Si Eliseo Nakakitag Nagkalayong mga Karo​—Ikaw ba Usab?

Gipangita sa hari sa Sirya si propetang Eliseo ug natultolan siya sa Dotan, usa ka siyudad nga pinarilan ug nahimutang sa bungtod. Pagkagabii, ang hari sa Sirya nagpadalag mga kabayo, karong iggugubat, ug mga sundalo ngadto sa Dotan. Pagkakadlawon, ang siyudad gilibotan na sa iyang kasundalohan.​—2 Hari 6:13, 14.

Dihang mibangon ug migawas ang tig-alagad ni Eliseo, nakita niya ang mga modakop sa propeta. “Intawon, akong agalon! Unsay atong buhaton?” siya miingon. “Ayaw kahadlok,” matod ni Eliseo, “kay mas daghan sila nga uban kanato kay kanila nga uban kanila.” Unya siya miampo: “Oh Jehova, bukha ang iyang mga mata, palihog, aron siya makakita.” Ang asoy nagpadayon: “Dihadiha gibuka ni Jehova ang mga mata sa tig-alagad, maong siya nakakita; ug, tan-awa! ang bukirong rehiyon napuno sa mga kabayo ug sa mga karong iggugubat nga kalayo nga naglibot kang Eliseo.” (2 Hari 6:15-17) Unsay atong makat-onan niini ug sa uban pang kasinatian ni Eliseo?

Bisag gilibotan sila sa kasundalohan sa Sirya, si Eliseo kalmado kay siya misalig kang Jehova ug nasinati na niya nga siya gipanalipdan sa Diyos. Dili kita makadahom ug mga milagro karon, apan nahibalo kita nga si Jehova nanalipod sa iyang katawhan ingong usa ka grupo. Kita samag gilibotan ug nagkalayong mga kabayo ug karo. Kon kita “makakita” niana pinaagi sa atong mga mata sa pagtuo ug mosalig kanunay sa Diyos, kita ‘magpuyo sa kasegurohan’ ug magtagamtam sa panalangin ni Jehova. (Sal. 4:8) Atong hisgotan kon sa unsang paagi kita makabenepisyo sa ubang hitabo sa kinabuhi ni Eliseo.

Kas-a samtang si Eliseo nagdaro, si propetang Elias miduol ug gisul-ob ang iyang opisyal nga besti ngadto kang Eliseo. Nahibalo si Eliseo kon unsay gipasabot niadto. Mao nga siya nagkombira, nanamilit sa iyang mga ginikanan, ug milakaw aron mag-alagad kang Elias. (1 Hari 19:16, 19-21) Kay si Eliseo andam moalagad sa Diyos sa bug-os, siya gigamit ni Jehova ug sa ulahi nahimong propeta puli ni Elias.

Lagmit unom ka tuig si Eliseo nahimong tig-alagad ni Elias. Siya ang ‘tigbubo ug tubig sa mga kamot ni Elias.’ (2 Hari 3:11) Kay batasan niadto nga magkinamot dihang mokaon, ang sulugoon maoy magbubo ug tubig sa mga kamot sa agalon aron mahinlo kini. Busa si Eliseo may pipila ka ubos nga trabaho, apan giisip niyang pribilehiyo ang pag-alagad kang Elias.

Daghang Kristohanon usab karon ang misulod sa lainlaing matang sa bug-os panahong pag-alagad. Gihimo nila kini tungod sa ilang pagtuo ug tinguha nga bug-os gamiton ang ilang kusog sa pag-alagad kang Jehova. Ang pipila kinahanglang mobiya sa ilang balay aron mag-alagad sa Bethel, sa konstruksiyon, ug uban pa​—nga tingali giisip sa daghan nga ubos nga trabaho. Dili angayng isipon sa mga Kristohanon nga ubos o dili importante ang maong pag-alagad kay kana bililhon kaayo kang Jehova.​—Heb. 6:10.

Sa wala pa ‘dad-a ni Jehova si Elias ngadto sa langit pinaagi sa alimpulos,’ gisugo niya ang propeta nga moadto sa Bethel gikan sa Gilgal. Dili unta pakuyogon ni Elias ang iyang tig-alagad, apan si Eliseo miingon: “Dili ako mobiya kanimo.” Samtang nagpanaw, kaduha sultihi ni Elias si Eliseo nga magpabilin apan wala kini mosugot. (2 Hari 2:1-6) Si Eliseo miunong kang Elias, sama kang Ruth nga miunong kang Noemi. (Ruth 1:8, 16, 17) Ngano? Kay ang pag-alagad kang Elias giisip niyang pribilehiyo gikan sa Diyos.

Si Eliseo maayong panig-ingnan kanato. Kon makadawat kitag pribilehiyo gikan sa organisasyon sa Diyos, mapabilhan lang nato kana pag-ayo kon atong hinumdoman nga kita nag-alagad kang Jehova. Wala nay kadungganan nga molabaw pa niana.​—Sal. 65:4; 84:10.

Samtang nagpanaw sila, si Elias miingon kang Eliseo: “Pangayo kon unsay akong buhaton alang kanimo sa dili pa ako kuhaon gikan kanimo.” Sama kang Solomon, si Eliseo nangayog butang nga makatabang sa iyang pag-alagad kang Jehova. Siya mihangyo nga ang ‘duha ka bahin sa espiritu ni Elias mahianha kaniya.’ (1 Hari 3:5, 9; 2 Hari 2:9) Sa Israel, ang panganayng anak nga lalaki makadawat ug duha ka bahin sa panulondon. (Deut. 21:15-17) Sa diwa, si Eliseo mihangyo nga siya ilhong espirituwal nga manununod ni Elias. Dugang pa, gusto usab ni Eliseo nga makabatog kaisog nga sama kang Elias, kinsa “bug-os nangabugho alang kang Jehova.”​—1 Hari 19:13, 14.

Unsay tubag ni Elias sa gihangyo sa iyang tig-alagad? “Ikaw nangayo ug lisod nga butang,” matod sa propeta. “Kon ikaw makakita kanako sa dihang kuhaon ako gikan kanimo, ingon niana ang mahitabo kanimo; apan kon dili, dili kini mahitabo.” (2 Hari 2:10) Dayag nga duha ang kahulogan sa tubag ni Elias. Una, ang Diyos ray magbuot kon madawat ba ni Eliseo ang iyang gipangayo. Ikaduha, aron madawat kana ni Eliseo, siya kinahanglang mounong kang Elias bisag unsa pay mahitabo.

Unsay panglantaw sa Diyos sa gipangayo ni Eliseo nga duha ka bahin sa espiritu ni Elias? Ang asoy nag-ingon: “Nahitabo nga sa naglakaw sila, nga nagsultihanay samtang naglakaw, tan-awa! usa ka nagkalayong karo nga iggugubat ug nagkalayong mga kabayo, ug kini nagbulag kanilang duha; ug si Elias mikayab diha sa alimpulos ngadto sa kalangitan. Sa kasamtangan, si Eliseo nakakita niana.”a Kadto ang tubag ni Jehova sa hangyo ni Eliseo. Siya nakakita kang Elias nga gikuha gikan kaniya, nakadawat ug duha ka bahin sa espiritu ni Elias, ug nahimong espirituwal nga manununod sa propeta.​—2 Hari 2:11-14.

Gipunit ni Eliseo ang opisyal nga besti nga nahulog gikan kang Elias ug gisul-ob kana. Ang besti nagpaila nga si Eliseo propeta na sa Diyos. Sa ulahi, iyang gipamatud-an usab nga siya propeta sa Diyos dihang iyang gibahin ang Suba sa Jordan.

Seguradong wala malimot si Eliseo sa pagkakita niya kang Elias nga mikayab sa alimpulos. Bisan kinsa mahingangha gayod kon makakitag nagkalayong karong iggugubat ug mga kabayo! Pamatuod kadto nga gihatag ni Jehova ang gipangayo ni Eliseo. Dihang tubagon sa Diyos ang atong mga pag-ampo, kita dili makakitag nagkalayong karong iggugubat ug mga kabayo. Apan masabtan nato nga gamiton sa Diyos ang iyang dakong gahom aron maseguro nga matuman ang iyang kabubut-on. Ug dihang makita nato nga gipanalanginan ni Jehova ang yutan-ong bahin sa iyang organisasyon, kita samag “nakakita” sa iyang langitnong karo nga nagapanaw.​—Ezeq. 10:9-13.

Daghag kasinatian si Eliseo nga nagkombinsir kaniya nga si Jehova gamhanan kaayo. Gani, sa tabang sa balaang espiritu sa Diyos siya nakahimog 16 ka milagro​—doble sa kang Elias.b Sa ikaduhang higayon, si Eliseo nakakitag nagkalayong mga kabayo ug karong iggugubat panahon sa krisis sa Dotan nga gihisgotan sa introduksiyon niining artikuloha.

Si Eliseo gilibotag mga kaaway didto sa Dotan apan nagpabiling kalmado. Ngano? Kay siya may lig-ong pagtuo kang Jehova. Kita usab nagkinahanglag pagtuo nga sama niana. Busa, angay kitang moampo alang sa balaang espiritu sa Diyos aron ikapasundayag nato ang pagtuo ug ang ubang bahin sa bunga sa espiritu.​—Luc. 11:13; Gal. 5:22, 23.

Ang nahitabo sa Dotan naghatag ug dugang rason kang Eliseo nga mosalig kang Jehova ug sa iyang nagapanalipod nga mga manulonda. Nasabtan sa propeta nga gisugo sa Diyos ang mga manulonda aron libotan ang siyudad ug ang misulong nga kasundalohan. Gibutaan sa Diyos ang mga kaaway mao nga milagrosong naluwas si Eliseo ug ang iyang tig-alagad. (2 Hari 6:17-23) Nianang makuyaw nga panahon ug sa ubang situwasyon, si Eliseo nagpakitag pagtuo ug bug-os nga pagsalig kang Jehova.

Sama ni Eliseo, angay kitang mosalig kang Jehova. (Prov. 3:5, 6) Kon himoon nato kana, ‘ang Diyos magpakitag kaluoy ug magpanalangin kanato.’ (Sal. 67:1) Tinuod, walay literal nga nagkalayong mga karo ug kabayo nga naglibot kanato. Apan sa taliabot nga “dakong kasakitan,” panalipdan ni Jehova ang iyang katawhan. (Mat. 24:21; Pin. 7:9, 14) Sa kasamtangan, dili gayod nato kalimtan nga “ang Diyos maoy atong dalangpanan.”​—Sal. 62:8.