Epektibo ba ang Imong Pagpanudlo?

ANG tanang ginikanan, mga ansiyano, magwawali sa maayong balita gisugo nga mahimong mga magtutudlo. Ang mga ginikanan magtudlo sa ilang mga anak, ang mga ansiyano magtudlo sa mga membro sa Kristohanong kongregasyon, ug ang mga magwawali sa maayong balita magtudlo sa bag-ong mga interesado. (Deuteronomio 6:6, 7; Mateo 28:19, 20; 1 Timoteo 4:13, 16) Unsay imong buhaton aron mahimong mas epektibo ang imong pagpanudlo? Ang usa ka paagi mao ang pagsundog sa panig-ingnan ug paagi sa takos nga mga magtutudlo nga gihisgotan diha sa Pulong sa Diyos. Si Esdras maoy ingon niana nga magtutudlo.

Pagkat-on Gikan sa Panig-ingnan ni Esdras

Si Esdras maoy usa ka saserdote nga membro sa banay ni Aaron nga nagpuyo sa Babilonya mga 2,500 ka tuig kanhi. Sa tuig 468 W.K.P., miadto siya sa Jerusalem aron sa pagpalambo sa putling pagsimba taliwala sa mga Hudiyo nga nagpuyo didto. (Esdras 7:1, 6, 12, 13) Kining buluhatona nagkinahanglan nga iyang tudloan ang katawhan bahin sa Balaod sa Diyos. Unsay gihimo ni Esdras aron maseguro nga epektibo ang iyang pagpanudlo? Mihimo siyag daghang kinahanglanong mga lakang. Matikdi kining mga lakanga nga narekord sa Esdras 7:10:

“Si Esdras [1] nakaandam sa iyang kasingkasing [2] sa pagkonsulta sa balaod ni Jehova ug [3] sa pagbuhat niini ug [4] sa pagtudlo sa Israel sa regulasyon ug sa hustisya.” Tan-awon nato sa makadiyot ang matag usa niining mga lakanga ug atong susihon kon unsay atong makat-onan gikan niini.

“Si Esdras Nakaandam sa Iyang Kasingkasing”

Maingon nga andamon una sa usa ka mag-uuma ang yuta pinaagi sa pagdaro niini sa dili pa pugsan ug binhi, mainampoong giandam ni Esdras ang iyang kasingkasing sa pagdawat sa pulong sa Diyos. (Esdras 10:1) Sa laing pagkasulti, iyang ‘gikiling ang iyang kasingkasing’ ngadto sa pagtulon-an ni Jehova.—Proverbio 2:2.

Sa susama, ang Bibliya nag-ingon nga si Haring Jehosapat ‘nag-andam sa iyang kasingkasing sa pagpangita sa matuod nga Diyos.’ (2 Cronicas 19:3) Sa kasukwahi, ang kaliwatan sa Israel “nga wala mag-andam sa ilang kasingkasing” gihubit ingong “gahian ug masukihon.” (Salmo 78:8) Makita ni Jehova ang “natago nga pagkatawo sa kasingkasing.” (1 Pedro 3:4) Oo, “tudloan niya ang mga maaghop sa iyang dalan.” (Salmo 25:9) Busa, pagkahinungdanon nga sundon sa mga magtutudlo karong adlawa ang panig-ingnan ni Esdras pinaagi sa mainampoong pag-andam una sa ilang kasingkasing nga maanaa sa maayong kondisyon!

“Sa Pagkonsulta sa Balaod ni Jehova”

Aron mahimong takos nga magtutudlo, gikonsulta ni Esdras ang Pulong sa Diyos. Kon magpakonsulta ka sa doktor, dili ka ba maminaw pag-ayo ug seguroon nga imong nasabtan ang tanan niyang gisulti o gireseta? Walay duhaduha nga himoon nimo kana, tungod kay nameligro ang imong panglawas. Busa, labi pa gayod natong hatagag ugdang nga pagtagad ang mga butang nga gisulti, o gireseta, ni Jehova kanato pinaagi sa iyang Pulong, ang Bibliya, ug pinaagi sa “matinumanon ug maalamong ulipon.” Angay nato kanang hatagag pagtagad tungod kay ang iyang mga tambag naglangkit sa atong kinabuhi mismo! (Mateo 4:4; 24:45-47) Siyempre, mahimong masayop ang doktor, apan “ang balaod ni Jehova hingpit.” (Salmo 19:7) Dili na gayod kita magkinahanglan ug lain pang opinyon.

Ang mga basahon sa Bibliya sa mga Cronicas (nga sa sinugdan gisulat ni Esdras sa usa ka tomo) nagpakita nga si Esdras maoy usa gayod ka makugihon nga estudyante. Aron masulat ang maong mga basahon, migamit siya ug daghang reperensiya.a Ang mga Hudiyo, nga bag-o lang nangabot gikan sa Babilonya, nagkinahanglag sumaryo sa kasaysayan sa ilang nasod. Kulang ang ilang kahibalo bahin sa mga pagsaulog sa ilang relihiyon, sa pag-alagad sa templo, ug sa mga buluhaton sa mga Levihanon. Hinungdanon kaayo alang kanila ang mga talaan sa kagikan. Gihatagag linaing pagtagad ni Esdras ang maong mga butang. Hangtod sa pag-abot sa Mesiyas, ang mga Hudiyo kinahanglang magpabiling usa ka nasod nga adunay kaugalingong yuta, templo, mga saserdote, ug gobernador. Tungod sa impormasyon nga nahipos ni Esdras, ang panaghiusa ug matuod nga pagsimba mapreserbar.

Komosta ang imong batasan sa pagtuon kon itandi sa iya ni Esdras? Ang makugihong pagtuon sa Bibliya motabang kanimo sa pagtudlo sa Bibliya sa epektibong paagi.

‘Konsultaha ang Balaod ni Jehova’ Ingong Pamilya

Ang pagkonsulta sa balaod ni Jehova dili lamang pinaagi sa personal nga pagtuon. Ang pagtuon sa pamilya maoy usa ka ekselenteng kahigayonan sa pagbuhat usab niini.

Si Jan ug Julia, usa ka magtiayon sa Netherlands, nagbasa ug kusog ngadto sa ilang duha ka anak lalaki sukad gayod sa ilang pagkahimugso. Karon, si Ivo 15 anyos na, ug si Edo 14. Kas-a sa usa ka semana, himoon gihapon nila ang ilang pagtuon sa pamilya. Si Jan nag-ingon: “Ang among pangunang tumong dili ang gidaghanon sa among natun-an panahon sa pagtuon kondili ang nasabtan sa mga bata bahin sa gihisgotan.” Siya midugang: “Manukiduki ug maayo ang mga bata. Ilang susihon ang dili sinating mga pulong ug mga karakter sa Bibliya—kon diin sila nagpuyo, kinsa sila, unsay ilang trabaho, ug uban pa. Sukad sila makamaong mobasa, ilang gikonsulta ang mga librong sama sa Insight on the Scriptures, mga diksiyonaryo, ug mga ensiklopedia. Kini naghimo sa pagtuon sa pamilya nga mas makalingaw. Ang mga bata kanunayng maghinamhinam sa pagtuon sa pamilya.” Ingong dugang benepisyo, silang duha usab karon parehong nanghawod sa ilang mga klase bahin sa katakos sa pinulongan.

Si John ug Tini, laing magtiayon sa Netherlands, nagtuon uban sa ilang anak nga lalaki, si Esli (24 anyos na karon ug nagpayunir sa laing kongregasyon), ug sa ilang anak nga babaye, si Linda (20 anyos na karon ug naminyo sa usa ka buotan nga batan-ong brader). Apan, inay tun-an ang usa ka publikasyon sa naandang pangutanag-tubag nga paagi, ilang gipahiangay sa edad ug panginahanglan sa ilang mga anak ang pagtuon sa pamilya. Unsang paagiha ang ilang gigamit?

Nag-ingon si John nga ang iyang mga anak nagpilig makaiikag nga ulohan gikan sa “Mga Pangutana Gikan sa mga Magbabasa” (gikan sa Ang Bantayanang Torre) ug sa “Ang Hunahuna sa Bibliya” (gikan sa Pagmata!). Sa ulahi, ilang gipresentar kon unsay ilang naandam, nga kanunayng miresulta sa makalingaw nga panaghisgot sa pamilya. Niining paagiha nakakuhag kasinatian ang mga batan-on pinaagi sa pagpanukiduki ug sa paghisgot sa mga resulta sa ilang pagtuon. ‘Gikonsulta ba ninyo ang balaod ni Jehova’ uban sa inyong mga anak? Dili lamang kini magpauswag sa inyong personal nga katakos sa pagpanudlo kondili motabang usab sa inyong mga anak nga mahimong mas epektibong mga magtutudlo.

“Sa Pagbuhat Niini”

Gipadapat ni Esdras ang iyang nakat-onan. Pananglitan, sa didto pa siya sa Babilonya, mahimong haruhay ang iyang pagkinabuhi. Bisan pa niana, sa dihang iyang naamgohan nga makatabang siya sa iyang katawhan sa laing nasod, gibaylo niya ang kahamugaway sa Babilonya sa layong siyudad sa Jerusalem, uban sa tanang kahasol, mga problema, ug kapeligrohan niini. Dayag nga si Esdras wala lang mokuha ug kahibalo sa Bibliya kondili andam siyang mopadapat sa kon unsay iyang nakat-onan.—1 Timoteo 3:13.

Sa ulahi, sa nagpuyo na siya sa Jerusalem, gipakita pag-usab ni Esdras nga iyang gipadapat ang iyang nakat-onan ug gipanudlo. Nadayag kini sa dihang nasayran niya nga nakigminyo ang mga lalaking Israelinhon sa mga babayeng pagano. Ang rekord sa Bibliya nagtug-an kanato nga ‘iyang gigisi ang iyang besti ug ang iyang kupo nga walay bukton ug gilarot ang pipila sa buhok sa iyang ulo ug sa iyang bungot ug nagpadayon sa paglingkod nga nahiugnok hangtod sa kagabhion.’ ‘Naulaw ug nanglipaghong pa gani siya sa pagyahat sa iyang nawong’ ngadto kang Jehova.—Esdras 9:1-6.

Dako kaayo ug epekto kaniya ang iyang pagtuon sa Balaod sa Diyos! Tin-aw sa hunahuna ni Esdras ang makalilisang nga sangpotanan sa pagkadili-matinumanon sa katawhan. Diyutay na lang ang namauli nga mga Hudiyo. Kon sila makigminyo sa dili mga Hudiyo, lagmit nga sila sa ngadtongadto mosagol na sa naglibot nga paganong mga nasod, ug ang putling pagsimba dali rang mahanaw gikan sa nawong sa yuta!

Ikalipay, ang panig-ingnan ni Esdras sa debotadong kahadlok ug kasibot nagtukmod sa mga Israelinhon sa pagtul-id sa ilang mga dalan. Gipapahawa nila ang ilang langyawng mga asawa. Natul-id ang tanan sulod sa tulo ka bulan. Ang pagkamaunongon ni Esdras sa Balaod sa Diyos nakatabang ug dako nga mahimong epektibo ang iyang pagpanudlo.

Mao usab karong adlawa. Usa ka Kristohanong amahan miingon: “Mas pang sundon sa mga bata ang imong panig-ingnan kay sa imong ginasulti!” Ang susamang prinsipyo mapadapat diha sa Kristohanong kongregasyon. Mahimong dahomon sa mga ansiyano nga nagpasundayag ug maayong panig-ingnan nga ang kongregasyon mosanong sa ilang pagpanudlo.

“Sa Pagtudlo sa Israel sa Regulasyon ug sa Hustisya”

Aduna pay laing rason kon nganong epektibo ang pagpanudlo ni Esdras. Wala niya itudlo ang kaugalingon niyang mga ideya, kondili iyang gitudlo ang “regulasyon ug ang hustisya.” Sa ato pa, ang mga regulasyon, o mga balaod, ni Jehova. Kini mao ang iyang katungdanan isip saserdote. (Malaquias 2:7) Nagtudlo usab siya ug hustisya, ug naghatag siya ug panig-ingnan sa iyang gitudlo pinaagi sa pagtuman sa balaod diha sa makataronganon ug makiangayong paagi, sumala sa sukdanan. Kon magpakitag hustisya kadtong anaay awtoridad, adunay kalig-on ug mapatungha ang permanenteng mga resulta. (Proverbio 29:4) Sa susama, ang Kristohanong mga ansiyano, ginikanan, ug mga magwawali sa Gingharian nga sinati pag-ayo sa Pulong sa Diyos makapalig-on sa espirituwalidad kon itudlo nila ang mga regulasyon ug hustisya ni Jehova diha sa kongregasyon, sa ilang mga pamilya, ug ngadto sa mga interesado.

Dili ka ba mouyon nga ang imong pagpanudlo mahimong mas epektibo kon imong sundogon sa bug-os ang panig-ingnan sa matinumanong si Esdras? Busa, ‘andama ang imong kasingkasing, konsultaha ang balaod ni Jehova, buhata kana, ug itudlo ang regulasyon ug hustisya ni Jehova.’—Esdras 7:10.

[Footnote]

[Kahon/Hulagway sa panid 22]

UNSAY NAKAPAEPEKTIBO SA PAGPANUDLO NI ESDRAS?

 1. Giandam niya ang iyang kasingkasing aron maanaa sa maayong kondisyon

 2. Gikonsulta niya ang Balaod ni Jehova

 3. Gihatag niya ang maayong panig-ingnan sa pagpadapat sa iyang nakat-onan

 4. Gitun-an niya pag-ayo ug gipadapat ang iyang nakat-onan aron iyang ikatudlo ang Kasulatanhong panglantaw