ADONIAS
[Si Jehova Maoy Ginoo].
1. Ikaupat nga anak nga lalaki ni David, nga natawo kang Hagit didto sa Hebron.—2Sa 3:4, 5.
Bisag lain ug inahan, si Adonias maoy sama gayod kang Absalom sa ‘pagkaambongan’ ug sa iyang ambisyon. (1Ha 1:5, 6; itandi ang 2Sa 14:25; 15:1.) Nahimo siyang prominente sa rekord sa Bibliya sa katuigan nga nagkaluya na si David. Bisag gipahayag ni Jehova nga ang pagkahari maiya ni Solomon (1Cr 22:9, 10), si Adonias nanghambog nga siya ang mahimong sunod nga hari sa Israel. Sanglit si Amnon ug Absalom, ug lagmit si Kileab patay na, si Adonias sa walay duhaduha nangusog sa iyang pagpangangkon sa trono tungod kay siya ang kinamagulangan nga anak. Sama kang Absalom, gipasiatab niya ang iyang mga pangangkon ug wala tul-ira sa iyang amahan. Naugmad niya ang pagpaluyo sa katawhan pinaagi sa pagkabaton sa pabor sa pangulo sa kasundalohan nga si Joab ug sa pangulo sa mga saserdote nga si Abiatar. (1Ha 1:5-8) Dayon naghimo siyag kombira sa mga halad duol sa En-rogel nga duol ra sa siyudad sa Jerusalem, ug nagdapit sa kadaghanan sa harianong panimalay apan wala magdapit kang Solomon, kang Natan nga manalagna, ug kang Benaias. Ang iyang dayag nga katuyoan mao nga ideklarar siya ingong hari.—1Ha 1:9, 10, 25.
Milihok dayon si Natan nga manalagna aron masumpo ang laraw ni Adonias. Iyang gitambagan ang inahan ni Solomon nga si Bat-seba nga pahinumdoman si David sa iyang panumpa dapig sa pagkahari ni Solomon ug dayon miadto sunod kaniya didto sa lawak sa hari aron pamatud-an ang mga pulong ni Bat-seba ug nagpaalinggat kang David sa pagkaseryoso sa kahimtang, sa ingon usab, nagpasabot nga gibati niya nga si David milihok nga wala magpahibalo sa iyang suod nga mga kaubanan. (1Ha 1:11-27) Nagpalihok kini sa tigulang nga hari ug siya nagsugo dayon sa dihadihang pagdihog kang Solomon ingong kaubang magmamando ug manununod sa trono. Kining buhata nakapatunghag malipayong kaguliyang sa katawhan, nga nadungog didto sa bangkete ni Adonias. Wala madugay usa ka magdadagan, nga anak nga lalaki sa saserdoteng si Abiatar, ang miabot dala ang makapatugaw nga balita bahin sa pagproklamar ni David kang Solomon ingong hari. Ang mga tigpaluyo ni Adonias daling nagkatibuagsa ug siya mikalagiw aron modangop didto sa sawang sa tabernakulo. Human niana gipasaylo siya ni Solomon sa kondisyon nga siya magbinuotan.—1Ha 1:32-53.
Ugaling, human mamatay si David, giduol ni Adonias si Bat-seba ug gikombinsir siya nga mahimong iyang tigpataliwala sa atubangan ni Solomon sa paghangyo kaniya nga mahimo unta niyang asawa si Abisag, ang batan-ong tig-alima ug kauban ni David. Ang gipamulong ni Adonias nga “ang pagkahari naakoa unta, ug ngari kanako ang tibuok Israel nagpatumong sa ilang mga nawong aron ako mahimong hari” nagpasabot nga gibati niyang gihikawan siya sa iyang katungod, bisag giila niya nga ang Diyos maoy nagpalakaw sa maong butang. (1Ha 2:13-21) Bisag ang iyang hangyo tingali gipasukad lamang sa tinguha nga makadawat ug bayad tungod kay wala maiya ang gingharian, kini nagpasabot gayod nga ang kusganong ambisyon nagpadayon diha kang Adonias, sanglit maoy lagda sa karaang Sidlakan nga ang mga asawa ug mga puyopuyo sa usa ka hari maiya lamang sa iyang legal nga manununod. (Itandi ang 2Sa 3:7; 16:21.) Gilantaw ni Solomon nga ingon niana kining hangyoa nga gipaagi sa iyang inahan ug gisugo ang pagpatay kang Adonias, nga ang maong sugo gituman dayon ni Benaias.—1Ha 2:22-25.
2. Usa ka Levihanon nga gipadala ni Jehosapat sa pagtudlo diha sa mga siyudad sa Juda.—2Cr 17:7-9.
3. Usa sa “mga pangulo sa katawhan” kansang kaliwat, kon dili man siya mismo, miduyog sa pipila ka prinsipe ug mga Levihanon sa pagpamatuod pinaagig timbre sa kontrata sa pagsugid nga gihimo sa namalik nga mga Israelinhon sa mga adlaw ni Nehemias ug Esdras. (Neh 9:38; 10:1, 14, 16) Gituohan sa pipila nga siya mao ra ang Adonikam sa Esdras 2:13, kansang mga kaliwat, nga may gidaghanon nga 666, namalik gikan sa Babilonya ubos ni Zorobabel niadtong 537 W.K.P. Ang pagtandi sa mga ngalan niadtong kinsa ingong mga hawas sa katawhan nga nagtimbre sa resolusyon diha sa Nehemias 10 ug niadtong gitala ingong mga pangulo sa namalik nga mga destiyero diha sa Esdras 2 daw naglig-on niini.