GERAR

Usa ka dapit nga duol sa Gaza nga gihisgotan diha sa kinaunahang rekord bahin sa mga utlanan sa teritoryo sa Canaan. (Gen 10:19) Sa nangagi ang Gerar sagad nga gihunahuna nga mao ang Tell Jemmeh (Tel Gamma), mga 12 km (7.5 mi) sa H sa modernong Gaza. Apan sa pagkakaron gituohan sa daghang geograpo nga kini mao ang Tell Abu Hureirah (Tel Haror), nga nahimutang diha sa tiilan sa kabukiran sa Judea, mga 19 km (12 mi) sa HS sa modernong Gaza. Daghang bika nga gituohang sukad pa sa panahon sa mga patriarka ang nakaplagan sa maong dapit. Si Abraham ug, sa ulahi, si Isaac mipuyo sa usa ka panahon ingong mga langyaw didto sa Gerar ug nakiglabot sa hari niini nga si Abimelek (lagmit duha ka magkalahing magmamando nga nakabaton niini nga ngalan o opisyal nga titulo).​—Gen 20:1-18; 21:22-34; 26:1-31; tan-awa ang ABIMELEK Num. 1 ug 2.

Human ipadangat ni Jehova ang kapildihan sa dakong kasundalohan ni Zera nga Etiopianhon, ang kasundalohan ni Haring Asa migukod sa nangalagiw nga mga kaaway hangtod sa Gerar. Human niadto ang mga Judeanhon naghampak ug nag-agaw sa “tanang siyudad palibot sa Gerar” (lagmit tungod sa ilang pakig-alyansa sa mga Etiopianhon); “bisan ang mga tolda nga may mga kahayopan ilang gihampak mao nga sila nakailog sa mga panon sa kahayopan nga daghan kaayo ug mga kamelyo.”​—2Cr 14:8-15.

Ang pipila ka eskolar nagsugyot nga usbon ang 1 Cronicas 4:​39, 40 aron mabasa nga “Gerar” (sama sa LXX) inay nga “Gedor.” Kining tekstoha naglangkit sa Gedor sa usa ka rehiyon nga sa sinugdan gipuy-an sa mga Hamihanon ug may maayong sibsibanan, ug kini nga kahubitan mohaom sa mga paghisgot sa Bibliya sa dapit nga palibot sa Gerar.