JOB

[Tumong sa Pagdumot].

Usa ka tawo nga nagpuyo sa yuta sa Uz, sa gitawag karon ug Arabia. (Job 1:1) Ang Diyos nag-ingon bahin kang Job: “Walay usa nga sama kaniya sa yuta, usa ka tawo nga walay-ikasaway ug matul-id, mahadlokon sa Diyos ug naglikay sa daotan.” (Job 1:8) Kini nagpakita nga si Job nagpuyo sa Uz sa mga panahon nga ang iyang layo nga mga ig-agaw, ang 12 ka tribo sa Israel, naulipon didto sa yuta sa Ehipto. Niadtong tungora si Jose nga anak ni Jacob (Israel) namatay na (1657 W.K.P.) human siya makalahutay sa daghang dili-makataronganong pag-antos apan padayong naghupot sa iyang pagkawalay-ikasaway atubangan sa Diyos nga Jehova. Si Moises wala pa mahimong manalagna ni Jehova aron manguna sa pagpagawas sa 12 ka tribo sa Israel gikan sa pagkaulipon sa Ehipto. Tali sa pagkamatay ni Jose ug sa panahong gipasundayag ni Moises ang iyang pagkawalay-ikasaway ug katul-id pinaagi sa iyang panggawi, walay tawo nga naghupot ug integridad sama sa integridad ni Job. Lagmit niining panahona nga nagsultihanay si Jehova ug si Satanas maylabot kang Job.​—Job 1:6-12; 2:1-7.

Si Moises mao ang giila sa kadaghanan nga maoy misulat sa asoy sa mga kasinatian ni Job. Mahimong nahibaloan niya ang bahin kang Job sa dihang migugol siya ug 40 ka tuig sa Midian ug nakadungog sa kataposang sangpotanan ug sa kamatayon ni Job sa dihang ang Israel duol sa Uz sa hapit nang matapos ang ilang panaw sa kamingawan. Kon natapos ni Moises ang basahon ni Job sa mga panahon nga misulod ang Israel sa Yutang Saad niadtong 1473 W.K.P. (lagmit wala magdugay human mamatay si Job), nahitabo ang pagsulay kang Job niadtong mga 1613 W.K.P., kay si Job nabuhi pa ug 140 ka tuig human matapos ang iyang pagsulay.​—Job 42:​16, 17.

Si Job usa ka paryente ni Abraham, nga parehong mga kaliwat ni Sem. Bisag dili Israelinhon, si Job usa ka magsisimba ni Jehova. Siya mao “ang labing bantogan sa tanan nga taga-Sidlakan,” nga nakabaton ug daghang bahandi. Ang iyang pamilya gilangkoban sa iyang asawa, pito ka anak nga lalaki, ug tulo ka anak nga babaye. (Job 1:1-3) Siya tim-os nga nagtuman sa iyang mga katungdanan ingong saserdote sa iyang pamilya, nga nagtanyag ug mga halad sa Diyos alang kanila.​—Job 1:​4, 5.

Si Job maoy usa ka tawong tinamod diha sa ganghaan sa siyudad, bisan ang mga tigulang ug mga prinsipe nagtahod kaniya. (Job 29:5-11) Siya milingkod ingong usa ka dili mapihigon nga maghuhukom, nga nagpahamtang ug hustisya ingong manlalaban sa mga babayeng balo, ug sama sa usa ka amahan sa mga batang ilo-sa-amahan, sa mga sinakit, ug sa mga walay magtatabang. (Job 29:12-17) Siya naglikay nga dili mahugawan sa imoralidad, sa hakog nga materyalismo, ug sa idolatriya, ug mahinatagon siya sa mga kabos ug sa mga nanginahanglan.​—Job 31:9-28.

Integridad ni Job. Gihagit ni Satanas ang integridad ni Job kang Jehova. Unya si Jehova, nga misalig sa mao nga integridad ug nasayod sa Iyang kaugalingong katakos sa pagpasig-uli ug sa pagganti kang Job, nagtugot kang Satanas nga sulayan sa bug-os ang integridad ni Job, apan wala niya itugot nga patyon ni Satanas si Job. Bisan tuod si Satanas, pinaagi sa lainlaing mga paagi, nagpatay sa kahayopan ug sa mga alagad ni Job ug dayon sa iyang mga anak (Job 1:13-19), si Job wala gayod mag-akusar sa Diyos nga siya nagbuhat ug daotan o sayop. Ni siya mitalikod sa Diyos, bisag gipit-os siya sa iyang asawa ug sa uban. (Job 1:20-22; 2:​9, 10) Gisulti niya ang kamatuoran bahin sa Diyos. (Job 42:8) Gidawat niya ang pagbadlong tungod sa iyang sobrang paghunahuna nga ipahayag ang kaugalingon nga matarong ug tungod sa pagkapakyas sa pagbindikar sa Diyos (Job 32:2), ug gidawat niya ang iyang mga sala atubangan sa Diyos.​—Job 42:1-6.

Gihigugma ni Jehova si Job. Human nga nagmatinumanon si Job ilalom sa pagsulay, gihimo siya sa Diyos nga usa ka saserdote alang sa iyang tulo ka higala nga nakiglalis kaniya, ug gipasig-uli sa Diyos si Job sa iyang kanhing kahimtang. Siya nakabaton na usab ug maayong pamilya (dayag sa mao ra gihapon nga asawa) ug duha ka pilo nga bahandi kay sa iyang nabatonan kanhi. Ang tanan niyang paryente ug kanhing mga kauban mibalik sa pagtahod kaniya ug sa pagdalag mga gasa kaniya. (Job 42:7-15) Siya nabuhi pa nga nakakita sa iyang mga anak ug sa iyang mga apo hangtod sa upat ka kaliwatan.​—Job 42:16.

Pinaagi sa manalagnang si Ezequiel, ang Diyos naghisgot kang Job ingong panig-ingnan sa pagkamatarong. (Eze 14:​14, 20) Ang iyang mapailobong paglahutay taliwala sa pag-antos maoy usa ka sumbanan sa mga Kristohanon, ug ang iyang malipayong sangpotanan gihisgotan ingong nagpatugbaw sa pagmahal ug kaluoy ni Jehova. (San 5:11) Ang asoy sa iyang masulayong kasinatian mohatag ug dakong kahupayan ug kalig-on sa mga Kristohanon, ug daghang prinsipyo sa Bibliya ang gipasiugda ug gipatin-aw sa basahon nga nagdala sa iyang ngalan.