BALAY SA AMAHAN

Ang Hebreohanong ekspresyon nga behth ʼav (plural, behth ʼa·vohthʹ) mahimong magtumong (1) sa usa ka puloy-anang dapit (Deu 22:21); (2) sa panimalay sa amahan sa usa ka tawo diha sa iyang dapit nga puloy-anan (Gen 31:30; 38:11); (3) niadtong naglangkob sa panimalay mismo, bisan atua sa usa ka dapit nga halayo sa pinuy-anan sa mga katigulangan (Gen 46:31; Huk 9:18); o (4), sumala sa lainlaing paghubad niini, sa usa ka “balay sa amahan,” “pangunang balay,” “balay sa katigulangan,” nga, sa pipila ka kahimtang, adunay ubay-ubayng mga banay. Pananglitan, sa dihang giihap ang mga Israelinhon didto sa kamingawan, upat ka banay ang giisip nga naglangkob sa balay sa amahan ni Kohat. (Num 3:​19, 30; tan-awa usab ang Ex 6:14; Num 26:20-22; Jos 7:17.) Ubay-ubayng mga balay sa amahan ang naglangkob sa usa ka tribo (sama sa tribo ni Levi, nga gilangkoban sa mga balay sa amahan ni Gerson, Kohat, ug Merari).

Bisan pa niana, ang mga terminong “balay sa amahan,” “balay sa among amahan,” ug ang uban pa, dili kanunayng limitado sa mga paggamit nga nahisgotan na. (Alang sa mas lapad nga paggamit sa “balay sa amahan” tan-awa ang Num 17:​2, 6, diin ang balay sa amahan maoy usa ka tribo.)

Sa dihang midaghan ang populasyon sa Israel ug gipuy-an ang lainlaing dapit sa Yutang Saad, ang mga balay sa amahan midaghan usab. Ang mga saserdote giorganisar ni David ngadto sa 24 ka dibisyon sa pag-alagad sumala sa mga balay sa ilang amahan, 16 ka dibisyon alang kang Eleasar ug 8 alang kang Itamar. Ang 24 ka pangulo gitawag nga “mga pangulo alang sa mga balay sa ilang mga amahan.” (1Cr 24:4-6) Ang nahibilin sa mga Levihanon gipili alang sa pipila ka buluhaton pinaagig ripa, nga walay pagsapayan sa edad sa mga pangulo sa mga balay sa ilang amahan.​—1Cr 24:20-31.

Ang matag balay sa amahan sa mga Israelinhon gihawasan sa usa nga nakapanunod ug katungdanan sa pagkapangulo maylabot sa opisyal nga kalihokan sa tribo ug sa pagpahamtang ug paghukom. (Neh 7:​70, 71; 11:13) Sa pagsaulog sa Paskuwa didto sa Jerusalem sa panahon ni Haring Josias, mopatim-aw nga ang katawhan misulod sa sawang sa templo sumala sa mga balay sa ilang amahan aron sa pagtanyag sa ilang mga halad. Ang mga Levihanon, sumala sa ilang mga dibisyon pinasukad sa mga balay sa ilang amahan, midawat sa mga halad sa katawhan ug giandam kini.​—2Cr 35:​4, 5, 12.

Si Jesu-Kristo misaad sa iyang mga sumusunod nga siya moadto aron sa pag-andam ug dapit alang kanila didto sa ‘balay sa iyang Amahan,’ nga nagtumong sa langitnong puloy-anan ni Jehova.​—Ju 14:2; tan-awa ang BANAY.