AHIAS

[Si Jehova Maoy (Akong) Igsoon].

1. Ang ikalima nga ginganlang anak nga lalaki ni Jerameel sa tribo ni Juda.​—1Cr 2:25.

2. Usa ka pangulo sa banay sa tribo ni Benjamin. (1Cr 8:​6, 7) Ang pipila naghunahuna nga siya mao ra si Ahoa sa bersikulo 4.

3. Anak nga lalaki ni Ahitub ug apo-sa-tuhod ni Eli. Siya nag-alagad ingong hataas nga saserdote sa Shilo sa hari pa si Saul. (1Sa 14:​3, 18) Gituohan sa pipila nga siya mao ang igsoong lalaki ni Ahimelek o, pinaagi sa paghulip ug “melek” sa “as” diha sa iyang ngalan, siya mao si Ahimelek.​—1Sa 22:9.

4. Usa ka Pelonhon nga usa sa gamhanang mga tawo sa kasundalohan ni David.​—1Cr 11:36.

5. Usa ka Levihanon nga gitudlo sa pagdumala sa mga bahandi sa balay ni Jehova sa paghari ni David.​—1Cr 26:20.

6. Anak nga lalaki ni Sisa. Siya ug ang iyang igsoong lalaki nga si Elihorep mao ang mga sekretaryong prinsipe ni Solomon.​—1Ha 4:​2, 3.

7. Usa ka manalagna ni Jehova nga nagpuyo sa Shilo nga mitagna kon sa unsang paagi mabahin ang gingharian ni Solomon. Gigisi ang bag-ong besti ngadto sa 12 ka bahin, si Ahias naghatag sa 10 ka piraso ngadto kang Jeroboam, nga nagsaad nga kon si Jeroboam magmatinumanon, si Jehova magtukod kaniya ug “usa ka malungtarong balay.” (1Ha 11:29-39; 12:15; 2Cr 10:15) Human sa katuigan sa daotang pagmando, gisugo ni Jeroboam ang iyang asawa sa pagpakisayod kang Ahias mahitungod sa kahimtang sa iyang masakitong anak nga lalaki. Ang manalagna, nga niadtong tungora tigulang ug buta, nagtagna nga sa dili madugay ang batang lalaki mamatay ug nga si Jehova “magasilhig sa luyo sa balay ni Jeroboam, ingon sa usa nga magahinlo sa kinalibang.” (1Ha 14:2-18; 15:29) Ang “panagna ni Ahias,” usa sa sinulat nga mga rekord lakip sa mga kalihokan ni Solomon, nagpabilin hangtod sa panahon sa paghugpong ni Esdras sa Mga Cronicas.​—2Cr 9:29.

8. Amahan ni Baasa, kinsa nakigkunsabo batok kang Nadab ug naghimo sa iyang kaugalingon nga hari sa Israel; sa tribo ni Isacar.​—1Ha 15:​27, 33; 2Ha 9:9.

9. Usa sa 44 ka pangulo sa katawhan kansang kaliwat, kon dili man siya mismo, miduyog sa pagtimbre sa “kasaligang kontrata” ni Nehemias sa paglakaw subay sa mga balaod ni Jehova.​—Neh 10:26; 9:38.