SAKOP NGA MGA LUNGSOD

Gagmayng mga lungsod nga anaa sa palibot sa usa ka mas dakong lungsod o siyudad. Ang kaulohan o pangunang siyudad sa usa ka distrito mao ang metropolis, o “inahan” nga siyudad, sama nianang sa 1 Cronicas 18:1: “Sa Gat ug sa mga lungsod nga sakop niini” (sa literal, “Ang Gat ug ang iyang mga anak nga babaye”). Ang Tiro gitawag nga “anak nga babaye” sa Sidon, usa ka siyudad nga dayag nga mas karaan kay sa Tiro, nga lagmit sa sinugdan usa ka kolonya sa Sidon. (Isa 23:​8, 12; Gen 10:19; Jos 11:8) Ang mga lungsod sa Juda sakop sa Jerusalem. (Sal 48:11; 97:8; Lam 3:51) Ang ubang “inahan” nga mga siyudad nga may sakop nga mga lungsod mao ang Samaria ug Sodoma (Eze 16:53), Raba sa Ammon (Jer 49:3), Kenat (Num 32:42), Ekron (Jos 15:45), Asdod ug Gaza (Jos 15:47), Bet-sean, Ibleam, Dor, En-dor, Taanak, ug Megido (Jos 17:11).

Ang “anak” nga mga lungsod naggikan sa “inahan” nga siyudad o kaha nag-agad niini sa politikanhon, ekonomikanhon, ug usahay sa relihiyoso nga paagi. Sa pipila ka kahimtang ang sakop nga mga lungsod dili-pinarilan o dili kaayo kinutaan, ug sa mga panahon sa paglikos ang mga molupyo modangop sa “inahan” nga siyudad.​—Jer 4:5; 8:14.

Ang karaang siyudad sa Jerusalem ingong “inahan” sa sakop nga mga lungsod sa Juda gigamit sa simbolikong paagi sa paglarawan sa “langitnong Jerusalem,” ang Mesiyanikong Gingharian ni Jehova pinaagi ni Jesu-Kristo, nga niana kadtong nangita sa pagkamatarong makakaplag ug kadangpan sa “adlaw ni Jehova batok sa tanang kanasoran.”​—Heb 12:​22, 28; Abd 15, 17; Sal 48:11-13; Joe 2:32.

Ang Dakong Babilonya gihulagway sa Pinadayag kapitulo 17 ingong usa ka babayeng pampam ug ingong usa ka siyudad nga may mga anak nga babaye. Kini maoy mga organisasyon nga naggikan sa inahan nga organisasyon. Sanglit iya mang mga sakop, kini mangapukan sa kalaglagan uban kaniya.​—Tan-awa ang SIYUDAD.