Kini usab motultol sa “kinabuhing walay kataposan.”—Juan 17:3.

Si Elias nagbaktas ug duolag 320 ka kilometro hangtod nga nakaabot siya sa Bukid sa Horeb, diin si Jehova nga Diyos, pinaagi sa usa ka manulonda, nagpakita kang Moises dugay na kanhi diha sa tunokong tanom ug sa ulahi naghimog pakigsaad sa Balaod ngadto sa Israel. Si Elias nakakitag langob ug didto natulog.

Kon Sa Unsang Paagi si Jehova Naghupay ug Naglig-on Kang Elias

Didto sa Horeb, ang “pulong” ni Jehova—dayag nga gipahayag pinaagig mensahero nga espiritu—nagpatungha niini nga pangutana: “Unsay imong gibuhat dinhi, Elias?” Lagmit usa kini ka lumo nga pangutana, kay gisabot man kini ni Elias nga siya giawhag sa pagpahungaw sa iyang gibati. Busa, siya miingon: “Ako bug-os nangabugho alang kang Jehova nga Diyos sa mga panon; kay ang mga anak sa Israel nagbiya sa imong pakigsaad, ilang gilumpag ang imong mga halaran, ug ang imong mga manalagna ilang gipamatay pinaagi sa espada, maong ako lamang ang nahibilin; ug sila nangita sa akong kalag aron sa pagkuha niini.” (1 Hari 19:9, 10) Madayag sa mga pulong ni Elias ang tulo ka hinungdan sa iyang kaguol.

Una, iyang gibati nga kawang ang iyang buluhaton. Bisag daghang tuig na siyang “bug-os nangabugho” sa pag-alagad kang Jehova, nga nagtuboy sa ngalan sa Diyos ug sa iyang pagsimba, nakita ni Elias nga daw migrabe na hinuon ang kahimtang. Ang katawhan rebelyoso gihapon ug dili matinuohon, samtang mikaylap ang bakak nga pagsimba. Ikaduha, gibati ni Elias nga siya nag-inusara. “Ako lamang ang nahibilin,” matod niya, nga morag siya na lang usa sa nasod ang pabiling nag-alagad kang Jehova. Ikatulo, si Elias nahadlok. Daghan sa iyang mga isigkamanalagna ang gipamatay na, ug siya nagtuo gayod nga siya ang isunod. Tingali dili sayon nga isulti ni Elias ang iyang gibati, apan wala niya palabiha ang iyang garbo o kaulaw. Pinaagi sa pagpahungaw sa iyang gibati ngadto sa Diyos diha sa pag-ampo, siya maoy maayong panig-ingnan alang sa tanang matinumanong tawo.—Salmo 62:8.

Unsay gihimo ni Jehova aron mawala ang kahadlok ug mga kabalaka ni Elias? Gisultihan sa manulonda si Elias sa pagbarog sa baba sa langob. Siya misunod, nga wala mahibalo kon unsay mahitabo. Mihuros ang kusog nga hangin! Kini makabungog, ug kusog kaayo kini kay kini migilis sa kabukiran ug mibuak sa dagkong bato. Handurawang gitabonan ni Elias ang iyang mata samtang naggunit sa iyang bug-at, daang besti nga ginama sa balhibo ug mihuros kaniya ang kusog nga hangin. Unya naningkamot siya nga dili matumba kay naglinog sa maong dapit! Dayon gisundan kini sa pagdilaab sa dakong kalayo, nga tungod niini siya mibalik sa langob aron siya dili mapagba sa kainit.—1 Hari 19:11, 12.

Sa matag higayon nga nahitabo kining talagsaong gahom sa kinaiyahan, ang asoy naghisgot nga si Jehova wala diha niini. Si Elias nasayod nga si Jehova dili usa ka mitolohikanhong diyos sa kinaiyahan, sama kang Baal, kinsa gisimba sa iyang nalimbongang mga magsisimba ingong “Nagsakay sa mga Panganod,” o tigpatungha sa ulan. Si Jehova maoy Tinubdan sa tanang katingalahang gahom sa kinaiyahan, apan siya labi pa kaayong gamhanan kay sa tanan niyang linalang. Bisan ang pisikal nga langit dili makaigo kaniya! (1 Hari 8:27) Apan sa unsang paagi kining tanan nakatabang kang Elias? Hinumdomi ang iyang gibating kahadlok. Kay si Jehova anaa sa iyang kiliran, nga may talagsaong gahom, si Elias dili angayng mahadlok kang Ahab ug Jezebel!—Salmo 118:6.

Pagkawala na sa kalayo, dihay kahilom ug nadunggan ni Elias ang usa ka “kalma, hinay nga tingog.” Kini nakaaghat kang Elias nga mopahungaw na usab sa iyang mga kabalaka.b Tingali kini dugang nakapahupay kaniya. Apan, walay duhaduhang si Elias mas nahupay sa sunod nga gisulti sa “kalma, hinay nga tingog.” Gipaamgo ni Jehova kaniya nga siya bililhon gayod. Sa unsang paagi? Daghan ang gipadayag ni Jehova kaniya bahin sa iyang umaabot nga katuyoan sa pagpapha sa pagsimba ni Baal sa Israel. Tataw, ang gibuhat ni Elias wala makawang, kay ang katuyoan sa Diyos matuman gayod. Dugang pa, si Elias maoy bahin sa maong katuyoan, kay gisugo na usab siya ni Jehova uban ang espesipikong mga instruksiyon.—1 Hari 19:12-17.

Komosta ang kamingaw nga gibati ni Elias? Duha ka butang ang gihimo ni Jehova niini. Una, iyang gisultihan si Elias nga dihogan si Eliseo ingong manalagna nga mopuli kaniya. Kining batan-on nga lalaki maoy mahimong kauban ug katabang ni Elias sulod sa daghang katuigan. Makapahupay gayod kana! Ikaduha, gipadayag ni Jehova kining makapalipayng balita: “Akong gipabilin ang pito ka libo sa Israel, ang tanang tuhod nga wala moluhod kang Baal, ug ang matag baba nga wala mohalok kaniya.” (1 Hari 19:18) Wala gayod mag-inusara si Elias. Nakapadasig kaniya ang pagkadungog nga linibo diay ka matinumanong tawo ang wala mosimba kang Baal. Buot nilang magpadayon si Elias sa iyang matinumanong pag-alagad ug magpakitag panig-ingnan sa bug-os nga pagkamaunongon kang Jehova taliwala sa maong masulayong panahon. Natandog pag-ayo si Elias nga nakadungog niadtong mga pulonga pinaagi sa mensahero ni Jehova, ang “kalma, hinay nga tingog” sa iyang Diyos.

Sama kang Elias, tingali mahingangha gayod kita sa dagkong puwersa sa kinaiyahan nga madayag sa kalalangan. Oo, tin-awng makita diha niini ang gahom sa Maglalalang. (Roma 1:20) Karon, buot gihapon ni Jehova nga gamiton ang iyang walay kinutobang gahom sa pagtabang sa iyang matinumanong mga alagad. (2 Cronicas 16:9) Apan ang Diyos bug-os nakigkomunikar kanato pinaagi sa iyang Pulong, ang Bibliya. (Isaias 30:21) Susama kinig “kalma, hinay nga tingog,” nga gigamit ni Jehova karon sa paggiya, pagbadlong, pagdasig kanato, ug sa pagpasalig kanato nga kita iyang gihigugma.

Gidawat ba ni Elias ang paghupay ni Jehova kaniya didto sa Bukid sa Horeb? Tino gayod! Sa wala madugay siya nagmaisogon na usab ug nagmatinumanon ingong manalagna nga nakigbatok sa pagkadaotan sa bakak nga pagsimba. Kon itisok nato sa atong kasingkasing ang inspiradong mga pulong sa Diyos, ang “paghupay gikan sa mga Kasulatan,” nan masundog nato ang pagtuo ni Elias.—Roma 15:4.

[Mga footnote]

[Hulagway sa panid 19]

Gipanalanginan gayod ni Jehova si Elias panahon sa kasakit ug kalipay

[Hulagway sa panid 20]

Sa dihang tumang nagmagul-anon, gipahungaw ni Elias ang iyang pagbati kang Jehova

[Hulagway sa panid 21]

Gigamit ni Jehova ang iyang katingalahang gahom sa paghupay ug pagdasig kang Elias