AWIT SA PAGBANGOTAN
Usa ka komposisyon sa mga pulong o mga honi nga nagpahayag sa tumang kasubo sama sa kaguol tungod sa kamatayon sa usa ka higala o sa usa ka minahal; usa ka awit o balak sa pagbangotan. Sa Bag-ong Kalibotang Hubad ang hubad nga “awit sa pagbangotan” sagad naggikan sa Hebreohanong pulong nga qi·nahʹ, nga nagpasabot sa usa ka masulub-ong komposisyon, usa ka awit o balak sa pagbangotan, o usa ka pagbakho.
Ang Hebreohanong termino nga shig·ga·yohnʹ diha sa superskripsiyon sa Salmo 7 gihubad usab nga “awit sa pagbangotan” ug lagmit nagpasabot sa usa ka emosyonal kaayong awit nga may paspas nga mga pag-usab-usab sa ritmo. (Ftn sa Rbi8) Ang usa ka plural nga porma sa Hebreohanong pulong niini makita sa Habacuc 3:1, diin kini gihubad nga “mga awit sa pagbangotan.” Tungod sa kinaiyahan niini, ang mga awit sa pagbangotan gihisgotan nga duyog sa pagdanguyngoy ug pagminatay (Eze 2:10), ug labing menos ang pipila niini nasulat ug natipigan. Ang 2 Cronicas 35:25 nagtaho nga si Jeremias miawit tungod sa namatay nga si Haring Josias ug nagpaila nga adunay koleksiyon kanhi sa mga awit sa pagbangotan (Heb., qi·nohthʹ), kay didto kini giingon: “Ang tanang lalaking mag-aawit ug mga babayeng mag-aawit nagpadayon paghisgot bahin kang Josias diha sa ilang mga awit sa pagbangotan hangtod karong adlawa; ug gihimo nila kini sila ingong regulasyon sa Israel, ug anaa kini sila nahisulat lakip sa mga awit sa pagbangotan.”
Ang mga awit sa pagbangotan gilangkit sa pagbalata, sama sa dihang si Jehova miingon ngadto sa dili-matinumanong Israel: “Ang inyong mga pista himoon ko nga pagbangotan ug ang tanan ninyong awit himoon ko nga awit sa pagbangotan.” (Am 8:10) Busa, ang pag-awit kaniadto ug usa ka awit sa pagbangotan nagpasabot sa pagkanta ug usa ka awit o balak sa pagbangotan, o masulub-ong komposisyon, tingali usa nga nagpakita sa pagsalikway ni Jehova o sa pagtandi sa kanhing paborableng mga kahimtang sa dili malipayong kahimtang sa ulahi. (Jer 7:29; Eze 19:1-14) Ang awit sa pagbangotan sagad awiton sa kababayen-an.—Eze 27:32; Jer 9:20.
Ang pipila ka awit sa pagbangotan maoy makasaysayanhon, nga gitagik human sa usa ka hitabo, sama sa kamatayon sa usa ka minahal nga kaila. Usa ka pananglitan niining matanga sa awit mao ang awit sa pagbangotan ni David nga giawit tungod sa iyang kasubo labot kang Saul ug Jonatan, kinsa namatay didto sa Bukid sa Gilboa panahon sa pagpakiggubat batok sa mga Filistehanon. (2Sa 1:17-27; 1Sa 31:8) Si Haring David miawit usab nga masulub-on tungod kang Abner human sa paglubong kaniya. (2Sa 3:31-34) Samtang ang mga awit sa pagbangotan maylabot sa kamatayon sa usa ka tawo lagmit gitagik aron sa paghatag ug paghupay sa mga nahibilin, taliwala sa matinumanong mga alagad sa Diyos kini gihimo dili aron himayaon ang namatay.—Ecc 9:5, 10.
Ang basahon sa Lamentaciones maoy usa ka awit sa pagbangotan nga gisulat ni Jeremias human sa kalaglagan sa Jerusalem diha sa mga kamot sa mga Babilonyanhon niadtong 607 W.K.P. Bisan tuod kini nagpahayag ug kasubo tungod sa maong kalaglagan, kini nagpasundayag usab sa pagtuo ug paglaom kang Jehova; ug ang ikalimang kapitulo nagbukas uban ang pangamuyo ngadto sa Diyos nga hinumdoman ang iyang katawhan nga nahimong “mga ilo na lamang nga walay amahan.”—Lam 3:22-27; 5:1-3; tan-awa ang LAMENTACIONES, BASAHON SA.
Ang pipila ka narekord nga mga awit sa pagbangotan diha sa Bibliya maoy matagnaon ug detalyadong naghubit sa nagsingabot nga kalamidad, nga usahay maorag kini nahitabo na. Ang matagnaong mga awit sa pagbangotan gipatugbaw batok sa Tiro ug sa hari niini (Eze 26:17; 27:1, 2; 28:11-19), maingon man batok kang Paraon ug sa Ehipto. (Eze 32:2-16) Ang pagpatugbaw ug awit sa pagbangotan tungod sa Juda ug Jerusalem gihisgotan maylabot sa ilang kalaglagan.—Jer 9:9-11.