POTIPAR

[gikan sa Ehiptohanon, pinamubo sa Potipera].

Usa ka Ehiptohanong opisyal sa palasyo ug pangulo sa mga bantay ni Paraon. Siya mao ang agalon ni Jose sulod sa usa ka panahon ug mopatim-aw nga siya usa ka tawong bahandianon. (Gen 37:36; 39:4) Gipalit ni Potipar si Jose gikan sa nagapanawng Midianhon nga mga magpapatigayon ug, kay nakitang usa ka buotang sulugoon si Jose, sa ngadtongadto gitudlo siya nga tagdumala sa tibuok niyang balay ug kaumahan, nga ang maong mga kabtangan gipanalanginan ni Jehova tungod kang Jose.​—Gen 37:36; 39:1-6.

Ang asawa ni Potipar dili maunongon kaniya dili sama sa iyang sulugoong si Jose. Siya sublisubling naningkamot sa pagtental kang Jose ug, sa usa ka adlaw niana sa dihang walay laing tawo sa balay, naghawid kaniya, apan si Jose midumili gihapon ug mikalagiw. Sa dihang nahiuli sa balay si Potipar, siya nakadungog na lamang sa nagpusotpusot nga bakak nga mga akusasyon sa iyang naglagot nga asawa. Masuk-anong gipabalhog ni Potipar si Jose ngadto sa bilanggoan.​—Gen 39:7-20.

Kini nga bilanggoan daw konektado sa balay ni Potipar o labing menos ubos sa iyang pagdumala ingong “pangulo sa mga bantay.” Busa ang rekord nag-ingon nga ang pangulong magtitiing ug ang pangulong panadero ni Paraon gibalhog niining samang bilanggoan, ang “bilanggoan sa balay sa pangulo sa mga bantay,” ang ‘bilanggoan sa balay sa agalon ni Jose.’ (Gen 39:1; 40:1-7) Apan, dili gayod parehog ranggo kang Potipar ang “pangulong opisyal sa bilanggoan” nga “nagtugyan ngadto sa kamot ni Jose sa tanang binilanggo nga diha sa bilanggoan.” (Gen 39:21-23) Kini nga opisyal lagmit ubos ra ug ranggo kang Potipar.

Ang titulo ni Potipar nga “opisyal sa palasyo” maoy hubad sa Hebreohanong pulong nga sa·risʹ, “eunuko,” nga sa mas halapad nga paggamit niini nagpasabot sa usa ka mayordomo sa balay sa hari, tig-alagad sa balay sa hari, o sinaligang opisyal sa trono. Ang “opisyal sa palasyo [sa·risʹ] nga nangulo sa mga tawong manggugubat” sa dihang napukan ang Jerusalem niadtong 607 W.K.P. sa walay duhaduha maoy usa ka hataas nga opisyal sa kagamhanan, dili usa ka tawong gikapnan. (2Ha 25:19) Busa, mao man usab, si Potipar maoy usa ka sundalo, pangulo sa mga bantay, ingon man usa ka tawong minyo, mga pamatuod nga siya dili usa ka eunuko sa mas kasagarang kahulogan.