AHASUERO

Ang ngalan o titulo nga gipadapat sa Hebreohanong Kasulatan ngadto sa tulo ka lainlaing magmamando.

1. Ang amahan ni Dario nga Medianhon nga gihisgotan sa Daniel 9:1. Sa pagkakaron dili posible ang paghimog tino nga paglangkit niini nga Ahasuero ngadto kang bisan kinsang tawo sa sekular nga kasaysayan.

2. Ang Ahasuero sa Esdras 4:​6, nga sa pagsugod sa iyang paghari dihay usa ka sumbong nga gisulat sa mga kaaway batok sa mga Hudiyo, lagmit mao si Cambyses, ang manununod ni Ciro nga nagsakop sa Babilonya ug nagluwas sa mga Hudiyo. Si Cambyses naghari sukad sa 529 hangtod sa 522 W.K.P.

3. Ang Ahasuero sa basahon ni Ester gituohan nga mao si Jerjes I, ang anak nga lalaki sa Persianhong hari nga si Dario nga Bantogan (Dario Hystaspis). Si Ahasuero (Jerjes I) gipakita nga nagmando sa 127 ka sakop nga mga distrito, gikan sa India ngadto sa Etiopia. Ang siyudad sa Susan maoy iyang kaulohan panahon sa dakong bahin sa iyang pagmando.​—Est 1:​1, 2.

Diha sa basahon ni Ester ang mga tuig sa paghari niining haria lagmit nga giihap sukad sa pagmando niya kauban sa iyang amahan nga si Dario nga Bantogan. Kini nagkahulogan nga ang tuig sa paglingkod sa trono ni Jerjes maoy 496 W.K.P. ug ang iyang unang tuig sa paghari maoy 495 W.K.P. (Tan-awa ang PERSIA, PERSIANHON.) Sa ikatulong tuig sa iyang paghari, diha sa usa ka maluho nga bangkete, siya nagsugo sa matahom nga si Rayna Vasti sa pag-atubang ug sa pagpakita sa iyang katahom ngadto sa katawhan ug sa mga prinsipe. Ang pagdumili ni Vasti nakapasinta sa kasuko ni Ahasuero, ug iyang gihinginlan siya ingong iyang asawa. (Est 1:​3, 10-12, 19-21) Sa ikapitong tuig sa iyang paghari iyang gipili si Ester, usa ka babayeng Hudiyo, ingong iyang pinili taliwala sa daghang ulay nga gidala ingong posibleng kapuli ni Vasti. (Est 2:​1-4, 16, 17) Sa ika-12 nga tuig sa iyang paghari gitugotan niya ang iyang primer ministro nga si Haman sa paggamit sa iyang singsing nga igtitimbre aron sa paglagda sa usa ka mando nga mosangpot sa pagpuo sa mga Hudiyo. Kini nga plano napakgang ni Ester ug sa iyang ig-agaw nga si Mardokeo, si Haman gibitay, ug usa ka bag-ong mando ang gipakanaog nga nagtugot sa mga Hudiyo sa katungod nga mosukol sa ilang mga kaaway.​—Est 3:​1-11; 7:​9, 10; 8:​3-14; 9:​5-10.

Human niadto, “si Haring Ahasuero nagpahamtang ug pinugos nga trabaho diha sa yuta ug sa kapuloan sa dagat.” (Est 10:1) Kini nga kalihokan haom kaayo sa mga gitinguha ni Jerjes, kinsa nagkompleto sa kadaghanan nga buluhatong pagpanukod nga gisugdan sa iyang amahan nga si Dario didto sa Persepolis.

Si Jerjes I lagmit nga mao usab ang “ikaupat [nga hari]” nga gihisgotan sa Daniel 11:​2, ang tulo nga nag-una mao si Ciro nga Bantogan, Cambyses II, ug Dario Hystaspis. Bisan tuod pito pa ka ubang mga hari ang mipuli kang Jerjes diha sa trono sa Persianhong Imperyo, si Jerjes mao ang kataposang Persianhong emperador nga nakiggubat sa Gresya, kansang pagsaka ingong dominanteng gahom sa kalibotan gihubit diha sa misunod dayon nga bersikulo.​—Dan 11:3.