“Ang Imong Kasingkasing ba Matul-id Uban Nako?”
“Kuyog nako ug tan-awa nga dili nako itugot ang pakig-indig kang Jehova.”—2 HARI 10:16.
1, 2. (a) Sa unsang paagi migrabe ang relihiyosong kahimtang sa Israel? (b) Sa 905 W.K.P., unsang dagko kaayong kausaban ang hapit nang mahitabo sa Israel?
ANG tuig 905 W.K.P. maoy panahon sa dakong kausaban sa Israel. Duolag 100 ka tuig kanhi, si Jehova nagpahinabo nga mabahin ang nahiusang gingharian sa Israel tungod sa apostasya ni Solomon. (1 Hari 11:9-13) Ang habagatang gingharian, ang Juda, niadto gimandoan sa anak ni Solomon nga si Rehoboam samtang ang amihanang gingharian, ang Israel, nailalom kang Haring Jeroboam, usa ka taga-Epraim. Ikasubo, ang amihanang gingharian nagsugod nga daotan. Dili gusto ni Jeroboam nga ang iyang mga ginsakpan moadto sa habagatang gingharian aron pagsimba sa templo, kay nahadlok nga makahunahuna sila pagbalik ngadto sa balay ni David. Busa siya nagtukod sa pagsimba sa baka sa Israel ug niana nagpahimutang sa sumbanan sa idolatriya nga milungtad sa usa ka sukod sa tibuok kasaysayan sa amihanang gingharian.—1 Hari 12:26-33.
2 Migrabe ang kahimtang sa dihang nahari si Ahab, nga anak lalaki ni Omri. Ang iyang asawa nga langyaw, si Jezebel, nagpasiugda sa pagsimba ni Baal ug nagpatay sa mga propeta ni Jehova. Bisan pa sa prangkang mga pasidaan sa propetang si Elias, walay gihimo si Ahab sa pagpugong kaniya. Sa 905 W.K.P., hinunoa, si Ahab patay na, ug si Jehoram, nga iyang anak lalaki, maoy nagmando. Panahon na kadto sa paghinlo sa yuta. Ang manununod ni Elias, si Eliseo, nagpahibalo sa komandante sa kasundalohan, si Jehu, nga si Jehova nagdihog kaniya aron mahimong sunod nga hari sa Israel. Iyang tahas? Laglagon ang makasasalang balay ni Ahab ug ipanimalos ang dugo sa mga propeta nga giula ni Jezebel!—2 Hari 9:1-10.
3, 4. Giunsa pagpakita ni Jehonadab nga ang iyang kasingkasing maoy ‘matul-id uban sa kasingkasing ni Jehu’?
3 Nga masinugtanon sa sugo sa Diyos, si Jehu nagpapatay sa labihan ka daotang si Jezebel, ug human niadto siya misugod sa paghinlo sa Israel pinaagi sa paglaglag sa balay ni Ahab. (2 Hari 9:15–10:14, 17) Unya siya nakigtagbo sa usa ka tigpaluyo. “Iyang gitagbo si Jehonadab nga anak ni Rekab nga nagpaingon sa pagsugat kaniya. Sa dihang siya nagpanalangin kaniya, niana siya miingon kaniya: ‘Ang imong kasingkasing ba matul-id uban nako, sama nga ang akong kasingkasing matul-id uban sa imong kasingkasing?’ Niini si Jehonadab miingon: ‘Kini mao.’ ‘Kon kini mao, itunol kanako ang imong kamot.’ Busa iyang gitunol kaniya ang iyang kamot. Niana iyang gipatindog siya aron mosakay sa karo uban niya. Unya siya miingon: ‘Kuyog nako ug tan-awa nga dili nako itugot ang pakig-indig kang Jehova.’ Ug sila nagpadayon sa pagsakay uban niya diha sa iyang karong iggugubat.”—2 Hari 10:15, 16.
4 Si Jehonadab (o, Jonadab) dili Israelinhon. Bisan pa niana, nahiuyon sa iyang ngalan (nagkahulogang “Si Jehova Mauyonon,” “Si Jehova Hamili,” o “Si Jehova Mahinatagon”) siya usa ka magsisimba kang Jehova. (Jeremias 35:6) Segurado, siya interesado kaayong motan-aw sa kang Jehu ‘nga dili pagtugot sa pakig-indig kang Jehova.’ Giunsa nato pagkahibalo? Aw, ang iyang pagtagbo sa dinihogan nga hari sa Israel dili aksidente. Si Jehonadab “nagpaingon sa pagsugat kaniya,” ug kini sa panahong si Jehu nakapatay na kang Jezebel ug sa uban sa balay ni Ahab. Si Jehonadab nasayod kon unsay nahitabo sa dihang iyang gidawat ang pagdapit ni Jehu nga mosakay sa iyang karo. Sa walay duhaduha siya dapig kang Jehu—ug kang Jehova—sa maong panagbangi tali sa bakak ug matuod nga pagsimba.
Modernong-Adlawng Jehu ug Modernong-Adlawng Jehonadab
5. (a) Unsang mga kausaban ang duol nang mahitabo alang sa tanang tawo? (b) Kinsa ang Dakong Jehu, ug kinsay naghawas kaniya sa yuta?
5 Karong adlawa, duol nang mausob pag-ayo ang kahimtang alang sa tanang tawo sama niadto sa Israel niadtong 905 W.K.P. Karon duol na ang panahon nga hinloan ni Jehova ang yuta sa tanang daotang mga resulta sa impluwensiya ni Satanas, lakip ang bakak nga relihiyon. Kinsa ba ang modernong-adlawng Jehu? Walay lain kondili si Jesu-Kristo, nga kaniya gitumong ang matagnaong mga pulong: “Ibakos ang imong espada sa imong bat-ang, Oh usang gamhanan, uban sa imong kahalangdon ug imong katahom. Ug sa imong katahom mopadayon ka ngadto sa kalamposan; sakay sa kaayohan sa kamatuoran ug pagkamapaubsanon ug pagkamatarong.” (Salmo 45:3, 4) Dinhi sa yuta si Jesus gihawasan sa “Israel sa Diyos,” ang dinihogang mga Kristohanon “nga nagasunod sa mga sugo sa Diyos ug may buluhaton sa pagpanaksi bahin kang Jesus.” (Galacia 6:16; Pinadayag 12:17) Sukad 1922 kining dinihogang mga igsoon ni Jesus sa pagkamaisogon nagpasidaan bahin sa umaabot nga mga buhat sa paghukom ni Jehova.—Isaias 61:1, 2; Pinadayag 8:7–9:21; 16:2-21.
6. Kinsay nanggula gikan sa mga nasod aron magpaluyo sa dinihogang mga Kristohanon, ug sa unsang paagi sila misulod sa karo, ingnon ta, sa Dakong Jehu?
6 Ang dinihogang mga Kristohanon wala mag-inusara. Ingong si Jehonadab migula aron mosugat kang Jehu, ang daghan gikan sa mga nasod nanggula aron pagpaluyo kang Jesus, ang Dakong Jehu, ug sa iyang mga hawas sa yuta sa ilang pagbarog dapig sa matuod nga pagsimba. (Zacarias 8:23) Nga gitawag ni Jesus nga iyang “ubang mga karnero,” niadtong 1932 sila giila ingong modernong-adlaw nga katumbas ni Jehonadab sa kakaraanan ug gidapit nga ‘mosakay sa karo’ sa modernong-adlawng Jehu. (Juan 10:16) Sa unsang paagi? Pinaagi sa ‘pagsunod sa mga sugo sa Diyos’ ug pagpakig-ambit uban sa mga dinihogan sa “buluhaton sa pagpanaksi bahin kang Jesus.” Sa modernong kapanahonan, kini naglakip sa pagsangyaw sa maayong balita sa natukod nga Gingharian sa Diyos ubos kang Jesus ingong Hari. (Marcos 13:10) Niadtong 1935 ang maong “mga Jonadab” giila nga mao ang “dakong panon” sa Pinadayag 7:9-17.
7. Giunsa pagpakita sa mga Kristohanon karon nga ang ilang ‘kasingkasing matul-id gihapon’ uban sa kasingkasing ni Jesus?
7 Sukad sa katuigang 1930, ang dakong panon ug ang ilang dinihogang mga igsoon maisogong nagpamatuod nga sila nagpaluyo sa matuod nga pagsimba. Sa pipila ka nasod sa Silangan ug Kasadpang Uropa, sa Halayong Sidlakan, ug sa Aprika, daghan kanila ang namatay tungod sa ilang pagtuo. (Lucas 9:23, 24) Sa ubang mga nasod, sila gibilanggo, giatake sa mga manggugubot, o sa ubang paagi gilutos. (2 Timoteo 3:12) Pagkatalagsaong rekord sa pagtuo ang ilang gihimo! Ug ang Taho sa Pag-alagad sa Tuig 1997 nagpakitang sila determinado gihapong moalagad sa Diyos, bisan pag unsay mahitabo. Ang ilang ‘kasingkasing matul-id gihapon’ uban sa kasingkasing ni Jesus. Gipasundayag kini sulod sa 1997, sa dihang 5,599,931 ka magmamantala sa Gingharian, nga halos tanan kanila “mga Jonadab,” migugol sa katibuk-ang gidaghanon nga 1,179,735,841 ka oras diha sa buluhaton sa pagpanaksi bahin kang Jesus.
Nagsangyaw Gihapon Uban sa Kasibot
8. Sa unsang paagi ang mga Saksi ni Jehova nagpakita sa ilang kasibot alang sa matuod nga pagsimba?
8 Si Jehu dunay dungog sa pagpadagan nga tulin sa iyang karo—usa ka ebidensiya sa iyang kasibot nga humanon ang iyang tahas. (2 Hari 9:20) Si Jesus, ang Dakong Jehu, gihubit ingong ‘giut-ot’ sa kasibot. (Salmo 69:9) Nan, dili katingalahang ang matuod nga mga Kristohanon karong adlawa ilado tungod sa ilang kasibot. Sulod sa kongregasyon ug ngadto sa publiko, sila ‘nagwali sa pulong . . . nagmadalion diha niini sa paborableng panahon, sa masamokong panahon.’ (2 Timoteo 4:2) Ang ilang kasibot ilabinang nadayag panahon sa sayong bahin sa 1997 human nga usa ka artikulo sa Atong Ministeryo sa Gingharian nagdasig sa labing daghan kutob sa mahimo nga moambit sa buluhatong pag-oksilyare payunir. Ang matag nasod nagbutang ug tumong nga gidaghanon sa mga oksilyare payunir. Unsay sanong? Talagsaon! Daghang sanga ang milabaw sa tumong nga gidaghanon. Ang Ecuador nagbutang ug tumong nga 4,000 apan sa Marso mitahog 6,936 ka oksilyare payunir. Ang Hapon mitaho sa katibuk-ang gidaghanon nga 104,215 sulod nianang tulo ka bulan. Sa Zambia, diin 6,000 mao ang tumong, 6,414 ka oksilyare payunir ang nagtaho sa Marso; 6,532 sa Abril; ug 7,695 sa Mayo. Sa tibuok kalibotan, ang kinatas-ang ihap sa oksilyare ug regular nga mga payunir sa tingob maoy 1,110,251, nga 34.2-porsiyentong uswag kay sa 1996!
9. Gawas pa sa balay-balay nga buluhaton, sa unsang ubang mga paagi makaplagan sa mga Saksi ni Jehova ang mga tawo aron suginlan sila sa maayong balita?
9 Gisultihan ni apostol Pablo ang mga ansiyanong taga-Efeso: “Ako wala magpugong sa pagsulti kaninyo sa bisan unsa man sa mga butang nga makaayo ni sa pagtudlo kaninyo sa publiko ug sa balay ug balay.” (Buhat 20:20) Ang mga Saksi ni Jehova karong adlawa nagsundog sa panig-ingnan ni Pablo ug masibotong nagsangyaw sa maayong balita sa balay-balay. Hinuon, mahimong dili sayon ang pagkaplag ug mga tawo diha sa ilang mga balay. Busa, ‘ang matinumanon ug maalamong ulipon’ nagdasig sa mga magmamantala sa Gingharian nga moduol sa mga tawo diha sa ilang mga dapit sa patigayon, sa kadalanan, sa kabaybayonan, sa publikong mga parke—sa bisan diin nga hikaplagan ang mga tawo. (Mateo 24:45-47) Ang mga resulta maayo kaayo.
10, 11. Sa unsang paagi ang mga magmamantala sa duha ka nasod nagpakitag inisyatibo aron makaplagan ang mga interesado nga kasagarang dili maabtan sa balay?
10 Sa Copenhagen, Denmark, ang gamayng grupo sa mga magmamantala nagsangyaw sa kadalanan sa gawas sa mga estasyonan sa tren. Gikan sa Enero hangtod Hunyo, nakapahimutang silag 4,733 ka magasin, may maayo kaayong mga pagkabildohay, ug nakahimog daghang balik-duaw. Ubay-ubayng magmamantala nianang nasora nakaestablisar ug mga ruta sa magasin diha sa mga tindahan. Usa ka lungsod dunay dakong taboan matag Biyernes, nga dunay linibong bisita. Busa ang kongregasyon naghikay ug regular nga pagsangyaw sa taboan. Sa usa ka lugar ang mga eskuylahan ginaduaw uban ang usa ka putos sa impormasyon nga naundan sa mga publikasyong angay ilabina sa mga magtutudlo.
11 Sa Hawaii usab ang paningkamot gihimo sa pag-abot niadtong dili hikaplagan sa balay. Ang espesyal nga mga teritoryo naglakip sa publikong mga lugar (mga dalan, mga parke, mga parkingan, ug mga hunonganan sa bus), mga komersiyal nga dapit, mga tindahan ug mga landiganan, pagsangyaw pinaagig telepono, publikong transportasyon (pagsangyaw sulod sa mga bus), ug mga kampus sa kolehiyo. Ginatino nga ang hustong gidaghanon sa mga Saksi iasayn sa matag teritoryo ug sila nga naasayn hustong pagkabansay. Ang organisado kaayong mga paningkamot nga susama niini gitaho sa daghang nasod. Ingong sangpotanan, nahibalag ang interesadong mga tawo nga lagmit dili gayod makaplagan diha sa balay-balay nga ministeryo.
Pagbarog nga Malig-on
12, 13. (a) Unsang taktika ang gigamit ni Satanas batok sa mga Saksi ni Jehova sulod sa 1997? (b) Sa unsang paagi ang bakak nga propaganda misumbalik diha sa usa ka nasod?
12 Sa ubay-ubayng nasod sa 1997, ang mga Saksi ni Jehova maoy mga biktima sa madaoton, bakak nga propaganda nga gipasiugda uban sa dayag nga tumong nga sila ikiha. Apan wala sila matarog! (Salmo 112:7, 8) Sila nahinumdom sa pag-ampo sa salmista: “Ang mapangahason nagduhig kanako sa kabakakan. Alang kanako, uban sa bug-os kong kasingkasing akong pagasundon ang imong mga sugo.” (Salmo 119:69) Ang maong bakak nga publisidad usa lamang ka ebidensiya sa pagkadinumtan sa tinuod nga mga Kristohanon sumala sa gitagna ni Jesus. (Mateo 24:9) Ug usahay misumbalik kini. Usa ka lalaki sa Belgium nakabasag nagpakaulawng artikulo bahin sa mga Saksi ni Jehova diha sa usa ka iladong inadlawng mantalaan. Kay nakurat sa mapasipalahong mga komento, siya mitambong sa usa ka tigom sa usa ka Kingdom Hall sa pagka-Dominggo. Iyang gihikay nga motuon sa Bibliya uban sa mga Saksi ug kusog nga miuswag. Sa nangagi, kining tawhana maoy membro sa usa ka gang. Ang iyang pagtuon sa Bibliya miabag kaniya sa paghinlo sa iyang kinabuhi, butang nga namatikdan sa mga tawo alirong niya. Segurado, kanang resultaha wala sa kaisipan sa magsusulat sa mapasipalahong artikulo!
13 Ang pipila ka tawong matinud-anon ug kasingkasing sa Belgium nagpahayag ug pagsupak sa malansisong propaganda. Nalakip kanila ang usa ka kanhing primer ministro nga miadmitir nga nahupngan sa pagdayeg alang sa nalampos sa mga Saksi ni Jehova. Ug usa ka diputado misulat: “Sukwahi sa mga pangdaot nga usahay gisabwag, alang kanako [ang mga Saksi ni Jehova] morag dili hawas sa labing gamayng kapeligrohan sa mga institusyon sa Estado. Sila mga lungsoranon nga mahigugmaon sa kalinaw, masundanon sa tanlag, ug matinahoron sa mga awtoridad.” Tinuoray, maalamon ang mga pulong ni apostol Pedro: “Padayong-hupti ang inyong panggawi nga maayo taliwala sa mga nasod, aron nga, sa butang nga sila nagapamulong batok kaninyo ingong mga mamumuhat ug daotan, sila ingong resulta sa inyong maayong mga buhat nga niini sila mga saksing-nakakita magahimaya sa Diyos sa adlaw sa iyang pagsusi.”—1 Pedro 2:12.
Usa ka Talagsaong Memoryal nga Pagsaulog
14. Unsa ang pipila ka makapaukyab nga mga taho sa mga tumatambong sa Memoryal sa 1997?
14 Kadtong nagapanaksi bahin kang Jesus angayng mag-isip sa Memoryal sa iyang kamatayon ingong linaing okasyon sa ilang tuig. Sa 1997, 14,322,226 ang mitambong sa Marso 23 aron pagsaulog sa okasyon. Kadto maoy kapig 1,400,000 nga labaw pa kay sa 1996. (Lucas 22:14-20) Sa daghang nasod ang tumatambong sa Memoryal milabaw kaayo sa gidaghanon sa mga magmamantala sa Gingharian, nga nagpakitag maayong mga kalaoman sa umaabot nga pag-uswag. Pananglitan, sa Haiti, sa 1997 ang kinatas-ang ihap maoy 10,621 ka magmamantala, samtang 67,259 mitambong sa Memoryal. Mahimong imong masusi ang tinuig nga taho sa mga panid 18 ngadto 21 ug makitang daghan pang nasod ang dunay susamang daghang tumatambong kon itandi sa gidaghanon sa mga magmamantala.
15. Sa pipila ka nasod, giunsa pagbuntog sa atong mga igsoon ang seryosong mga suliran aron masaulog ang Memoryal?
15 Alang sa pipila, ang pagtambong sa Memoryal dili sayon. Sa Albania dihay 7:00 s.g. nga curfew tungod sa sibil nga kagubot. Diha sa 115 ka gagmayng grupo sa tibuok nasod, ang Memoryal nagsugod sa 5:45 s.g. Ang adlaw misalop sa 6:08 s.g., nga nagtimaan sa pagsugod sa Nisan 14. Ang mga emblema gipasa sa mga 6:15 s.g. Sa kadaghanang kahimtang ang paniklop nga pag-ampo gilitok pagka-6:30 s.g., ug kadtong nanambong nagdalig pauli sa wala pay curfew. Bisan pa niana, ang tumatambong sa Memoryal maoy 3,154, kon itandi sa kinatas-ang ihap nga magmamantala nga maoy 1,090. Sa usa ka Aprikanhong nasod, tungod sa sibil nga kagubot ang Kingdom Hall dili maadtoan, busa duha ka ansiyano mihukom nga magtagbo sa balay sa ikatulong ansiyano aron hikayon ang pagsaulog diha sa gagmayng mga grupo. Aron makaabot sa balay, ang duha ka ansiyano kinahanglang motabok sa usa ka imburnal. Ugaling lang, dihay away sa maong dapit, ug ang mga esnayper namusil kang bisan kinsang mosulay pagtabok sa imburnal. Usa ka ansiyano midali pagtabok nga walay nahitabo. Ang ikaduha nagtabok pa sa dihang nakadungog siyag buto. Mihapa siya sa yuta ug mikamang ngadto sa luwas nga dapit samtang naghadyong ang mga bala sa ibabaw sa iyang ulo. Ang tigom sa mga ansiyano malamposong nahimo, ug ang mga panginahanglan sa kongregasyon naatiman.
“Gikan sa Tanang Kanasoran ug mga Tribo . . . ug mga Dila”
16. Giunsa paghikay sa matinumanon ug maalamong ulipon aron masabwag ang maayong balita taliwala sa gagmayng mga grupo nga lain ug pinulongan?
16 Si apostol Juan miingon nga ang dakong panon manggula “gikan sa tanang kanasoran ug mga tribo ug katawhan ug mga dila.” (Pinadayag 7:9) Busa, ang Nagamandong Lawas naghikay nga ang literatura mahubad sa dugang ug dugang nga mga pinulongan—lakip kadtong gigamit sa nahilit nga mga tribo ug gagmayng mga grupo sa katawhan. Pananglitan, sa Mozambique ang tract nga Kinabuhi sa Malinawong Bag-ong Kalibotan giluwatan sa lima pa ka pinulongan. Sa Nicaragua, ang brosyur nga Tagamtama ang Kinabuhi sa Yuta sa Walay Kataposan! nahubad diha sa pinulongang Miskito—ang unang basahon sa Watch Tower Society nianang pinulongana. Daghang Miskito nga mga Indian malipayong midawat sa brosyur sa pagkakitag basahon diha sa ilang pinulongan mismo. Sa 1997 ang Sosyedad miaprobar sa literatura diha sa 25 dugang pang mga pinulongan ug mipatik ug kapin sa usa ka bilyong magasin.
17. Unsang grupo nga may laing pinulongan ang natabangan sa Korea, ug sa unsang paagi ang mga videotape nakatabang pag-ayo niining bahina sa populasyon?
17 Sa Korea ang lain-ug-pinulongang grupo natabangan. Sa tuig 1997 gihimo ang unang kombensiyon sa Koreanong senyas nga pinulongan. Adunay 15 ka kongregasyon sa senyas nga pinulongan sa Korea nga may 543 ka magmamantala, apan 1,174 ang mitambong sa kombensiyon, ug 21 ang nabawtismohan. Aron matabangan ang mga bungol nga dili daling makasabot sa gisulti o gisulat nga pulong, ang mga publikasyon gihimo sa videotape diha sa 13 lainlaing senyas nga mga pinulongan. Sa ingon, ang mga bungol ginatabangan sa “pagbasa” ug pagtuon pa sa maayong balita, nga may maayong mga resulta. Sa Tinipong Bansa, sa nangagi dangtag lima ka tuig aron ang usa ka bungol mouswag hangtod sa punto sa bawtismo. Karon, tungod sa ubay-ubayng video nga anaa na sa American Sign Language, alang sa pipila ka bungol, kana namenosan ngadto sa duolag usa ka tuig.
‘Pagpabilin Diha sa Karo’
18. Human makahibalag kang Jehonadab, unsay gisugdan pagbuhat ni Jehu?
18 Balik sa 905 W.K.P., human kuyogi ni Jehonadab, si Jehu misugod paglaglag sa bakak nga pagsimba. Siya midapit sa tanang magsisimba ni Baal: “Balaana ang usa ka solemneng panagkatigom alang kang Baal.” Unya gipasugoan niya ang tibuok yuta aron matino nga walay masayloan nga magsisimba ni Baal. Samtang ang panonpanon mihugop pagsulod sa dakong templo sa bakak nga diyos, gitinong walay magsisimba ni Jehova ang tua didto. Sa kataposan, si Jehu ug ang iyang kasundalohan naglaglag sa mga magsisimba ni Baal. “Sa ingon gipuo ni Jehu si Baal gikan sa Israel.”—2 Hari 10:20-28.
19. Tungod sa anaa sa unahan sa katawhan, unsang espirituha ang angay natong ipakita, ug sa unsang tahas nga kita angayng magmakugihon?
19 Karong adlawa, ang kataposang paghukom sa tibuok bakak nga relihiyon anaa lamang sa unahan. Ubos sa pagtultol sa mga manulonda ang mga Kristohanon nagamantala sa maayong balita ngadto sa tanang tawo, nga nagdasig kanila nga mahadlok sa Diyos ug mobulag sa bakak nga relihiyon. (Pinadayag 14:6-8; 18:2, 4) Ang mga maaghop gidasig nga magpasakop sa Gingharian sa Diyos ubos sa kang Jehova nga gipalingkod nga Hari, si Jesu-Kristo. (Pinadayag 12:10) Niining makapaukyab nga panahon, kinahanglang dili nato itugot nga ang atong kasibot maawop samtang nagbarog kita dapig sa matuod nga pagsimba.
20. Unsay gihukom nimong buhaton sulod sa 1998 tuig sa pag-alagad?
20 Kas-a, sa dihang si Haring David nabug-atan pag-ayo, siya miampo: “Ang akong kasingkasing malig-on, Oh Diyos, ang akong kasingkasing malig-on. Ako magaawit ug magahoni. Pagadayegon ko ikaw taliwala sa mga katawhan, Oh Jehova.” (Salmo 57:7, 9) Hinaot nga kita usab magmalig-on. Sa 1997 nga tuig sa pag-alagad, bisan pa sa daghang kalisdanan, ang kusog nga singgit sa pagdayeg gipatugbaw sa kahimayaan ni Jehova nga Diyos. Hinaot ang susama, mas kusog pa, nga singgit madungog sulod sa presenteng tuig sa pag-alagad. Ug hinaot nga kini mahitabo bisan pa kon unsay sulayan pagbuhat ni Satanas aron paluyahon o supakon kita. Sa ingon, atong ipakita nga ang atong kasingkasing nagpabiling matul-id uban sa kasingkasing sa Dakong Jehu, si Jesu-Kristo, ug mosanong kita uban sa bug-os natong kalag sa dinasig nga awhag: “Magsadya diha kang Jehova ug magmaya, kamong mga matarong; ug maghugyaw nga mangayaon, kamong tanan nga matul-id sa kasingkasing.”—Salmo 32:11.
Makasaysay Ka Ba?
◻ Unsang kausaban ang nahitabo sa Israel sa 905 W.K.P.?
◻ Kinsa ang modernong-adlawng Jehu, ug giunsa pagpakita sa “dakong panon” nga ang ilang “kasingkasing matul-id” uban sa iyang kasingkasing?
◻ Unsang mga estadistika gikan sa tinuig nga taho ang nag-ilustrar sa kasibot nga gipakita sa mga Saksi ni Jehova sulod sa 1997 tuig sa pag-alagad?
◻ Bisan pag unsa tingaliy buhaton ni Satanas batok kanato, unsang espirituha ang atong ipakita sulod sa 1998 tuig sa pag-alagad?
[Chart sa panid 18-21]
1997 SERVICE YEAR REPORT OF JEHOVAH’S WITNESSES WORLDWIDE
(See bound volume)
[Hulagway sa panid 15]
Ang talagsaong tumatambong sa Memoryal nagpakitag maayong mga kalaoman sa umaabot nga pag-uswag
[Hulagway sa panid 16]
Ingong si Jehonadab nagpaluyo kang Jehu, ang “dakong panon” karong adlawa nagpaluyo sa Dakong Jehu, si Jesu-Kristo, ug sa iyang dinihogang mga igsoon